MULING nag-convene ang Budget Amendments Review Sub-committee (BARSc) sa ikalawang taon upang talakayin ang panukalang amendments sa 2027 General Appropriations Bill, mula na rin sa kahilingan na isinumite ng ilang government agencies at rekomendasyon na ginawa sa plenary deliberations.

Ayon kay House Committee on Appropriations Chairperson Rep. Mikaela Angela B. Suansing, ang rebyu ay bahagi ng patuloy na commitment ng Kamara para sa isang ‘transparent, accountable, and people-centered budget process.’

Nakahanay ito sa panawagan ni Speaker Faustino “Bojie” G. Dy III’s para sa isang “Bagong Kongreso” na naka-angkla sa transparency, accountability, institutional reforms, at pagbibigay ng resulta sa sambayanang Pilipino.

Kabilang sa pangunahing prayoridad na tinalakay sa deliberasyon para masiguro na manatiling ligtas ang mga eskwelahan sa pamamagitan ng School Safety and Security Program. Sa panukalang ₱500 million pondo, layon nitong matulungan na mapalakas ang security measures at emergency preparedness sa mga paaralan, maglaan ng ligtas na kapaligiran sa mga estudyante, guro at school personnel.

“Alam naman po natin ang mga nagaganap sa atin pong mga paaralan, at hindi man po natin gustuhin, pero kailangan po natin maging handa sa mga pagkakataon kung mayroon mang mangyayari. Currently, School Safety and Security has zero funding in the NEP — wala pong nakalagay sa budget para tumugon sa pangangailangan ng ating mga estudyante pagdating sa seguridad. And with that po, given the urgency of the situation at kung gaano kahalaga ito, I would like to put forth for the consideration of the BARSc to allocate ₱500 miliion for school safety and security,” ani Suansing.

Kasama rin sa ginawang rebyu ay mga hakbang para tugunan ang transport sector fuel subsidy. Isinuwestiyon ng komite ang paglalaan ng ₱2.35 billion kasunod ng nagaganap na global energy crisis upang suportahan ang mga direktang naapektuhan ng tumataas na presyo ng gasolina.

Ganoon din ang preparasyon para sa pagkakaroon ng El Niño-ready agriculture budget tulad ng pagbibigay prayoridad sa pagpapalawig ng solar pumps para sa irigasyon sa pamamagitan ng ₱125 million panukalang alokasyon.

(VINA de GUZMAN)

DALAWANG katao ang sugatan matapos gumuho ang isang dalawang-palapag na bahay sa Sevilla Street, Barangay 272, Binondo, Maynila, pasado alas-9 kagabi, October 1.

Ayon sa mga residente, nakarinig muna sila nang malakas na dagundong bago bumagsak ang bahay.

Tinamaan ng yero ang isang tindera at isang bumibili ng palamig na nasa lugar nang mangyari ang insidente.

Mahigit 70 taon na umanong nakatayo ang bahay at tinitirhan ng isang pamilya na binubuo ng mag-asawa at tatlong anak. Wala ang pamilya nang mangyari ang pagguho dahil nasa kanilang pagsamba.

Napagitnaan naman ang bahay ng dalawang malalaking gusali—isa ang may ongoing na construction at ang isa ay natapos na.

Sinisilip na ng mga awtoridad ang posibleng dahilan ng pagguho, kabilang ang kondisyon ng lumang bahay at ang mga istrukturang nakapaligid dito.

Agad na nagsagawa ng assessment ang Manila DRRMO at Manila Police District o MPD. Bilang safety measure, isinara na rin sa mga motorista ang bahagi ng Sevilla Street na apektado ng insidente. (Gene Adsuara)

NAGING bahagi si Mayor Along Malapitan sa pagbubukas ng Philippine Red Cross North Caloocan Satellite Office sa Barangay 176-A na aniya’y malaking bagay para sa mga residente ng Caloocan North, lalo na sa panahon ng emergency at sakuna dahil sa pamamagitan nito, mas mapapabilis ang pagtugon at pag-abot ng kinakailangang tulong ng mga Batang Kankaloo.

