PINALAGAN ng Malakanyang ang alegasyon ng ‘selective justice’ matapos pagbigyan ng Sandiganbayan Third Division ang petisyon ni Senador Ramon “Bong” Revilla Jr., para magpiyansa para sa kanyang pansamantalang paglaya.

Si Revilla ay nahaharap sa kasong malversation na hindi maaaring piyansahan, kaugnay ng umano’y ghost project na nagkakahalaga ng P92.8 milyon sa Pandi, Bulacan.

Sinabi ni Presidential Communications Office Undersecretary at Palace Press Officer Claire Castro sa press briefing sa Malakanyang na ang ruling ay ginawa ng independent court at hindi ni Pangulong Ferdinand R. Marcos Jr.

“Ang pagdedesisyon po iyan, hindi po hawak ng Pangulo ang judiciary, alam natin na separation of powers,” ang sinabi ni Castro.

Binasura rin nito ang ulat na binibigyan ng special treastment ng administrasyon si Revilla dahil kinokonsidera itong kaalyado ng Pangulo.

“Kung iyan talaga ay may katotohanan at sasabihin natin may kamay ang Pangulo dito, hindi ba dapat hindi na lang siya sinampahan ng kaso, pero siya iyong naunang sinampahan ng kaso,” ang sinabi ni Castro.

“So walang logic, it doesn’t follow na siya ang unang pakakawalan dahil kaalyado,” aniya pa rin.

“Tandaan po natin, hindi lamang po si dating Senador Bong Revilla ang akusado rito. Siya lamang po ang nabigyan ng pagkakataon na makapag-post ng bail for temporary liberty. Iyong iba pong sangkot ay hindi po na-grant ang petition for bail,” aniya pa rin.

“Hindi po natin masasabi na hindi sapat ang naging trabaho ng Office of the Ombudsman at ng mga state prosecutors. Hindi ito gauge para sabihin na hindi sila nagtatrabaho,” dagdag na pahayag ni Castro.

Samantala, pinayagan ng Sandiganbayan si Revilla na magpiyansa ng P1M para sa kanyang malversation case ng kasong malversation na may kinalaman sa P92.8-milyong ghost flood control project sa Pandi, Bulacan.

Ayon sa Sandiganbayan, pinayagan si Revilla na makapagpiyansa dahil nabigo ang prosekusyon na magpakita ng matibay na ebidensya ng pagkakasala ng dating senador.

Nauna nang nagpasok ng not guilty plea si Revilla sa arraignment ng Third Division para sa kasong malversation, habang ang kanyang mga kapwa-akusado ay pawang nagpasok din ng not guilty plea.  

(DARIS JOSE)

SUPORTADO ng Malakanyang ang panawagan ni Defense Secretary Gilberto Teodoro Jr. sa mga public officials na panindigan ang posisyon ng Pilipinas sa West Philippine Sea (WPS).

Para kay Presidential Communications Office (PCO) Undersecretary at Palace Press Officer Claire Castro sa press briefing sa Malakanyang, ang katapatan ng bawat Filipino ay nararapat na para lamang sa bansa , maging anuman ang political affiliation o pagkakaiba sa ibang usapin.

Para kay Castro, walang nakikitang mali ang administrasyong Marcos sa naging pahayag ni Teodoro na dapat ikonsidera ng mga opisyal ng gobyerno na magbitiw sa puwesto kung hindi mapaninindigan ng mga ito ang Philippine laws at national policy, kabilang na rito ang matibay na posisyon sa karapatan sa WPS.

“Ang pinag-uusapan po natin dito ay mga Pilipino. Pilipino na ang dapat ang puso ay para sa Pilipinas lamang,” ang sinabi ni Castro.

“Hindi pinag-uusapan dito ang loyalty. Lahat tayong mga Pilipino dapat ang puso, ang paninindigan, ang ipaglalaban ay ang bansang Pilipinas lamang,” aniya pa rin.

Ang pahayag na ito ni Castro ay matapos na batikusin ni Davao City 1st District Rep. Paolo “Pulong” Duterte si Teodoro para sa di umano’y pagpapataw ng “loyalty test” at tila ginagawang demonyo ang Tsina kasunod ng panawagan ng Kalihim na panindigan ang posisyon ng Pilipinas sa WPS.

Winika ni Castro na labis na nakababahala kung sakaling ang isang elected official na gaya ni Pulong Duterte ay kinukuwestiyon ang inaasahan na dapat na panindigan ng mga Pinoy ang sovereign rights ng Pilipinas.

“Lubhang kataka-taka, very alarming, para sa isang katulad niya na mambabatas na lubhang parang nagpapakita na ang kaniyang loyalty ay hindi solido sa Pilipinas,” anito.

Binigyang diin pa ni Castro na ang panatilihin ang cordial ties ng Pilipinas sa tsina sa kalakalan, investments, at negosyo ay hindi dapat malito sa pagdepensa sa sovereign rights ng bansa.

Kaya nga aniya, makailang ulit na inuulit ni Pangulong Marcos na ang political differences ay hindi dapat na ipinapakahulugan ng pagprotekta sa interets ng bansa sa WPS.

Samantala, hinikayat naman ni Castro ang mga opisyal na paulit-ulit na iginigiit ang posisyon ng Tsina sa WPS na maging transparent ukol sa kanilang personal na pananaw.

