- June 3, 2026
Ang Diyaryong Pinagkakatiwalaan
Archive for June 1st, 2026
Mahigit 28-M na mag-aaral inaasahan ngayong 2026-2027 school year – DepEd
TIWALA ang Department of Education (DepEd) na makakaabot ng mula 26 milyon hanggang 28 milyon ang mag-aaral na papasok ngayong school year 2026-2027.
Ayon kay Assistant Secretary Jocelyn Andaya , na mayroon silang sapat na teaching at non-teaching personnel sa public elementary at secondary schools para sa nasabing bilang ng mga mag-aaral.
May ilang paaralan na kulang ang mga guro habang mayroong iba naman ay mahigit pa.
Base sa kanilang teacher-to -studen ratio ay mayroon isang guro kada 35 na mag-aaral sa elementary habang sa sekondarya ay mayroong isang guro sa 45 na mag-aaral.
Habang ang mga classroom ratio ay mayroong isa kada 32 mag-aaral sa elementary; isang silid aralan sa kada 39 sa junior highschool at isa sa kada 36 para sa senior high school. (Gene Adsuara)
NAVOTAS, PINALAWAK ANG GRADUATION INCENTIVE PROGRAM
NAMAHAGI ang Pamahalaang Lungsod ng Navotas ng cash incentives sa Navoteño students na nagtapos sa mga pampublikong paaralan ng lungsod para sa taong panuruan 2025-2026, bilang bahagi ng patuloy na pangako nito sa pagsuporta sa edukasyon paa mapagaan ang pinansiyal na pasanin ng mga pamilya.
May kabuuang 3,776 Grade 6 completers ang nakatanggap ng P500 bawat isa, habang 1,986 Grade 12 completers ang nabigyan ng P1,000 bawat isa.
Simula ngayong taon, ang mga Grade 10 completers ay kasama na rin sa graduation incentive program ng lungsod sa bisa ng City Ordinance No. 2026-03. May 2,722 Grade 10 completers ang nakatanggap ng tig-P1,000.
Samantala, ang mga graduate ng Navotas Polytechnic College ay tatanggap ng P1,500 kasunod ng kanilang graduation ceremony sa huling bahagi ng taong ito.
Sinabi ni Mayor John Rey Tiangco na ang lungsod ay nananatiling nakatuon sa pamumuhunan sa edukasyon at pagkilala sa pagsusumikap ng mga mag-aaral.
“Education is one of the most important investments we can make for the future of our city. Through these incentives, we hope to encourage our students to continue striving for excellence and help ease the financial challenges faced by their families,” ani Mayor Tiangco.
Layunin aniya ng pamahalaang lungsod na matiyak na walang maiiwan na mag-aaral dahil sa kahirapan sa pananalapi.
“We want our students to focus on achieving their dreams and completing their studies. The city government will continue to provide programs that support their academic journey and overall development,” dagdag niya.
Ang pamamahagi ng mga insentibo ay bahagi ng patuloy na pagsisikap ng lungsod na hikayatin ang mga mag-aaral at palakasin ang mga programa sa suportang pang-edukasyon para sa mga nag-aaral ng Navoteño. (Richard Mesa)
BJMP inihanda na ang kulungan ni Sen. Jinggoy Estrada
INIHANDA na ng Bureau of Jail Management and Penelogy (BJMP) ang detention cell ni Senator Jinggoy Estrada sa New Quezon City Male Dormitory sa Payatas.
Sinabi ni Interior Secretary Jonvic Remulla na kaniyang tiniyak ang kahandaan nila sakaling lumabas na ang warrant of arrest ni Estrada sa kasong plunder mula sa Fifth Division ng Sandiganbayan.
Nahaharap ang Senador ng kasong plunder na may kinalaman sa P573 milyon na halaga ng umanoy kickbacks mula sa iba’t-ibang flood control projects.
Magugunitang nitong Biyernes ay naghain si Estrada ng piyansa na aabot sa P90,000 para sa kaso nitong graft kasama si dating Department of Public Works and Highways secretary Manuel Bonoan sa Sandiganbayan Second Division.
