ISANG pulis na nakatalaga sa PNP Anti-Cyber Crime Group nasa “hot water” ngayon matapos ireklamo ng panunutok ng baril sa isang bebot sa Malabon City, Linggo ng madaling araw.

Sa ipinarating na ulat ng Malabon City Police Station kay Northern Police District (NPD) Director P/BGen. Benliner Capili, dumalo sa isang kapistahan sa Brgy. Potrero ang biktima, kasama ang isa pa, nang lapitan sila ng senglot na pulis dakong alas-5 ng madaling araw.

Ayon sa biktima, hinahanap ng pulis ang nawawalang cellphone at naglabas umano ito ng baril saka itinutok sa ulo at leeg ng babae hanggang mamagitan ang mga taong nakapaligid kaya napayapa ang sitwasyon.

Nang umalis ang suspek, humingi ng tulong ang babae sa Police Sub-Station 1 sa Potrero subalit hindi na inabutan ng nagrespondeng pulis ang kanilang kabaro at hindi na rin matagpuan sa tanggapan ng Anti Cyber Crime Response Team sa Northern District kung saan siya nagre-report.

Dinala naman ng pulisya sa Malabon City Police Station ang biktima at kanyang kasama na tatayo bilang testigo upang maghain ng pormal na reklamo laban sa naturang parak.

Tiniyak naman ng Malabon City Police Station na tutugunan nila anumang reklamo o insidenteng may pagbabanta sa buhay gamit ang baril kahit pa kabaro nila ang nasasangkot. (Richard Mesa)

BALANSE ang pagtugon ng gobyerno sa pangangailangan ng mga transport worker at commuters kasunod ng inaprubahang dagdag-pasahe sa gitna ng patuloy na pagtaas ng presyo ng langis sa world market.

Sinabi ni Presidential Communications Office Undersecretary at Palace Press Officer Claire Castro sa press briefing sa Malakanyang, kailangan ang fare increase upang matulungan ang mga jeepney operator at driver sa mataas na gastos sa gasolina, habang isinasaalang-alang ang kapakanan ng mga pasahero.

“Alam natin na maraming mabibigatan sa pagtaas na ito ng pasahe. Pero dapat balance ito para sa kapakanan ng transport sector at ng ating commuters. Hindi puwedeng isang grupo lang ang panalo,” ani Castro.

Sinabi ni Castro na patuloy ang tulong ng pamahalaan sa mga apektadong transport worker, kabilang ang fuel subsidy.

“Ang pagbibigay ng mga ayuda, nandiyan ang fuel subsidy. Sila nga ang unang binigyan ng ayuda,” ani Castro.

Sa ilalim ng bagong fare increase, P14 na ang minimum fare sa traditional jeepney mula P13, habang P17 naman sa modern jeepney mula P15. May dagdag ding pasahe sa mga bus, UV Express, taxi, TNVS at point-to-point buses.

Tiniyak naman ni Castro na mananatili ang mga diskwento sa pasahe para sa estudyante, senior citizens at PWDs.

Winika pa nito na patuloy na pag-aaralan ang mga hakbang upang mabawasan ang epekto ng mataas na presyo ng langis at pasahe sa commuters.

Samantala, iginagalang ng pamahalaan ang karapatan sa mapayapang protesta at nananawagan sa mga nagpoprotesta na panatilihing maayos at mapayapa ang kanilang mga kilos. (DARIS JOSE)

UMABOT lamang sa 3,000 estudyante ang tinanggap ng Pamantasan ng Lungsod ng Maynila (PLM) mula sa mahigit 70,000 aplikante para sa academic year 2026-2027 dahil hindi na umano nito kayang tumanggap ng mas marami pang estudyante.

Sinabi ni PLM President Atty. Domingo Y. Reyes Jr. sa flag-raising ceremony sa Manila City Hall nitong Lunes, Setyembre 28 na umabot sa 70,000 ang mga nag-apply sa PLM para sa taong panuruan 2026-2027, habang 43,000 lamang ang nakakuha ng entrance examination.

“Kaya po ngayong taong 2026-2027, nagkaroon po tayo ng 70,000 applicants. 43,000 po ang nakakuha ng entrance exam, at 3,000 lang po ang natanggap natin dahil hindi na natin kayang i-absorb ang accommodation,” ani Reyes.

Samantala, sinabi ng PLM president na magsasara sa Setyembre 30 ang online application para sa susunod na school year. Sa kasalukuyan, nasa 65,000 na umano ang nakapagsumite ng kanilang aplikasyon.

“Pasensya na po, hindi natin mapagbibigyan lahat ng gustong mag-aral sa PLM,” pahayag ni Reyes.

Ayon sa PLM president, makatutulong ang itinatayong bagong Health Sciences Building upang madagdagan ang kapasidad ng unibersidad at mas marami pang estudyante ang matanggap.

“Sana po ay magkaroon pa tayo ng pagkakataon, lalo na po kung maitatayo na ang ating bagong Health Sciences Building na makakadagdag sa dami ng enrollment,” ani Reyes.

Sinabi naman ni Manila City Mayor Francisco “Isko” Moreno Domagoso na sa kabuuang 340 piles na kailangang itayo, 132 na ang nakumpleto para sa konstraksiyon ng College of Health Allied Sciences ng PLM .

