Ang Diyaryong Pinagkakatiwalaan
MATUTULOY ang inaabangang paghaharap nina heavyweight boxers Tyson Fury at Anthony Joshua.
Gaganapin ang inaabangang paghaharap ng dalawa sa Principality Stadium sa Cardiff sa Disyembre 11.
Gagawin ang news conference ng dalawa sa Setyembre 30 sa London matapos na mapirmahan ang kontrata.
Ilang ulit na kasing nagtangkang magharap ang 36-anyos na si Joshua at 38-anyos na si Fury subalit hindi matuloy-tuloy dahil sa problema sa kanilang kontrata.
TIWALA ang Philippine Olympic Committee (POC) na madagdagan pa ang hahakutin na gintong medalya ng Pilipinas sa 20th Asian Games sa Aichi-Nagoya , Japan.
Kasunod ito sa unang pagkamit ng Pilipinas ng gintong medalya sa pamamagitan ni two-time Olympic champion Carlos Yulo na nangibabaw sa floor exercise.
Sasabak pa kasi si Yulo sa finals ng parallel bars at vault category ngayong araw.
Pasok na rin sa finals ang pambato ng skateboarding sa pamamagitan ng 12-anyos na si Mazel Paris at Jericho Francisco.
Ilan pa sa mga maaring makapag-uwi ng gintong medalya sa sports ng boxing ganun din sa pole vault sa pamamagitan ni EJ Obiena.
NATAPOS na ang kampanya ni Pinay tennis star Alex Eala sa Singapore Open.
Ito ay matapos na talunin siya ni Tatiana Prozorova ng Russia.
Umabot sa tatlong set ang laban kung saan unang nakuha ng Russian player ang panalo 6-4 habang nakabawi si Eala sa second set 7-5 at pagpasok ng ikatlong set ay nadomina ni Prozorova sa score na 6-3.
Susunod na makakaharap ni Prozorova si Wang Xinyu ng China para sa quarterfinals.
Susunod naman na laban ni Eala ay sa Asian Games kung saan inirepresenta niya ang Pilipinas.
KALABOSO ang isang binata na wanted sa siyam na bilang ng kasong Qualified Theft sa Quezon City matapos maaresto ng pulisya sa ikinasang manhunt operation sa Valenzuela City.
Sa kanyang ulat kay Northern Police District (NPD) Director P/BGen. Benliner Capili, sinabi ni Valenzuela Police Chief P/Col. Joseph Talento na ang akusado ay isang 29-anyos na lalaki na residente ng Brgy., Arkong Bato ng nasabing lungsod.
Ayon sa ulat, ikinasa ng mga tauhan ni Police Sub-Station 5 Commander P/Lt. Ailyn Domingo ang operation laban sa akusado kasunod ng natanggap na impormasyon hinggil sa kinaroroonan nito.
Hindi naman umano pumalag ang akusado nang isilbi sa kanya ng mga pulis ang arrest warrant na inisyu ng Regional Trial Court, Branch 81, Quezon City noong September 15, 2026 para sa kasong Qualified Theft under Art. 310 in rel. to Art. 308 of the RPC (9 Counts) na may inirekomendang piyansa na kabuuang halaga na P144,000.00.
Pansamantalang nakapiit ang akusado sa Custodial Facility Unit ng Valenzuela City Police habang hinihintay ang pagpapalabas ng commitment order mula sa hukuman. (Richard Mesa)
“MAGTRABAHO nang mahusay. Maglingkod nang tapat. At laging alalahanin kung para kanino tayo nagtatrabaho,”
Ito ang panawagan ni Executive Secretary Ralph G. Recto sa mga empleyado ng Office of the President (OP) bilang kabayaran sa tiwala ng publiko na may kaakibat na tapat na trabaho na aniya’y “good results that Filipinos can feel.”
Sa isang seremonya bilang pagkilala sa mga empleyado para sa kanilang mga achievements at mga taon ng serbisyo, sinabi ni Recto na lumalapit ang mga mamamayan sa gobyerno para sa tulong na kanilang kailangan.
“Every task in the Office of the President is an opportunity to answer that trust with action,” aniya pa rin.
Ani Recto, bilang civil servants, inaasahan nila na “to act as professionals, and not as partisans. The presidency is that privileged conduit through which one’s skills can be used to serve the people.”
