BINUKSAN na ng Pamahalaang Lungsod ng Navotas ang bagong renovated na Pantay-Pantay Court, at Kapalaran Court sa Brgy., San Roque at Brgy., Tangos South at S. Roldan Court kasnuod ng pagpapasinaya sa mga ito sa pangunguna nina Mayor John Rey Tiangco at Congressman Toby Tiangco, bilang bahagi ng pagdiriwang ng ika-19th Navotas Cityhood Anniversary. Ang naturang mga pasilidad ay magsisilbing venue para sa sports, community gatherings, at iba’t ibang aktibidad. 

(Richard Mesa)

WALANG hidwaan sa pagitan ng Pilipinas at Tsina sa kabila ng mainit na pagpapalitan ng pahayag sa pagitan ni Philippine Defense Secretary Gilberto Teodoro at Chinese officials kaugnay sa West Philippine Sea (WPS).

Sinabi ni Presidential Communications Office (PCO) Undersecretary at Palace Press Officer Claire Castro na pinananatili ng Pilipinas ang magandang relasyon nito sa Tsina.

Ito’y sa kabila ng babala ng Tsina kay Teodoro matapos sabihin ng huli ang pagtanggi ng Chinese Embassy sa pahayag ng Department of Foreign Affairs (DFA) tungkol sa 2016 Arbitral Award ay nagpapakita ng “insincerity and duplicity” o kawalan ng sinseridad at pagiging mapanlinlang.

“Ang bansang China ay tumutupad sa kanilang batas at polisiya, ganoon din ang bansang Pilipinas. Si Sec. Gibo ay tumutupad lang sa kaniyang mandato bilang opisyal ng Pilipinas,” ayon kay Castro .

“Sa parte ng Pilipinas, itinuturing pa rin na maganda ang relasyon sa bansa ng China,” aniya pa rin.

“Hindi naman nagkakaroon ng rift o sigalot dahil sa mga mensahe ng ating Defense Secretary,” dagdag na pahayag ni Castro.

Nauna nang iginiit ng DFA na ang 2016 Arbitral Award ay pinal at may bisa, at kinondena ang patuloy na pagtanggi ng China na kilalanin ito.

Bilang tugon, sinabi ng Chinese Embassy na hindi nito kinikilala ang arbitration sa South China Sea at tinawag itong “a political manipulation in disguise.” Iginiit din nitong binaluktot umano ng Arbitral Award ang mekanismo ng United Nations Convention on the Law of the Sea (UNCLOS).

Ayon kay Teodoro, ang pahayag ng embahada ay nagpapakita ng tunay na intensyon ng Chinese Communist Party sa pakikitungo sa Pilipinas.

“It clearly shows their insincerity and duplicity… We condemn the arrogant display of deceitful indignation by them.”

“Hindi kapani-paniwala ang mga sinasabi kaya idinadaan sa alboroto,” dagdag pa niya.

Binigyang-diin din ni Teodoro na hindi magpapasindak ang Pilipinas.

“Hindi tayo pasisiil.”

“Ang pangulo po ang direktiba… Dapat daanin sa diplomatikong pamamaraan,” ang sinabi naman ni Castro.

“We can protect our rights, we can protect our interests in a diplomatic manner,” aniya pa rin. (DARIS JOSE)

ARESTADO ang 29-anyos na kelot matapos tangayin ang mamahaling bisikleta ng isang dalagang office clerk sa San Juan City, Linggo ng umaga.

Kaagad pinosasan ng rumespondeng mga tauhan ng Pasadena Police Sub-Station 4 ng San Juan City Police sa pangunguna ni PCMS Roberto Santillan, PSSg Dondon Galingan at PCpl Jhon Augustine Lopez ang suspek na si alyas “Joseph”, ng Tondo, Manila.

Lumabas sa imbestigasyon ng pulisya, bandang alas-10:45 ng umaga nang magtungo ang complainant na si alyas “Andrea”, 28, kasama ang kanyang mga kaibigan sakay ng kani-kanilang bisikleta sa isang coffee shop sa Dos Castillas St., Brgy., Pasadena, San Juan City.

