KAAGAD inatasan ni Northern Police District (NPD) Director P/BGen. Benliner Capili ang Caloocan City Police Station na magsagawa ng imbestigasyon, kaugnay sa nag-viral sa social media na video ng mga menor-de-edad na lalaki na ipinangangalandakan ang hawak na baril at patalim habang nagmumura at may binabanggit na pangalan na nangyari kamakailan sa Barangay 12, Lungsod ng Caloocan.

Sa inilabas na kalatas ng Caloocan Police Station, nakasaad na batay sa kanilang pakikipag-ugnayan sa mga magulang ng mga menor-de-edad na lalaki, kagagawan umano ng isang indibiduwal na nananakot at humihingi ng pera sa kanila, kapalit na hindi pagpo-post sa online ng naturang video.

Bukod sa pamilya ng mga kabataan, pinulong din ng kapulisan ang mga opisyal ng Barangay 12 sa Dagat-dagatan upang matiyak ang kaligtasan ng mga menor-de-edad at maiwasan ang paglala ng sitwasyon.

Inireport na rin ni Col. Joey Goforth, hepe ng Caloocan police kay BGen. Capili na kontrolado na sa ngayon ang sitwasyon habang sinisiyasat pa nila ang umano’y ginagawang pananakot at pangingikil ng nag-upload umano ng video sa pamilya ng mga menor-de-edad para sa posibleng pagsasagawa ng legal na aksiyon.

Nagbabala rin ang pulisya sa publiko na iwasang ipakalat o i-share pa ang hindi beripikadong impormasyon at hayaan silang pangasiwaan ang ganitong uri ng insidente na nababatay sa umiiral na batas. 

(Richard Mesa)

PINABULAANAN ni Cabinet Secretary Benhur Abalos Jr., ang tsismis na nagbitiw sa kanyang puwesto si Health Secretary Ted Herbosa dahil sa mga reklamong may kaugnayan sa umano’y iregularidad sa P1.8 bilyong mobile clinic procurement program, mga isyu sa mga expired medicine, at paggamit umano ng Medical Assistance for Indigent and Financially Incapacitated Patients (MAIFIP) program para sa layuning pampulitika.

Sinabi ni Abalos na may kinalaman sa operasyon sa kanyang (Herbosa) tuhod na nauwi nga sa pagsusumite nito ng kanyang letter of resignation .

“May nabasa kasi ako kanina. wala iyon… wala iyon. He’s just a good friend. Nagkaroon siya ng operation sa kanyang tuhod. Iyon nga, nandoon iyon sa kanyang letter of resignation na kanyang isinumite. There’s no truth to the rumor na sinasabing .. ganoon siya…,” ani Abalos.

Binisita aniya niya si Herbosa sa ospital. Kinamusta niya ang dating Kalihim sabay sabing “He is a good friend.”

Nauna rito, kinumpirma ng Malakanyang na nagbitiw na sa pwesto si Herbosa.

Idinahilan ni Herbosa kay Pangulong Ferdinand Marcos Jr. ang kanyang kondisyon sa kalusugan.

“Itinalaga ni Pangulong Ferdinand R. Marcos Jr. ngayong araw bilang Kalihim ng Department of Health si Dr. Jose S. Pujalte Jr. baon ang malawak na karanasan at natatanging pamumuno bilang doktor, hospital administrator, guro at lingkod-bayan na may mahigit na tatlong dekada sa pagsusulong ng pampublikong pangkalusugan, ayon kay Presidential Communications Office (PCO) Undersecretary at Palace Press Officer Claire Castro sa press briefing sa Malakanyang.

Tinanggap aniya ng Pangulo ang resignation letter ni Herbosa.

Sa kabilang dako, naging bahagi ng DOH si Dr. Pujalte Jr. taong 1991 at natapos ang kanyang orthopedic residency sa Philippine Orthopedic Center noong 1994. 

