NAGHANDA ang Pamahalaang Lungsod ng Malabon ng pitong sasakyan at response assets, kabilang ang limang sasakyang nakalaan para sa “Libreng Sakay” upang tulungan ang mga commuter at tiyakin ang kaligtasan ng publiko sa nakatakdang tatlong-araw na nationwide transport strike mula Setyembre 28 hanggang 30.

Bahagi ito ng pinag-ugnay na mga hakbang pang-emerhensiya ng Lungsod sa pangunguna ng Public Safety and Traffic Management Office (PSTMO), katuwang ang mga kinauukulang departamento ng lungsod, mga ahensya ng pambansang pamahalaan, mga barangay, at local transport groups.

“Ngayong mayroon na naman pong isinasagawang tigil-pasada, prayoridad natin ang kapakanan ng ating mga kapwa Malabueño upang masiguro na makakarating sila sa kanilang mga paroroonan nang maayos at ligtas. Patuloy ang koordinasyon at pakikipagtulungan natin sa mga transport groups sa lungsod, kasabay ng paghahanda natin ng Libreng Sakay para sa ating mga kababayan. Mag-iingat po ang lahat,” ani Mayor Jeannie Sandoval.

Ang nasabing mga sasakyan ay i-deployed sa mga lugar kung saan may napaulat na stranded na mga pasahero na mahigpit na babantayan ng PSTMO, partikular sa mga kalsadang malapit sa Malabon City Hall, Hulong Duhat, Concepcion, Acacia-Palengke, Panghulo-Tatawid, Catmon-Francis, Potrero-Del Monte, at C-4 Road/Letre.

“Nakahanda ang ating mga tanggapan at katuwang na ahensya upang agad na makapagbigay ng tulong sa ating mga Malabueño na maaaring ma-stranded dahil sa transport strike. Nakaposisyon na ang mga sasakyan at response teams, habang patuloy ang monitoring sa mga lugar na maaaring magkaroon ng crowd build-up. Mahalaga ang mabilis na koordinasyon ng bawat tanggapan upang masiguro ang maayos at ligtas na pagbiyahe ng ating mga kababayan,” sabi ni City Administrator Dr. Alexander T. Rosete.

Nakipag-ugnayan din ang Pamahalaang Lungsod sa PNP, BFP, MMDA, at mga barangay upang palakasin ang monitoring, security, emergency response, at pagpapalaganap ng impormasyon sa loob ng tatlong-araw. (Richard Mesa)

DINAKIP ng pulisya ang 40-anyos na biyuda nang makuhanan ng mga drug paraphernalia sa loob ng bahay kung saan iniulat ang pagkamatay ng 69-anyos na lolo sa Valenzuela City, Linggo ng hapon.

Sa ulat ni Valenzuela Police Chief P/Col. Joseph Talento kay Northern Police District (NPD) Director Benliner Capili, alas-5:30 ng hapon nang humingi ng tulong sa Police Sub-Station 8 ang 60-anyos na si alyas “Romy” matapos madatnan niya ang bangkay ng kanyang nakatatandang kapatid sa bahay nito sa Villa San Jose St. Purok 4, Brgy., Mapulang Lupa.

Nang magtungo sa lugar sina P/MSg Nordan Damiar at P/SSg Rafaelito Santos, nadatnan nila ang nakahandusay na bangkay ng biktimang si alyas “Jordan” habang namataan nila ang biyudang si alyas “Jonalyn” na nakaupo sa sofa at sa harap nito ang mga drug paraphernalia na nakapatong sa mesa na dahilan para siya arestuhin.

Bago nadiskubre ang bangkay ay narinig pa ng kanilang kapitbahay ang mainitang pagtatalo ng biktima at ni alyas Jonalyn bagama’t wala namang nakitang senyales na may nangyaring karahasan at wala ring anumang sugat sa katawan na nakita ang pulisya sa bangkay 

May rekord naman ang puilsya na nagpapatunay na inaresto na nila noon ang nasawi sa kasong may kaugnayan sa ilegal na droga at sumasailalim din ito sa pagpapagamot sa Mental Hospital sanhi ng sakit sa pag-iisip.

Isasailalim naman sa awtopsiya ang bangkay ng biktima upang matukoy ang sanhi ng kanyang pagkamatay habang gagamitin namang ebidensiya ng pulisya ang nakumpiskang iba’t-ibang uri ng drug paraphernalia para sa pagsasampa ng kaso laban kay alyas Jonalyn. (Richard Mesa)

SUGATAN ang dalawang kabataang snatcher nang sumalpok ang sinasakyan nilang motorsiklo sa isang pick-up truck habang mabilis na tumatakas sa Malabon City, Linggo ng umaga.

Sa inilabas na ulat ni National Capital Region Police Office (NCRPO) Acting Director P/BGen. Christopher Abrahano, magka-angkas sa motorsiklo ang mga suspek na may edad 22 at 19, nang tangayin nila ang bag sa loob ng isang nakaparadang sasakyan sa M.H. Del Pilar St., Brgy., Santulan, pasado alas-9:00 ng umaga bago mabilis na humarurot patakas.

Hinabol ng 40-anyos na biktima ang mga suspek na mabilis na lumiko sa Rodriguez Street hanggang mawalan ng kontrol sa tapat ng isang gasolinahan malapit sa kanto ng M. Santos Street at tuluyang sumalpok sa isang pick-up truck.

Kapwa duguan ang dalawang kawatan nang isugod ng nagrespondeng medical team ng Malabon City Disaster Risk Reduction and Management Office (MDRRMO) sa Tondo Medical Center kung saan nananatiling nakaratay ang isa habang dinala na sa Malabon police station ang isa pa.

Sa pahayag ng biktima sa mga tauhan ni Northern Police District (NPD) Director P/BGen. Benliner Capili, laman ng kanyang bag na tinangay ng mga suspek ang isang bundle na salapi na nakabalot sa plastic na aabot sa P100,000.00, mobile phone, wallet na naglalaman ng P1,500 cash at assorted na ID, na hindi na nabawi ng pulisya sa mga suspek. (Richard Mesa)