NAGHAIN ng resolusyon ang ilang mambabatas upang gawing 35% ang taripa sa imported na bigas mula sa kasalukuyang 15%.

Nakapaloob ito sa House Joint Resolution No. 3 na inihain ninaDinagat Islands Representative Kaka Bag-ao, Akbayan Rep. Dadah Kiram Ismula, Rep. Chel Diokno, Rep. Perci Cendaña, Mamamayang Liberal Partylist Rep. Leila De Lima, Albay Rep. Krisel Lagman, at Kamanggagawa Partylist Rep. Elijah San Fernando.

Ikinaalarma ni Bag-ao ang pagbaba ng farmgate prices ng palay sa P16.9/kg mula sa original na P24.9/kg sa mga nakalipas na taon sa kabila ng mataas na costs of production na nasa average na P13.38/kg.

“Dahil sa mababang taripa sa inaangkat na bigas unti-unti nating pinapatay ang kabuhayan ng ating mga magsasaka. Hindi pa inaani yung palay, lugi na agad ang mga magsasaka,” ani Bag-ao.

Ayon sa mambabatas, dapat agad magpatupad muli ang gobyerno ng mataas na taripad makaraang bumaha ang imported na bigas dala na rin sa pagbaba nito.

“Noong 2024 kumonti ang suplay ng bigas dahil sa El Niño kaya binaba ng gobyerno ang taripa sa pag-angkat ng bigas para dumami ang supply. Ngayong wala nang El Niño, nararapat nang ibalik ang original na 35% tariff. Isang malaking salot sa rice farmers natin itong mababang taripa. Sa dulo, hindi na nga nararamdaman ng mga mamimili na bumaba ang presyo ng bigas, lalo pang naghihirap ang ating mga magsasaka,” dgdag nito.

Iginiit pa ni Bag-ao na tungkulin rin ng kongreso na protektahan ang kabuhayan ng mga magsasaka sa pamamagitan ng supisyenteng subsidiya at suporta habang ginagarantiya nito ang maayos na suplay ng murang bigas.

Iginiit pa nito na dapat gawin ng konreso ang orihinal nitong papel na maglagay ng tariff prices upang maiwasan na magkaproblema sa presyo ng bigas sa hinaharap.

“Congress delegated the power to impose those tariffs in accordance with RA 10863 or the Customs Modernization and Tariff Act and also provided the conditions when it can withdraw that power–through a joint resolution of Congress. Panahon nang gamitin natin itong kapangyarihan para sa agrikultura natin,” pagtatapos ni Bag-ao. (Vina de Guzman)

SINUSPINDE ng Land Transportation Office (LTO), sa ilalim ng pamumuno ni Department of Transportation (DOTr) Secretary Vince Dizon, ang lisensya ng 11 taxi at Transport Network Vehicle Service (TNVS) drivers matapos makatanggap ng mga reklamo ng sobrang paniningil sa mga pasahero sa Ninoy Aquino International Airport (NAIA).

Ayon kay LTO Chief, Assistant Secretary Atty. Vigor D. Mendoza II, ang 90-araw na preventive suspension ng lisensya ng mga nasabing driver ay alinsunod sa direktiba ni Pangulong Ferdinand “Bongbong” R. Marcos Jr. na tugisin ang mga abusadong driver ng pampublikong transportasyon na nananamantala sa mga pasahero.

“We already suspended a lot of erring taxi and TNVS drivers in the past weeks. Akala yata ng mga ito ay ningas cogon lang ang ginagawa natin, nagkakamali sila at itong 11 na drivers na ito ay patunay na tuloy tuloy ito,” saad ni Asec Mendoza.

“Ito ang mahigpit na bilin sa ating ni Secretary Dizon na huwag tantanan ang mga abusadong drivers ng taxi at TNVS na ito dahil nadadamay ang mga marami pa ring mga taxi at TNVS drivers na mga matitino,” dagdag pa nito.

Ang pagsuspinde sa lisensya ng mga driver ay bunga ng isinagawang operasyon ng pinagsamang puwersa ng Land Transportation Office (LTO) at Philippine National Police (PNP), sa pamamagitan ng Aviation Security Group, laban sa mga taxi at TNVS drivers na sangkot sa paniningil ng labis, panunuba, at pagtanggi sa mga pasahero.

Batay sa paunang imbestigasyon ng LTO-Intelligence and Investigation Division sa pamumuno ng hepe nitong si Renante Melitante, napag-alamang naniningil ang 11 taxi at TNVS drivers ng halagang mula ₱200 hanggang ₱700 para lamang sa maikling biyahe mula NAIA Terminal 1 patungong Terminal 3.

Sa direktiba ni Secretary Dizon, inatasan ni Asec Mendoza ang regular na pag-deploy ng mga tauhan ng LTO sa mga terminal ng NAIA upang agad na maaksyunan ang mga reklamo ng pananamantala sa pamasahe.

Sa Show Cause Order (SCO) na inilabas laban sa 11 taxi at TNVS drivers, inatasan silang magpaliwanag kung bakit hindi dapat tuluyang bawiin ang kanilang driver’s license dahil sa pagiging ‘improper person to operate a motor vehicle’.

“We also ordered them to immediately surrender their driver’s license. Dahil sa kanilang pananamantala, matagal-tagal o baka hindi na sila makapag-trabaho bilang taxi at TNVS drivers,” saad ni Asec Mendoza.

Ang aksyon ng LTO ay hiwalay sa legal na proseso na isasagawa ng LTFRB kaugnay ng prangkisa ng 11 taxi at TNVS units. (PAUL JOHN REYES)

UMAAPELA  ang Philippine General Hospital (PGH) sa publiko na sa ibang ospital na lamang muna dalhin ang mga pasyente bunsod ng pagtaas ng mga dinadalang pasyenteng may leptospirosis at pneumonia.

Hinihikayat ng PGH ang mga pas­yente na maghanap muna ng ibang ospital na maaaring magbigay ng agarang serbisyo sa inyo.

Batay sa ulat, umabot sa 400% ang mga pasyenteng dinala sa ER ng nabanggit na pampublikong pagamutan, na ang kapasidad ay nasa 75 katao lamang.

Kaugnay nito, siniguro naman ni Department of Health (DOH) Secretary ­Teodoro Herbosa na handang tumulong sa PGH ang mga DOH-run hospitals at mga ospital ng Government-Owned or Controlled Corporation (GOCC) sa National Capital Region.

Sinabi naman ni Herbosa na bukas at handa ang mga DOH hospital pati na rin ang apat na GOCC hospitals na tanggapin ang mga pasyenteng hindi muna matatanggap sa UP-PGH dahil sa panandaliang pagkapuno ng ER nito.