Ayon sa alkalde, patuloy na naghahanap ang pamahalaang lungsod ng mga paraan upang madagdagan ang espasyo para sa mga estudyante gamit ang kasalukuyang lupain ng unibersidad.

“But what more can we do to give opportunities if we create space within the same space, just by innovation?” ani Domagoso.

Samantala, pinasalamatan ni Reyes ang pamahalaang lungsod sa patuloy nitong suportang pinansyal sa PLM. Aniya, umabot na sa ₱125 milyon ang kabuuang subsidy na natanggap ng unibersidad.

“Ang total subsidy na natanggap na po natin ay ₱125 million, pero sa kabila po niyan, patuloy tayong inaalalayan ni Mayor sa mga pangangailangan nating pinansyal at mga kagamitan na kailangan ng mga mag-aaral,” ani Reyes.

Tiniyak naman ni Domagoso na magpapatuloy ang pamahalaang lungsod sa pagpopondo sa libreng edukasyon sa PLM, sa kabila ng malaking gastusin ng pamahalaan para dito.

Aniya, ipinagpapatuloy ng kasalukuyang administrasyon ang pananaw ng mga dating alkalde ng Maynila na sina dating Mayor Arsenio “Nick” Lacson at dating Mayor Antonio Villegas na magkaroon ng libreng edukasyon para sa mga Manileño.

“Ang mahal magpaaral, cost per student. Just so you know, sa mga nag-aaral, it is very expensive for the government to have it free. But, like the vision of Lacson and Villegas, today as the torchbearer of that vision, we will continue to do so,” ani Domagoso.

Binigyang-diin din ng alkalde ang kanyang suporta sa pamunuan, faculty at mga estudyante ng PLM.

“We are very proud of you, sa pamunuan, sa bumubuo ng faculty, at sa students. Worth every penny. Sulit na sulit ang paggasta ng buwis ng mamamayan ng Lungsod ng Maynila,” pahayag niya. (Gene Adsuara)

NAILANTAD sa Senate impeachment court ang mga baril na pag-aari nina Vice President Sara Duterte at mister nitong si Atty. Manases Carpio.

Sinabi ni PNP Firearms and Explosives Office Chief Joericson Sangalang, iprinisintang saksi ng prosekusyon sa impeachment trial ni Vice President Sara Duterte na lumitaw sa talaan ng ahensiya na mayroong 14 pistola, dalawang revolver, limang rifles kabilang na ang tatlong Class-A light weapons, at isang shotgun ang VP.

Si Duterte ay tinaguriang Type 5 License to Own and Possess Firearms owner, na ibinibigay sa mga indibidwal na nagmamay-ari at nakarehistrong armas na mahigit sa 15.

Samantalang ang asawa nitong si Manases Carpio ay mayroong 29 firearms, kabilang na ang 16 pistola, dalawang revolvers, isang shotgun, 10 rifles kabilang na ang isang Class-A light weapon, at isang expired firearm, base pa sa PNP records.

Ang isang armas na may fully automatic function na tuluy-tuloy ang buga kapag pinaputok ay maaari lamang makuha ng Armed Forces of the Philippines, PNP at iba pang law enforcement agencies, pahayag ni Sangalang, base sa RA 10591 o Comprehensive Firearms and Ammunition Regulation Act.

Pero ang mga indibidwal na nakabili ng light weapon bago ito naging batas noong 2013 ay pinapayagan pa ring panghawakan ito kasabay sa pagsunod sa ippbang probisyon sa batas.

Sinabi pa ni Sangalang na si Duterte ay may P2,184,550 habang si Carpio ay P5,035,820 halaga ng armas base sa present market prices sa halip na actual acquisition costs.

(VINA de GUZMAN)

IPATATAWAG ng National Bureau of Investigation (NBI) ang mga personalidad na binanggit sa sworn affidavit ni dismissed policeman Rodulfo Gracioso Jr. kaugnay ng umano’y pamamahagi ng bilyong pisong cash sa pamilya Duterte.

Sa ambush interview sa Tripartite MOA Signing sa Department of Justice, sinabi ni NBI Director Melvin Matibag na kabilang sa imbestigasyon ang pag-imbita sa mga pinangalanan para sa validation ng impormasyon.

Sumipot nitong Lunes ng umaga sa NBI si Gracioso para magsumite ng kanyang sinumpaang salaysay.

Sa kanyang affidavit, iginiit niyang nag-deliver siya ng mahigit P2 bilyong cash na nakasilid sa maleta kina Vice President Sara Duterte, dating Pangulong Rodrigo Duterte, at Davao City Rep. Paolo Duterte, sa utos umano ni dating House Speaker Lord Allan Velasco.

Ayon kay Matibag, isasailalim si Gracioso sa polygraph test na nagpakita umano ng mataas na truthfulness rating, ngunit patuloy pa rin ang intelligence validation sa lahat ng detalye.

Nilinaw din ng NBI na hiwalay sa kredibilidad ng testimonya ang mga dating administrative case ni Gracioso sa PNP na nagresulta sa pagkakatanggal niya sa serbisyo.

Patuloy ang beripikasyon ng ahensya sa mga ebidensyang isinumite. (Gene Adsuara)