2021 June 03 Archive - People's Balita

Archive for June 3rd, 2021

‘Symbolic vaccine rollout’ ilulunsad sa A4 priority group sa June 7: Galvez

Posted on: June 3rd, 2021 by @peoplesbalita No Comments

Maglulunsad ng “symbolic vaccine rollout” ang pamahalaan sa June 7, Lunes, para sa ilang indibidwal na pasok sa A4 priority group.

Ito ang inamin ni vaccine czar Sec. Carlito Galvez Jr., kasabay ng inaasahang pagsisimula ng pagbabakuna sa hanay ng mga manggagawa ngayong buwan.

Bukod sa national government, maglulunsad din daw ng symbolic vaccine rollout ang ilang local government units para sa ilang frontline economic at government workers.

“Ito talaga yung inaantay ng mga LGUs considering that we have to protect our economic and government workers. Nakikita na ito ay humigit kumulang 12 million population and they are rearing and very eager to be vaccinated,” ani Galvez sa panayam ng ANC.

Gayunpaman, nilinaw ng opisyal na ang symbolic vaccine rollout sa Lunes, ay hindi pa hudyat ng opisyal na rollout ng mga bakuna sa A4 priority group.

Ayon sa opisyal, magsisimula lang ang maramihang pagbabakuna sa mga manggagawa kapag dumating na ang malaking bulto ng COVID-19 vaccines mula sa COVAX facility ngayong buwan.

Mayroon daw kasing 5-milyong doses ng bakuna na galing sa COVAX Facility ang dadating sa June 15, at 2-milyong doses ng Sinovac vaccine.

Noong nakaraang linggo nang aprubahan ng Inter-Agency Task Force ang mas malawak na coverage ng A4 priority group.

Kung saan pasok ang lahat ng manggagawa, maliban sa mga naka-work from home.

Pero paliwanag ni Galvez, dahil limitado pa rin ang supply ng bakuna sa bansa, ang magiging priority sa pagbabakuna ay ang mga A4 na edad 40-years old pataas.

“Nung nagkaroon kami ng meeting, napagkasunduan na dalawa (ang classification sa A4) 40 and up tapos 39 and below.”

Batay sa tala ng National Economic and Development Authority, aabot sa 35.5-milyong manggagawa ang sakop ng A4 priority group.

Pagbaril ng senglot na parak sa leeg ng 52-anyos na ale ‘hindi isolated case’ — DILG

Posted on: June 3rd, 2021 by @peoplesbalita No Comments

Maaaring mas madalas pa kaysa sa gustong aminin ng gobyerno ang mga nangyayaring karumal-dumal na pagpatay ng mga kawani ng Philippine National Police sa mga sibilyan, pag-amin ng Department of the Interior and Local Government.

Martes lang nang arestuhin si Police M/Sgt. Hensie Zinampan, na nakuhanan ng video nang patayin ang nakaalitang 52-anyos na si Lilybeth Valdez habang lango sa impluwensya ng alak.

“Kapag ka ganyang buhay ng tao ang pinag-uusapan, hindi pwedeng isolated. Ito’y nakuhanan lang ng video… Eh paano ‘yung mga hindi nakuhanan ng video?” wika ni Interior Undersecretary Martin Diño.

“Kaya siguro, tanggapin natin na talagang dapat dito, bantayan talaga nang husto itong ating kapulisan.”

Ang PNP ay isang ahensya na direktang nasa ilalim ng DILG.

Ilang araw pa lang nang patayin ng Valenzuela PNP ang 18-anyos na may kapansanang si Erwin Arnigo habang “nagsasagawa ng raid sa isang tupada” at pinararatangang nangtangkang mang-agaw ng baril, kahit ganyan ang testimonya ng ilan.

Nahahambing din ang pagpatay ni Zinampan sa viral video ng pagbaril ni Police SMSgt. Jonel Nuezca sa ulo nina Sonya Gregorio (52-anyos) at anak na si Frank Anthony Gregorio (25-anyos) matapos “makaalitan sa boga at right-of-way.” Kasama ni Nuezca ang anak na menor de edad nang patayin ang mag-ina.

Ayon naman kay dating Vice President Jejomar Binay sa report ng Rappler, malayo sa pagiging isolated ang kaso ni Zinampan, lalo na’t may “pattern ng abuso at murderous behavior” ang ilang kapulisan sa ngayon, bagay na parang palala raw nang palala.

“Policemen are not ordinary government workers. They are given guns to protect law-abiding citizens from criminals,” ani Binay sa isang tweet.

“Ang baril ay hindi dapat ginagamit upang pumatay ng inosenteng mamamayan. Dapat ang mga kriminal ang takot sa pulis, hindi ang taumbayan.”

