KINONDENA ng ilang lady solons ang mga naging pahayag ni Quezon City Rep. Bong Suntay sa ginanap na pagdinig ng Justice Committee nitong Martes kaugnay kay Anne Curtis.

Sa isang statement mula kay Committee on Women Chair at Laguna Rep. Ann Matibag, sinabi nito na ito ay simpleng biro o harmless na komento lamang .

Ang pagsasabi sa isang babae bilang object of sexual imagination, lalo na sa isang opisyal na pagdinig ay tahasang sexist at nakakahiya.

Wala aniya umano itong lugar sa anumang institusyong dapat na nagtataguyod ng respeto at propesyunalismo.

Inihayag naman ni Rep. Sarah Elago na hindi katanggap-tanggap ang pahayag ng mambabatas.

Aniya ang pagbabahagi ng kanyang imahinasyon tungkol sa isang babae—anumang dahilan—ay tahasang pambabastos at pag-objectify sa kababaihan.

“We stand firmly with women in denouncing this behavior from those in positions of power. There is no place for sexism and objectification of women by public officials. We will continue to demand respect, uphold women’s dignity, and push for accountability,” ani Elago.

Kaugnay nito, nilinaw naman ni Suntay na walang malisya sa kanyang naging pahayag sa pagdinig ng Justice committee ukol sa impeachment complaint laban kay Bise Presidente kaugnay kay Curtis.
Humingi rin ito ng paumanhin kung naka-offend siya sa naging pahayag niya sa aktres.
“I stand by that analogy that I made but if some people were offended, lalo na Women’s Month, I’m sorry for those who were offended but if you read the context talaga, there was nothing malicious in it. Depende kung bibigyan ng malice nung nagbasa. Pasensiya na po. To make it appear offensive was not the intention.” pahayag ni Suntay sa interbyu nito sa DZMM. (Vina de Guzman)

MAAARING pag-aralan ni Pangulong Ferdinand Marcos Jr., ang suhestiyon ni Sherwn Gatchalian na 4 day work week at Work From Home (WFH) scheme para makatipid sa paggamit ng petrolyo.
“Sa ngayon po ay maaaring pag-aralan po ng Pangulo ang ganyang suhestiyon lalo na kung magiging malala pa po ang nangyayaring Israel-Iran issue,” ayon kay Presidential Communications Office (PCO) Undersecretary at Palace Press Officer Claire Castro sa press briefing sa Malakanyang.
“Sa ngayon po ay hindi pa po ito napag-uusapan,” ani Castro.
Sa ulat, iminungkahi ni Gatchalian ang 4 day work week at WFH scheme para makatipid sa petrolyo bilang tugon sa naging panawagan ng Pangulo sa mga tanggapan ng gobyerno na magtipid sa paggamit ng enerhiya.
Para kay Gatchalian, ‘immediate solution’ ang 4-day work week at WFH scheme sa gitna ng nakaambang na pagtaas ng presyo ng langis dahil sa nagpapatuloy na Middle East crisis.
Sa halip aniya na 5 araw sa kalsada ay 4 na araw na lamang sa kumpanya at work from home para hindi aniya lalabas ng kalsada.
“Kasi once na lumabas ka.. gastos sa petrolyo un eh,” ayon sa senador.
Nauna rito, ipinag-utos ni Pangulong Marcos ang pagtitipid sa paggamit ng enerhiya sa gitna ng nangyayaring kaguluhan sa Middle East.
Ayon sa Pangulo, inatasan niya ang lahat ng tanggapan ng gob­yerno para gumawa ng hakbang para magtipid sa enerhiya.
“Maghanap tayo ng paraan para mabawasan ang ating paggamit ng lahat ng mga sources of energy natin,” saad pa ni Pangulong Marcos.
Bagama’t sapat naman aniya ang supply ng langis sa ngayon ay dapat na rin itong gawin ngayon para mabawasan ang pagbayad dahil sa tataas ang presyo ng mga produktong petrolyo.
‘Yung mga unnecessary travel, ‘yung mga carpooling, ‘yung mga bagay-bagay na ganyan. These are things that the general public can do,” pahayag pa ng Presidente.
Hinikayat din ni Marcos ang publiko na gumamit ng pampublikong transportasyon habang ang mga pribadong sasakyan ay dapat punuin ang mga sakay at hindi lang iisang tao ang gumagamit.
Ang kanyang panawagan aniya ay hindi lang para sa mga ahensiya ng gobyerno kundi maging sa taumbayan. ( Daris Jose)

NAKITAAN ng sufficiency in substance ng House Committee on Justice ang natitirang dalawang impeachment complaints laban kay Vice President Sara Duterte sufficient in substance, na daan para maipagpatuloy ang proseso ng impeachment.

