IBINASURA ng Court of Appeals (CA) ang apela ni dating Bamban, Tarlac Mayor Alice Guo na palayain siya mula sa kulungan.

Nahatulang guilty si Guo sa kasong qualified human trafficking na iginiit na iligal siyang inaresto ng Bureau of Immigration (BI).

Sa desisyon ng CA nitong Oktubre 5 muling iginiit ng appellate court ng dating First Division ang “simple and inescapable fact” na hindi under detention ng BI si Guo.

Giit ng CA , si Guo ay nakadetine hindi dahil sa anumang warrant o kautusan ng BI kundi dahil sa joint decision ng Pasig City Regional Trial Court Branch 167.

Dagdag pa ng CA , walang alegasyon o pagpapakita na ang nasabing detensyon ay lumabas sa constitutional rights ng petitioner sa mabilis na paglilinis at sa kalayaan.

Si Guo na pinaghinalaang Chinese spy ay kasalukuyang nakakulong sa Correctional Institution for Women sa Mandaluyong . (Gene Adsuara)

UMABOT sa halos 100 residente ng Lungsod ng Malabon ang nabigyan ng libreng serbisyo sa Health Caravan na hatid ng Philippine Red Cross-Malabon City Chapter, na ginanap sa Tinajeros National High School sa Barangay Tinajeros ng lungsod.

Nagbigay ang Philippine Red Cross ng iba’t ibang serbisyo tulad ng libreng konsultasyong medikal at check-up, libreng gamot, at libreng maiinit na pagkain gaya ng taho, pandesal, pansit, kape, at ice cream.

Personal namang dumalo sa nasabing aktibidad si Malabon City Mayor Jeannie Sandoval at nagpahayag ng pasasalamat para sa mga serbisyong ipinagkaloob sa mga mamamayan ng Malabon. 

(Richard Mesa)

May dahilan para maalarma si Presidente Ferdinand Marcos Jr., sa P319 million na Chinese remittances sa isang kumpanyang may ugnayan umano sa asawa ni Vice President Sara Z. Duterte lalo na sa isyu ng national security.

Ayon kay House impeachment team adviser at spokesperson Ace Barbers na nangangailangan ng masusing imbestigasyon ang naturang transaksyon partikular na sa posibleng foreign influence sa ikalawang pinakamataas na opisyal ng bansa.

“Talagang very alarming kasi dahil merong national security implications ’yan,” pahayag ni Barbers sa isang press briefing sa ika-38 araw ng Senate impeachment trial.

Reaksyon ito ng dating mambabatas sa naging pahayag ng pangulo sa pagbibigay nito ng alalahanin ukol sa alegasyon na may pondo na mula China ang nakaabot umano sa VP sa pamamagitan ng kumpanyang may kaugnayan umano sa kanyang asawang si Manases “Mans” Carpio.

Nagbabala ang pangulo na ang ganitong alegasyon, kung napatunayan, ay may seryosong pagbabanta sa national security sa pinakamataas na lebelo.

Sinabi ni Barbers na dapat mapatunayan na ang remittances na natanggap ng Cale88 Foods Corp. ayginamit para suportahan ang political activities umano ni Duterte.

“Kung ito’y mapapatunayan sa isang malalimang imbestigasyon, therefore, napaka-alarming at nakakatakot ito. At ito ay may serious national security implication,” pahayag ni Barbers.

Lumitaw sa iprinisintang records ng Anti-Money Laundering Council (AMLC) sa impeachment trial na tumanggap ang Cale88 ng P319.326 million na inward remittances mula mainland China at Hong Kong. (VINA de GUZMAN)

PINANUKALA ng isang mambabatas ang pagtataguyod ng rooftop solar energy system sa lahat ng government housing projects sa buong bansa bilang pagtitipid sa singil ng kuryente sa mga low income households at mga informal settlers.

Inihain ni Quezon City Rep. Michael Ray Vargas ang House Bill No. 10478, o “Power sa Mamamayan Act,” sa nais nitong magtatag ng national framework na isama ang rooftop solar equipment sa mga long-term housing loans.

“Ang layunin natin sa pag-relocate ng informal settlers ay matulungan silang maiahon sa kahirapan. Dahil itinataguyod pa lang nila muli ang kanilang mga buhay, kailangan bawasan natin ang kanilang pasanin sa pagbibigay ng murang kuryente,” Vargas said. 

Ayon kay Vargas, maaring maibalik ang naitipid na gastos sa kuryente sa pamamagitan ng monthly billing credits sa mga local power distributors. 

Inihalimbawa ni Vargas ang grid-connected rooftop solar installation sa Pasinaya Homes sa Naic, Cavite. 

“Napatunayan sa Pasinaya Homes na kayang magkaroon ng mura at malinis na kuryente sa socialized housing communities. Pagkakataon na nating palawakin at gawing pamantayan ito sa lahat ng relocation site ng gobyerno sa buong bansa,” dagdag ni Vargas. 

Aniya, sa paglalagay ng solar power sa mga relocation sites, binibigyan ng agarang bawas-gastos ang mga pamilya, ibinabalik ang kanilang dignidad, at sinisiguro kasama ang low-income communities sa paglipat ng bansa sa clean and renewable energy. (VINA de GUZMAN)

ISANG mambabatas ang nanawagan ng import ban sa karneng baboy at mataas na taripa upang maprotektahan ang lokal na industriya.

“Ang pagbagsak ng industriya ng baboy ay bunga ng dekadang import liberalization, smuggling, at pagpapabaya ng gobyerno sa lokal na agrikultura,” pahayag ni Gabriela Women’s Party Rep. Sarah Elago. 

Kinuwestiyon ni Elago ang ginagawang tugon ng gobyerno ng importasyon tuwing humihina ang lokal na produksiyon.

“Sa ganitong sistema, ang mga importer at cartel ang kumikita habang ang mga lokal na magbababoy ang nalulugi,” ayon kay Elago.

Aniya, ginagamit na dahilan ang kakulangan sa suplay at pagtaas ng presyo para patuloy na magpasok ng imported na karne. Habang lumalaki ang pagdepende sa importasyon, lalong nahihirapan ang mga magbababoy na makipagsabayan dahil pinapaboran ang mga importer habang unti-unting pinahihina ang lokal na industriya. 

“Hindi sapat ang pagtaas ng taripa kung mananatili ang mga patakarang nagpapahina sa ating agrikultura. Kailangan ang tunay na repormang agraryo at sapat na suporta sa mga lokal na magbababoy. Dapat palakasin ang sariling produksiyon at wakasan ang mga patakarang inuuna ang kita ng malalaking importer kaysa sa kabuhayan ng mga magsasaka at pangangailangan ng mamamayan,” sinabi ni Elago. (VINA de GUZMAN)