Ipinarada nila ang kanilang bisikleta sa labas ng establishemento bago pumasok sa coffee shop at habang nasa loob ang complainant tinangay umano ng suspek ang kanyang bisikleta na nagkakahalag ng P316,998.00.

Gayunman, nasaksihan ng landscaper ng nasabing establishemento na si alyas “Leazer”, 34, ang insidente kaya kaagad siyang humingi ng tulong sa mga bystander sa lugar at hinabol ang suspek na dahilan upang makorner ang kawatan.

Dinala ang suspek at ang nabawing bisikleta sa Barangay Hall ng Pasadena bago humingi ang mga ito ng assistance sa pulisya kaya agad rumesponde sina PCMS Santillan at inaresto si alyas Joseph nang positibong ituro ng saksi na siyang tumangay sa bisikleta ng dalaga.

 (Richard Mesa)

PINANGUNAHAN ni Pangulong Ferdinand Marcos Jr. ang turnover ceremony ng P82 million na financial assistance sa ilalim ng Socio-Civic Projects Fund (SCPF) sa Sulu provincial government.

Sina Abdusakur Tan III at ang provincial federation of the Association of Barangay Councils (ABC) ang tumanggap ng tseke.

Sa ilalim ng SCPF, may P200,000 ang inilaan sa bawat barangay na may kabuuang 410 para sa Sulu.

Winika pa ng Pangulo na P100,000 mula sa bawat alokasyon ang gagamitin para pondohan ang scholarships para sa limang estudyante kada barangay.

‘Yung natirang P100,000 ay nasa inyo na ‘yun kung saan n’yo gagamitin. Dahil malakas ang paniwala ko na walang nakakaalam sa problema sa isang barangay kung hindi ang mga barangay official,” aniya pa rin.

Sa kabilang dako, pinangunahan din ng Pangulo ang pamamahagi ng rice assistance sa ilalim ng Local Government Support Fund (LGSF).

Ani Pangulong Marcos, ang mga benepisaryo ay ‘poor at near-poor families.’

‘Yung sinasabi na kung hindi natin tulungan ay bababa sa poverty line. Sabi ko, ‘yun ang nilalabanan natin para hindi sila bumaba. Bago pa mangyari ‘yan, unahan na natin,” anito pa rin.

Tinatayang 3,000 benepisaryo sa Sulu ang makatatanggap ng tulong.

“Huwag po kayo mag-alala. Ito po ay hindi minsanan lang. Magbibigay kami ng sako ng bigas anim na beses sa loob ng isang taon. So kada dalawang buwan, meron po ulit nito,” anito.

Samantala, pinasalamatan ni Tan ang national government para sa suporta.

“Naghatid kayo sa amin ng pag-asa. Naipakita ninyo sa aming lalawigan, sa mga Tausug, na ang aming probinsya ay kailanman hindi napapabayaan at napag-iiwanan,” aniya pa rin. ( DARIS JOSE)

NANAWAGAN si 4Ps Party-list Rep. Marcelino “Nonoy” Libanan sa paghihigpit sa mga menor de edad na gumamit ng social media, rebyuhin ang juvenile justice law hinggil sa criminal responsibility ng mga minors at dagdagan ang mga lisensiyadong guidance counselors sa mga public schools.

Ayon kay Libanan, ito lamang ang mga paraan upang hindi maulit ang malagim na insidente sa San National High School sa Tacloban City kung saan tatlong estudyante ang namatay at mahigit sampu ang nasugatan.

Aniya, ang nangyaring trahedya noong June 22 ay hudyat sa mga awtoridad ng kakulangan sa implementasyon sa batas o polisiya sa mga “Children in Conflict with the Law” (CICL).

“We cannot ignore the possibility that unrestricted exposure to harmful online content and violent digital communities may be influencing vulnerable young minds. Congress, together with our internet regulators, should seriously study reasonable restrictions on social media access for minors, consistent with our Constitution and the protection of children’s welfare,” sinabi ni Libanan.

