Hindi umano makakaapekto sa nagpatuloy na training ni Sen. Manny Pacquiao ang isyu tungkol sa breach of contract.

Ito ang pahayag ni Pacquiao matapos lumabas ang balita na may sinuway itong kontrata sa OD Promotions.

Sigurado umano ito na walang nangyaring breach sa kontrata dahil alam ito ng Team Garcia.

Bago umano ito pumirma ng kontrata inilagay umano sa unang linya ang mga salita na “All contract is valid ” kaya hindi umano makahabla ang Team Garcia sa kanya.

Dagdag pa nito na sinagot na umano ito ng kanyang legal team kaya dapat walang ikabahala.

Minaliit din nito ang nasabing isyu matapos sinabi na tutukan din ang usapin dahil hindi ito susuko.

Opisyal nang maglalaro sina 2021 US Women’s Open champion Yuka Saso at  Bianca Pagda­nga­nan sa Olympic Games sa Tokyo, Japan.

Pumuwesto si Saso sa No. 9 habang No. 42 si Pagdanganan sa listahan ng International Golf Fe­deration (IGF) para sa 60 women golfers na papalo sa Tokyo Olympics sa Hul­yo 23 hanggang Agosto 8.

Ang 20-anyos na si Saso at ang 23-anyos na si Pagdanganan ang ikalawa at ikatlong golfers na sasabak sa Tokyo Olympics kasama si Juvic Pagunsan na tumaas sa No. 49 sa men’s class.

Umakyat na sa 17 ang mga Pinoy qualifiers sa Tokyo Olympics na mas marami kumpara sa 13 lahok noong 2016 na idinaos sa Rio de Janeiro, Brazil kung saan inangkin ni weightlifter Hidilyn Diaz ang silver medal.

Bukod kina Saso, Pagdanganan, Pagunsan at Diaz, ang iba pang Olympic qualifiers ay sina weightlif­ter Elreen Ann Ando, skateboarder Margielyn Didal, pole vaulter Ernest John Obiena, gymnast Carlos Edriel Yulo, shooter Jayson Valdez, Fil-Am trackster Kristina Knott, taekwondo jin Kurt Barbosa, rower Cris Nievarez, Fil-Japanese judoka Kiyomi Watanabe at boxers Eumir Felix Marcial, Irish Magno, Nesthy Petecio at Carlo Paalam.

Si Miguel Tabuena ang huling golfer na naisalang ng bansa sa Olympics noong 2016 sa Rio de Janeiro.

Ang tatluhan nina Saso, Pagdanganan at Lois Kaye Go ang umangkin sa gold medal ng women’s team competition noong 2018 Asian Games sa Indonesia.

Kinuha rin ni Saso ang gintong medalya sa individual category.

Tinututukan sa ngayon ng kampo ni Sen. Manny Pacquiao na mas maging malakas pa ang stamina ng pinoy ring icon bilang preparasyon sa nakatakdang laban kay Errol Spence.

Ayon kay Pacquiao na dapat ma-develop rin ang kanyang head movements at footwork.

Dagdag pa nito na focus siya ngayon sa training dahil isang magaling rin na boksingero si Spence.

Napag-alaman na si Coach Buboy Fernandez ang kasama ni Pacquiao na nag-eensayo sa GenSan.

Una nito inihayag ni Fernandez na hindi dapat i-under-estimate si Spence dahil naghahanda rin sa laban.

Target ng Team Pacquiao na matamaan ng malakas na kamao si Spence sa unang mga rounds ng laban para maramdaman nito na kahit may edad na ang senador hindi basta basta pa rin na boksingero.

Balak ngayon ng mga otoridad na baguhin ang unang walong araw ng Olympic torch relay sa siyudad ng Tokyo dahil sa pangamba sa hawaan sa COVID-19.

Ayon sa mga organizers iiwas muna sila sa mga matataong lugar o public roads para makaiwas din sa super spreader events.

Inaasahan kasi na sa July 9 ay darating na ang traditional torch relay sa Tokyo at ipaparada ito sa mga sentrong lugar hanggang sa grand opening ng pinakalamaking sporting event sa buong mundo sa July 23.

Sa ngayon hindi pa tinukoy ng Olympic organizers ang mga lugar na dadaan ng Olympic torch relay sa Tokyo lalo na at ang host city ay nasa state of emergency pa hanggang July 11 dahil sa pangamba sa COVID surge.

Sa kabila ng kaliwa’t kanang injuries sa lineup, nananatiling mataas ang moral ng Gilas Pilipinas na haharap sa mga bigating tropa sa FIBA Olympic Qualifying Tournament na pormal nang lalarga nga­yong araw sa Belgrade, Serbia.

Posibleng hindi makalaro si Dwight Ramos na may iniindang groin injury habang napasama pa sa injury list ng Gilas Pilipinas si naturalized player Angelo Kouame na nananakit ang tuhod.

Nauna nang nagtamo ng injury si Carl Tamayo na nagtamo naman ng ankle sprain sa laban ng Gilas Pilipinas kontra Indonesia sa FIBA Asia Cup Qualifiers noong nakaraang linggo.

Aminado si Gilas Pilipinas head coach Tab Baldwin na malaking dagok ito sa koponan lalo pa’t hindi basta basta ang mga koponang makakalaban sa Olympic qualifiers.

“We’re banged up. There’s no question we came out in the third win­dow limping. Ange Kouame is nursing is a deep knee bruise, deep knee contusion that he got in the third window and he’s not at full speed,” ani Baldwin.

Sa kabila ng lahat, buhay na buhay ang dugo ng Gilas Pilipinas na excited nang makipagsabayan sa mga veteran players ng Serbia at Dominican Republic.

Bitbit ng Gilas Pilipinas ang pusong palaban na siyang mantra ng koponan sa kanilang mga international tournaments.