IPINAGPALIBAN muna ng Kamara ang proposed 2027 budget ng Department of Information and Communications Technology (DICT) dahil sa tila kawalan nito ng kakayahan na tugunan ang problema sa online scams ng social media platforms.

“Kaya nga sinususpinde ’yung deliberation ng kanilang budget kasi nakukulangan ng tapang, nakukulangan ng ngipin. ’Yan ang pananaw ng karamihan ng ating mga mambabatas,” sinabi ni Deputy Speaker at Iloilo Rep. Janette Garin sa isang pagpupulong.

Ayon kay Garin, hinahanap ng mga mambabatas mula sa DICT ang isang kongretong plano kung papaano tutugunan ang problema sa online scams at harmful online content sa mga social media platforms.

“Eh nakita mo nang nagpapatayan, nakita mo nang may mga kulto at recruitment na nangyayari, at ang isasagot natin is beyond our pay grade, beyond our capability. Mukhang hindi katanggap-tanggap ’yun. There’s always a whole-of-government approach, at diyan tayo nakukulangan,” sinabi ni Garin.

Aniya, nakahanda naman ang Kamara na suportahan ang DICT subalit kailangan nila ipakita kung ano ang plano nila laban sa online sexual abuse at exploitation of children, child sexual abuse materials, illegal gambling, cyberbullying, at social media addiction.

“Eh nakita mo nang nagpapatayan, nakita mo nang may mga kulto at recruitment na nangyayari, at ang isasagot natin is beyond our pay grade, beyond our capability. Mukhang hindi katanggap-tanggap ’yun. There’s always a whole-of-government approach, at diyan tayo nakukulangan,” sabi ni Garin. (VINA de GUZMAN)

PINANGUNAHAN ni President Ferdinand E. Marcos, Jr. ang groundbreaking ng itatayong istasyon sa Ninoy Aquino International Airport Terminal 3 ng Metro Manila Subway ng nakaraang linggo.

Ang nasabing istasyon ay kasama sa Contract Package 109 na gagamitin ang existing na NAIA expressway piers.

“Building a subway beneath a dense and highly developed city is no simple undertaking. That is why CP 109 will also introduce advanced engineering methods to the Philippines. Its tunnels will require the underpinning of existing expressway piers, the first application of this type of technology for tunnel construction in the country. Proven in Japan, this method will help ensure that construction can proceed safely beneath existing infrastructure while also maintaining structural integrity,” wika ni Marcos.

Inihayag niya na ang right-of-way ng nasabing terminal link ay 100 percent ng secured kung kaya’t ang pagtatayo ng nasabing istasyon sa NAIA T3 ay isang hakbang na may kasiguraduhan.

Ang istasyon sa NAIA T3 ay makapagbibigay din sa mga pasahero ng diretsong koneksyon sa mga malalaking paliparan sa bansa. Dagdag pa ni Marcos na ang ganitong pag-usad ng bansa ay nangagahulugan lamang na may tamang kooperasyon ang pamahalaan at pribadong sektor kasama na rin ang iba pang sektor na nagsusulong ng isang maunlad na bansa.

Sa ilalim ng CP 109, ang itatayong istasyon ay ilalagay sa NAIA T3 open parking lot na kadugtong sa NAIA Terminal 3 building sa tulong din ng New NAIA Infra Corporation.

Nakapaloob sa CP 109 ang pagtatayo na isang underground na istasyon at tunnels sa loob ng NAIA T3 Complex na may kabuohang route na 2.413 kilometro at magdudugtong sa lungsod ng Taguig at Pasay.

Inaasahang magkakaroon ang nasabing istasyon ng 70,000 na pasahero kada araw sa taong 2035 at madadagdagan pa ng 74,000 kada araw sa darating na 2045.

Nagbigay rin ng commitment si Marcos na magkakaron ng isang totoong programa upang maging makabago ang railway system ng bansa dahil gusto niya na mabigyan ang mga mamayan ng isang maganda at ligtas na transportasyon.