Kaugnay nito, tinukoy at kinilala sa seremonya ang 15 empleyado na nakakuha ng master’s degrees sa Public Administration habang nagtatrabaho.
Kabilang sa mga indibiduwal na binalanse ang trabaho sa pag-aaral ay si Palace engineering office employee Joseph Timbol, nag-iisang awardee sa ilalim ng Lifelong Learners Program, nakakuha ng bachelor’s degree in Information Technology mula sa PUP Open University.
“The Filipino people deserve public servants like you who never stop learning, never stop improving, and never stop finding better ways to serve the country,” aniya pa rin.
Sa ngalan ni Pangulong Marcos, pinasalamatan ni Recto ang 20 loyalty awardees na naglingkod ng 30 hanggang 45 taon.
Pinuri rin ang 19 retirees, “who through multiple administrations responded to the demands of the OP, through years of changes and challenges.”
Pinarangalan din ni Recto ang mga pamilya na recipients ng Pamana ng Paglilingkod: dating Chief Presidential Legal Counsel Juan Ponce Enrile, Rolito Rodriguez ng Presidential Human Rights Committee Secretariat, at Joven Rodil of the Engineering Office.
Inalala ang mga taon na nakatrabaho si Enrile bilang kapwa-mambabatas, sinabi ni Recto na marami siyang natutunan mula kay Enrile.
Gayundin, nagbigay-pugay naman siya kay Rodriguez at Rodil para sa mga panahon, kasanayan at pagsisikap na ibinigay ng mga ito para paglingkuran ang bansa.
“Ang posisyon ay pansamantala. Ang titulo ay maaaring mawala. Ang parangal ay maaaring maluma. Pero ang mabuti at tapat na serbisyo ay nananatili habang buhay,” ani Recto.
“That service, lives on in stronger institutions, in younger colleagues inspired to do better, and in the Filipinos whose lives their work has helped improve,” ayon pa rin kay Recto. ( DARIS JOSE)
NILAGDAAN na ni Pangulong Ferdinand R. Marcos Jr.ang panukalang pagpapaliban sa Barangay and Sangguniang Kabataan Elections (BSKE) na nakatakda sanang idaos sa Nobyembre 2, 2026.
Sinabi ni Presidential Communications Office Undersecretary at Palace Press Officer Claire Castro, na nakita ng mga mambabatas at ng Pangulo kung gaano kung gaano kahalaga sa ngayon ang papel ng mga barangay official.
Ani Castro, kailangan aniya kasing i-mobilized ang mga barangay officials para sa pagsupo ng krimen.
“Dyan magsisimula sa barangay kung paano maiiwasan ang paggawa ng krimen dahil kapag ang barangay mismo, ang mga opisyal ay lumilibot at mahigpit mababawasan ang pagtaas ng crime rate,” ang paliwanag ni Castro.
Bukod dito, tinukoy din na dahilan ni Castro ang pagbaha kung saan ang mga barangay official ang makakatulong sa kanilang mga nasasakupan at kung paano masasaayos ang pagtatapon ng basura.
“Kailangan po natin sila ngayon,” diing pahayag ni Castro.
Kaya aniya kung magkakaroon ng eleksyon ay mahihirapan ang lahat na makapagpatupad ng ganitong mga klase ng programa.
“So, ang pagpapa-extend man ng termino ng mga barangay official ay hindi para maging hayahay ang kanilang buhay. Ito ay para sila magtrabaho,” ani Castro.
“Kaya, para sa mga barangay officials, ang kailangan po namin ay trabaho mula sa inyo,” ang panawagan ni Castro.
Nauna rito, pinirmahan na ni Pangulong Marcos ang Republic Act No. 12326, na nagtatakda ng limang taong termino ng panunungkulan ng mga opisyal ng barangay at mga miyembro ng Sangguniang Kabataan.
Kasabay nito, hinikayat ng Pangulo ang mga kasalukuyang opisyal na gamitin ang karagdagang panahon upang higit na mapabuti ang serbisyo, tapusin ang mga nasimulang programa, at tugunan ang pangangailangan ng mga komunidad, pamilya at kabataan.
