BILANG preparasyon sa pagdating ng Bagyong Mirasol, sinigurado ng Department of Social Welfare and Development (DSWD) na nakahanda na ang higit sa 2.5 milyong food packs at iba pang relief items para sa mga Filipino na maaapektuhan ng nasabing bagyo.

Sinabi ni Presidential Communications Office Undersecretary at Palace Press Officer Claire Castro sa press briefing sa Malakanyang na alinsunod ito sa direktiba ni Pangulong Ferdinand R. Marcos Jr. na pag-ibayuhin ang disaster preparedness ng bansa.

Sa katunayan, nakatutok na aniya ang DSWD sa mga lugar na posibleng daanan ng bagyo para makapagpaabot ng agarang tulong sa mga maaapektuhang komunidad.

Ayon sa ahensiya, ‘ready to deploy’ na ang mga family food packs maging ang higit 100,000 ready-to-eat food boxes para sa mga maaaring ma-stranded dahil sa inaasahang sama ng panahon.

Bukod aniya sa mga food packs, may higit 300,000 relief items din gaya ng kumot, hygiene kits, modular tents at iba pa na naka-standby para sa ikagiginhawa ng mga pamilyang tutungo sa evacuation center.

Samantala, patuloy ang koordinasyon ng DSWD sa mga Local Government units (LGUs) para siguruhin na mapabilis ang pagtulong sa mga maaapektuhan ng bagyo.

Pinaalalahanan naman ni Castro ang lahat na mag-ingat at sumunod sa mga direktiba ng mga LGUs para sa kanilang kaligtasan. ( Daris Jose)

MULING nagbabala si Dr. Jose Antonio Goitia, Chairman Emeritus tungkol sa lumalalang kalagayan ng ating mga mangingisda at sa lantad na pagkukunwari ng China sa West Philippine Sea.

Paglalarawan ni Goitia na marami nang mangingisda ang lumipat sa konstruksiyon at tinalikuran ang tradisyunal na bumubuhay sa kanila ng maraming henerasyon- ang pangingisda at ito ay dahil sa pinsala at agresyon ng China.

Matatandaan na unang tinuligsa ni National Security Adviser Sec. Eduardo Ano ang hakbang ng China na magtatag ng nature reserve sa Bajo de Masinloc kung saan hinuhuli ang mga endangered species at nasisira ang mga bahura.

Naniniwala si Goitia na hindi kailanman maituturing silang tagapangalaga dahil sila mismo ang sumira sa bahura, hindi lang pinapatay nila ang kalikasan kundi ang kabuhayan at pagkain ng pamilyang Pilipino.

Malinaw kay Goitia na ang tinatawag nilang nature reserve ay pagtatakip lamang ng kanilang illegal na layunin at ito ay makuha ang kontrol sa ating karapatan at kapalit nito ay mas matinding pangha-harass, may pamilyang mapapalayas sa pagyurak sa batas pandaigdig.

At sa huli, nagpaalala si Goitia na ang laban sa West Philippine Sea ay hindi lamang tungkol sa dagat, kundi tungkol sa mismong kinabukasan ng bayan. “Bawat bangkang nakatiwangwang ay tanda ng pagkakanulo,” aniya. “Ito ay laban ng buong sambayanan, hindi lang ng mga mangingisda.”

Nanawagan siya ng pagkilos at pagkakaisa: mula sa fuel subsidy at modernong bangka, hanggang sa pagtiyak ng ligtas na pangingisda.

 “Ang dagat ay hindi kayang ipagtanggol ng mga sumira nito,” giit niya. “Tanging mga Pilipinong mangingisda—ang mga tunay na nagmahal at namuhay kasama ng dagat—ang karapat-dapat na maging tagapangalaga. At tungkulin nating lahat na ipaglaban sila.”

Si Dr. Jose Antonio Goitia ay kinikilala bilang Chairman Emeritus ng apat na makabayan at sibikong organisasyon:, ang ABKD), PADER, LIPI at FDNY.

(Gene Adsuara)

Suportado ni CIBAC Party List Rep. Eddie Villanueva ang ginawang defunding at resetting ng flood control projects sa 2026 budget ni Department of Public Works and Highways (DPWH) Secretary Vince Dizon.

Sa ginanap na the DPWH budget hearing sa Kamara, sinabi ni Dizon na binawasan ng ahensiya ng P252 bilyong halaga ng locally funded flood control projects para sa badyet sa susunod na taon.

“We welcome Secretary Dizon’s resolve to clean up the flood control budget, defund inefficient and non-delivering projects, and remove duplicate projects, to come up with a really genuine and responsive flood control plan,” anang mambabatas.

Sinabi nito na inihain niya ang House Resolution No. 208 na nagsusulong para sa pagpapatupad ng isang comprehensive, interconnected, at corruption-free national flood control master plan base sa naging finding ng mga eksperto tulad ng Project NOAH.