“This project, along with other railway projects that we are currently undertaking, such as the North-South Commuter Railway, the MRT Line 7, the Common Station and our other rail projects, form part of our broader effort to improve mobility and connectivity,” saad ni Marcos.

Ito ay binigyan ng JICA na may aprubadong pondo na nagkakahalaga ng P488.48 bilyon. May haba itong 33.103-km na inaasahang makababawas sa travel time mula Valenzuela at NAIA T3 na magiging 40 minuto na lamang mula sa dating 1 oras at 30 minuto na paglalakbay. LASACMAR

HUSTISYA at pagiging patas, magsilbing gabay sana sa pagboto ng senate impeachment court sa usapin ng botong kinakailangan para mahatulan si Vice President Sara Z. Duterte.

Ayon kay House Committee on Human Rights Chairperson Manila Rep. Bienvenido “Benny” Abante Jr., ang senado ang may awtoridad kung papaano ipapatupad ang constitutional requirement na “two-thirds of all the Members of the Senate” dala na rin sa isyu na ilang senator-judges ay walang partisipasyon o hindi maipatupad ang kanilang tungkulin sa impeachment trial.

“It is still up to the impeachment court to actually amend the rules, not to change it, but to amend it according to fairness and justice,” ani Abante.

Pinakinggan ng korte ang mga naging opinyon ng apat na dating mahistrado ng Supreme Court na inimbitahan bilang amici curiae o friends of the court.

Nagkaisa sina retired Chief Justices Hilario Davide Jr. , Artemio Panganiban, at Reynato Puno na ang bilang ng boto ay hindi naman kinakailangang nakapirmi sa 16 boto at maaaring magbago depende sa magiging bilangan ng mga senador.

Iba naman ang naging posisyon ni retired Associate Justice Adolfo Azcuna kung saan inihayag nito na ang lahat ng naka-upong senador ay nananatiling bahagi ng bilang at ang threshold ay permanente sa halip na pabago-bago.

Sinabi ni Abante na ang magkaka-ibang opinyon ay nagbigay ng importanteng gabay para sa senator-judges sa pagresolba sa isyu na hindi nakasaad sa konstitusyon ukol sa absolute number.

“Wala namang sinabing 16. Ang sinabi, two-thirds of all members,” pahayag ni Abante. “Gray area ’yung all members. Sino po sila? Ano po ba sila?”

Idinagdag pa ng mambabatas na dapat magabayan ang mga senator-judges mula sa kanilang narinig sa mga dating mahistrado.

“Naniniwala naman ako that the senator-judges have heard the four magistrates sa mga sinabi, and I believe that all of them, all of them, will be able to really make judgment on the basis of fairness, truth, and justice,” pahayag pa ni Abante.

Muling ring nanawagan si Abante kay Duterte na personal na sagutin ang mga akusasyon laban sa kanya.

“We want the truth to come out. We want accountability. We want transparency. We want fairness and justice in this impeachment court. And that is what the Filipino people want. Nais po ng taong-bayan na makita ang katotohanan tungkol dito,” pagtatapos ni Abante.

 (VINA de GUZMAN)

PINAGTIBAY ng mga mambabatas ang isang panukalang palawakin ang proteksiyon laban sa mga espiya, cyber-enabled spying, at iba pang banta sa national security ng bansa.

Sa botong 247 affirmative, 10 negative votes at zero abstentions, inaprubahan ng Kamara ang House Bill (HB) No. 9642, o kilalang “New Espionage Act,” kung saan binabago at dinadagdagan ang legal framework para protektahan ang anumang classified information, national defense assets at mga sensitibong government operations. 

Ayon sa mga may akda ng HB 9642, ang pag-eespiya sa kasalukuyan ay mas sopistikado katulad ng paggamit ng cyber networks, drones, financial channels at cyber attacks sa mga critical infrastructure ng gobyerno. 

Nabanggit sa nasabing panukala ang mga paraan na ipinagbabawal tulad ng unauthorized handling or disclosure of classified information, unauthorized access to plans or representations of critical infrastructure and defense facilities at di awtorisadong pagpasok sa mga national defense assets at critical infrastructure. 