Para sa Pangulo, ang dagdag na panahon sa panunungkulan ay dagdag na panahon para maglingkod at gampanan ang pananagutan sa taumbayan. ( DARIS JOSE)
PINIRMAHAN na ni Pangulong Ferdinand Marcos Jr., ang paggawad ng absolute pardon kay Mary Jane Veloso, isang Overseas Filipino Worker (OFW) na nakakulong sa Correctional Institution for Women dahil sa pagdadala ng droga sa Indonesia noong 2010.
Sa isang ambush interview sa isa sa kanyang mga aktibidad sa Samar, tinanong ang Pangulo sa kung napirmahan na niya ang paggawad ng absolute pardon kay Mary Jane Velado at ang tugon nito ay ” pinirmahan ko na ‘yong pardon niya kahapon, (Setyembre 24, 2026).”
Matatandaang, sa deliberasyon ng plenaryo, araw ng Miyerkules, tinanong ni Gabriela Women’s Party Rep. Sarah Elago si Bataan Rep. Albert Garcia, ang budget sponsor ng Office of the President (OP), tungkol sa panawagang pagkalooban si Veloso ng executive clemency.
“Nananatili po siyang nakakulong hanggang ngayon Madam Speaker, simula po ng makabalik siya dito sa Pilipinas siya po ay nananatili sa Correctional Institution for Women. Ang kanyang kaso po ay kinilala hindi lamang po dito sa Pilipinas kundi sa buong mundo na isang malinaw na halimbawa ng human trafficking at forced drug mule exploitation,” ayon kay Elago.
“Ano po ba ang tiyak na hakbang na ginagawa ng Office of the President upang matiyak ang kanyang agarang paglaya at matiyak po na makasama na niya ang kanyang pamilya na sa ngayon ay nasa ngayon ay nasa 16 na taon na po siyang nawalay sa kanyang pamilya,” ang sinabi pa ni Elago.
Ang naging tugon naman ni Garcia, ay, “The Office of the President is seriously considering to grant absolute pardon to Mary Jane Veloso on humanitarian grounds in support of the government’s commitment to protecting Filipino migrant workers.”
At nang tanungin ni Elago kung kailan ipagkakaloob ang absolute pardon, sinabi ni Garcia na “There will be an announcement in a few days.”
“Magandang balita po ito para kay Mary Jane Veloso at sa kanyang pamilya. Ang isyu po kasi na ito ay hindi lang tungkol kay Mary Jane Veloso, kundi para sa bawat Pilipino na naghahangad ng mas magandang buhay, ng disenteng trabaho, dito sa ating bansa,” ayon pa rin kay Elago.
“Dapat may kalakip ito na pagpapalakas ng laban sa human trafficking, pagpapalakas ng ating proteksyon para sa mga migrant workers, at higit sa lahat, pagtitiyak ng aktibong paglikha ng mas maraming trabaho dito sa Pilipinas. Trabaho na may nakabubuhay na sahod para sa kanilang pamilya,” ang dagdag na pahayag ng mambabatas. ( DARIS JOSE)
PAETE, LAGUNA — Pormal nang pinasinayaan araw Ng Setyembre 24, 2026, ang ika-16 na Anibersaryo ng Ukit Taka Festival. Kasabay nito ay inilatag din ni Mayor Ronald “Bokwet” Cosico ang kanyang State of the Municipality Address (SOMA) sa Tanghalan ng Leandro B. Balquiera (Plaza ng Paete / Festival Ground).
Sinimulan ang apat na araw na selebrasyon sa pamamagitan ng isang banal na misa, na sinundan ng opisyal na pagbubukas ng mga palatuntunan at trade booths, bago iniulat ng alkalde ang mga nagawa at tagumpay ng pamahalaang bayan.
Pag-angat ng Ekonomiya at Turismo
Sa kanyang talumpati, ibinahagi ni Mayor Cosico ang magandang direksyon ng lokal na ekonomiya ng Paete. Bagama’t kasalukuyang nasa ikaapat na klasipikasyon pa lamang ang bayan, inaasahan ang pag-akyat nito sa ikalawang klasipikasyon sa susunod na taon dahil sa patuloy na pagtaas ng taunang kita. Target din ng kanyang administrasyon na tuluyang maabot ang unang klasipikasyon sa mga susunod na termino.
Pokus sa Kabuhayan at Sektor ng Katandaan
Ipinagmalaki rin sa SOMA ang mga natapos at kasalukuyang proyekto para sa kapakanan ng mga mamamayan:
Pangkabuhayan: Pagkakaloob ng mga alagang baboy mula sa Department of Agriculture (DA) upang magsilbing direktang alternatibong kabuhayan ng mga pamilya.