Una nang sinabi ni PNP chief Police Gen. Guillermo Elazar na sasampahan na nila ng reklamong kriminal at administratibo si Zinampan.

Nauwi pa nga ito sa harapang pagkumpronta ng PNP chief sa suspek, hanggang sa pagduduruin, pagyuyugyugin at pagsisigawan si Zinampan.

“Humihingi po ako ng dispensa sa ating kababayan kung nadala tayo ng emosyon,” ani Eleazar kanina.

“Pero itong si Police Master Sergeant Hensie Zinampan ay hindi na karapat-dapat na manatili pa sa ating institusyon.”

‘Hindi lahat ng pulis ganyan’

Kahapon lang nang sabihin ni presidential spokesperson Harry Roque na “iilan lang sa PNP ang bugok” kumpara sa “libu-libong propesyunal na pulis.” Aniya, ang ginawa ni Zinampan ay “exemption to the rule.”

“Definitely that is not the rule. That is the exemption to the rule. Wala po tayong magagawa. Kahit na anong organization, may paisa-isang mga bugok,” ani Roque.

“Pero please, we have hundreds of thousands in the ranks of our policemen. And we hear of one or two cases of this nature… Hindi po totoo na malawakang maraming pulis [na ganito].”

Dahil sa insidente, trending #1 sa Twitter ang hastag na #PNPANGTERORISTA habang sinusulat ang balitang ito, na meron nang hindi bababa sa 80.4k tweets.

Matagal nang nababatikos ang PNP sa ilalim ni Pangulong Rodrigo Duterte sa gitna ng mga isyu sa madugong “war on drugs” at extrajudicial killings ng mga aktibista. (Daris Jose)

Mga atletang sasabak sa SEA Games pinayagan nang magsagawa ng bubble training

Posted on: June 3rd, 2021 by @peoplesbalita No Comments

Pinayagan na ng gobyerno ang pagsasagawa ng bubble training ng mga national athletes na sasabak sa Southeeast Asian Games (SEA Games).

Sa inilabas na joint administrative order ng Philippine Sports Commission, Department of Health at Games and Amusement Board, mayroong istriktong pagbabantay ang gobyerno sa mga magsasagawa ng training bubble.

Nataon na rin ang pag-apruba ng nasabing joint administrative order dahil sa nakahanda na rin ang mga sports facilities na nasa Baguio City.

Nakasaad din sa kautusan na pirmado ni PSC Chairman William Ramirez, GAB Chairman Baham Mitra at DOH Secretary Francisco Duque III na pinayagan ang mga contact at non-contact sports na magsanay sa mga lugar na nasa ilalim ng moderate at low-risk community quarantine classifications.

Mayroon ding nakatalagang health and safety officers para patuloy na mag-monitor sa mga health status ng lahat ng mga nasa loob ng training.

SINOVAC, isinama na ng WHO sa Emergency Use Listing

Posted on: June 3rd, 2021 by @peoplesbalita No Comments

MASAYANG ibinalita ng Malakanyang ang naging hakbang ng World Health Organization (WHO) na isama sa emergency use listing ang Sinovac.

Para kay Presidential Spokesperson Harry Roque, makatutulong aniya ang hakbang na ito ng WHO para mapalakas ang kumpiyansa sa bakuna.

“Nagagalak po ako sa balitang ‘yan dahil ‘yan po ay siguradong makakaboost ng kumpyansa sa bakuna dahil nadagdagan po yung mga institusyon na nagsabi na ligtas at epektibo ag Sinovac na pinakamaraming ginagamit natin sa Pilipinas,” ayon kay Sec. Roque.

Ngayon aniya ay hindi lamang ang Food and Drug Administration (FDA) ng Pilipinas ang nagsabi na ligats at epektibo ang Sinovac kundi pati na rin ang WHO dahil iyon ang ibig sabihin kapag nakasama sa emergency use list ng WHO ang isang bakuna.

Bukod dito, makatutulong din na mapalakas ang kumpiyansa sa mga mamamayan na hanggang ngayon ay nag-aalinlangan na magpabakuna laban sa Covid-19.

“Ay talaga namang makakatulong ito para maitaas ang kumpiyansa sa bakuna dahil ito po’y karagdagan assurance ng isang UN-agency na ligtas at epektibo ang Sinovac,” lahad ni Sec. Roque.

Sa ulat, kinumpirma ng WHO na isinama na nito ang Sinovac-CoronaVac COVID-19 vaccine para sa Emergency Use.

