UMAPELA si Solid North Party-list Rep. Ching Bernos sa mga state universities and colleges na buksan sa publiko ang kanilang mga library kasabay na rin sa komemorasyon ng Library and Information Services Month ngayong November.

“Libraries are a key partner in helping us overcome our current learning crisis. In this regard, I hope that our SUCs will extend a helping hand to our communities to promote a culture of lifelong learning among our people,” ani Bernos, miyembro ng House committee on higher and technical education.

Sinabi ng mambabatas na malaki ang papel ng mga libraries sa paglalaan ng libreng access sa learning resources at technology.

Idinagdag nito na nakakatulong din ito bilang physical at digital repositories sa pagpreserba sa cultural heritage ng bansa.

“Our libraries hold vital assets not only for technical knowledge, but also for learning about our local history, collective memory, and identity as a community. These can be valuable and beneficial to every Filipino, and emphasizes why we must have more libraries that everyone can access.” ani Bernos.

Isinuwestiyon ni Bernos na magsagawa ang SUCs library-centered activities sa mga komunidad upang ma-engganhyo ang publiko na magbasa at gumamit ng library materials.

“Halimbawa, baka maaaring magsagawa ang mga estudyanteng may on-the-job training ng mga reading clinics, library tours, at iba pang makabuluhang gawain para sa mga nakababatang myembro ng komunidad at sa iba pang interesadong magbasa,” pagtatapos ni Bernos. (VINA de GUZMAN)

SISIMULAN ng kampo ni Vice President Sara Duterte sa Lunes ang pagharap sa mga ebidensiyang iniharap ng prosekusyon ng Kamara kaugnay ng umano’y P818 milyong hindi maipaliwanag na yaman at mga kuwestiyonableng ari-arian na iniuugnay sa kanya at sa kanyang pamilya.

Tinapos na ng prosekusyon ang presentasyon ng mga ebidensiya, kabilang ang mga titulo ng lupa, rekord sa bangko, dokumento sa buwis at forensic report. Ayon kay forensic accounting expert Alexander Cabrera, umaabot sa P817.87 milyon ang umano’y hindi ­naideklarang yaman mula 2022 hanggang 2025, at maaari pa umanong lumampas sa P1.5 bilyon bago ibawas ang mga pananagutan.

Kabilang sa mga isyung inaasahang sasagutin ng depensa ang mga ari-ariang nakapa­ngalan umano sa asawa ni Duterte na si Manases Carpio na hindi umano naisama sa SALN, gayundin ang mga mansiyong may swimming pool, helipad at pribadong kalsada na natukoy ng National Bureau of Investigation (NBI).

Iginiit naman ni Duterte na hindi niya pag-aari ang ilan sa mga ari-ariang tinukoy ng NBI, habang sinabi ng kanyang mga abogado na naideklara sa kanyang SALN ang mga ari-ariang may kaukulang titulo.

Bukod dito, inilahad din ng prosekusyon ang umano’y mahigit P424 milyong transaksiyong pinansiyal, kabilang ang isang P41 milyong cash withdrawal sa loob ng 73 minuto noong Agosto 2024, na isa rin sa mga inaasahang tutugunan ng depensa.

Ayon kay Ridon, nararapat na magharap ang depensa ng mga testigong may kakayahang sumagot at magpabulaan sa mga ebidensiya ng prosekusyon sa halip na basta kuwestiyunin lamang ang paraan ng paglalahad ng mga ito.

“Kaya nga ang sinasabi natin, kailangan ho witnesses, hindi weaknesses ’yung pong isasalang po ng depensa sa darating pong mga araw,” ani Ridon.

Tanging ang Article II na may kinalaman sa umano’y unexplained wealth ang natitirang batayan ng impeachment case laban kay Duterte matapos bawiin ng prosekusyon ang iba pang mga artikulo. Nakatakdang magsimula ang presentasyon ng depensa alas-10 ng umaga ngayong Lunes. Nakatakda ring magpatuloy ang mga pagdinig hanggang Nobyembre 23. 

( VINA de GUZMAN)

LUNGSOD NG CALAMBA — Paunang 2,000 mag-aaral na Calambeño mula sa Batch 1, 2, at 3 ang nakatanggap ng scholarship assistance sa ilalim ng programang “Iskolar ni Rizal” sa ginanap na pamamahagi kahapon, Nobyembre 5, 2026, sa Calamba Coliseum.

Ang naturang kaganapan ay pinangunahan ni Mayor Roseller “Ross” Rizal bilang bahagi ng patuloy na adbokasiya at prayoridad ng lokal na pamahalaan sa pagtataguyod ng edukasyon para sa mga kabataan sa lungsod.

Ayon kay Mayor Rizal, ang pamumuhunan sa edukasyon ng mga kabataan ay itinuturing na pinakamahalagang hakbang upang matiyak ang mas maliwanag at maunlad na kinabukasan ng buong Lungsod ng Calamba.

Nakatulong ang ibinigay na tulong-pinansyal upang maibsan ang mga gastusin sa pag-aaral ng mga benepisyaryo ng unang tatlong batch at ng kanilang mga pamilya.