Binanggit sa resolusyon ang lumalalang pagbaha sa Metro Manila at ilang probinsiya sa kabila ng mahigit na ₱1.5 trillion nakalaan sa DPWH flood control budget simula 2019.

“Our people deserve real solutions—not ghost or overpriced projects, not piecemeal intervention, not corruption-ridden deals. We call for a flood control master plan that truly safeguards Filipino families and reflects the highest standards of stewardship and accountability,” pagtatapos ni Villanueva. (Vina de Guzman)

NASAMSAM sa isang hinihinalang tulak ng illegal na droga ang mahigit P.1 milyong halaga ng shabu matapos umanong kumagat sa ikinasang buy bust operation sa Valenzuela City, Martes ng gabi.

Sa report ni P/Lt. Swerwin Dascil, OIC chief ng Station Drug Enforcement Unit (SDEU) ng Valenzuela police kay Acting Chief P/Col. Joseph Talento, sinabi niya nakatanggap sila ng impormasyon hinggil sa umano’y illegal drug activities ni alyas “Waway”.

Nang magawang makipagtransaksyon sa suspek ng isa sa mga operatiba ng SDEU, kaagad bumuo ng team si Lt Dascil bago ikinasa ang buy bust operation, sa koordinasyon sa PDEA.

Sakay ng kanyang motorsiklo, nakipagtagpo umano ang suspek sa isang pulis na nagpanggap na buyer sa ilalim ng West Service Road Footbrigde, sa West Service Road, Brgy., Paso De Blas.

Nang tanggapin umano ng suspek ang marked money mula sa police poseur buyer, kapalit ng isang plastic sachet ng shabu ay agad siyang dinamba ng mga tauhan ni Lt Dascil dakong alas-11:05 ng gabi.

Nakumpiska sa suspek ang humigi’t kumulang 20 grams ng hinihinalang shabu na may standard drug price na P136,000, buy bust money na binubuo ng isang tunay na P500 at pitong P1,000 boodle money, P200 recovered money at gamit niyang motorsiklo.

Ayon kay SDEU investigator P/MSgt. Ana Liza Antonio, nakatakda nilang sampahan ang suspek ng kasong paglabag sa Sections 5 at 11 under Article II ng R.A 9165 o ang Comprehensive Dangerous Drug Act of 2002 sa Valenzuela City Prosecutor’s Office sa pamamagitan ng Inquest Proceedings. (Richard Mesa)

NASAMSAM ang tinatayang P272 milyong halaga ng illigal na droga sa isinagawang operasyon ng pinagsanib na pwersa ng PCG, PDEA, at Coast Guard K9 Unit, sa Batangas Port noong Martes, Setyembre 16.

Nadiskubre ang mga  kontrabando sa loob ng 4 na speakers, na lulan ng isang sasakyan na minamaneho ng isang 30-anyos na taga-Cotabato City. matapos nagpositibo ito sa K9 unit, ayon sa PCG.

Dinala na ang suspek at mga ebidensya sa PDEA Headquarters, para sa imbestigasyon.

Itinuring naman ng PCG, na isa itong matagumpay na operasyon  na nagpapakita ng matibay na pagtutulungan sa pagitan ng mga pinagsanib na pwersa ng mga ahensya sa pagpigil at pagpasok ng ilegal na droga sa pamamagitan ng mga daungan sa bansa. (Gene Adsuara)

NAGLABAS ang Manila LGU ang mga lansangan na sakop ng MMDA Regulation No 25-001 na nagbabawal sa pagparada ng mga sasakyan sa mga kalsada.

Kabilang dito ang 7 na nasa ilalim ng ABSOLUTE NO PARKING ZONES o 24-oras na bawal pumarada sa kalye ang: Pres Quirino Ave; Roxas Blvd o R1; Taft Ave o R2; Magsaysay Blvd at Aurora Blvd o R6; Rizal Ave o R9; Delpan o R10 at ang 17 Mabuhay Lanes.

Habang ang mga kalye na ipagbabawal magparada o No Parking Zones sa pagitan ng 7-10 ng umaga at 5-8 ng hapon, ang Alfonso Mendoza St, Ayala Blvd, Blumentritt Rd.

Kasama rin ang Finance Rd, Guanzon St, Jose Abad Santos Ave, westbound ng Kalaw, Lawton, Legarda St, Moriones St. Onyx St, Osmeña Highway, Pablo Ocampo St, Mel Lopez Blvd o R10, San Andres Bukid, United Nations Ave, at Zobel Roxas St.

Samantala, nagsumite naman ng hiling na exemption ang Manila Traffic and Parking Bureau sa MMDA.

Ito ay dahil sa may ilang kalsada umano sa Maynila ang kailangan mapagamit bilang paradahan dulot ng interes ng pagne-negosyo at mga paaralan.

