NAMATAAN ang isang movable floating platform sa karagatan sakop ng Bajo de Masinloc ayon sa National Task Force for the West Phillipine Sea.

Sinabi ni WPS Rear Admiral Jay Tarriela na ang natukoy na istraktura ay isang data gathering object para sa marine science research dahil sa mga presensya ng Chinese vessels.

Ayon kay Tarriela, bukod sa floating platform ay may mga boya rin at antenna na pawang hindi pa malinaw kung para saan.

Sinabi naman ni National Maritime Council spokesperson Usec Alexander Lopez, na iligal ang anumang ginagawa ng China sa Bajo de Masinloc dahil ito ay nasa layo lamang na 119 nautical miles mula sa palauig,Zambales at sakop ito ng exclusive economic zone ng bansa.

Sa ngayon , patuloy aniya ang monitoring habang nagpahayag naman si DFA Deputy Asec Rogelio Villanueva Jr ng pag-aaalala sa nasabing istraktura .

Ayon kay Villanueva, ang presensya ng istraktura ay malinaw na paglabag sa soberenya ng Pilipinas kaya naman nagsasagawa na sila ng angkop na diplomatikong aksyon at diplomatikong protesta laban sa Republic of China.

Sa panig naman ng Armed Forces of the Philippines for WPS, sinabi ni RADM spokesperson Roy Vincent T. Trinidad PN na para sa inter-agency ng gobyrno ay patuloy silang nakikipag-ugnayan sa kanilang allies upang maisakatuparan ang kanilang mandato.

Samantala, sinabi rin ni Tarriela na nakaranas din ng pangha-harrass ang sasakyang panghipapawid ng BFAR at PCG na nagsagawa ng maritime domain awareness flight. (Gene Adsuara)

TINIYAK ni Mayor Jeannie Sandoval sa mga Malabueño na ganap na nakahanda ang Pamahalaang Lungsod ng Malabon na tumugon sa mga emerhensiya at protektahan ang mga residente sa pagsisimula ng tag-ulan.

“Ang kaligtasan ng bawat tahanang Malabueño ang ating pangunahing prayoridad. Marami na ang kalamidad na dumaan sa ating lungsod ang ating napagtagumpayan ng nagkakaisa. At ngayong panahon na naman po ng tag-ulan, ating ipagpapatuloy ang bayanihan at malaksakit sa ating mga kababayan. Nakaantabay ang ating mga emergency response teams at patuloy nating pinaghahandaan ang anumang epekto ng masamang panahon upang matiyak ang mabilis at maayos na pagtugon sa pangangailangan ng ating mga mamamayan,” aniya.

Ayon sa Malabon Disaster Risk Reduction and Management Office (MDRRMO), pinaigting ng lungsod ang mga pagsisikap nito sa paghahanda, kabilang ang patuloy na pagsubaybay sa mga abiso sa lagay ng panahon, pagtataya ng baha, at impormasyon sa peligro upang suportahan ang napapanahong at matalinong paggawa ng desisyon. Ang Malabon Command and Communication Center ay aktibo bilang sentro ng command post para sa mga hakbang sa pagtugon sa kalamidad.

Binigyang-diin ni Mayor Sandoval na ang lahat ng response clusters at concerned offices ay itinuro upang tiyakin ang kahandaan ng mga mapagkukunan, pasilidad, at tauhan. Kabilang dito ang pag-iimbak ng mga pagkain at hindi pagkain, inspeksyon ng mga kritikal na pasilidad, at pagpapanatili ng kahandaan sa pagpapatakbo sa Emergency Operations Center (EOC).

Operating din ang 40 pumping stations sa iba’t ibang barangay na makakatulong sa pagpigil sa pagbaha, at regular din ang paglilinis sa mga kalsada at daluyan ng tubig para maiwasan ang pagbabara ng mga drainage system.

Naglagay din ng health monitoring protocols upang makatulong na maiwasan at matugunan ang mga sakit na karaniwang nauugnay sa tag-ulan, kabilang ang dengue, leptospirosis, pagtatae, at impeksyon sa paghinga

Hinikayat naman ni City Administrator Dr. Alexander Rosete ang lahat ng residente na manatiling may kaalaman sa pamamagitan ng mga opisyal na payo, maghanda ng mga emergency go-bag, at makipagtulungan sa mga awtoridad sa panahon ng mga emerhensiya.

“Disaster preparedness is a shared responsibility. Kung ang pamahalaan, mga komunidad, at tahanan ay patuloy na magtutulungan, mas nagiging handa at matatag tayo sa pagharap sa hamon ng kalamidad at sakuna. Mas mabuti pong tayo ay handa at nakikiisa sa inisyatiba ng pamahalaan dahil para po ito sa kapakanan ng bawat mamamayan,” dagdag niya. 

(Richard Mesa)

SINABI ng Malakanyang na kailangan munang magkasundo ang mga senador bago pa magpatawag ng special session si Pangulong Ferdinand R. Marcos Jr. sa Kongreso para talakayin ang 21 priority measures para maipasa ang mga ito ng Kongreso bago pa ang 5th State of the Nation Address (SONA) ng Pangulo

“Ang gusto po ng Pangulo ay mauna ang Senado na magkasundo dahil kahit sabihin natin na mayroong hiling ang Pangulo para sa isang special session, kung sila mismo po ay hindi magkakasundo, mababale-wala po ang naisin ng Pangulo,” ayon kay Presidential Communications Office (PCO) Undersecretary at Palace Press Officer Claire Castro sa press briefing sa Malakanyang.

“Dapat ayusin po nila ang Senado para… ito naman ay para sa taumbayan, hindi pangsarili. So, unahin muna nilang maayos ang kanilang mga sigalot at ang kanilang mga isyu sa Senado,” aniya pa rin.

Giit pa ni Castro, kung patuloy na hindi magkakasundo ang mga senador at mananatili ang power gridlock sa Senado ay malabo aniyang magkaroon ng special session.

“Katulad ng sinabi natin, kahit humiling ang Pangulo ng special session, kahit sa kaniya manggaling ang special session – kung wala pong mangyayari dahil hindi po nagkakasundo ang mga senador sa Senado, mababale-wala po iyan. Dapat unahin ng mga senador natin ngayon ang taumbayan hindi ang sariling interes o ambisyon,” aniya pa rin.

Kamakailan ay sinabi ni Castro na nakahanda si Pangulong Marcos na magpatawag ng special session ang Kongreso kung pormal itong hihilingin ng grupong pinamumunuan ni Senador Sherwin Gatchalian.

Ito ay matapos mabalam ang pagtalakay ng Senado sa ilang panukalang batas at kumpirmasyon ng mga heneral dahil sa sigalot sa liderato ng kapulungan bago ang sine die adjournment.

Ani Castro, agad na kikilos ang Pangulo sa oras na makatanggap siya ng opisyal na kahilingan mula sa bagong liderato ng Senado.

Nais aniya ng Pangulo na magpatuloy ang trabaho ng Senado at malabong tanggihan ang anumang kahilingan para sa special session kung may sapat na batayan ito.

Sa ilalim ng Artikulo VI, Seksyon 15 ng 1987 Konstitusyon, ang Pangulo lamang ang may kapangyarihang magpatawag ng special session ng Kongreso anumang oras.

Gayunman, sinabi ng Palasyo na kailangan munang ayusin ng Senado ang mga suliranin nito sa loob bago tuluyang makausad ang mga nakabinbing usapin. 

(DARIS JOSE)