TINIYAK ng Department of Energy (DOE) na kahit bumababa na ang presyo ng mga produktong petrol­yo sa bansa ay patuloy pa rin ang pagpapatupad nila ng Fuel Subsidy Program para sa Public Utility Vehicles (PUVs) upang magbigay ng agarang tulong sa mga tsuper.

Sa ilalim ng programa, bumuo sila ng isang whole-of-government program kung saan makatatanggap ang mga kwalipikadong tsuper ng P10 diskwento kada litro ng diesel.

Maaari umanong makatanggap ang bawat driver ng hanggang 150 litro na limitasyon kada linggo o katumbas ng tinatayang P1,500 na lingguhang tipid na makatutulong upang mabawasan ang kanilang gastos sa operasyon at mapanatili ang kanilang kita sa araw-araw.

Sa kasalukuyan, mahigit 2,000 gasolinahan sa bansa ang kalahok na sa programa kaya’t mas maraming PUV drivers ang nabibigyan ng mas madali at mas malawak na access sa fuel subsidy saan man sila bumibiyahe.

Upang matukoy ang listahan ng mga gasolinahang kalahok sa programa ay maaaring bisitahin ang link na https://doe.gov.ph/…/3528092–fuel-subsidy-program. ( DARIS JOSE)

BINATI ni Speaker Faustino “Bojie” G. Dy III ang Filipino tennis star na si Alex Eala sa huling naging panalo nito sa Wimbledon victory, saying ” her historic run has become a source of pride for the nation and an inspiration for young Filipinos to dream big.”

“Congratulations, Alex! Once again, you have made your kababayan proud. Sa bawat panalo mo, ipinapakita mo sa buong mundo ang husay, tapang, at determinasyon ng Pilipino,” ani Dy.

“You are not only winning matches—you are winning hearts around the world and inspiring countless young Filipinos to dream big and believe in what they can achieve.”

Siniguro rin ni Dy ang hindi natitinag na suporta ng sambayanang Pilipino sa susunod pa nitong mga laban sa Wimbledon.

“Laban lang, Alex! Kasama mo ang sambayanang Pilipino sa bawat hakbang ng makasaysayang kampanyang ito. Nandito kaming lahat, buong pusong sumusuporta sa’yo.” pagtatapos ni Dy.

(Vina de Guzman)

ISINUSULONG ni Leyte Rep. Ferdinand Martin G. Romualdez ang pagkakaroon ng regional rapid-response network na binubuo ng mga mental health at child protection professionals kasunod na rin sa naganap na barilan sa San Jose National High School sa Tacloban City, bilang bahagi ng pagpapalawig na matulungan ang mga eskuwelahan na agad at mabilis na matugon laban sa karahasan, trauma at students in distress.

“Tatlo ang ating agarang direksyon. Una, bubuo tayo ng regional network ng mga volunteer psychologists, psychiatrists, guidance counselors, social workers at iba pang professionals na maaaring agad ma-deploy kapag may ganitong insidente,” pahayag ni Romualdez matapos makipagpulong sa mga opisyal mula sa Commission on Higher and Technical Education (CHED), Department of Education (DepEd), Department of Health (DOH) at Department of Social Welfare and Development (DSWD) sa Price Mansion sa Tacloban City nitong Lunes.

Sinabi ni Romualdez na ang network ay mayroong preventive education at mas malakas na koordinasyon sa pagitan ng mga government agencies, schools at local communities.

“Pangalawa, magsasagawa tayo ng regular na seminars para sa mga estudyante, magulang at guro tungkol sa mental wellness, child protection at violence prevention. Pangatlo, palalakasin natin ang koordinasyon ng lahat ng ahensya upang mas mabilis ang pagtugon kapag may mga batang nangangailangan ng tulong,” dagdag nito.

Nagpa-abot muli ito ng pakikiramay sa mga pamilya ng mga biktima ng nangyari sa San Jose National High School. “Bilang mga magulang at bilang isang bansa, nasaktan tayong lahat.”