Inihalimbawa ni Libanan ang Australia kung saan mahigpit na pinagbabawal ang social media accounts sa mga bata na 16 years old pababa.

“We should explore whether similar safeguards may be appropriate here in the Philippines,” ani Libanan.

Sinabi ni Libanan na dapat repasuhin ang Republic Act No. 9344, o Juvenile Justice and Welfare Act, as amended. 

Ayon sa nasabing batas ang mga batang 15 years of age pababa ay exempt sa criminal liability, subalit ang mga 15 pataas at di hihigit sa 18 years of age ay maaring kasuhan kung naunawaan niya ang kanyang ginawa o paglabag.

“Congress has a responsibility to undertake a careful and evidence-based review of our juvenile justice law. We must continue protecting children while ensuring that our legal framework remains responsive to exceptionally grave offenses,” sinabi ni Libanan. 

Idinagdag ni Libanan ang kakulangan sa mga guidance counselors mga pampublikong paaralan ay dapat tugunan ng Kongreso at ng Department of Education (DepEd).

“Every public school should have adequate access to professional guidance counselors who can identify behavioral problems early, provide timely intervention, and help prevent violence before lives are lost. Prevention must always remain our first line of defense,” aniya. (Vina de Guzman)

ITO ang iginiit ni Manila Rep. Joel Chua sa gitna ng lumalalang isyu kung papatawan ba ng parusa o rehabilitasyon ang mga “Children in Conflict with the Law” (CICL).

“The recent incidents involving children in conflict with the law remind us that accountability and rehabilitation must go hand in hand. One important but often overlooked part of our juvenile justice system is the Bahay Pag-asa,” sinabi ni Chua.

Ayon kay Chua, malinaw sa Juvenile Justice and Welfare Act, as amended by Republic Act No. 10630, na bawat lalawigan o lungsod ay responsible sa pagtatatag ng Bahay Pag-asa sa kanilang lugar.

“Ang challenge ngayon ay hindi yung kawalan ng legal mandate kundi ang mga nag-iimplement nito,” sinabi ng kongresista.

Idinagdag ni Chua na mandato ng Department of Social Welfare and Development (DSWD) at ng Juvenile Justice and Welfare Council na mag conduct ng nationwide assessment para alamin ang mga lugar na walang pang Bahay Pag-asa at kung ano pa ang kinakailangan para mapa- unlad ang mga pasilidad.

Bawat Bahay Pag-asa ay minimum standards sa security, staffing, mental health services, education, skills training, at rehabilitation, paliwanag ni Chua.

“Children who pose a serious danger to others because of the gravity of the offenses they allegedly committed should be housed in appropriately secure units while continuing to receive the rehabilitation and protections required by law,” ayon sa kongresista.

Sinabi ni Chua na pinag-aaralan niya na amyendahan ang mga probisyon ng Juvenile Justice and Welfare Act para magkaroon ng regular compliance audits, congressional oversight, at periodic reporting ng mga lalawigan at Highly Urbanized Cities sa pagtatatag ng Bahay Pag-asa sa kanilang lugar.

“The protection of the public and the rehabilitation of children in conflict with the law are not competing objectives. We can and must achieve both by faithfully implementing and strengthening the law we already have,” sinabi ni Chua.

 (Vina de Guzman)

INARESTO ng Bureau of Immigration (BI) ang sampung dayuhan sa isinagawang operasyon sa iba’t ibang bahagi ng Siargao Island noong Hunyo 26.

Ayon kay Immigration Commissioner Joel Anthony Viado, isinagawa ang mga operasyon ng mga operatiba ng BI Intelligence Division Main Office at BI Intelligence Division Mindanao Intelligence Task Group hinggil sa mga ulat mula sa mga residente at negosyante na may mga dayuhang umano’y lumalabag sa mga batas sa imigrasyon ng Pilipinas.