Inaasahan naman na mas marami pang kwalipikadong estudyante sa Calamba ang makatatanggap ng kaparehong suporta sa mga susunod na batch ng pamamahagi sa ilalim ng nasabing programa.

(Yvonne Bagang/ Kim Bornella/ Jeremiah Solomon/ Photos Boy Morales)

NAGWAKAS na ang pagtatago ng isang lolo na most wanted sa Valenzuela City nang matunton ng sa pinagtataguang lugar sa isang bayan sa Sorsogon noong Sabado ng umaga.

Sumugod sa lalawigan ng Sorsogon ang mga tauhan ni Northern Police District (NPD) Director P/BGen. Benliner Capili nang makatanggap ng impormasyon na doon nagkakanlong ang 62-anyos na lolo na nahatulan na sa kasong may kaugnayan sa ilegal na droga sa Valenzuela City.

Katuwang ang mga tauhan ng Barcelona Municipal Police Station at San Manuel Municipal Police Station sa Sorsogon, inaresto ang akusado dakong alas-10:10 ng umaga sa Brgy. Poblacion Sur, sa Bayan ng Barcolona.

Bitbit ng mga operatiba ng Station Intelligence Section at Warrant and Subpoena Section ng Valenzuela Police Station ang arrest warrant na inilabas ng Regional Trial Court (RTC) Branch 284 ng Valenzuela laban sa akusado para sa kasong paglabag sa Section 12 ng R.A. 9165 o ang Comprehensive Dangerous Drugs Act of 2002 na may kalakip na service of sentence.

Nagpaabot naman ng papuri ni National Capital Region Police Office (NCRPO) Officer-in-Charge P/BGen. Christopher Abrahano sa NPD at Valenzuela police sa masigasig na pagtugis sa akusado na pansamantalang nakadetine sa Barcelona Municipal Police Station habang pinoproseso pa ang pagbiyahe sa kanya sa Valenzuela City. (Richard Mesa)

UMABOT sa mahigit P.4 milyong halaga ng shabu ang nasamsam sa dalawang tulak ng droga kabilang ang 43-anyos na housewife nang maaresto ng pulisya sa buy bust operation sa Caloocan City.

Ikinasa ng mga tauhan ni Northern Police District (NPD) Director P/BGen. Benliner Capili ang buy bust operation laban sa 47-anyos na delivery worker at 43-anyos na housewife kasunod ng natanggap na impormasyon hinggil sa umano’y illegal drug activities ng mga ito.

Dakong alas-12:10 ng hating gabi nang maaresto ang mga suspek ng mga operatiba ng NPD District Drug Enforcement Unit (DDEU) sa Brgy., 188 nang bintahan umano ng shabu ang isang pulis na nagpanggap na buyer.

Nakumpiska sa kanila ang humigi’t kumulang 62.4 grams ng hinihinalang shabu na nagkakahalaga ng P424,320 at buy bust money.

Sinampahan ng pulisya ang mga suspek ng kasong paglabag sa R.A 9165 o ang Comprehensive Dangerous Drug Act of 2002 sa Caloocan City Prosecutor’s office. (Richard Mesa)

MATAPOS tanggapin ng Senate impeachment court sa mga pangunahing ebidensiya, walang nakikita ang House prosecution na dahilan para ma-delay ang pagdinig at nangakong hahadlangan ang anumang hakbang para mapahaba ang trial ni Vice President Sara Z. Duterte.

Sinabi ni House prosecution legal spokesperson at private prosecutor Benjamin “Jay” Tolosa Jr. na hahadlangan ng prosecutors ang mga hindi kinakailangang delay sa pagsisimula ng depensa sa presentasyon ng ebidensiya sa Lunes, Nov. 9.

Nagbabala si Tolosa na sa posibleng pagkakaantala sa kung igigiit ng depensa na magpresenta ng ebidensiya sa tatlong iniatras na impeachment charges o iginiit ang pagkakaroon ng buong 30 trial days na orihinal na nakalaan sa apat na articles.

“Dahil napakaliwanag naman, kung magpe-presenta pa sila ng ebidensya para doon, it will not serve any legitimate purpose. So kung magpe-presenta pa sila ng ebidensya paukol doon sa articles that were already dropped, malinaw ang magiging effect lang niyan is to cause delay in this case,” aniya.

Una nang binawi ng House prosecution ang tatlong impeachment articles na kinabibilangan ng confidential funds, grave threats at bribery itong Oktubre, kung saan tanging Article II, ukol sa alegasyon ng unexplained wealth ang naiwan.

Sinabi pa ni Tolosa na hindi na kailangan ng depensa ang 30 trial days na orihinal na inilaan para sa apat na alegasyon.

“So kami ho, inaasahan namin reasonable na kung binigyan sila ng 30 days to present evidence for four articles, reasonable that this should be accordingly decreased now, considering isa na lang,” ani Tolosa.

Tinukoy na ng depensa ang initial batch ng 24 prospective witnesses at inaasahan na magsusumite pa ito ng karagdagang pangalan. (VINA de GUZMAN)