LTFRB IPINATAWAG ANG MGA OPERATOR NG 4 NA PUV NA SANGKOT SA MULTIPLE ROAD COLLISIONS SA MANILA BRIDGE

IPINATAWAG ng Land Transportation Franchising and Regulatory Board (LTFRB), ang mga operator ng apat na public utility vehicle (PUV) na sangkot sa sunod-sunod na banggaan sa Ramon Magsaysay Flyover (dating Nagtahan Bridge) sa Sta. Mesa, Maynila, na ikinasugat ng 13 katao.

Ayon kay Acting LTFRB Chairman Atty. Greg G. Pua, Jr., naglabas na ang LTFRB ng Show Cause Orders (SCOs)laban sa mga operator, kabilang ang dalawang pampasaherong jeepney at isang motorcycle taxi.

Inatasan din ni Pua ang mga kinauukulang insurance provider na agad sagutin ang mga gastusin sa ospital ng mga biktima, habang inatasan ang Regional Franchising Regulatory Office (RFRO)–Metro Manila na tiyaking maipatutupad ito.

Batay sa paunang imbestigasyon ng traffic police, nawalan ng preno ang isang jeepney at bumangga sa isa pang jeepney na nasa unahan nito, na nagresulta sa sunod-sunod na banggaan at pagkakasangkot ng isang motorcycle taxi at isa pang sasakyan.

Inatasan ni Acting Chairman Pua ang lahat ng operator na magsumite ng nakasulat at notarized na paliwanag kung bakit hindi dapat suspindihin o kanselahin ang kanilang mga prangkisa.

“Nais nating malaman kung ano talaga ang nangyari, at isa sa mga partikular na isyung nais nating tutukan ay ang ulat ng pulisya na nawalan ng preno ang pampasaherong jeepney na naging sanhi ng insidente,” ani Pua.

Inatasan din ang operator ng nasabing jeep, gayundin ang tatlo pang operator, na isumite ang mga dokumento kaugnay ng pagpaparehistro at roadworthiness ng kanilang mga sasakyan. Itinakda ang pagdinig sa Setyembre 10.

Samantala, ang operator ng pampasaherong jeep na umano’y naging sanhi ng aksidente ay nahaharap sa mga kaso kaugnay ng pagkuha ng reckless driver at kabiguang magbigay ng ligtas at komportableng pampublikong transportasyon. (PAUL JOHN REYES)