Magbibigay ito ng katiyakan sa mga bansa, funders, procuring agencies at mga komunidad na ang “it (Sinovac) meets international standards for safety, efficacy and manufacturing. The vaccine is produced by the Beijing-based pharmaceutical company Sinovac.”

“The world desperately needs multiple COVID-19 vaccines to address the huge access inequity across the globe,” ayon kay Dr Mariângela Simão, WHO Assistant-Director General for Access to Health Products.

“We urge manufacturers to participate in the COVAX Facility, share their knowhow and data and contribute to bringing the pandemic under control,” dagdag na pahayag nito.

Ang WHO’s Emergency Use Listing (EUL) ay isang prerequisite o paunang kinakailangan para sa COVAX Facility vaccine supply at international procurement.

Pinapayagan din nito ang mga bansa na bilisan ang sarili nilang regulatory approval para umangkat at mag-administer ng COVID-19 vaccines. (Daris Jose)

MTPB TRAFFIC ENFORCER NAKIPAGHABULAN SA MGA SNATCHER, 2 MENOR DE EDAD ARESTADO

Posted on: June 3rd, 2021 by @peoplesbalita No Comments

NAARESTO ng isang traffic enforcer ng Manila Traffic and Parking Bureau (MTPB) ang dalawang menor de edad na nang-agaw ng cellphone sa isang senior citizen na naglalakad sa Tondo, Maynila.

Hawak ngayon ng Manila Social Welafre and Development ang naarestong suspek na ang isa ay nasa edad 15 at ang isa ay nasa 14 anyos na kapwa residente ng Baseco Compound, Port Area sa Maynila makaraang agawan ng cellphone ang biktimang si Romansita Lira, 63, ng Maypajo, Caloocan City.

Sa ulat, dakong ala-1:00 kamakalawa ng hapon nang naganap ang insidente sa kanto ng Moriones at Juan Luna Sts., sa Tondo.

Sa inisyal na imbestigasyon, nagmamando ng traffic si Joel T. Santos, MTPB traffic enforcer, sa nasabing lugar ng pinangyarihan nang maaktuhan nito na nagsisisigaw at humihingi ng tulong ang biktima na senior citizen dahil inagaw ang kanyang cellphone.

Hinabol ni Santos ang dalawang lalaki na nang-agaw ng cellphone hanggang sa makarating sila sa Franco St., Tondo kung saan nakorner at nahuli ang mga suspek.

Dinala sa MPD-Station 7 ang mga naarestong suspek kung saan nadiskubre nila na kapwa mga menor de edad ang mga ito makaraang puntahan sila ng kanilang mga kaanak.

Narekober naman sa mga suspek ang cellphone at ibinalik ito sa biktima kung saan nagpahayag ito na hindi na magsasampa ng reklamo nang malaman na menor de edad ang mga ito. (GENE ADSUARA)

NAVOTAS, PSA SINIMULAN NA ANG PAGPAPATALA PARA SA NATIONAL ID

Posted on: June 3rd, 2021 by @peoplesbalita No Comments

SINIMULAN na nang Pamahalaang Lungsod ng Navotas, sa pakikipagtulungan sa Philippine Statistics Authority (PSA) ang pagpapatala ng biometric ng Navoteños sa Philippine Identification System (PhilSys).

“The national ID will give them not just proof of their identity, but will make it easier for Navoteños to avail of all social services and government benefits applicable to them,” ani Mayor Toby Tiangco.

Ilang mga residente ng Brgys. Bagumbayan South, Bangkulasi, North Bay Boulevard North (NBBN), San Roque, Sipac-Almacen, Tanza 2, Tangos North at South ang nakakumpleto nan g unang step sa national ID registration.

Nauna rito, nagsagawa ang mga tauhan ng PSA ng house-to-house interviews sa naturang mga barangay para sa demographic data collection kung saan ang mga residente na nakumpleto ang Step 1 ay sumasailalim na sa biometric enrollment.

Hinihikayat naman ang mga Navoteño na hindi na-interview ng PSA na magparehistro sa PhilSys online portal, sa sandaling ito ay magagamit para sa mga residente ng lungsod.

Sa Step 2, ang supporting documents ng nagparehistro ay ipapakita ang kanyang demographics para mai-encode, ang kanyang biometric ay makukuha at maitatala, at siya ay bibigyan ng isang transaction slip.

Magkakasabay na isasagawa ang registrations sa apat na venues sa lungsod kabilang ang Navotas City Hall mula May 31 – June 3; Brgy. NBBN Covered Court, June 1–August 10; Navotas City Library, June 3–December 30; at Brgy. Tanza 2 Multi-Purpose Hall, June 5–October 30.