“Mas maganda po siguro talaga na… lumantad na sila para makita natin kung sino ba talaga ang nagmamahal sa bansang Pilipinas,” aniya pa rin. (DARIS JOSE)

ANG “Refund now, bawi later” scheme na ipinapatupad ng Energy Regulatory Commission’s (ERC) sa Manila Electric Company (Meralco) ay lubhang ikalulugi ng mga consumers, ayon kay Gabriela Women’s Party Rep. Sarah Elago.

Partikular ni tinukoy ni Elago ang pagpayag ng ERC sa Meralco na bawiin ang P8.709 billion na unrecovered generation, transmission, system loss, at iba pang charges sa consumers sa susunod na tatlong taon.

Ginawa ng ERC ang desisyon ilang araw matapos ipag-utos sa Meralco na mag refund ng P9.51 billion sa excess distribution rate collections. 

At kahit pinaliwanag ng ERC na makakakuha rin ng refund ang mga consumers, sinabi ni Elago na walang saysay ito.

“Refund now, bawi later. Ano ang saysay ng refund kung babawiin din naman sa mga susunod na buwan at taon?” tanong ni Elago. 

Pinuna ni Elago ang desisyon ng ERC na taliwas sa panawagan ni Pangulong Ferdinand R. Marcos Jr. sa kanyang State of the Nation Address (SONA) na alisin ang paniningil ng systems loss ng kuryente sa mga consumers.

“Sa isang banda, sinasabi ng administrasyon na aalisin ang system loss charges sa electric bill. Sa kabilang banda, pinapayagan namang singilin muli ang mga konsyumer para rito,” sabi ni Elago.

“Hindi kasalanan ng mga mamamayan ang pagkawala ng kuryente sa transmission at distribution, maging ito man ay dulot ng technical losses o iba pang operational inefficiencies. Hindi sila dapat ang pinagbabayad sa gastos na bahagi ng operasyon ng mga power utility,” dagdag ng kongresista.

Iginiit ni Elago na kailangan ang pangmatagalang solusyon. “Hangga’t nananatili ang EPIRA (Electric Power Industry Reform Act of 2001) at ang mga patakarang nagpapahintulot na ipasa sa mga konsyumer ang iba’t ibang gastos ng mga power utilities, mananatiling magulo at hindi makatarungan ang sistema ng paniningil sa kuryente.” 

(VINA de GUZMAN)

MAHIGIT 100 manggagawa ang nagsagawa ng kilos-protesta sa harap ng Department of Labor and Employment o DOLE Central Office sa Maynila ngayong umaga laban sa pagpapatigil sa 85-pisong dagdag sa arawang sahod sa Metro Manila.

Pinangunahan ng Bukluran ng Manggagawang Pilipino o BMP, Workers Federation at Oriang Women’s Movement ang protesta na isinabay sa flag-raising ceremony ng DOLE.

Naglabas noong Huwebes ang Pasig City Regional Trial Court ng temporary restraining order laban sa pagpapatupad ng wage increase.

Ayon kay BMP President Luke Espiritu, labag sa Labor Code ang TRO laban sa mga kautusan ng national at regional wage boards.

Iginiit naman ng mga grupo na hindi sapat ang nakatakdang dagdag-sahod at lalo lamang pinabigat ng TRO ang kalagayan ng mga manggagawa. (Gene Adsuara)

NAGWAKAS na ang maliligayang araw ng dalawang teenager na wanted sa kasong Rape, Murder at Frustrated Murder nang maaresto ng pulisya sa magkahiwalay na manhunt operation sa Caloocan at Malabon Cities.

Sa ulat ng tanggapan ni Northern Police District (NPD) Acting Director P/BGen. Benliner Capili, nakatanggap ng impormasyon ang mga operatiba ng District Special Operations Unit (DSOU) hinggil sa kinaroroonan ng akusado na na si alyas “Totoy” na nakatala bilang No. 3 sa Top Ten Most Wanted Person sa NPD.

Katuwang ang mga operatiba ng Women and Children Protection Desk, Warrant and Subpoena Section ng Caloocan City Police Station, at NDIT-RIU NCR, agad ikinasa ng DSOU ang operation na nagresulta sa pagkakaaresto sa akusado sa Brgy., 181.

Hindi na nakapalag ang akusado nang isilbi ng mga pulis ang arrest warrant na inisyu ng Family Court, Branch 1, Caloocan City para sa kasong Rape (3 Counts) at Sexual Assault in relation to RA 7610 (3 Counts) na walang inilaang piyansa.

Bitbit naman ang arrest warrant na inisyu ng Malabon Regional Trial Court para sa kasong Murder at Frustrated Murder, isinawa ng mga operatiba ng District Mobile Force Battalion (DMFB) Intelligence Section ang pagtugis sa akusado na si alyas “Pedro” kabilang sa mga Most Wanted Person ng Malabon City Police Station.

Maayos naman umanong naisilbi sa akusado na residente ng Brgy., Longos, Malabon City ang naturang warrant sa kasong Murder na walang inirekomendang piyansa at Frustrated Murder na may inilaang piyansa na halagang ₱200,000. (Richard Mesa)