Nagtapos si Dr. Pujalte Jr. sa kursong medisina sa University of the Philippines College of Medicine at kalaunan ay nagtamo ng Master’s Degree sa Hospital Administration mula sa Ateneo Graduate School of Business. 

Noong 20028 kinilala rin bilang Career Executive Service Eligible, isang patunay ng kaniyang kakayahan at kahandaan sa parehong larangan ng paggamot at public administration. 

Nagsilbi rin siyang guro sa University of the Philippines-Manila, FEU Nicanor Reyes Medical Foundation at San Beda College of Medicine.

“Sa kaniyang pagpasok sa DOH, inaasahang pangungunahan ni Dr. Pujalte Jr. ang ahensiya sa pagpapatuloy ng mga hakbang ni Pangulong Marcos Jr. upang higit na mapatatag ang healthcare system sa bansa, maisulong ang dekalidad na serbisyong pangkalusugan at maisulong ang mabuting kalusugan para sa lahat,” ang sinabi ni Castro.

Sa ulat, sinabi di umano ni Herbosa na kailangan niyang sumailalim sa tatlo hanggang apat na buwan na extensive rehabilitation matapos ang isang kamakailang medical procedure.

Sinabi pa umano ni Herbosa na “I find it unfair that I will not be able to devote my full time and effort to important matters of the DOH.”

Matatandaang itinalaga si Herbosa bilang kalihim ng DOH noong 2023 matapos magsilbi bilang isa sa mga pangunahing public health adviser ng administrasyong Marcos.

Mariin namang itinanggi ni Herbosa ang anumang gawain, habang iginiit ng DOH na ang mga programa nito ay sumusunod sa umiiral na mga regulasyon ng pamahalaan at layuning mapabuti ang serbisyong pangkalusugan.

Samantala, sinabi naman ni Castro na hindi nabanggit ang patungkol sa mga kaso ni Herbosa at ang isinaalang-alang ng Pangulo ay ang kalusugan ng dating Kalihim. 

(DARIS JOSE)

BINISITA ni Pangulong Ferdinand R. Marcos Jr. , araw ng Lunes ang Camiguin General Hospital upang tiyaking nakatatanggap ang mga mamamayan ng libre o abot-kayang serbisyong pangkalusugan.

Sa kanyang pagbisita, ininspeksyon ng Pangulo ang operasyon ng emergency room at internal medicine ward ng ospital.

Sinuri rin niya kung paano ipinatutupad ang Zero Balance Billing (ZBB) upang matiyak na walang babayarang gastusin ang mga kuwalipikadong pasyente.

Bahagi ang pagbisitang ito ng Pangulo ng patuloy na pagsisikap ng administrasyon na tugunan ang mga suliranin sa sistema ng kalusugan sa bansa, kabilang ang kakulangan ng access sa mahahalagang serbisyong medikal, lalo na sa mga liblib at mahihirap na lugar, at ang mataas na gastos sa pagpapagamot na direktang binabayaran ng mga pasyente.

Matatandaang inatasan ng Pangulo ang Department of Health (DOH), sa pakikipagtulungan ng Department of the Interior and Local Government (DILG) at PhilHealth, na palakasin ang mas direkta at mas episyenteng paghahatid ng serbisyong pangkalusugan sa pamamagitan ng pinagsama-samang primary care providers at healthcare networks.

Mula Hulyo 2025 hanggang Mayo 2026, gumastos ang pamahalaan ng PhP67 bilyon upang pondohan ang pagpapagamot ng 2.76 milyong pasyente sa ilalim ng Zero Balance Billing scheme.

Simula ngayong buwan, ipinatutupad na rin ang ZBB sa mga lokal na ospital sa mga lalawigan ng Sarangani, Laguna, Aklan, Bataan, Batangas, at Quezon.

Mula naman Enero hanggang Mayo ngayong taon, 1.3 milyong pasyente ang nakinabang sa Medical Assistance to Indigents and Financially Incapacitated Patients Program (MAIFIP).

