KINUWESTYON ng isang mambabatas ang basehan ng China na inaangkin ang mga isla sa Batanes sa hilagang bahagi ng Pilipinas.

Ayon kay Batanes Rep. Ciriaco B. Gato Jr., nakakabahala at nakaalarma ang mga alegasyon na ang mga isla ng Batanes ay “natural geographical extension” ng Taiwan, isang isla na sinasabing soberanya ng China.

“We treat any insinuation that seeks to question or undermine the absolute sovereignty of the Republic of the Philippines over our islands with utmost gravity,” sinabi ni Gato.

Iginiit ni Gato na ang Batanes ay lalawigan ng Republika ng Pilipinas at ang mga Ivatans na nakatira sa rehiyon ay mga Pilipino.

“ These are enduring truths established by history, affirmed by our Constitution and laws, and embodied in the identity and collective experience of our people,” dagdag ng kongresista.

Samantala, sinabi naman ni Akbayan Partylist Rep. Perci Cendaña na isa umanong malaking kahibangan ang pagsabi na pag-aari ng Tsina ang Batanes sa pamamagitan ng Taiwan.

Ayon kay Cendaña, desperado na umano ang China dahil habang papalapit ang 10th anniversary ng 2016 Arbitral Award victory sa West Philippine Sea ay parami nang parami ang kumikilala sa buong mundo na sa Pilipinas ang WPS.

“The Chinese government has long resorted to pseudo-science and pseudo-history to justify its pseudo-claim to the West Philippine Sea. Maliban sa basag na basag na internationally ang propaganda nila, dumadami na ang kumokondena sa pangha-harass nila sa Pilipinas. China should wake up to reality and respect our sovereignty,” ani Cendaña.

 (Vina de Guzman)

ISINUSULONG ng isang mambabatas ang pagkakaroon ng mga halfway houses o safe shelters sa bawat siyudad at probinsiya para sa mga survivors ng gender-based violence at iba pang uri ng pang-aabuso.

Sa House Bill No. 10044 o “Bahay Kanlungan Act of 2026”, layon ni House Senior Deputy Minority Leader at Mamamayang Liberal (ML) Partylist Rep. Leila de Lima na masiguro na ang lahat ng survivors, kahit anong idad, kasarian o sexual orientation, ay may madaling access ng proteksyon, temporary shelter, at support services para matulungan silang bumangon at maka-recover. 

“A nationwide halfway house system would provide a more inclusive and rehabilitative mechanism to protect survivors of violence and those vulnerable to abuse,” ani De Lima. “As a framework for protection, recovery, and reintegration, this measure ensures that all survivors receive guidance, care and sustained support.”

sa ngayon, ang mga residential care facilities ay pinangangasiwaan ng Department of Social Welfare and Development (DSWD), kabilang na ang Haven for Women at Home for Girls, ngunit hindi sapat para makapaglaan ng proteksyon sa mga survivors ng pang aabuso partikular na yaong sexual orientation, gender identity, gender expression, and sex characteristics (SOGIESC).

Sinabi pa ni De Lima, na ang mga survivors na may diverse gender identities ay patuloy na dumaranas ng violence at systemic discrimination, pero walang sapat na proteksyon sa ilalim ng kasalukuyang batas.

Upang matugunan ang mga gaps nito, isinusulong ng mmbabatas na palakasin ang kapasidad ng local governments na maglaan ng integrated services para sa kaligtasan, dignidad at hustisya ng mga ito.

Sa ilalim ng HB 10044, ang DSWD ay naatasan na magbuo o mag- accredit ng isang (1) Inclusive Halfway House sa bawat siyudad at probinsiya sa buong bansa.

Ang mga survivors ay maaaring paglaanan ng pansamantalang accommodation sa safe shelters ng hanggang 90 araw na maaaring palawigin kung kinakailangan.

hindi rin dapat ibalik o palabasin ang survivor sa umanoy :perpetrator, abusive environment, orvunsafe setting.’

Naging inspirasyon ng panukala ang Quezon City’s Bahay Kanlungan, ang unang LGU-run shelter na nagbibigay ng comprehensive medical, psychological, police, at legal assistance sa kababaihan, bata at LGBTQ na itinuturing na victim-survivors ng gender-based violence. 

