IKINAGALAK ng ilang mambabatas ang absolute pardon na ibinigay ni Pangulong Bongbong Marcos kay Mary Jane Veloso, isang OFW na nakulong sa Indonesia ng 16 na taon matapos mahatulan bilang drug courier.

“Nakikiisa tayo sa pamilya Veloso sa kanilang pagdiriwang. Sa dulo ng kanilang mahabang paghihintay, sa wakas makakauwi na si Mary Jane,” sinabi ni Akbayan Partylist Rep. Perci Cendaña. 

Ayon kay Cendaña, ang paglaya ni Veloso ay resulta ng pakikibaka ng mga OFW groups, migrant rights advocates, at mga Pilipinong walang sawang nanindigan para mailigtas siya mula sa death row. 

Ayon naman kay Gabriela Women’s Partylist Rep. Sarah Elago, hindi kusang-loob na dumating ang kalayaan ni Veloso.

“Pinaglaban ito ng kanyang pamilya, mga migranteng Pilipino, taong simbahan, human rights defenders, women’s groups, lawyers, at mamamayang patuloy na nanindigan kahit ilang taon nang tila walang kasiguruhan ang kanyang paglaya,” sinabi ni Elago.

Aniya, matagal nang dapat pinalaya si Veloso. “Matagal na rin nating iginiit na siya ay biktima ng human trafficking at pagsasamantala, hindi kriminal na dapat parusahan.”

Sumang ayon si Elago kay Cendaña na ang paglaya ni Veloso ay pagkilala “sa mahabang laban upang itama ang isang matinding kawalan ng hustisya.”

Nakapiit si Veloso ng 16 na taon matapos siyang maaresto at mahulihan ng 2.6 kilos ng heroin sa Adisutjipto International Airport sa Yogjakarta, Indonesia noong April 25, 2010.

Sa gitna ng apila ng kampo ni Veloso na biktima lang siya at ginamit bilang drug mule, sinintensiyahan siya ng bitay ng District Court of Justice sa Yogjakarta noong October 11, 2010.

Hindi natuloy ang bitay ni Veloso at na-commute ang sentensiya matapos ang apila ni dating Pangulo Benigno Simeon “Noynoy” Aquino III.

Noong December 2024, pinayagan ng Indonesian government na ilipat si Veloso sa kustodiya ng Philippine government, kung saan siya ikinulong sa Correctional Institution for Women (CIW) sa Mandaluyong City.

 (VINA de GUZMAN)

MATIBAY ang batayan ng naging desisyon ng Senate impeachment court na babaan ang voting threshold sa impeachment trial ni Vice President Sara Duterte, ayon kay Atty. Benjamin Tolosa Jr., tagapagsalita at legal counsel ng House prosecution team.

Sa ginanap na press briefing nitong Biyernes, iginiit ni Tolosa na walang naganap na “grave abuse of discretion” sa naging desisyon ng Senado.

“Maliwanag na it stands on solid legal grounds itong kanilang naging ruling,” sagot ni Tolosa.

“Wala pong grave abuse of discretion,” dagdag naman ni House prosecutor Manila Rep. Joel Chua.

Ginawa nila Tolosa at Chua ang mga pahayag matapos maghain ng petisyon si dating Executive Secretary Vic Rodriguez sa Supreme Court na kinukwestiyon ang desisyon ng Senate impeachment court noong Sept. 23 na babaan ang voting threshold.

Hiniling ni Rodriguez sa SC na atasan ang Senado na ibalik ang naunang interpretasyon na 16 na boto ang kailangan para sa impeachment ni Duterte, base sa two-thirds ng lahat ng 24 na miyembro ng Senado na nakasaad sa Konstitusyon. Humiling din si Rodriguez ng Temporary Restraining Order.

Naghain ng hiwalay na petition for certiorari ang isang abugado, Ernesto Francisco, na humihiling sa SC na resolbahin muna ang constitutional issue.

Sa isinagawang ruling ng Senate impeachment court, ang two-thirds requirement sa ilalim ng Saligang Batas ay hindi binago. Nakatutok ang isyu kung ilan sa mga kasalukuyang senador ang maaring bumoto dahil apat sa kanila ay hindi magampanan ang kanilang papel bilang senator-judges.

Sabi ni Tolosa, saklaw ng SC kung may naganap na grave abuse of discretion. “Sabi nga nila, mahirap sabihin na itong decision na ito ay produkto lamang ng kapritso, or arbitrarily made, dahil klaro, talagang pinag-isipan nang mabuti ang decision na ito, pinakinggan ang magkabilang panig sa kanilang mga opinion, pati dito sa mga disinterested persons.” 

Sinabi naman ni Chua na malinaw sa Saligang Batas na binibigyan ng wide latitude ang impeachment court, ang Senado, para gumawa ng sarili nilang rules. 

“But of course, at the end of the day, it will still be the Supreme Court who will determine if they should even look into that matter,” dagdag ni Tolosa. (VINA de GUZMAN)

HIMAS-REHAS ang isang hinihinalang tulak ng droga na itinuturing bilang High-Value Individual (HVI) nang maaresto sa ikinasang buy bust operation ng pulisya sa Valenzuela City, Biyernes ng madaling araw.

Sa kanyang ulat kay Northern Police District (NPD) Director P/BGen. Benliner Capili, kinilala ni Valenzuela Police Chief P/Col. Joseph Talento ang suspek na si alyas “Moymoy”, 28, ng Brgy., Wawang Polo.

Ayon kay Col. Talento, unang nakatanggap ng impormasyon ang mga operatiba ng ‎ Station Drug Enforcement Unit (SDEU) hinggil sa pagbebenta umano ng suspek ng shabu sa kanilang lugar at kalapit na mga barangay.

Nang magawang makipagtransaksyon sa suspek ng isa sa mga operatiba ng SDEU, agad bumuo ng team si P/Lt. Sherwin Dascil bago ikinasa ang buy bust operation laban kay alyas Moymoy sa koordinasyon sa PDEA.

Hindi na nakapalag ang suspek nang dambahin ng mga operatiba ng SDEU makaraang bintahan umano ng P8,500 halaga ng shabu ang isang pulis na nagpanggap na buyer dakong alas-3:30 ng madaling araw sa Kabesang Imo St., corner Langka St., Brgy. Balangkas.

Nakumpiska sa suspek ang humigi’t kumulang 55 grams ng hinihinalang shabu na nagkakahalaga ng P374,000.00, buy bust money na isang tunay na P500 bill at walong P1,000 boodle money, sling bag, P150 cash at isang motorsiklo na gamit umano nito sa pagdedeliber ng droga.

Ani SDEU investigator PSSg Cris Paul Collo, kasong paglabag sa Sections 5 at 11 ng R.A 9165 o ang Comprehensive Dangerous Drug Act of 2002 ang isasampa nila laban sa suspek sa piskalya ng Valenzuela City. (Richard Mesa)