Patuloy ding isinusulong ng administrasyon ang iba pang programang pangkalusugan tulad ng Yaman ng Kalusugan Program (YAKAP), kung saan 26.10 milyong Pilipino na ang nakarehistro sa 4,374 YAKAP providers sa buong bansa.

Samantala, ang isa pang proyekto na Bagong Urgent Care and Ambulatory Service (BUCAS) Centers ay nakapagbigay na ng serbisyo sa 2.07 milyong pasyente mula Marso 2024 hanggang Hunyo 2026.

Sa kasalukuyan, may 63 BUCAS Centers na sa buong bansa.

Ang Camiguin General Hospital, na matatagpuan sa Mambajao, Camiguin, ay isang Level 1 General Hospital sa ilalim ng DOH. Mayroon itong 105-bed capacity at 593 health personnel.

Nagbibigay ang ospital ng outpatient at inpatient services, kabilang ang general surgery, orthopedics, obstetrics, at gynecology. ( DARIS JOSE)

KINOKONSIDERA ng Malakanyang na magpataw ng mas mabigat na parusa at malaking multa sa mga pasaway na nagtatapon ng basura sa kung saan-saan lang.

Bahagi ito ng pagsisikap ng gobyerno na tugunan ang pagbaha.

“At sa ngayon ay pinag-uusapan na lakihan ang penalty para sa mga pasaway na nagtatapon ng basura kung saan-saan lang. Itabi ang inyong basura at i-dispose nang tama. Sa ganitong paraan ay makakatulong kayo na mapanatiling malinis ang paligid at ligtas ang mga komunidad mula sa baha,” ayon kay Communications Office (PCO) Undersecretary at Palace Press Officer Claire Castro sa press briefing sa Malakanyang.

Aniya pa, may mga mamamayan aniya na nahuli sa CCTV na nagtatapon ng basura sa mga creek. May mga mamamayan din aniya na nagtatapon din ng kanilang basura sa labas ng bintana habang umaandar ang sasakyan.

“Ang administrasyon ay ginagawa ang lahat pero ang iba, dumadagdag pa sa problema. Maging responsable para sa sarili at para sa bayan,” ani Castro.

“Kung hindi man po kayo makatulong sa paglilinis ng mga drainage ay huwag na pong maging sanhi ng pagbaha. Tumulong na lang po kayo. Kapag nahuli kayong nagtatapon ng basura, papanagutin kayo,” diing pahayag ni Castro.

Sa kabilang dako, sinabi ni Castro na may mga ahensiya ng pamahalaan ang kaliwa’t kanan ang trabaho sa flood control works.

Ito’y upang tiyakin ang kaligtasan ng mga komunidad at mapanatiling mabilis ang daloy ng trapiko sa mga lansangan.

Tinukoy ni Castro ang walang patid na trabaho ng MMDA sa pamumuno ni Chairman Don Artes at GM Nic Torre, at DPWH sa pamumuno ni Sec. Vince Dizon nitong mga nakaraang araw bilang paghahanda sa epekto ng Bagyong Inday.

“Alinsunod ito sa utos ni Pangulong Ferdinand R. Marcos Jr. na tiyakin ang mabilis na pagbaba ng tubig sa mga bahaing lugar. Kaya naman kahit umuulan o hindi ay patuloy ang trabaho ng mga kawani ng MMDA at DPWH upang linisin ang mga daluyan ng tubig, panatilihing operational ang mga pumping station at clearing and dredging activities sa iba’t ibang bahagi ng Metro Manila,” ang sinabi pa ni Castro.

“Ang resulta? Mas mabilis na humupa ang baha at nanatiling passable sa mga commuter at motorista ang mga kalsada. May mga lugar na hindi pa rin agad humuhupa ang baha kaya’t hindi titigil ang administrasyon na maisaayos ang lahat ng lugar sa Pilipinas na lubhang bahain,” aniya pa rin.

