PINAG-UUSAPAN sa social media si Megastar Sharon Cuneta matapos ipasilip ang ilang eksena sa paparating niyang pelikula sa Agosto — at oo, ito na ata ang most daring role niya so far.

Sa kanyang Instagram posts nitong Linggo, ipinasilip ng 55-anyos ang ilang movie stills sa pelikula niyang Revirginized, kung saan binibigyan niya ng “body shot” ang 26-anyos na si Marco Gumabao.

“OMG I have NEVER done this in real life (I don’t drink Tequila or anything else with alcohol! Hahahahaha!),” wika ni Mega sa IG.

“Nahilo ako! Ganito pala itchura natin dun hahahahaha!”

Tumutukoy ang body shot sa pagkonsumo ng alak matapos dilaan ang asin sa katawan ng iba, bagay na sinusundan ng pagkain ng lime sa bibig ng nabanggit na tao.

Una nang sinabi ni Sharon sa kanyang vlog noong Abril na tungkol ang pelikula sa transpormasyong sa buhay ng isang malungkot na babae, bagay na mangyayari raw sa loob lang ng isang weekend.

“It’s nice. It’s a coming of age movie in many different contexts,” sabay tawa ng beteranang singer-actress.

“I’m very excited. Parang… I think I’ve earned the right after four decades to experiment and to do movies that are not really the kind of movies that my audience is used to seeing me in.”

Ngayong Agosto nga nakatakda itong ipalabas sa streaming platform na Vivamax ang naturang pelikula, na dinirek ng kontrobersyal na si Darryl Yap.  

Hindi maiiwasan na magkaroon ng varied reactions ang mga larawang inilabas ni Sharon sa kanyang IG account at maging ang role niya mismo sa pelikula.

Una nang nagpahayag nang pag-aalinlangan ang mga fans ni Sharon nang malaman na gagawa ito ng pelikula with Darryl Yap. Baka ma-shock raw sila sa kabuuan ng pelikula.

Pero bilang reaction sa mga fans niya, sinabi ni Sharon na bagamat daring ang Revirginized kumpara sa mga past movies niya, hindi naman daw dapat magkaroon ng violent reaction ang kanyang mga tagahanga.

Hindi naman daw dapat ma-shock ang kanyang mga fans, sabi pa ni Sharon. Sana raw ay panoorin muna ang pelikula bago mag-react.

Siyempre tiyak na uulanin ng batikos si Sharon ng kanyang mga bashers dahil sa pagtanggap niya ng Revirginized. May mga nagsasabi na agad na hindi bagay si Sharon sa role kaya ‘di niya ito dapat na tinanggap.

We love Sharon at maging kami ay nagulat sa kanyang desisyon. Pero we are willing to give her the benefit of the doubt.

Marahil nagandahan siya sa script ng Revirginized kaya nga ito tinanggap. Comeback project pa naman niya ito sa Viva kaya we trust na naniniwala siya na tama na ito ang maging handog niya to her fans sa pagbabalik niya sa Viva.

Tama rin naman ang sinabi ng Direk Darryl na bago husgahan ang pelikula ay panoorin muna ito.

Kaya pag napanood na namin ang Revirginized, kasama ang ibang fans ni Sharon, ay masasagot na ang aming tanong kung tama ba ang desisyon ni Mega na tanggapin ang pelikula.

***

NAKATUTUWANG malaman ang miyembro ng Gold Squad na sina Andrea Brillantes, Francine Diaz, Kyle Echarri at Seth Fedelin ay bukas ang mga mata sa mga nangyayari sa ating bansa.

Sa zoom conference ng Huwag Kang Mangamba ay nanawagan ang Gold Squad sa kanilang mga fans na magpa-rehistro at bumoto sa 2022 elections.

Ipinaalala rin ni Seth sa kanilang mga fans na huwag na huwag nila ibebenta ang kanilang mga boto.

“Huwag tayong tumanggap ng pera kapalit ng ating boto kasi hindi ito tama. At maging mapanuri tayo. Iboto natin kung sino ang tunay na nararapat na kandidato kasi nakasasalay sa ating boto ang kinabukasan nating lahat,” pahayag ni Seth.