(Gene Adsuara)

BUONG suporta ang ibinigay ni House Committee on Overseas Workers Affairs Chair at AGIMAT partylist Rep. Bryan Revilla sa inisyatibo ng Bureau of Customs (BOC) na magbuo ng isang task force na tututok sa mga isyu kaugnay sa balikbayan box concerns lalo na ngayong nalalapit na kapaskuhan.

“Kapag Pasko, dagsa talaga ang balikbayan boxes. Pero higit pa sa mga padala, dala nito ang pagmamahal at sakripisyo ng ating mga kababayang nasa abroad. Kaya timely at kailangan ang task force na ito ng BOC para mabawasan ang delays, maiwasan ang unfair fees, at masigurong makakarating ang bawat pasalubong sa tahanan ng mga Pilipino nang walang dagdag na pasakit,” ani Revilla.

Ayon sa mambabatas, dapat pagtuunan ng pansin ng task force ang paglilinaw sa usapin ng buwis at iba pang fees na hindi malinaw, streamlining customs procedures upang maiwasan ang bottlenecks tuwing peak season, at siguruhin na malinaw ang regulasyon sa mga padala.

“Dapat matiyak na ang mga scammer o abusadong forwarders ay hindi lang pinapatawan ng parusa kundi tuluyang maba-blacklist dahil ang bawat balikbayan box ay simbolo ng dugo at pawis ng ating mga OFW. Ayaw nating may mga padalang nabubulok lang sa mga bodega hanggang ma-expire nang walang nakikinabang, gayong ang mga ito’y nakalaan para sa mga pamilya nilang matagal nang naghihintay at sabik nang matamasa ang bunga ng kanilang pagsusumikap,” giit ni Revilla.

Nanawagan naman ito sa mga civil society, OFW groups, at media partners na palakasin ang boses ng migrant workers, siguruhin na naaayon at matutugunan ng mga polisiya ang pangangailangan ng mga OFWs.

“Ngayong Pasko na dumarami ang balikbayan boxes, at habang mas marami pang OFWs ang nakakatanggap ng tulong mula sa AKSYON, ipakita natin sa ating mga modern-day heroes na pinapahalagahan ang kanilang sakripisyo, pinoprotektahan ang kanilang karapatan, at may gobyernong tunay na kakampi nila,” pagtatapos ni Revilla. (Vina de Guzman)

NAGPAKALAT ng 12 sasakyan para sa “Libreng Sakay” ang Pamahalaang Lungsod ng Malabon, sa pamamagitan ng mga pangunahing tanggapan nito bilang paghahanda sa nakatakdang transport strike sa Setyembre 17–19, 2025, upang matiyak ang mabilis na pagkilos, kaligtasan, at kaginhawahan ng mga Malabueñong mananakay.

“Magkaroon man po ng mga transport strike na kagaya nito, tayo po ay palaging nakahanda para masiguro ang kapakanan ng Malabueño. Layunin po natin na walang hassle para sa ating mga commuters at masiguro na maayos ang trapiko sa ating lungsod, kaya ating inihanda ang Libreng Sakay na maghahatid sa kanila sa kanilang mga pupuntahan,” ani Mayor Jeannie Sandoval.

Ayon sa alkade, katuwang ng Pamahalaang Lungsod ang Public Safety and Traffic Management Office (PSTMO), General Services Department (GSD), Mayor’s Complaint and Action Team (MCAT), at Malabon Disaster Risk Reduction and Management Office (DRRMO) para ihanda at pakilusin ang mga sasakyan na susuporta sa mga pangangailangan ng commuter at kaligtasan sa kalsada sa panahon ng welga.

Nakipag-ugnayan din ang lungsod sa Malabon City Police, Bureau of Fire Protection–Malabon, at mga opisyal ng barangay para patuloy na masubaybayan ang kaligtasan ng publiko sa iba’t ibang lugar.

Ang Central Command at Communications Center naman ay nananatiling ganap na gumagana para sa real-time na pagsubaybay at pagtugon.

Sinabi naman ni PSTMO Chief Ret. Col. Reynaldo Medina na nakipag-ugnayan din sila sa mga lokal na transport group kabilang ang mga operator at driver ng mga tricycle, e-trike, pedicab, at jeepney na magpapatuloy sa kanilang operasyon sa panahon ng welga.

Tiniyak ni Mayor Sandoval sa mga Malabueño na ang Pamahalaang Lungsod ay nananatiling maagap at handa sa pagbibigay ng tulong sa transportasyon at pagpapanatili ng kapayapaan at kaayusan sa panahon ng welga.

Hinihikayat din niya ang mga residente na gamitin ang Malabon All Hazards One Network (AHON) 24/7 Alert Application o makipag-ugnayan sa mga sumusunod na hotline 0942-372-9891 / 0919-062-5588 / (02) 8921-6009 / (02) 8921-6029 para sa mga emerhensiya at iba pang alalahanin. (Richard Mesa)