Sinabi naman ni BI Intelligence Chief Division na patuloy ang kanilang pagmo-monitor sa mga ulat ng komunidad at pakikipagtulungan sa kanilang partner law enforcement upang matiyak na sinusunod ng mga dayuhan ang batas ng Pilipinas habang tnatangkilik nila ang destinasyong panturista sa Pilipinas.

“Napaka-aktibo ng mga residente at iba pang lokal na sektor sa Siargao sa pag-uulat ng mga hinihinalang paglabag sa batas sa imigrasyon, kaya mabilis na nakakilos ang BI upang mapanatili ang kaligtasan at integridad ng isa sa mga pangunahing destinasyong panturista ng bansa,” dagdag ni Manahan.

Iniulat naman ni BI Intelligence Division Mindanao Deputy Chief Melody Gonzales na kabilang sa mga inaresto ang mga Israeli national na sina Ben Yeshaya Menahem Mendel Rafael at Aharon Ida, kapwa 22 taong gulang, na natuklasang nag-overstay at nagtatrabaho sa isang Jewish Center nang walang kaukulang visa at permit at hindi rin nakapagpakita ng pasaporte.

Isa pang Israeli national na si Abeve Tewabel, 23, ang inaresto dahil sa pagtatrabaho nang walang tamang dokumento at idineklarang undesirable alien matapos ang nauna niyang pagkakaaresto ng mga lokal na awtoridad. Samantala, inaresto rin ang kapwa Israeli na si Etay Harari, 51 taong gulang, matapos mahuling nagtatrabaho bilang disc jockey nang walang kaukulang permit sa pagtatrabaho.

Inaresto rin ang Moroccan national na si Larbi Oirdi, 23, na nahaharap sa mga kasong administratibo sa imigrasyon bilang isang undesirable alien kaugnay ng nauna niyang pagkakaaresto dahil sa unjust vexation, direct assault, serious resistance and disobedience, at iba pang mga paglabag.

Naaresto rin ang Australian national na si Lauren Elizabeth Fornazieri, 34, matapos matuklasang siyam na taon nang nag-o-overstay sa Pilipinas habang nagtatrabaho sa isang hotel sa Siargao nang walang legal na immigration status.

Nahuli rin ang Nigerian national na si Bill James Augustine, 27 taong gulang, dahil sa iligal na pagtatrabaho bilang dog trainer, habang ang Lithuanian national na si Edgar Drozdov, 39 taong gulang, ay natuklasang namamahala ng isang resort at nagtatrabaho rin bilang food delivery rider nang walang kinakailangang permit.

Sa operasyon ay naaresto rin ang mga Chinese national na sina Zhu Guifu, 36, at Chen Anqi, 31. na natagpuan sa isang surf resort. Kapwa sila nag-overstay at mayroon nang umiiral na blacklist records dahil sa mga nauna nilang paglabag sa batas sa imigrasyon.

“Nanatiling bukas ang Pilipinas sa mga lehitimong turista, mamumuhunan, at iba pang dayuhang bumibisita sa ating bansa. Kilala ang mga Pilipino sa buong mundo sa kanilang mabuting pagtanggap sa mga bisita,” ani Viado. 

“Ngunit hindi dapat ipagkamali ang ating pagiging magiliw bilang pagpapaubaya sa mga lumalabag sa ating mga batas. Ang mga umaabuso sa pribilehiyong manatili sa ating bansa ay dapat managot sa kanilang mga ginawa. Patuloy na nagpapanatili ng matatag na presensya ang Bureau hindi lamang sa Siargao kundi maging sa iba pang pangunahing destinasyong panturista sa bansa, at magpapatuloy ang aming mga operasyon sa intelligence. Mas marami pang enforcement operations ang isasagawa laban sa mga dayuhang patuloy na lumalabag sa ating mga batas sa imigrasyon.”

Ang lahat ng sampung dayuhan ay dadalhin sa detention facility ng Bureau of Immigration sa Maynila, kung saan sila mananatili habang isinasailalim sa mga kaukulang immigration proceedings. 

(Gene Adsuara)