Kapwa nakakuha ng magkaparehong botong 54 na yes, isang no at walang abstention ang dalawang reklamo.

Nagsagawa ng botohan ang komite na pinamumunuan ni Batangas Rep. Gerville “Jinky Bitrics” Luistro matapos ang dalawang araw na deliberasyon para sa ika-tatlo at ika-apat na verified complaints.

Ang ikatlong complaint ay inihain ni Fr. Jose Saballa at iba pa na inindorso ni ML Party-list Rep. Leila de Lima, kung saan inaakusahan ang VP ng maling paggamit umano ng confidential funds, pagsusumite ng kuwestiyonableng liquidation documents, korupsyon noong siya pa ang Department of Education secretary, at ang pahayag ng asasinasyon kina Presidente Ferdinand Marcos Jr., First Lady Liza Araneta Marcos at dating Speaker Ferdinand Martin Romualdez.

Habang ang ika-apat na complaint na inihain ni atty. Nathaniel Cabrera at inindorso naman nina Manila Rep. Bienvenido “Benny” Abante Jr. at Deputy Speaker at La Union Rep. Francisco Paolo Ortega V ay naglalaman ng alegasyon ng procurement irregularities; omissions and misdeclarations sa Statements of Assets, Liabilities and Net Worth; unexplained wealth; at command responsibility sa umanoy maling paggamit ng public funds.

Pawang mga impeachable offenses ito sa ilalim ng Article XI, Section 2 ng 1987 Constitution, kabilang na ang culpable violation of the Constitution, betrayal of public trust, graft and corruption, bribery at iba pang high crimes.

Si House Deputy Majority Leader at Tingog Party-list Rep. Jude Acidre ang nagmosyon na ideklara ang Saballa complaint na sufficient in substance habang si San Juan City Rep. Ysabel Maria Zamora, vice chair ng justice panel ang nagmosyon na ideklara ang Cabrera impeachment complaint na sufficient in substance.

Matapos ang botohan, inaprubahan din ng komite ang mosyon para sa pagpapalabas ng notice kay VP Duterte para sagutin ang dalawang impeachment complaints.

Nakapaloob din sa mosyon na isinulong ni Zamora ang pangangailangang magsumite si Duterte ng kanyang tugon sa loob ng 10 calendar days ng walang extention matapos ntiong matanggap ang notice.
(Vina de Guzman)

NABIKTIMA ng “basag-kotse” si Lito Erice, kapatid ni Caloocan City 2nd District Congressman Egay Erice, na naganap noong Pebrero 27, sa Barangay 106, Caloocan City.

Sa naturang insidente, natangay ng hindi pa nakikilalang kawatan ang bag ng biktima na naglalaman ng ₱480,000 cash at ilang mahahalagang personal na dokumento.

Gayunman, nilinaw ni Lito Erice na ang nasabing halaga ay personal niyang pondo bilang isang negosyante at walang kaugnayan sa anumang transaksyon o kontrata sa pamahalaan.

Aniya, ang pera ay nakalaan para sa pagbili ng mga materyales para sa isang proyektong kanyang pinangangasiwaan, pambayad sa sahod ng mga manggagawa ngayong katapusan ng buwan, at para sa ilang personal na gastusin.

Ipinaliwanag din niya na maaga pa nang mangyari ang insidente at maliwanag ang paligid, na may presensya rin ng maraming tao kaya inakala niyang ligtas ang kanyang sasakyan habang siya ay may saglit na inaasikaso.

Sa kasamaang-palad, wala umanong CCTV sa mismong lugar na maaaring makatulong sa agarang pagtukoy sa mga suspek.

Ayon kay Erice, patuloy siyang nakikipagtulungan sa mga awtoridad para sa masusing imbestigasyon at umaasa na matutukoy at mapapanagot ang mga responsable.

Binigyang-diin ni Erice na siya ay isang pribadong indibidwal at ang nangyari ay isang krimen kung saan siya mismo ang naging biktima.

Hinihiling din niya sa publiko ang patas na pag-unawa at pag-iwas sa mga haka-hakang walang kinalaman sa insidente.
(Richard Mesa)