Nagkakaisa ang Gold Squad na importante na bumoto ng tama, lalo na ang mga kabataan dahil sila ang direktang maapektuhan kung maling tao ang maluluklok sa pwesto sa gobyerno.

(RICKY CALDERON)

KINUKUMBINSI pa rin ni President Rodrigo Duterte na tumakbo si Willie Revillame sa darating na national elections.

Patuloy ang panliligaw ng Pangulo kay Kuya Wil na tumakbong Senador para mas marami pa siyang matulungang Filipino.

Naniniwala kasi si Pangulong Duterte sa kakayahan ng tv host na makapagserbisyo sa buong bansa dahil sa pagmamahal at malasakit niya madlang pipol, na kitang-kita naman sa ‘Tutok To Win’ ng Wowowin sa rami ng kanyang natutulungan.

Sa video message, sinabi ng Pangulo na susuportahan niya si Willie sakaling pumayag ito na tumakbong Senador sa 2022 Election.

“Willie, si mayor ‘to. Kumusta ka?,” panimula ng Presidente.

“Matagal na tayong ‘di nagkita pero palagi kitang naaalala dahil gusto ko sanang maging senador ka.

“Sabi ni Bong (Go) nagdadalawang-isip ka. Pero ganu’n pa man open ‘yung slot until the last minute.

“Kung ayaw mo na talaga eh, ‘di pwede na tayong mag-usap ulit.”

Sabi pa ni PDU30 sa huling bahagi ng video, “but in the meantime, more success sa programa mo. Bilib ako sa appeal mo sa masa. Mabuhay ka!”    

Wala pang sagot dito si Kuya Wil, pero karamihan sa netizens ay tutol na pasukin niya ang pulitika, mas okey daw na maging private citizen na lang na tahimik ang buhay, dahil marami pa rin naman siyang matutulungan kahit hindi siya maging Senador.

***

ANG pinakamalaki at pinakaprestihiyosong animation festival sa buong mundo, ang Annecy International Animation Film Festival sa France mula Hunyo 14 hanggang 19, ay may malakas na representasyon mula sa Pilipinas na may pinakamalaking delegasyon ng bansa na pinamumunuan ng Film Development Council of the Philippines (FDCP).

Kasama ang kauna-unahang competing film mula sa Pilipinas, apat na projects, at higit sa 50 na animation workers mula sa 29 na animation studios.

Ang Hayop Ka! The Nimfa Dimaano Story ni Avid Liongoren ay napili bilang kauna-unahang pelikulang Pilipino na kasama sa kompetisyon sa Annecy.

Ang unang Filipino Netflix animated film ay project ng First Cut Lab 2019 na isinagawa ng FDCP at Tatino Films. Ang pelikula ay tungkol sa pusang si Nimfa na naghahanap ng tunay na pag-ibig at kaligayahan at dapat pumili sa dalawang aso sa kaniyang buhay.

Sa Marché international du film d’animation d’Annecy (MIFA) o Annecy International Animation Film Market, tatlong Philippine projects, kasama ang projects mula sa Malaysia at Thailand, ay kasama sa ASEAN Pitch noong Hunyo 15.

Ang mga ito ay Ella Arcangel ni Mervin Malonzo, Kampilan ni Cris Dumlao, at Hayop Ka! Universe ni Manny Angeles.

Ang Ella Arcangel ay isang series tungkol sa isang batang babae mula sa slums ng Maynila na nakikipaglaban sa mga halimaw upang protektahan ang kaniyang komunidad, at malalaman niyang may mga bagay sa mundo na mas masahol pa kaysa sa mga halimaw.

Kampilan, na nakapag-pitch sa virtual na Kre8tif! Conference at Content Festival sa Malaysia noong 2020, ay pelikulang tungkol sa isang prinsipeng nahaharap sa isang paparating na banta.

Sa tulong ng kaniyang mga tapat na kaibigan, kailangan niyang gumawa ng paraan upang mailigtas ang tribo at mapanatili ang kanilang pamumuhay.