Nagbigay katiyakan si House Majority Leader at Ilocos Norte Rep. Ferdinand Alexander “Sandro” A. Marcos na ipagpapatuloy ng House of Representatives ang mga hakbang laban sa mga banta sa seguridad ng bansa.

Bukod kay Marcos, kabilang sa mga may akda ng HB 9642 ay sina Reps. Ysabel Maria J. Zamora ng San Juan City, Jurdin Jesus M. Romualdo ng Camiguin at Gerville “Jinky Bitrics” Luistro ng Batangas. 

(VINA de GUZMAN)

TIGBAK ang isang lalaki habang sugatan naman ang isa sa mga suspek matapos ang naganap na rambulan na hinihinalang nag-ugat sa abutan ng ilegal na droga sa Caloocan City, Huwebes ng madaling araw.

Dead-on-arrival sa Caloocan City Medical Center si alyas “Jhonny”, residente ng Samson Road, Brgy. 73, sanhi ng mga tama ng saksak sa katawan habang naka-confine din sa naturang pagamutan ang suspek na si alyas “Jay-jay”, 32, ng PNR Compound, bunga ng isang tama ng saksak sa kaliwang tagiliran.

Sa ulat ng tanggapan ni Northern Police District (NPD) Director P/BGen. Benliner Capili, dakong alas-3:17 ng madaling araw nang makita ng isang babaing testigo ang pag-aabot ng sachet ng umano’y shabu ni alyas Jay-jay sa dalawang hindi niya kilalang lalaki.

Makalipas ang ilang sandali, dumating ang dalawang lalaki na kapuwa nakasuot ng itim na jacket at tiningnan siya ng masama habang may dinudukot na bagay sa bulsa kaya sinigawan sila ng isa pang suspek na si alyas “Daga” 34, na naging hudyat ng rambulan.

Una umanong nasaksak ng nasawi si ‘Jay-jay’ hanggang sa pagtulungan na siyang bugbugin at saksakin ng mga suspek na sina alyas “Ryan”, 26, alyas Daga at alyas “Randy” na dahilan upang tumakas na ang dalawa pang kasama ng biktima.

Patuloy na tinutugis ng mga tauhan ni Caloocan police chief P/Col. Joey Goforth ang tatlong suspek habang mahigpit namang binabantayan ang sugatang suspek na nakaratay sa pagamutan. (Richard Mesa)

BINANGGA ng barko ng China Coast Guard na CCG-21585 ang BFAR vessel na BRP Datu Magat Salamat habang nagsasagawa ng fuel subsidy mission para sa mga mangingisdang Pilipino, 54 nautical miles mula sa Palawan.

Nangyari ang insidente ngayong umaga, Setyembre 18, 2026.

Dalawang beses hinarang ng CCG ang BFAR vessel bago tuluyang binangga bandang 11:13 ng umaga .

Nasira ang railings, bakal na suporta, at iba pang kagamitan sa barko.

Nangyari ito sa loob mismo ng Exclusive Economic Zone ng Pilipinas, malapit sa Abad Santos Shoal. Rumesponde ang PCG sa utos ni Commandant Admiral Ronnie Gil Gavan para tiyakin ang kaligtasan ng crew.

Giit ng PCG, humanitarian mission ang ginagawa ng BFAR at malinaw na paglabag sa batas-dagat ang ginawa ng China. 

(Gene Adsuara)

UMABOT sa mahigit P.5 milyong halaga ng shabu ang nasamsam sa isang tulak na ginang na itinuturing bilang High-Value Individual (HVI) nang maaresto ng pulisya sa buy bust operation sa Valenzuela City, Huwebes ng gabi.

Sa kanyang ulat kay Northern Police District (NPD) Director P/BGen. Benliner Capili, kinilala ni Valenzuela Police Chief P/Col. Joseph Talento ang suspek na si alyas “Eyang”, 43, ng Brgy., Malinta.

