TINIYAK ng Malakanyang na hindi babawiin o ili-lift ng Pilipinas ang overseas deployment ban sa mga healthcare workers sa hinaharap dahil sa COVID-19 pandemic.
Ayon kay presidential spokesperson Harry Roque, ang deployment ban ay mananatili sa kabila ng pagsalungat ni Foreign Affairs Secretary Teodoro Locsin Jr., na nakipagtalo na ang pagbabawal sa mga doktor, nurse at iba pang medical professionals mula sa pagta-trabaho sa ibang bansa ay unconstitutional.
Sinabi pa ni Sec. Roque na ipinatupad ni Pangulong Rodrigo Roa Duterte ang deployment ban para protektahan ang kalusugan at buhay ng mga Filipino healthcare workers at paigtingin ang medical manpower ng bansa sa gitna ng pandemiya.
“Napag-usapan po ‘yan sa IATF [ Inter-Agency Task Force for the Management of Emerging Infectious Diseases] and we all concurred with the opinion of the President except for Secretary Locsin,” ayon kay Sec. Roque.
“The President encourages free thought even among Cabinet secretaries especially on matters that do not fall within their primary jurisdiction,” dagdag na pahayag ni Sec. Roque.
At nang tanungin kung darating ang panahon na ili-lift ng bansa ang travel restrictions sa medical professionals ay sinabi ni Sec. Roque : “Wala po siguro.”
Noong nakaraang linggo, hinikayat ni Sec. Roque ang mga health workers na gumawa muna ng karanasan sa bansa sa pamamagitan ng paga-apply para sa posisyon sa ilalim ng COVID-19 emergency hiring program ng pamahalaan.
“And by equipping/acquiring themselves with the skills and competence their profession entails, they have not only helped our people during this time of global health emergency crisis, but they, too, would have been provided the work experience that would open doors for opportunities for overseas employment,” ang pahayag ni Sec. Roque.
Tanging ang mga healthcare employees na mayroong government-issued overseas employment certificates (OEC) at verified work contracts ‘as of March 8, 2020’ ay exempted mula sa pansamantalang deployment ban sa medical at allied health workers.
Exempted din sa ban ang mga nagbabakasyon lamang na health workers na may existing job contracts sa ibang bansa. (Daris Jose)