Tampok sa Hayop Ka! Universe ang spin-off at sequel ng Hayop Ka! The Nimfa Dimaano Story. Ang spin-off na series na Papa Jorge’s Bedtime Radio Confessions ay tungkol sa love doctor sa radyo na si Papa Jorge habang ang sequel na pelikulang The Jerry Action Bonanza: Hayop Ka Din! ay tungkol sa isang baguhang security guard sa museum na nakikipaglaban sa mga magnanakaw at goons ng kaniyang sariling amo.

Ibabahagi ni FDCP Chairperson at CEO Liza Diño ang film incentives programs ng pambansang ahensya ng pelikula sa ASEAN Pitch in MIFA, isang mahalagang kaganapan para sa co-production, purchasing, selling, financing, at distributing content para sa lahat ng broadcasting platforms na dinadaluhan ng 13,000 na industry professionals.      Pag-uusapan naman ni FilmPhilippines Incentives Unit Manager Mil Alcain ang Film Location Incentive Program (FLIP) at International Co-production Fund (ICOF).

Samantala, ang Rage Radio ni Mark Lenard Mendoza na produced ng Friendly Foes Studio ay bahagi ng Partners Pitches: Southeast Asia Focus @MIFA 2021 kasama ang projects mula sa Indonesia, Malaysia, Singapore, Thailand, at Vietnam.      Inorganisa ng French Embassy in Singapore at MIFA ang Southeast Asia Focus para bigyan ng pagkakataon ang emerging talents na makakuha ng funding, work collaborations, at co-production deals para sa kanilang projects.

Ang FDCP, na nagsagawa ng Open Call for Animation Projects, ang namumuno sa Philippine Delegation sa Annecy.

“Boosting the animation industry has been part of the FDCP’s priority programs since 2017. Through our participation in Annecy, we aim to expand the already thriving service sector of the animation industry and elevate the skills of animation workers through participation in various conferences and workshops in MIFA,” sabi ng FDCP Chairperson at CEO.

“We also seek to continue to support the global track of original Filipino Intellectual Property (IP) creations by giving them a platform to find industry partners in MIFA. Additionally, we wish to explore further the potential of the Filipino comics community by providing a space for them to promote their IPs in MIFA, especially with the recent success of ‘Trese’ in Netflix,” dagdag pa niya.

Kasapi rin sa MIFA ang record-breaking na bilang na higit sa 50 na Filipino animation workers mula sa 29 na kumpanya at organisasyon, na pinagtipun-tipon ng FDCP para ipamalas ang iba’t ibang sektor ng Philippine animation industry. Hindi lamang sa Manila galing ang animation workers dahil mayroon ding representatives mula sa Cordillera, Cebu, at Davao.

Ang Philippine delegates ay mula sa Animation Council Of The Philippines, Inc. (ACPI), Philippine Animation Workers Association (PAWA), SIKAP (Creative Content Creators Association of the Philippines), Animation Vertigo Asia, Inc., Amaya Films, Ateneo De Naga University – Digital Arts And Communication, Blissful Fun Animation, Inc., Clayshop Inc., De La Salle – College of Saint Benilde, Enigma Kai, Friendly Foes, IAcademy, Ikigai Animation Studio, Kampilan Productions, Kino Arts, at Komiket Inc.

Bahagi rin sa mga kalahok na kumpanya at organisasyon ang Luminait Pictures Inc., Meowsmouse, Toon City (Morph Animation Inc.), Puppeteer Animation Studios Inc., Rocketsheep Studio, Silver Media Group, Storykitchen Animation Studio, Studio Nonego, Teamapp, Inc., Toei Animation Philippines Inc. (TAPI), Top Peg Animation And Creative Studio, Inc., Twenty Manila, at VPF Creative Marketing Communications.

Magkakaroon ng access ang delegates sa MIFA database, virtual stands at pavilions, online meeting platforms, Matchmaking, Work in Progress, Masterclasses, Pitches, Partners Screenings, at Mifa Campus.

(ROHN ROMULO)