Kaya nga aniya “Tuluy-tuloy lang ang trabaho. Pero hindi ito natatapos dito, kailangan ng pamahalaan ang tulong ng bawat Pilipino.”

“Tuluy-tuloy po ang aksiyon ng pamahalaan upang labanan ang baha. Tumulong po tayong lahat para maiwasan natin ang panganib at abala dulot ng maling pagtatapon ng basura. Responsibilidad natin lahat na maging maayos ang ating bansa,” ang winika ni Castro. 

( DARIS JOSE)

HINDI pabor si Deputy Minority Leader at ACT Teachers Party-list Representative Antonio Tinio sa isinusulong ni Defense Secretary Gilberto “Gibo” Teodoro na taasan ang Department of National Defense (DND) budget katumbas sa 4% ng gross domestic product (GDP).

Naniniwala ang mambabatas na ito ay isang direct imposition ng interes ng US at pagsisilbi nito bilang mouthpiece umano ng US sa Pilipinas.

“Si Gibo ang numero unong tagapagsalita ng US sa Pilipinas. Ang kanyang panawagang pagtaas ng military spending ay hindi para sa ating mga pangangailangan kundi para sa interes ng US kontra sa China. Ang gusto ng US, Pilipinas ang gumastos para sa pagdepensa ng interes ng US, sa balangkas ng mapanlinlang nitong iskema ng ‘collective defense, ani Tinio.

Tinukoy nito ang May 2026 Shangri-La Dialogue sa Singapore, kung saan hiniling ni U.S. Secretary of Defense Pete Hegseth sa mga kaalyado sa Asia-Pacific na maglaan ng 3.5%- 5% ng GDP sa defense.

“Ito ang bagong estratehiya ng imperyalismong US—ang pag-uudyok sa ating bansa na gumastos ng bilyun-bilyong piso para suportahan ang kanilang geopolitical competition laban sa China,” pahayag ni Tinio. 

“Habang nagtutulak si Gibo para sa dagdag na pera para sa mga missile, fighter jet, barko, at submarine, nag-aaral sa mga siksikang klasrum na walang libro at internet ang ating kabataan, walang access sa sapat na healthcare ang napakarami, at walang disenteng pabahay ang mga maralita.”

Sinabi nito na hindi tulad ng Japan, South Korea, o European NATO members, di kakayanin ng Pilipinas ang malaking gastos para sa military expenditures ng walang sinasakripisyong importanteng social services.

“Mas kailangang unahin ang pagtataas ng budget sa edukasyon katumbas sa 6% ng ating GDP ayon sa UN. Gayon din sa serbisyong pangkalusugan na dapat ay 5% ayon naman sa WHO,” dagdag ni Tinio.

Nanawagan naman ang mambabatas sa gobyerno na ibasura ang pressure ng US at iprayoridad ang tunay na pangangailangan ng sambayanang Pilipino.

(Vina de Guzman)

INARESTO ng Bureau of Immigration (BI) ang tatlong dayuhan sa magkakahiwalay na operasyon sa Luzon at Visayas dahil sa paglabag sa mga batas sa imigrasyon.

Kinilala ni Immigration Commissioner Joel Anthony Viado ang mga naarestong dayuhan na sina Henri Joel Atanga Betayene, 35, ng Cameroonian; Murat Fentci, 53, isang Turkish national; at Mario Angelai, 60, isang Italian national.

Pinangunahan ang operasyon ng BI Intelligence Division at ng mga Regional Intelligence Operations Units sa magkakahiwalay na lugar sa Cainta, Rizal; Sagbayan, Bohol; at Baguio City.

Naaresto si Betayene sa isang subdivision sa Cainta, Rizal matapos makumpirma ng mga intelligence operative na nag-overstay na siya sa Pilipinas.

Samantala, inaresto naman si Fentci sa Barangay Canmaya Diot, Sagbayan, Bohol matapos mapatunayan sa beripikasyon na nanatili siya sa bansa lampas sa itinakdang panahon ng kanyang pananatili.