Tulong sa mga Senior Citizen: Pamamahagi ng ayuda katuwang ang DSWD at NCSC, bukod pa sa espesyal na 100,000 pisong pabuya mula sa Pamahalaang Bayan para sa mga umabot sa sentenaryo (100 taong gulang). Nadagdagan din ang mga benepisyaryo ng lokal na pensiyon na umabot na sa 300 katao.
Pangkalahatang Serbisyo: Patuloy na pagtutok sa kalusugan, edukasyon, trabaho, turismo, at iba pang serbisyong panlipunan.
Nagpaabot ng taos-pusong pasasalamat ang alkalde sa Poong Maykapal, kay Vice Mayor Lorena Velasco at sa buong Sangguniang Bayan, pati na sa 19 na barangay at mga kawani ng pamahalaang lokal sa kanilang walang-sawang pagkakaisa at suporta.
Mga Paligsahan at Pagtatapos
Nagbigay-kulay sa unang araw ng festival ang mga kapana-panabik na kompetisyon tulad ng Head Dress Competition, Band Competition, at ang Taka Designers Competition.
Ang Ukit Taka Festival 2026 ay magtatapos sa darating na Setyembre 27.
(Yvonne Bagang/ Boy Morales Sr./ Jeremiah Solomon)
KINUMPIRMA ng Bureau of Immigration (BI) ang isang insidente na kinasangkutan ng dalawang babaeng immigration offficers sa Ninoy Aquino International Airport (NAIA) Terminal 3 noong September 22, 2026 bandang alas-8:30 ng gabi.
Nilinaw ng Bi na ang nasabing insidente ay nag-ugat sa isang personal at pribadong bagay na kinasangkutan ng dalawang babaeng officers kung saan parehong naka-duty nang naganap ang insidente.
Inutusan na ng BI ang dalawang opisyal na magsumite ng kanilang written explanations hinggil sa insidente habang inaasahan naman ang iba pang mga pesonnel ng propesiyonalismo, proper decorum at disiplina anumang oras partikular habang ginagampanan nila ang kanilang mga opisyal na tungkulin .
Sinabi ng BI na hindi nila ito-tolerate ang anumang klase ng unprofessional conduct, misconduct, o behavior unbecoming of a public officer. Karampatang administrative action ang ipapairal base sa resulta ng imbestigasyon at sa umiiral na rules and regulations habang sinuguro naman ng BI na paninindigan nito ang professionalism, discipline, at integrity sa kanilang mga personnel gayundin ang pagbibigay ng epiyente at at magalang na serbisyo sa mga mananakay. (Gene Adsuara)
KINONDENA ng isang mambabatas ang ginawang pagpapaliban ng Barangay at Sangguniang Kabataan Elections (BSKE) na aniya’y nagbibigay lamang ng karagdagang panahon sa mga opisyal na kumapit sa kapangyarihan
“Ang karagdagang panahon sa panunungkulan ay karagdagang panahon para kumapit sa kapangyarihan, lalo na kung walang malinaw na batayan para ipagpaliban ang halalan. Kunwari pang term extension lang ang ginagawa, pero BSKE postponement ang totoong habol.” sabi ni Kabataan Party-list Rep. Renee Louise Co.
Ginawa ni Co ang pahayag matapos pirmahan ni Pangulong Ferdinand R. Marcos Jr. nitong Biyernes ang Republic Act No. 12326 na ipagpaliban ang BSKE sa November 2028 at bibigyan ng limang taon na termino ang mga opisyal.
“Kung babalikan, naisagawa naman ang BSKE noong 2023 sa kabila ng iba’t ibang krisis, kaya malaking kasinungalingan kung sasabihin na hindi handa ang gobyerno. Sabi nga ng COMELEC, gumastos na sila ng milyones sa paghahanda para sa paparating na eleksyon. Para saan pa ang lahat ng iyon kung hindi lang pala ito matutuloy?” tanong ni Co.
Iginiit ng mambabatas na dapat ituloy ang BSKE at nagbanta na kung hindi matutuloy, ang taumbayan at ang mga kabataan “ang maniningil at pagpananagot, mula sa baba hanggang sa tuktok.” (vina de guzman)