Subalit paglilinaw ni Remulla na nasa Sandiganbayan pa rin ang may pasya kung saan nila ilalagak si Estrada sakaling lumabas na ang warrant of arrest nito sa kasong plunder. ( DARIS JOSE)
PBBM, itinuring na highly ‘productive at constructive’ ang state visit sa Japan
HIGIT pa sa mga pulong at seremonyang diplomatiko, ipinakita ng State Visit ni Pangulong Ferdinand R. Marcos Jr. ang lalim ng pagkakaibigan at matibay na samahan ng Pilipinas at Japan na nabuo sa paglipas ng maraming taon.
Kasabay ng pagdiriwang ng ika-70 anibersaryo ng diplomatikong relasyon ng dalawang bansa ngayong taon, naging mainit ang pagtanggap kina Pangulong Marcos at First Lady Louise Araneta-Marcos ng Imperial Family.
Ayon kay Presidential Communications Office Acting Secretary Dave Gomez, mahalaga ang pagbisitang ito dahil ipinakita nito ang matatag at malapit na relasyon ng dalawang bansa.
“Kaya napakahalaga nitong pagbisita natin… Talagang napaka-overwhelming nung reception nila kagabi (Wednesday) sa ating Pangulo at ating Unang Ginang. They were received by their Imperial Highness, the Emperor and the Empress,” ani Gomez.
Sinabi rin ni Gomez na pangalawang State Visit at State Banquet pa lamang ito na inihost ng Emperor ng Japan mula nang matapos ang pandemya.
“At nakakatuwang panoorin ang Pangulo at ang Emperor kagabi (Miyerkules)) dahil makikita mo kung gaano na kalalim yung bond, ‘yung relationship nilang dalawa na developed through the years, through mutual shared experiences,” dagdag niya.
Bukod sa mga seremonyal na aktibidad, naging abala rin ang Pangulo sa mga high-level meeting tungkol sa kalakalan, imprastraktura, depensa, maritime security, enerhiya, at regional stability.
Ayon kay Gomez, hindi lamang seremonyal ang mga foreign trip ng Pangulo dahil nagdadala rin ito ng benepisyo sa bansa sa pamamagitan ng dagdag na investments, development cooperation, at mas matibay na strategic partnership sa Japan.
“So yung mga ganitong foreign trips, hindi lang ito puro ceremonial. Marami talagang naibabalik na benepisyo para sa ating bansa. Ngayong araw na ito (Miyerkules), punong-puno ang schedule ng ating Pangulo,” ani Gomez. ( DARIS JOSE)
Kelot na wanted sa rape sa Valenzuela, shoot sa selda
TIMBOG ang isang tambay na akusado sa malupit umanong pamamaraan ng panghahalay sa babaeng biktima nang masukol ng pulisya habang naglalakad sa Valenzuela City.
Sa kanyang ulat kay Northern Police District (NPD) Director P/BGen. Benliner Capili, sinabi ni Valenzuela Police Chief P/Col. Joseph Talento na nakatanggap sila ng impormasyon na naispatan sa lungsod ang presensya ng 23-anyos na akusado na si alyas “Bogart”, residente ng Rivera Compound, Sitio Gitna, Novaliches, Quezon City.
Kaagad ikinasa ng mga tauhan ni Col. Talento ang manhunt operation hanggang sa matiyempuhan nila ang akusado sa kahabaan ng CJ Santos Street, Brgy. Malinta dakong alas-11:15 ng umaga.
Hindi na nakapalag si alyas Bogart nang bitbitin ng pulisya sa bisa ng warrant of arrest na inilabas ng Valenzuela City Regional Trial Court (RTC) Branch 171 para sa kasong Rape by Carnal Knowledge at Rape by Sexual Assault.
Hindi na binanggit ng pulisya ang malupit na pamamaraan ng panghahalay na ginawa ng akusado sa kanyang biktima na dahilan upang hindi siya payagang makapaglagak ng piyansa para sa pansamantalang paglaya.
Pansamantalang nakadetine sa Custodial Facility Unit ng Valenzuela Police Station ang akusado habang hinihintay ang utos ng hukuman para sa paglilipat sa kanya sa pangangalaga ng Bureau of Jail Management and Penology (BJMP).
(Richard Mesa)
Pambansang Watawat ng Pilipinas, iwinagayway sa Imus para sa ika-128 Anibersaryo ng Labanan sa Alapan!
ISINAGAWA ang solemneng seremonya ng pagtataas ng watawat sa Dambana ng Pambansang Watawat, Alapan II-B, Lungsod ng Imus, araw, Mayo 28, 2026.