Kapag available na ang National ID, ipapadala ito sa address ng nagparehistro at ipakita ang kanyang transaksyon slip at anumang patunay ng pagkakakilanlan upang makuha ang ID. (Richard Mesa)

COVID-19 vaccines protektahan vs ‘brownouts’ sa Luzon

Posted on: June 3rd, 2021 by @peoplesbalita No Comments

Nag-abiso na ang Department of Energy (DOE) sa ibang ahensya ng pamahalaan na gumawa ng kaukulang hakbang para maproteksyunan ang mga bakuna na nakaimbak sa mga ‘cold storage facilities’ dahil sa posibleng ‘rotational brownouts’ sa loob ng isang linggo o hanggang Hunyo 7.

“Dapat patuloy ‘yung coordination natin sa IATF sa ating mga opisyales — local and national officials — para masigurado na protektado ‘yung ating mga storage facilities for our vaccines,” ayon kay DOE Undersecretary William Fuentebella.

Iminungkahi nila na magkaroon ng ‘triple backup system’ para masolusyunan ang sitwasyon. Nakapaloob dito ang back-up na solusyon sa National Grid Corporation of the Philippines (NGCP), sa mga distribution utility at sa mismong lokasyon ng mga storage facilities.

Ito ay makaraang ilagay sa ‘yellow at red alert status’ ang Luzon grid. Ang ‘yellow status’ ay nangangahulugan na manipis ang suplay ng kuryente sa isang lugar habang ang ‘red alert’ ay maaaring magpatupad na ng ‘brownout’.

Ayon kay NGCP spokesperson Cynthia Alabanza, maaaring magtuluy-tuloy ito hanggang Hunyo 7 maliban tuwing Sabado at Linggo na mas mababa ang demand sa kuryente.

Kasalukuyang nasa 11,408 megawatts lamang umano ang nakahandang kapasidad na mas mababa sa 11,593 megawatts na kailangan sa ‘peak demand’.

Upang masolusyunan ito, maaaring magpatupad ang NGCP ng ‘manual load dropping (MLD)’ o ‘rotational brownout’ sa ilang bahagi ng Luzon.

Sinabi ni NGCP Luzon System head Beng Abadilla na inaasahan na babalik sa normal ang sitwasyon sa enerhiya sa Hunyo 8 dahil babalik na sa ‘online operation’ ang mga pangunahing planta na nag-emergency outage.

Umaasa ang DOE na tataas ang reserbang enerhiya ng bansa sa pagdating ng mga ulan at bagyo na magiging dahilan sa pagbaba sa demand sa kuryente ng publiko dulot ng paggamit ng mga air-conditioning units at electric fans. (Daris Jose)

DOTR: Mga nawalan ng trabaho na OFWs, drivers bibigyan ng trabaho

Posted on: June 3rd, 2021 by @peoplesbalita No Comments

Binibigyan ng pagkakataon ng Department of Transportation (DOTr) ang mga drivers, conductors at overseas Filipino workers (OFWs) na nawalan ng trabaho ngayon panahon ng pandemya ang magtrabaho sa mga proyekto ng pamahalaan tulad ng DOTr.

Nanawagan si DOTr Secretary Arthur Tugade sa mga nawalan ng trabaho ngayon pandemya tulad ng drivers, conductor at OFWs na mag apply sa transportation sector tulad ng DOTr.

“I want jobless OFWs and workers in the transportation sector to be hired by the DOTr projects,” wika ni Tugade.

Binigyan ni Tugade ng tagubilin ang mga kontraktor ng mga proyekto sa DOTr na bigyan muna ng pansin ang pagbibigay ng trabaho sa mga taong nawalan ng trabaho lalo na yoon mga qualified naman.

“If you know jeepney drivers and bus conductors who want to make a living, if they are qualified, we will give them jobs,” saad ni Tugade.

Isa sa mga proyekto ng DOTr ang nagbibigay ng pagkakataon sa mga nawalan ng trabaho ay ang North-South Commuter Railway (NSCR). Ito ay ang 148-kilometer proyekcto sa rail sector.

Ayon kay Tugade mayron 200 na dating OFWs ang nabigyan ng trabaho sa proyektong National Railways Clark Phase 1 na siyang unang bahagi ng NSCR.

Dagdag pa ni Tugade na may mahigit na 7,500 na mga mangagawa pa ang kanilang mabibigyan ng trabaho para sa ginagawang konstruksyon habang magkakaron pa ng karagdagang 2,000 na trabaho ang magiging kailangan kung ito ay tapos na.