 “Victims of abuse or those at risk must have a safe place to go. This is essential not only to protect them from further harm, but also to provide a stable foundation where they can begin healing and rebuilding their lives. Walang sinuman ang dapat dumanas at magtiis ng karahasan at pang-aabuso. Obligasyon ng Estado hindi lang ang tuldukan ang pananakit o anumang uri ng dahas, kundi siguruhin din na mabibigyan ang mga biktima ng karampatang kalinga at serbisyo tungo sa pamumuhay na ligtas at may dignidad,” pahayag pa nito.

(Vina de Guzman)

LABING-TATLONG wanted persons, kabilang ang walong most wanted person ang nalambat sa pinaigting na manhunt operation ng Northern Police District (NPD) at mga police station sa lugar ng CaMaNaVa.

Isang 23-anyos na college student na residente ng Barangay 27, Caloocan City, ang inaresto ng mga operatiba ng District Special Operations Unit (DSOU) ng NPD sa bisa ng arrest warrant para sa kasong Attempted Rape na inisyu ng Regional Trial Court, Branch 126, Caloocan City, na may inilaang piyansa na P120,000.

Nadakip naman ng mga operatiba ng District Intelligence Division – Intelligence Operations Section (DID-IOS) ang 38-anyos na lalaki na akusado sa Frustrated Murder na inisyu ng RTC, Branch 126, Caloocan City, na may inirekomendang piyansa na P200,000.

Sinilbihan ng mga operatiba ng Caloocan Police Warrant and Subpoena Section ng warrant of arrest para sa kasong Murder na inisyu ng RTC, Branch 126, Caloocan City, na walang inirekomendang piyansa ang 36-anyos na lalaki habang nakakulong sa BJMP ng Caloocan City.

Habang dinampot naman ng mga tauhan ng Bagong Bagong Barrio Police Sub-Station 5 sa bisa ng arrest warrant para sa paglabag sa RA 6539 (Anti-Carnapping Act) na inisyu ng RTC Branch 13, Malolos City, Bulacan, na may inilaang piyansa na P180,000 ang 29-anyos na babaeng cook at residente ng Barangay 5, ng lungsod.

Sa Malabon, isinilbi rin ng mga operatiba ng WSS-CCPS ang arrest warrant para sa kasong Murder na inisyu ng RTC Branch 126, Caloocan City, na walang inirekomendang piyansa laban sa 40-anyos na ginang na kasalukuyang nakapiit sa BJMP Female Dorm.

Inaresto naman ng mga operartiba ng WSS ng Navotas CPS ang 23-anyos na bartender na residente ng Barangay San Jose, Navotas City, sa bisa ng warrant of arrest para sa paglabag sa Section 5(1) ng RA 9262 at Section 4(d) ng RA 9995 na inisyu ng Family Court, Branch 9, Navotas City.

Natimbog din ng mga operatiba ng WSS ng Valenzuela CPS ang 51-anyos na driver na residente ng Barangay Bancal, Meycauayan City sa bisa ng arrest warrant na inisyu ng RTC Branch 172, Valenzuela City para sa kasong Frustrated Murder na may inirekomendang piyansa na P200,000.

Hinihikayat naman ni NPD Acting Director P/BGen. Benliner Capili ang publiko na makiisa sa pagpapanatili ng kapayapaan at kaayusan sa pamamagitan ng maagap na pagbibigay ng impormasyon tungkol sa mga taong pinaghahanap ng batas at iba pang kahina-hinalang gawain. 

(Richard Mesa)

UMABOT sa mahigit P.3 milyong halaga ng shabu ang nasamsam sa isang tulak ng droga na itinuturing bilang High-Value Individual (HVI) matapos maaresto ng pulisya sa ikinasang buy bust operation sa Valenzuela City, Biyernes ng umaga.

Nakapiit sa Custodial Facility Unit ng Valenzuela City Police Station ang suspek na si alyas “Ping”, 53, ng Brgy., Ugong at mahaharap sa kasong paglabag sa Sections 5 at 11 ng R.A 9165 (Comprehensive Dangerous Drug Act of 2002).

