HINDI kapani- paniwala, ito ang naging reaksyon ni Gabriela Women’s Party Rep. Sarah Elago sa pahayag ng Meralco na malaking kawalan sa power industry kung tatanggalin ang system loss charges, gaya ng panawagan ni Pangulong Ferdinand R. Marcos Jr. sa kanyang State of the Nation Address (SONA) na alisin ito.

“Hindi kapani-paniwala na isang kumpanyang kumita ng ₱26.5 bilyon sa loob lamang ng anim na buwan ang magsasabing hindi nito kayang akuin ang system loss charges. Kung may dapat magbayad, hindi ang mga konsyumer kundi ang mga korporasyong patuloy na kumikita ng bilyon-bilyong piso mula sa isang batayang serbisyo,” sinabi ni Elago.

Aniya, sa simula pa lang, hindi na dapat ipinapasa sa mga konsyumer ang system loss charges. 

“Hindi kasalanan ng mga mamamayan ang pagkawala ng kuryente sa transmission at distribution. Hindi sila dapat ang pinagbabayad sa gastos na bahagi ng operasyon ng mga power utility,” dagdag ni Elago.

Ayon kay Elago, ang posisyon ng Meralco ay nagpapatibay lamang ang pangangailangan na amiyendahan ang Electric Power Industry Reform Act (EPIRA). 

“Lumalabas ngayon kung bakit hindi sapat ang simpleng pag-amyenda sa EPIRA. Hangga’t nananatili ang batas na nagbibigay-prayoridad sa tubo ng malalaking power corporations, patuloy ding maipapasa sa mga konsyumer ang iba’t ibang singilin para proteksyunan ang kanilang napakalaking kita,” sabi ni Elago.

Nanawagan si Elago sa Kongreso na amiyendahan ang EPIRA sa lalong madaling panahon. “We urge lawmakers to fast-track the EPIRA amendments while working toward the law’s eventual repeal,” pahayag ng kongresista. (VINA de GUZMAN)

NAGBABALA ang Malakanyang sa mga local government unit (LGU) na maging mapagmatyag laban sa mga scam at disinformation na may kaugnayan sa Local Government Support Fund (LGSF) at Socio-Civic Projects Fund (SCPF).

Sa press briefing sa Malakanyang, sinabi ni Presidential Communications Office (PCO) Undersecretary at Palace Press Officer Claire Castro na walang sinisingil ang Office of the President na anumang bayad o fees ang pamahalaan sa mga benepisyaryong LGU upang makuha ang kanilang inilaan na pondo.

“Mag-ingat sa scam at disinformation tungkol sa LGSF at SCPF ng Office of the President. Hinding hindi maniningil ng kabayaran o anumang fees ang gobyerno sa mga LGU beneficiaries upang makuha ang kanilang budget,” ayon kay Castro.

Ang LGSF sa ilalim ng Support and Capital Projects Fund (SCPF) ay tulong-pinansyal mula sa pambansang pamahalaan na ipinagkakaloob sa mga lokal na komunidad at barangay, kabilang ang tig-P200,000 na alokasyon para sa bawat lungsod at munisipalidad sa ilalim ng programang Bawat Bayan Makikinabang, na hinahati para sa mga proyektong pangkaunlaran at pangkaligtasan ng barangay at sa scholarship ng mga mag-aaral.

Sa harap nito, hinimok ni Castro ang mga opisyal ng LGU na mag-ingat sa mga indibidwal na humihingi ng personal na impormasyon o naniningil kapalit ng pagpapalabas ng kanilang pondo, at iginiit na mga awtorisadong kinatawan lamang ng pamahalaan ang dapat nilang kausapin.

Sinabi ni Castro na nagbabala rin ang Office of the President na maaaring gamitin ng mga scammer ang makukuhang impormasyon upang mailihis o maagaw ang pondong nakalaan para sa mga LGU.

Dahil dito, hinihikayat ni Castro ang mga opisyal ng LGU at ang publiko na agad iulat sa Office of the President ang anumang kahina-hinalang aktibidad o mapanlinlang na gawain upang agad itong maaksyunan at maprotektahan ang mga benepisyaryo.

“Kapag may ganyan po na mga problema, isangguni lamang po ninyo, ipagbigay alam po ninyo mismo sa amin, sa aming opisina, para po ito ay makontrol at mahinto ang ganitong mga klase ng pang-aabuso,” pagtatapos ni Castro. ( DARIS JOSE)

SA kulungan ang bagsak ng isang lalaki na armado ng dalawang baril habang pagala-gala sa lansangan nang masakote ng rumespondeng mga pulis sa Malabon City.

Nahaharap sa kasong paglabag Republic Act No. 10591 (Comprehensive Law on Firearms and Ammunition) ang suspek na si alyas “Boy”, 42, residente ng Brgy., Tonsuya ng lungsod.

Sa ulat ng tanggapan ni Northern Police District (NPD) Director P/BGen. Benliner Capili, nakatanggap ng report ang mga tauhan ni Malabon Police Chief P/Col. Kenneth Mission hinggil sa isang lalaki na armado umano ng baril habang pagala-gala sa Brgy., Tonsuya.