Ang pandemya ay nakaapekto sa mga kinabubuhay ng mga nagtrarabaho sa transport sector dahil sa pinatutupad na travel restrictions at capacity limitations na pinaiiral ng pamahalaan upang hindi kumalat ang COVID 19.

Maraming mga kumpanya rin ang nagsara kung kayat nabawasan ang workforce habang ang iba naman industria ay tuluyan ng nagsara.

Ang North-South Commuter Railway (NSCR) Project o PNR Clark Phase 1 Project ay binigyan ng pondo mula sa Japan International Cooperation Agency (JICA). Ang proyektong ito ay ang 38-kilometer railway na magdudugtong sa Tutuban Station sa Manila papuntang Malolos, Bulacan. Nilagdaan ang kontrata noong November 2015.

Magkakaron ito ng sampung (10) stations simula sa lungsod ng Manila, Caloocan, Valenzuela, Meycauayan at Malolos at bayan ng Marilao, Bocaue, Balagtas at Guiguinto sa Bulacan.

Samantala, sa ilalim naman ng programang DOTr-Joyride, may mahigit na 500 drivers ang nabigyan ng trabaho bilang mga taxi bikers at Happy Move delivery riders. Sila ang mga drivers at conductors na nawalan din ng trabaho sa land transport sector. (LASACMAR)

Giit ni Sec. Roque: hindi lahat ng pulis ay bugok

Posted on: June 3rd, 2021 by @peoplesbalita No Comments

HINDI lahat ng pulis sa bansa ay “bugok”.

Ito ang binigyang diin ni Presidential Spokesperson Harry Roque matapos na maging viral online ang video na nagpapakita na may isang babae ang binaril ng pulis na ikinamatay nito.

Para kay Sec. Roque, nananatiling professional organization ang Philippine National Police (PNP).

Aniya pa, ang nasabing shooting na nagsasangkot sa pulis ay “isolated incident.”

“Definitely, that is not the rule. That is the exception to the rule. Wala po tayong magagawa. Kahit anong organization mayroong paisa-isang mga bugok at ito pong pangyayaring ito iyong naunang event…ito po iyong mga bugok,” ayon kay Sec. Roque.

“Pero … please, we have hundreds of thousands in the ranks of our policemen and we hear of one or two cases of this nature. Hindi po totoo na malawakang maraming bugok sa kapulisan,” dagdag na pahayag nito.

Iginiit ni Sec. Roque na ang kapulisan ay professionals matapos na sanayin bilang tagapagpatupad ng batas subalit kailangan din nilang i- observe ang batas.

“We have respect for the professionalism of our policemen. And yes, I confirm these are exceptions to the rule that our policemen are by and large professionals,” anito.

Sa ulat, patay ang 52 anyos na lola na si Lilybeth Valdez matapos barilin ng lasing na pulis sa Sitio Ruby, Barangay Greater Fairview, Quezon City nitong Lunes.

Kinilala ang pulis na si Police Master Sgt. Hensie Zinampan ng Police Security and Protection Group. Nakuhanan ng video ang pamamaril.

Pasado alas-9 ng gabi nang bumili ng sigarilyo ang biktima sa isang tindahan sa labas ng kanilang bahay.

Sinundan siya ng pulis at kitang-kitang itinatago ng pulis ang baril sa kanyang likuran. Ikinasa niya ito at saka sinabunutan ang lola.

“Nung pagkasabunot po kay ante Susan sabi po, ‘sir wag niyo naman po ako sabunutan’…Pagkasabunot kay ante sa buhok binaril po kaagad siya,” ani Joanne Luceño, kaanak ng biktima at nakakita sa insidente.

Kita sa video na may mga bata sa paligid nang mangyari ito. Hindi naka-duty si Zinampan nang barilin niya ang biktima.

Ayon sa anak ng biktima na si Beverly Luceño, dati nang nagkaalitan ang pulis at ang biktima.

Noong May 1, nagkasuntukan umano ang pulis at ang asawa at anak ng biktima. Pinagbantaan na rin daw ng pulis ang biktima.

Agad inireport sa pulisya ang insidente kaya inaresto ang suspek.

Sa panayam ng media, itinanggi pa ng suspek na siya ang pumatay sa lola, kahit na kitang kita sa video ang pagpatay.

Narekober ng mga awtoridad ang baril na ginamit.

Hawak na ng Quezon City Police District ang suspek na nakatakdang kasuhan ng murder.

Noong Disyembre 2020, kasagsagan ng isyu ng pamamaril ni Jonel Nuezca sa mag-inang Gregorio, nagpost sa Facebook ang suspek na hindi lahat ng pulis ay masama at isa aniya siya sa mabubuting pulis. (Daris Jose)