Sa ulat ni Police Investigator PSSg Cris Paul Collo kay Valenzuela Police Chief P/Col. Joseph Talento, ikinasa ng mga operatiba ng Station Drug Enforecement Unit (SDEU) sa pangunguna ni P/Lt. Sherwin Dascel ang buy bust operation laban sa suspek sa koordinasyon sa PDEA kasunod ng natanggap na impormasyon hinggil sa umano’y pagbebenta nito ng droga.

Dakong alas-7 ng umaga nang makipagtransakyon umano ang suspek sa isang pulis na nagpanggap na buyer sa harap ng isang junk shop sa kahabaan ng Bignay-Punturin Bypass Road, Brgy. Bignay na nagresulta sa pagkakaaresto sa kanya nang tanggapin ang marked money mula sa pulis kapalit ng isang plastic sachet ng shabu.

Bukod sa nabiling isang plastic sachet ng umano’y shabu, nakuha pa sa suspek ang limang plastic sachets ng shabu na aabot sa kabuuang timbang na 50 grams na nagkakahalaga ng P340,000, buy bust money na isang tunay na P500 bill at 8-pirasong P1000 boodle money, P150 cash at kanyang gamit na isang motorsiklo.

Pinuri Northern Police District (NPD) Acting Director P/BGen. Benliner Capili ang operating team sa kanilang matagumpay na operation na bahagi aniya ng pinaigting na kampanya ng NPD laban sa mga indibidwal na nagpapakalat ng illegal na droga. (Richard Mesa)

KAAGAD naghatid ng tulong na food packs at hygiene kits ang Pamahalaang Lungsod ng Malabon sa pangunguna ni Mayor Jeannie Sandoval sa 25 pamilyang naapektuhan ng naganap na sunog sa Samson, Brgy. Baritan at pansamantalang nanunuluyan sa Amang Rodriguez Elementary School upang makatulong sa kanilang agarang pangangailangan habang sila ay bumabangon mula sa nasabing insidente. (Richard Mesa)

TIMBOG ang dalawang kawatan na lumimas sa mga kagamitan, alahas at gadget sa bahay ng 54-anyos na biyuda sa Caloocan City nang matunton ng pulisya sa Malabon City, Huwebes ng hapon.

Sa ulat ng tanggapan ni Northern Police District (NPD) Director P/BGen. Benliner Capili, umalis ang biktimang si alyas “Mary” upang gampanan ang trabaho sa Ilocos Sur noong Hunyo 30 at bago lumisan ay tiniyak na nakakandado ang pintuan sa harap at likod ng kanyang bahay sa Jude Street, Kingstown II, Brgy., 171, Bagumbong.

Nang dumating ang biktima noong alas-9:10 Huwebes ng umaga, Hulyo 9, nagulat siya dahil nalimas na halos lahat ang mga gamit at alahas sa kanyang bahay at wasak din ang likurang pintuan ng bahay na posibleng dinaanan ng mga suspek.

Nasaksihan naman ng isang testigo ang ginawang paghahakot ng mga suspek sa kagamitan ng biktima noong araw ng Martes at Miyerkules na isinakay sa Mitsubish Mirage, kaya agad nagsagawa ng follow-up operation ang mga tauhan ni Gen. Capili na nagresulta sa pagkakadakip sa mga suspek na sina alyas “Olatorio” 28, at alyas “Borbes”, 29, alas-4:00 ng hapon sa Brgy. Flores, Malabon City.

Nabawi sa mga suspek ang P45,000 halaga ng automatic washing machine, P25,000 halaga ng oven, P7,000 na turbo broiler, P35,000 na ice crusher, P15,000 na cake mixer, at P25,000 na steamer na kabilang sa kanilang tinangay, habang hindi pa nababawi ang gold necklace, gold bracelet, gold ring, Louie Vuitton wrist watch na may kabuuang halagang P290,000.00, pati na ang P34,000 Samsung refrigerator, P65,000 split type aircon, at P70,000 na Apple Ipod.

Sinabi ni BGen. Capili na magiging bahagi na rin ng imbestigasyon ang anak na lalaki ng biktima matapos aminin ng biyuda na kaibigan ng kanyang anak ang mga nadakip na suspek. (Richard Mesa)