Kaagad namang rumesponde sa lugar ang mga tauhan ng Police Sub-Station 5 subalit, nang mapansin ng suspek ang kanilang presensya ay agad itong nagtangkang tumakas.

Hinabol siya ng mga pulis hanggang makorner at nakumpiska sa kanya ang isang caliber .45 pistol na kargado ng walong bala at isang revolver na kargado ng anim na bala.

Nang hanapan ng mga pulis ang suspek ng kaukulang mga dokumento hinggil sa ligaledad ng nasabing mga baril ay wala siyang naipakita na dahilan upang posasan siya.

Binigyang-diin ni Gen. Capili na nananatiling matatag ang NPD sa kanilang dedikasyon sa maagap na pagpapatupad ng batas at walang humpay na kampanya laban sa iligal na baril at criminal activities upang matiyak ang kaligtasan at seguridad ng komunidad na kanilang pinaglilingkuran. 

(Richard Mesa)

BINITBIT sa selda ang 55-anyos na hinihinalang tulak ng iligal na droga matapos makuhanan ng mahigit P.2 milyong halaga ng shabu nang maaresto sa ikinasang buy bust operation ng pulisya sa Valenzuela City, Miyerkules ng gabi.

Sa kanyang report kay Northern Police District (NPD) Director P/BGen. Benliner Capili, kinilala ni Valenzuela Police Chief P/Col. Joseph Talento ang suspek bilang si alyas “Joel”, (SLI/PUSHER) at residente ng Brgy., Bignay.

Ikinasa ng mga operatiba ng Station Drug Enforcement Unit (SDEU) ng Valenzuela Police sa pangunguna ni P/Lt. Sherwin Dascil ang buy bust operation sa koordinasyon sa PDEA kasunod ng kanilang natanggap na impormasyon hinggil sa umano’y illegal drug activities ni alyas Joel.

Nang matanggap ang signal mula sa kanyang kasama na nagpanggap na poseur-buyer na positibo na ang transaksyon, kaagad lumapit ang back-up na operatiba at sinunggaban ang suspek dakong ala-1:20 ng madaling araw sa Galas Street Beside Valenzuela View, Barangay Bignay.

Nasamsam sa suspek ang humigi’t kumulang 35 grams ng suspected shabu na may standard drug price na P238,000.00, buy bust money na isang tunay na P500 bill at walong pirasong P1,000 boodle money, P200 cash at itim na coin purse.

Ayon kay SDEU Police Investigator PSSg Cris Paul Collo, inihahanda na nila ang pagsasampa ng kasong paglabag sa Sections 5 at 11 ng R.A 9165 (Comprehensive Dangerous Drug Act of 2002) laban sa suspek sa pamamagitan ng Inquest Proceedings sa Valenzuela City Prosecutor’s Office.

Pinuri naman ni NPD Director Capili ang operating team sa kanilang pagsisikap na tugisin ang mga indibidwal na sangkot sa pagpapakalat ng iligal na droga.

Muli rin niyang pinagtibay ang hindi natitinag na pangako ng NPD sa pagpapatuloy ng mga agresibo at intelligence-driven operations laban sa iligal na droga bilang suporta sa kampanya ng Pambansang Pulisya ng Pilipinas na panatilihing ligtas at walang droga ang mga komunidad. (Richard Mesa)

ISANG mambabatas ang nanawagan ng malalimang imbestigasyon hinggil sa tumataas na bilang ng insidente ng karahasan sa mga paaralan sa bansa.

Ginawa ni CIBAC Rep. Bro. Eddie Villanueva ang panawagan matapos ang insidente ng pag atake ng isang estudyante at ng kanyang kapatid sa isang guro sa Elizalde National High School sa Davao de Oro kamakailan.

Nanawagan din si Villanueva na rebisahin ng Department of Education (DepEd) ang ilang kaukulang ahensiya ng gobyerno ang implementasyon ng Good Manners and Right Conduct (GMRC) and Values Education Act.

“The recent incidents of violence in our schools are deeply alarming. Schools should be places of learning, character formation, and safety—not places where teachers fear being assaulted or students become victims of violence. These incidents compel us to seriously examine whether the values we seek to instill through GMRC are truly taking root in the lives of our young people,” sabi ni Villanueva. 

Ayon kay Villanueva, principal author ng GMRC and Values Education Act of 2020, ang implementasyon ng nasabing batas ay hindi lamang sa paaralan.

“GMRC begins long before a child enters the classroom. The home is the first school, and parents are the first teachers of respect, discipline, responsibility, and compassion. Schools reinforce these values, but families must lay the foundation. If we want to address the growing culture of violence, we must strengthen not only our educational system but also the partnership among parents, schools, churches, communities, and government. Values formation is a whole-of-society responsibility,” sabi ni Villanueva. 

“Pag-ibayuhin natin ang ating paggabay at pag-aruga sa ating kabataan. Magkakasama tayong lahat sa misyong ito: ang pamahalaan, pamilya, paaralan, simbahan, industriya, at komunidad. Tatayo ang paaralan bilang pangalawang tahanan para sa kanila,” dagdag ng kongresista. 

(VINA de GUZMAN)