Ang taunang pagdiriwang na ito para sa National Flag Days ay pinangungunahan ng National Historical Commission of the Philippines (NHCP) at ng Sandatahang Lakas ng Pilipinas (AFP), katuwang ang Pamahalaang Lungsod ng Imus sa pangunguna nina Mayor Alex Advincula, Vice Mayor Homer Saquilayan, Congressman AJ Advincula, kasama mga Konsehal ng Panglungsod.
Mas naging makabuluhan at makasaysayan ang okasyon sa pagdalo ng mga matataas na pinuno ng pamahalaan sa pangunguna nina DILG Secretary Jonvic Remulla at Cavite Governor Abeng Remulla, kasama ang ating natatanging panauhin na si Senator JV Ejercito.
Ang pagtitipong ito ay nagsisilbing paalala ng kabayanihan ng mga Pilipino sa laban para sa kalayaan, kung saan unang iwinagayway ang pambansang sagisag matapos ang tagumpay sa Battle of Alapan noong 1898. Isang pagpupugay sa pagkakaisa ng ating mga pinuno at sa walang-humpay na pagmamahal sa bayan! 
(Kim Bornella/ Boy Morales Sr.)
NHA NAGKALOOB NG HIGIT ₱64 MILYONG EHAP SA MGA BIKTIMA NG SUNOG SA PAROLA, MANILA
NAGKALOOB nitong Mayo 29, 2026 si National Housing Authority General Manager Joeben A. Tai ng kabuuang ₱64 milyon na tulong pinansyal sa 2,134 pamilyang naapektuhan ng sunog na naganap sa Parola, Tondo, Maynila noong Mayo 23, 2026.
Kasunod ito ng pangako ni Pangulong Ferdinand “Bongbong” R. Marcos Jr. sa kanyang kamakailang pagbisita sa mga apektadong pamilya, kung saan inatasan niya ang NHA na agarang magbigay ng tulong-pinansyal sa pamamagitan ng Emergency Housing Assistance Program (EHAP).
Dito ay tumanggap ang bawat pamilya ng ₱30,000 na umabot sa kabuuang ₱64,020,000 ang naipamahagi sa mga benepisyaryo.
Kabilang sa mga benepisyaryo ang mga pamilyang mula sa Brgy. 275, Zone 25, Parola Compound, partikular sa Gate 46, 52, 54, 56, at 58.
Sa kanyang mensahe, tiniyak ni General Manager Joeben A. Tai sa mga apektadong pamilya na nananatiling matatag ang NHA sa paghahatid ng agarang tulong at mga programang pabahay para sa mga komunidad na naapektuhan ng mga kalamidad at sakuna.
Ang EHAP ay isa sa mga programa ng NHA na naglalayong magbigay ng tulong-pinansyal sa mga pamilyang naapektuhan ng sunog, pagbaha, lindol, at iba pang kalamidad upang matulungan silang muling makabangon at makapagsimulang muli.
Kinilala rin ng NHA ang matibay na pakikipagtulungan ng Pamahalaang Lungsod ng Maynila, sa pangunguna ni Mayor Francisco “Isko” Moreno Domagoso, na naging mahalagang katuwang ng ahensya upang maisagawa nang maayos at mabilis ang pamamahagi ng ayuda sa mga apektadong residente.
Sa ilalim ng pamumuno ni GM Tai, patuloy na pinapalakas ng NHA ang mga programa nito upang makapaghatid ng ligtas, matatag at sustanableng mga solusyon sa pabahay para sa mga pamilyang Pilipinong nangangailangan, kasabay ng agarang pagtugon ng pamahalaan sa panahon ng mga sakuna.
Ang aktibidad ay ginanap sa Leonardo B. Fugoso Sports Complex (dating Delpan Sports Complex) sa Maynila. Ito ay dinaluhan nina kung saan ito ay dinaluhan Manila Mayor Domagoso, Manila Urban Settlements Office Head Jay Delafuente, NHA West Sector Regional Manager Cromwell C. Teves, at mga opisyal mula sa lokal na pamahalaan at NHA.
Alinsunod sa layunin ng Bagong Pilipinas ni Pangulong Marcos, Jr., patuloy ang NHA sa pagbibigay ng maaasahang tulong sa pabahay para walang pamilyang mapag-iwanan. (PAUL JOHN REYES)