Ayon kay Col. Talento, ikinasa ng mga operatiba ng Station Drug Enforcement Unit (SDEU) sa pangunguna ni P/Lt. Sherwin Dascil ang buy bust operation sa koordinasyon sa PDEA kasunod ng natanggap na impormasyon hinggil sa umano’y illegal drug activities ni ‘Eyang’ sa lungsod.

Hindi na nakapalag ang suspek nang arestuhin ng mga tauhan ni Lt. Dascil sa loob mismo ng kanyang bahay sa Sitio Dulong Tangke dakong alas-7:00 ng gabi makaraang bintahan umano ng P7,500 halaga ng shabu ang isang pulis na nagpanggap na buyer.

Nakuha sa kanya ang humigi’t kumulang 75 grams ng hinihinalang shabu na may standard drug price na P510,000.00, buy bust money na isang tunay na P500 bi at pitong P1,000 boodle money, P250 cash, ID at coin purse.

‎Ayon kay SDEU investigator P/MSg Ana Liza Antonio, kasong paglabag sa Sections 5 at 11 ng R.A 9165 o ang Comprehensive Dangerous Drug Act of 2902 ang isasampa nila laban sa suspek sa Valenzuela City Prosecutor’s Office.

Pinuri naman ni Mayor Wes Gatchalian ang Valenzuela City Police sa kanilang matagumpay na operation kontra illegal na droga. “Walang pamilyang dapat masira dahil sa droga. Tuloy ang laban natin kontra ilegal na droga. Sama-sama nating pangalagaan ang ating mga anak, pamilya, at komunidad para sa isang mas ligtas at panatag na Valenzuela,” giit niya. 

(Richard Mesa)

UMABOT sa 55 kahon ng Carnival Red cigarettes na nagkakahalaga ng P137,390.00 ang nasamsam ng mga tauhan ng National Capital Region Police Office (NCRPO) sa pakikipagtulungan sa Bureau of Internal Revenue (BIR) noong araw ng Huwebes sa Caloocan City.

Nagsagawa ng operasyon ang mga tauhan ni Northern Police District (NPD) Director P/BGen. Benliner Capili, kasama ang mga operatiba nina Caloocan police chief P/Col. Joey Goforth at Valenzuela police chief P/Col. Joseph Talento, matapos isuko ng isang delivery rider sa pulisya ang 19 na kahon ng naturang sigarilyo na ipinakuha sa kanya sa isang paupahang bodega sa Caloocan City para dalhin sa Valenzuela City.

Hindi sumipot at hindi na rin sumasagot sa tawag ang taong tatanggap dapat ng sigarilyo kaya’t nagpasiya ang rider na isuko ito sa nagpapatrulyang tauhan ng Valenzuela Police Station Intelligence Section (SIS) sa Feliciano Road, Brgy. Ugong dakong alas-3:20 ng madaling araw.

Para matukoy ang pinanggalingan ng puslit na sigarilyo, nakipag-ugnayan sa BIR-CAMANAVA ang pulisya na dahilan para maglabas ang ahensiya ng Mission Order na magpapahintulot na inspeksiyunin ang paupahang bodega sa Brgy. 89, Caloocan Cit,y na pinanggalingan na idedeliver sanang sigarilyo sa Valenzuela City.

Sa ginawang inspeksiyon sa naturang bodega, nakumpiska ang 55 pang kahon ng King Size Class A Filter na Carnival Red cigarettes na walang BIR stamp (IRS) na nagpapatunay ng hindi pagbabayad ng buwis.

Patuloy ang isinasagawang imbestigasyon ng pulisya upang makilala at madakip ang mga nasa likod ng pagbebenta ng puslit na sigarilyo habang ipinatatawag na rin ng pulisya ang may-ari ng paupahang bodega para hingan ng paliwanag.

Pinuri naman ni NCRPO Officer‑in‑Charge P/BGen. Christopher Abrahano si NPD Director P/BGen. Capili, mga opisyal at tauhan ng Caloocan at Valenzuela Police Stations, at BIR-CAMANAVA sa kanilang mabilis na aksiyon at pagtutulungan na nagresulta sa pagkakakummpiska sa mga puslit na sigarilyo. (Richard Mesa)