Sa Baguio City, inaresto ng mga intelligence operative si Angelai na nahuling nagtatrabaho bilang chef sa isang lokal na restawran sa kabila ng pagkakaroon lamang ng tourist visa. Isinagawa ang operasyon matapos ang surveillance at beripikasyon na aktibo siyang nagtatrabaho nang walang kaukulang work visa o permit.

Kasalukuyang nasa kustodiya ng Bureau of Immigration ang tatlong dayuhan para sa booking at dokumentasyon at sasailalim sa deportation proceedings dahil sa paglabag sa Philippine Immigration Act. 

(Gene Adsuara)

SA kulungan ang bagsak ng dalawang lalaki matapos maaktuhang gumagamit umano ng droga sa magkahiwalay na lugar sa Valenzuela City.

Batay sa ulat, nagsasagawa ng anti-criminality operation ‘Oplan Galugad’ ang mga tauhan ni Valenzuela Police Chief P/Col. Jospeh Talento nang maaktuhan nila ang isang lalaki na sumisinghot umano ng droga sa Karuhatan Public Cemetery sa Padrigal St., Brgy., Karuhatan pasado ala-1:45 ng madaling araw.

Kaagad nila itong nilapitan sabay nagpakilala bilang mga pulis na nakatalaga sa Police Sub-Station 9 bago inaresto at nakumpiska sa suspek na si alays “Rey”, 37, ang isang nakabukas na plastic sachet na may bahid ng umano’y shabu at mga drug parapernalya.

Nauna rito, alas-11:30 ng gabi nang mahuli din sa akto ng mga tauhan ng Police Sub-Station 2 si alyas “Alvin”, 35, na gumagamit din umano ng droga sa loob ng isang bahay sa Urutia St., Brgy., Gen T De Leon.

Nakumpiska rin sa kanya ang isang nakabukas na plastic sachet na may bahid umano ng hinihinalang shabu at mga drug parapernalya.

Na-inquest na ang mga suspek kaugnay sa kasong paglabag sa R.A 9165 o Comprehensive Dangerous Drug Act of 2002. (Richard Mesa)

NAGWAKAS na ang halos limang taon na pagtatago ng isang most wanted na rapist sa Lungsod ng Malabon nang matunton ng pulisya sa manhunt operation sa Malolos, Bulacan.

Sa ulat ng tanggapan ni Northern Police District (NPD) Acting Director P/BGen. Benliner Capili, ang 44-anyos na akusado ay nakatala din bilang No. 2 sa Top Ten Most Wanted Person sa NPD at No. 1 sa Malabon City Police Station.

Kaagad ikinasa ng mga tauhan ni Malabon Police P/Col. Kenneth Mission ang operation laban sa akusado kasunod ng natanggap na impormasyon hinggil sa kinaroroonan nito

Hindi na nakapalag ang akusado nang masukol ng pinagsamang mga operatiba ng Malabon Police Warrant and Subpoena Section at WCPD sa Barangay Tikay, Malolos, Bulacan

Sa bisa ng warrant of arrest na inisyu ng Family Court, Branch 4, Malabon City, noong September 24, 2021, para sa 2 counts of Qualified Rape, Acts of Lasciviousness in relation to Section 5(b) of R.A. 7610 at Section 5(b) of R.A. 7610 (Lascivious Conduct) ay pinosasan ng pulisya ang akusado.

Walang inirekomendang piyansa ang hukuman para sa Qualified Rape habang may inilaang piyansa na P180K sa Acts of Lasciviousness in relation to R.A. 7610 at P200K para sa R.A. 7610 (Lascivious Conduct).

Pinuri ni Gen. Capili ang operating team sa kanilang pagsisikap na natugisin ang mga wanted person at tiyaking maihaharap sa hukuman ang mga taong may kinahaharap na mabibigat na kaso. (Richard Mesa)