WINASAK ng Bureau of Customs Manila International Container Port (BOC-MICP) ang limang container ng smuggled na sigarilyo at tuyong dahon ng tabako na nagkakahalaga ng P179.03 milyon sa Porac, Pampanga.

Isinagawa ang destruction activity mula Setyembre 30 hanggang Oktubre 2, 2026. Kabilang sa mga winasak ang apat na container ng sigarilyo at ang isang container ng dried tobacco.

Kinumpiska ang mga produkto matapos ang inspeksiyon noong Oktubre 8, dahil sa mga paglabag sa Graphic Health Warnings Law, TRAIN Law, at Customs Modernization and Tariff Act (CMTA).

Ayon kay Customs Commissioner Ariel F. Nepomuceno, mahalagang matiyak na hindi na makababalik sa merkado ang mga kontrabando upang maprotektahan ang kalusugan ng publiko, kita ng pamahalaan, at mga lehitimong negosyo.

Samantala, binigyang-diin ni MICP District Collector Atty. Felipe Geoffrey K. De Vera IV ang kahalagahan ng pagsunod sa mga legal na proseso sa pagsira sa mga nakumpiskang produkto. ( DARIS JOSE)

NANAWAGAN si Senate President Sherwin Gatchalian sa mga awtoridad na tiyaking ligtas at maayos ang pagsasagawa ng pag-aresto kay Sen. Ronald “Bato” dela Rosa upang maiwasan ang karahasan at posibleng pagkasawi ng mga sibilyan at operatiba.

Sa isang panayam, sinabi ni Gatchalian na mahalagang matiyak ang kaligtasan kapwa ni Dela Rosa at ng mga law enforcer na magsasagawa ng operasyon, dahil mapanganib ang ganitong uri ng pagpapatupad ng batas.

Binigyang-diin niya na dapat maging maayos ang pag-aresto, lalo na matapos ang mga pahayag ng Department of the Interior and Local Government (DILG) na posibleng humantong sa karahasan ang operasyon.

Nauna nang sinabi ni Interior Secretary Jonvic Remulla na maaaring umabot sa 10,000 ang mamatay kung sapilitang aarestuhin si Dela Rosa. Dahil dito, ayon kay Remulla, nakikipagnegosasyon ang pamahalaan upang mahikayat ang senador na sumuko.

Gayunman, iginiit ni Gatchalian na dapat panindigan ng gobyerno ang awtoridad nito sa harap ng ulat na may armadong grupong umano’y kumakalinga kay Dela Rosa.

Nauna nang sinabi ng Senate President na hindi dapat nakikipagnegosasyon ang pamahalaan sa mga armadong grupong walang awtorisasyong humawak ng armas, lalo na kung kabilang ang mga ito sa mga grupong kriminal o terorista.

Aniya, maaaring magmukhang mahina ang gobyerno kung makikipagnegosasyon ito sa mga grupong dapat sana ay nasa ilalim ng batas. ( DARIS JOSE)

ISINELDA ang 47-anyos na senglot na kelot nang undayan ng sunod-sunod na saksak ang isa sa mga kainumang kapitbahay matapos mapikon sa kanilang pagtatalo sa Malabon City, kamakalawa ng gabi.

Sa imbestigasyon nina PMSg Michael Oben at P/SSg Bengie Nalogoc ng Investigation Section ng Malabon police, nangyari ang insidente sa Talabahan St. Brgy Baritan alas-11:40 ng gabi habang nag-iinuman ang magkakapitbahay.

Nagatalo umano ang biktimang si alyas Rommel, 43, at alyas Bayot nang hindi magkaintindihan na dahilan upang mapikon ang suspek at inundayan ng magkakasunod na saksak ang biktima na nagawa namang makailag.

Nagsumbong ang biktima sa mga tauhan ni Malabon police chief P/Col. Kenneth Mission na nagresulta sa pagkakadakip kay “Bayot” at pagkakakumpiska sa kalawanging patalim na ginamit sa pananaksak sa kapitbahay.

Mahaharap sa reklamong attempted homicide ang suspek sa Malabon City Prosecutor’s Office. (Richard Mesa)

BILANG paghahanda sa paggunita ng Undas, personal na nag-inspeksyon si Mayor Along Malapitan sa Tala at Bagbaguin Cemetery kasama ang mga kawani mula sa iba’t ibang tanggapan at ahensya, upang kaagad na masolusyunan ang mga kailangang ayusin.

Ani Mayor Along, tinututukan nila ang pag-aaspalto sa mga daanan, gayundin ang paglilinis, pagpipintura, flushing operation sa mga kalsada, at pangkabuuang kahandaan ng mga sementeryo para sa mas ligtas at payapang pagbisita ng mga mamayan sa kanilang namayapang mahal sa buhay.

“Hinihikayat ko po ang lahat na makiisa sa ating lokal na pamahalaan at sundin ang opisyal na Gabay sa Undas na inilunsad natin. Basahin ang mga mahalagang paalaala sa official facebook page ng Caloocan City Government https://www.facebook.com/share/p/1CAG67YoqQ/.

Pinasalamatan din niya ang mga katuwang na tanggapan at ahensya upang sulubungin at mairaos nang maayos ang Undas 2026. (Richard Mesa)

PORMAL nang binuksan sa publiko ang proyektong pang-imprastraktura ng lokal na pamahalaan, ang Caloocan City Columbarium and Crematorium na matatagpuan sa Sunflower Street, Tala, Barangay 178 at Barangay 187, kasunod ng pagpapasinaya nito sa pangunguna ni Mayor Dale Gonzalo “Along” Malapitan at Congressman Oscar “Oca” Malapitan.

Layon ng pasilidad na ito na mabigyan ang mga residente ng disente at maayos na serbisyo sa pag-alaala sa kanilang mga yumaong mahal sa buhay. 

Ang nasabing pasilidad ay kabilang sa mga prayoridad na proyektong pang-imprastraktura ni Mayor Along. Sinimulan ang konstruksyon nito sa mga unang taon ng kanyang panunungkulan bilang alkalde. 

Bukod sa cremation services at vault rentals, ang pasilidad ay mayroon ding urn storage, apat na funeral halls, lawn crypt, chapel, indoor at outdoor cinerarium upang makapagbigay sa mga mamamayan ng iba’t ibang pagpipilian para sa marangal na pag-alaala sa kanilang namayapang mga mahal sa buhay. 

“Lagi pong prayoridad ng ating pamahalaang lungsod ang pangangalaga sa kapakanan ng mga Batang Kankaloo. Gusto po nating bawasan ang kanilang alalahanin, lalo na sa panahon ng pagdadalamhati, sa pamamagitan ng pagbibigay ng abot-kayang mga serbisyo para sa kanilang mga namayapang mahal sa buhay,” ani Mayor Along. 

“Makakaasa ang ating mga kababayan na katuwang po ninyo kami sa lokal na pamahalaan sa bawat yugto ng buhay,” dagdag ng alkalde. (Richard Mesa)