Ang pagpupulong ay ipinatawag ni Romualdez sa mga naturang opisyal upang talakayin din ang tulong na ibibigay sa mga naapektuhan at magbuo ng mga karagdagang both assistance for those affected and measures to prevent upang hindi na maulit ang ganitong uri ng insidente.

“Kaya ipinatawag natin ang CHED, DepEd, DOH at DSWD upang pag-usapan kung ano ang maaari nating gawin—hindi lang para tumulong sa mga naapektuhan ngayon, kundi para maiwasan na maulit ang ganitong trahedya,” paliwanang nito.

“Responsibilidad din naming pagsama-samahin ang iba’t ibang sektor at tiyaking may sapat na suporta ang mga programa ng pamahalaan. Kapag may kakulangan sa batas o pondo, trabaho naming ayusin iyon,” dagdag ni Romualdez.

(VINA de GUZMAN)

HIMAS-REHAS ang walong indibidwal na pawang may kinakaharap na mabibigat na kaso ng pagpatay ang nasakote ng pulisya sa magkahiwalay na manhunt operation sa Caloocan at Malabon Cities.

Kaagad iniutos ni Northern Police District (NPD) Director P/BGen. Benliner Capili sa kanyang mga tauhan ang pagtugis limang kelot na nasa edad 19, hanggang 24 makaraang maglabas ng warrant of arrest ang Malabon Regional Trial Court (RTC) Branch 180, para sa kasong Murder ng walang inilaang kaukulang piyansa laban sa mga suspek.

Hindi na nakapalag ang mga akusado na pawang residente ng Malabon City nang matunton ng mga tauhan ng District Special Operations Unit (DSOU) sa kanilang hideout sa Brgy. Kaunlaran, Caloocan City.

Tatlo pang akusado sa kasong Murder, kabilang ang 23-anyos na barbero, isang SK Kagawad, at 24-anyos na tambay, na pawang may warrant of arrest na inisyu ng RTC Branch 170 ng Malabon City ang natimbog naman ng mga tauhan ni Malabon Police Chief P/Col. Kenneth Mission sa magkahiwalay na lugar sa Brgy. Potrero.

Ani Gen. Capili, ang matagumpay na operasyon ay bahagi ng pinaigting na kampanya ng NPD laban sa mga wanted na indibidwal para tiyaking maihaharap sa hukuman ang mga taong may kinahaharap na mabibigat na kaso.

Patuloy niyang hinihikayat nang publiko na makiisa sa pagpapanatili ng kapayapaan at kaayusan sa pamamagitan ng maagap na pagbibigay ng impormasyon tungkol sa mga taong pinaghahanap ng batas at iba pang kahina-hinalang gawain. 

(Richard Mesa)

SHOOT sa hoyo ang 25-anyos na kelot na wanted sa kaso ng pangaggahasa matapos madakip ng pulisya sa pinaigting na manhunt operation sa Caloocan City.

Sa ulat ng tanggapan ni Northern Police District (NPD) Acting Director P/BGen. Benliner Capili, ang akusado ay kapwa nakatala bilang No. 2 sa Top Ten Most Wanted Person sa NPD at sa Caloocan City Police Station.

Isinagawa ng mga operatiba ng Warrant and Subpoena Section at Women and Children Protection Desk ng Caloocan Police ang joint operation laban sa akusado hanggang masukol siya sa Apitong St., Pleasant View, Bagbaguin, Brgy. 165,

Dinampot ang akusado sa bisa ng warrant of arrest para sa kasong Rape na inisyu ng Regional Trial Court, Branch 131, Caloocan City, noong June 8, 2026.

Ayon kay Caloocan Police Chief P/Col. Joey Goforth, walang inirekomendang piyansa ang hukuman para sa pansamantalang paglaya ng akusado.

Pansamantalang nakapiit ang akusado sa Custodial Facility ng Caloocan Police habang hinihintay ang utos mula sa korte para sa paglilipat sa kanya sa Caloocan City Jail. (Richard Mesa)