PBBM, pinag-aaralang mabuti ang panukalang ‘blanket social media ban’ sa mga menor de edad

SINABI ni Pangulong Ferdinand Marcos Jr. na pinag-aaralang mabuti ng gobyerno ang panuklang batas na maghihigpit sa paggamit ng social media sa mga menor de edad, tinukoy ang mga potensiyal na epekto.

“The blanket ban, that’s also something that we’re still studying really hard,” ang sinabi ni Pangulong Marcos.

Winika ng Pangulo na nais niyang makita kung maa-adopt din ng ng bansa ang polisiya na magbabawal sa mga menor de edad na may edad na 16 at pababa, kahalintulad na batas sa ibang bansa gaya ng Australia at Indonesia.

“Tinitingnan namin kung tama ba, baka bagay din sa atin ‘yun. And it has its advantages but there’s also one thing that comes out of it na kapag binan (ban) mo, itatago nung bata. So, hindi mo na ngayon alam na that kid is going on to that site, reading all of this, is getting groomed,” ang tinuran ng Pangulo.

Nauna rito, inaprubahan ng Senado sa ikatlo at huling pagbasa nitong Oktubre 8 ang Senate Bill No. 2424 o “SMART KIDS Act,” na naglalayong limitahan ang pag-access ng mga menor de edad sa mga digital platform na itinuturing na mataas ang panganib sa mga bata.

Labing-anim na senador ang bumoto pabor sa panukala, isa ang tumutol at walang nag-abstain. Inakda at ini-sponsor ito ni Sen. Robinhood Padilla.

Sa ilalim ng panukala, maaaring obligahin ang mga high-risk platform na suspindihin o alisin ang mga account ng mga wala pang 18 taong gulang at magpatupad ng mekanismo para beripikahin ang edad ng mga gumagamit. Kabilang sa mga posibleng saklaw ang Meta Platforms, Roblox at Gorebox.

Hindi saklaw ng panukala ang email, pribadong mensahe, online games na hindi pangunahing social networking service, educational platforms, news services at professional collaboration services.

Binigyang diin naman ni Pangulong Marcos ang pangangailangan na suriing mabuti ang ugat ng karahasan sa mga menor de edad, inilarawan ang usapin bilang kapuwa “psychological” and a “generational problem.”

“Thank God, my generation, we didn’t have to worry about this, but this generation does. And we, who are supposed to be taking care of them and looking after them, we have to get something done,” ang sinabi ni Pangulong Marcos.

“For now, social media platforms that were previously flagged have been cooperating with the government,” aniya pa rin sabay sabing “Now, in fairness, the providers now, because we brought the problem to them, are – they tend to cooperate. And sinasabi nila basta maipakita ninyo na ito talaga, unang-una, fake news, o ito, ‘yun na nga, grooming, et cetera, et cetera, isasara namin ‘yan.”

“It’s a work in progress. It’s a hard question,” dagdag na pahayag ng Chief Executive , sabay binigyang diin ang pangangailangan para sa whole-of-nation approach.

“Don’t get me wrong. Having the metal detectors in the school, that helps. You know, the teachers and the parents being more attentive and listening to their children, of course, that helps,” anito.

“So, all of these things. There’s no silver bullet to this. You have to bring many, many things together,” ang winika ng Pangulo. 

( DARIS JOSE)