GUMAGAWA ang Department of Transportation (DOTr) at Light Rail Transit Authority (LRTA) ng mga hakbang upang makalikom ng pondo at makabili ng karagdagang trainsets para sa LRT-2. Pero dahil inaasahang aabutin ng tatlong taon o higit pa bago dumating ang mga bagong tren, naghahanap ang DOTR ng mga alternatibong paraan para umayos ang sitwasyon at mabawasan ang pila ng mga pasahero sa istasyon.

Ito’y alinsunod sa utos ng Pangulo na tiyaking maayos, ligtas at tuloy-tuloy pa rin ang biyahe ng mga pasahero.

Sa ngayon, walong tren lamang ang naka-deploy dahil ang isang bagon ay sumasailalim sa Train Operating Control Panel upgrade habang ang isa naman ay kinukumpuni pa rin. Kasabay nito, patuloy ang pagdami ng bilang ng mga pasaherong sumasakay sa LRT-2.

Bilang agarang solusyon at habang hinihintay ang pondong magagamit sa pagbili ng mga bagong tren, ipinag-utos ni Transportation Secretary Banoy Lopez sa Land Transportation Franchising and Regulatory Board (LTFRB) at LRTA na pag-aralan ang pag-iisyu ng special permits sa mga Public Utility Buses (PUBs) para mabigyan ng alternatibong masasakyan ang mga pasahero.

“Patuloy po ang paghahanap namin ng pondo para sa kailangang dagdag na tren para sa LRT-2. Kailangan na rin pong ma-upgrade ang iba nating tren. Pero habang ina-ayos po natin ito, naghahanap po tayo ng ibang paraan para maibsan ang pila sa mga istasyon at matulungan ang ating mga komyuter. Inatasan po natin ang LTFRB at LRTA na mag-coordinate para sa panukalang pag-i-isyu ng special permits sa mga bus nang sa gayo’y may alternatibong masakyan ang ating mga pasahero habang tinutugunan natin ang kakulangan sa bilang ng tren,” ani Sec. Lopez.

Inutusan ng Kalihim ang LTFRB at LRTA na tingnan at pag-aralan ang pag-i-isyu ng special permits sa mga bus na bibyahe sa ruta ng LRT-2 mula Antipolo Station hanggang Recto Station at pabalik, na may designated stopping points sa mga istasyon ng LRT-2. 

Pag-aaralan din sa naturang panukala na PUB service ang operational arrangements, pagsunod pa rin sa mga umiiral na franchising at regulatory requirements, at ang halaga ng pamasahe na sisingilin sa mga pasahero.

Layunin ng inisyatibong ito na magbigay ng alternatibong masasakyan ang mga komyuter at mabawasan ang siksikan sa mga istasyon ng LRT-2, lalo na tuwing peak hours. (PAUL JOHN REYES)

SIX years ang termino ng Presidente at Bise Presidente. Malinaw ito sa Saligang Batas

(Art 7 sec. 4).

Para magkaroon ng amendment o revision sa Konstitusyon, dapat proposed ng Kongreso upon a vote of three fourths of all its members o kaya constitutional convention. Pero kailangan din ma-ratify ng majority of the votes cast sa isang plebiscite. ( Art. XVII)

So mahirap para sa mga nais ng no election at extension of term ng Presidente para makapag BENDA LAW?

Pero may SHORT CUT pala?

At BATAS lang ang kailangan para magawa ng mga BENDA LAW legislators na ma extend ang termino ng Presidente TULAD NG GINAWA NILA SA BARANGAY AT SK OFFICIALS.

Kongreso ang taga balangkas ng batas. Kaya pag sa Konstitusyon may nakalagay AS PROVIDED FOR BY LAW — Ibig sabihin ay as provided ng batas na ginawa ng kongreso at pinirmahan ng presidente. 

Ito :yun mga constitutional provisions na non executory without an implementing law.

So nasan yun SHORT CUT?

Art VII sec. 4 third paragraph:

UNLESS OTHERWISE PROVIDED BY LAW, the regular election for President and Vice President shall be held on the second Monday of May.

Ang susunod na presidential elections ay sa MAY 8, 2028. PERO pag nag BENDA LAW ang mga Congressmen AT GUMAWA NG BATAS PARA MABAGO ANG DATE NG ELECTION TULAD NG GINAWA SA BSKE AT PINIRMAHAN NG PRESIDENTE RESULTA – NO ELECTIONS.

Pero ma extend ang term nila beyond six years? 

SABI NGA NG SOLICITOR GENERAL INCIDENTAL LANG YUN SA FIXING THE TERM . So incidental lang sa pagbago ng date ng election.

Magagawa ba nila ito? Kung hahayaan ng taong bayan ay mangyayari ito.

Pipirmahan kaya ni BBM?

Pero makakasama sa extension ang Vice President?

Convict muna si VP SARA pumalit ang iba at tuloy ang ligaya.

Pag-acquitted si VP SARA , idemanda ng plunder ipakulong at kahit bise pa siya ay PRESIDENTE PA RIN SI BBM.

Pero ang mas delikado ay maari ng gawin yan sa mga susunod na panahon lalo na mga BENDA LAW ang mga nasa Kongreso. ( ATTY. ARIEL INTON)

ISINAPUBLIKO na ng Quiapo Church sa kanilang Facebook page ang magiging opisyal na logo para sa Pista ng Itim na Poong Nazareno sa Enero 2027.

May temang “Tuwirin Ninyo ang daraanan ng Panginoon,” na base sa Juan 1:23 ng banal na Bibliya, makikita sa opisyal na logo ang Itim na Nazareno, si San Juan Bautista na may hawak na tungkod, ang simbahan ng Quiapo, at ang lubid na ginagamit sa Traslacion.

Sa naturang paskil, sinabi rin ng Quiapo church na ang larawan ng Mahal na Poong Hesus Nazareno sa logo ay imbitasyon sa bawat deboto na ipagpatuloy ang paglakad sa daan ng pananampa­lataya. Nakalagay rin naman si San Juan Bautista bilang ‘tagapagpauna ng Panginoon.”

Ang simbahan naman anila ang sumisimbolo sa mga korporal at espiritwal na gawain ng awa. Ito anila ang nagpapakita ng ating mga responsibilidad at ginagawa sa lipunan at simbahan upang tuluyang maituwid ang ating buhay para kay Kristo.

Samantala, ang lubid naman anila ang nagpapaalala sa ating panawagan bilang mga deboto na ituwid ang mga ‘buhul-buhol’ o baluktot na landas sa ating buhay.

Kabilang sa mga pa­ngunahing aktibidad sa pista ay ang Traslacion.