Nagpasalamat ang alkalde sa Philippine Red Cross sa patuloy na pakikipagtulungan sa lungsod kaya patuloy niyang susuportahan at palalakasin ang mga serbisyong naglalayong magligtas ng buhay at magbigay ng agarang tulong sa mga Batang Kankaloo. 

(Richard Mesa)

NAPIGILAN ng mga tauhan ng Bureau of Immigration (BI) sa Ninoy Aquino International Airport (NAIA) ang pag-alis ng tatlong babaeng pasahero noong Setyembre 25, 2026, matapos mapag-alamang posibleng biktima sila ng human trafficking.

Ayon sa ulat ng Immigration Protection and Border Enforcement Unit (I-PROBES) kay BI Commissioner Joel Anthony M. Viado, hinarang ang tatlong pasahero sa departure area ng NAIA Terminal 1 habang tangka nilang bumiyahe gamit ang mga kahina-hinala at umano’y pekeng dokumento.

Una nilang idineklarang biyaheng Vietnam ang kanilang destinasyon, ngunit lumitaw sa kanilang E-class Cambodian visas na Phnom Penh, Cambodia ang kanilang tunay na destinasyon.

Napansin din ng mga immigration officer ang mga hindi pagkakatugma sa kanilang destinasyon, haba ng pananatili at iba pang detalye ng kanilang biyahe.

Nakita rin ang mga kuwestiyonableng at umano’y pinakialamang dokumento, kabilang ang bank certificates, certificates of employment at business registration documents.

Dahil dito, pinaghinalaan ng I-PROBES na maaaring na-recruit ang tatlong babae para magtrabaho sa Cambodia, kung saan may mga Pilipino nang nailigtas mula sa mga kaso ng trafficking at illegal recruitment na may kaugnayan sa online scam operations.

Nagbabala si Commissioner Viado sa mga Pilipinong naghahanap ng trabaho sa ibang bansa na maging maingat sa mga alok na trabaho, lalo na kung nangangako ito ng sobrang taas na sahod o hindi malinaw na employment arrangements.

Itinurn-over ang tatlong pasahero sa Inter-Agency Council Against Trafficking (IACAT) para sa karagdagang assessment, imbestigasyon at kaukulang aksyon, kabilang ang posibleng pagsasampa ng kaso laban sa kanilang mga umano’y lokal na recruiter.
(Gene Adsuara)

SA ilalim ng pamumuno ni District Director P/BGen. Benliner Capili, nakapagtala ang Northern Police District (NPD) ng tuloy-tuloy na pagbaba ng krimen sa buong CaMaNaVa area.

Sa naitalang datos ng NPD, bumaba ang insidente ng krimen mula sa 104 noong buwan ng Hulyo sa 68 pagsapit ng Agosto o katumbas ng 34.62% habang pagsapit ng Setyembre ay lalu pa itong bumaba sa 59 na karagdagang pagbaba ng siyam na kaso o 13.24% kung ikukumpara sa nagdaang dalawang buwan.

Sinabi ni NPD Public Information Office (PIO) chief P/Lt. Reichhel Raymundo na maituturing na bumaba lahat ng focus crimes sa area ng CAMANAVA (Caloocan, Malabon, Navotas, Valenzuela) na kadalasang nangyayari at nagdudulot ng takot sa mamamayan dahil direkta itong nagbabanta sa kanilang buhay at ari-arian.

Kabilang naman sa naging susi ng pagbaba ng krimen sa NPD ang patuloy na pagsisikap na maimplementa ang police operations, pagpapalakas ng police visibility at pagpapatrulya, pati na ang inisyatiba sa pagiwas sa krimen.

Patuloy din ang maagap na pagpapatupad ng batas sa ilalim ng liderato ni BGen. Capili, pati na ang pagiging responsableng serbisyo publiko, mas mahigpit na pakikipagtulungan sa mga lokal na pamahalaan at komunidad upang makatulong sa pagsugpo sa anumang banta ng kriminalidad. (Richard Mesa)