2024 December 24 Archive - People's Balita

Archive for December 24th, 2024

Higit P1 milyon shabu, nasabat sa HVI tulak sa Caloocan

Posted on: December 24th, 2024 by @peoplesbalita No Comments

KALABOSO ang isang drug suspect na itinuturing bilang High Value Individual (HVI) matapos makuhanan ng mahigit P1 milyon halaga ng shabu makaraang kumagat sa ikinasang buy bust operation ng pulisya sa Caloocan City.

Sa kanyang ulat kay Northern Police District (NPD) Acting Director P/Col. Josefino Ligan, kinilala ni District Drug Enforcement Unit (DDEU) chief P/Col. P/Capt. Regie Pobadora ang naarestong suspek na si alyas “Kuya”, 47, ng Sta Monica, Hagonoy, Bulacan.

Ayon kay Capt. Pobadora, ikinasa nila ang buy bust operation matapos magawang makipagtransaksyon sa suspek ng isa sa kanyang mga tauhan ng P36,000 halaga ng shabu.

Nang tanggapin umano ng suspek ang marked money mula sa pulis na nagpanggap na poseur buyer kapalit ng isang medium plastic sachet ng shabu ay agad siyang dinamba ng mga operatiba ng DDEU dakong alas-3:18 ng madaling araw sa Sta Quiteria, Brgy. 161, Caloocan City.

Nakumpiska sa suspek ang humigi’t kumulang 150 grams ng hinihinalang shabu na may standard drug price value na P1,020,000.00, buy bust money na isang tunay na P1,000 bill at 35-pirasong P1,000 boodle money, sling bag, cellphone keypad, at gamit niyang motorsiklo.

“This operation is a testament to the NPD’s unwavering commitment to eradicating illegal drugs and creating a safer environment for the residents of Metro Manila,” ani NPD Director.

“We urge the public to continue supporting our efforts by reporting any illegal drug activity to the authorities. Together, we can make our communities safer.” dagdag niya.

Mahaharap ang suspek sa kasong paglabag sa Section 5 (Sale of Dangerous Drugs) at Section 11 (Possession of Dangerous Drugs) under the Republic Act (R.A.) 9165 o ang Comprehensive Dangerous Drugs Act of 2002. (Richard Mesa)

Reenacted budget para sa 2025, hindi pinag-usapan- Malakanyang

Posted on: December 24th, 2024 by @peoplesbalita No Comments

HINDI napag-usapan at tinalakay ang potensiyal na reenacted budget para sa 2025.

Nagkaroon kasi ng masusing pagrerebisa sina Pangulong Ferdinand Marcos Jr., at ang mga miyembro ng kanyang gabinete sa 2025 General Appropriations Bill (GAB), dalawang araw bago ang Kapaskuhan.

Nakapulong ng Pangulo sina Executive Secretary Lucas Bersamin, Public Works and Highways Secretary Manuel Bonoan, at ang mga economic manager para suriing mabuti ang panukalang P6.352-trillion 2025 national budget sa Palasyo ng Malakanyang.

Sinabi ni Presidential Communications Office (PCO) Secretary Cesar Chavez na ang printed copy ng spending bill ay hapon na ng Disyembre 20 natanggap ng Malakanyang.

Gayunman, umaasa ang Pangulo na malalagdaan niya ang budget bill bago matapos ang taon.

“In the two meetings I attended with them, there was no mention of that,” ang sinabi ni Chavez nang tanungin ukol sa posibilidad ng reenacted budget para sa 2025.

Matatandaang, noong nakaraang linggo, sinabi ni Pangulong Marcos na hihimaying mabuti ng Office of the President (OP) ang 2025 budget, lalo na ang probisyon na naglalarawan ng matinding pagkabahala.

Sinabi pa ng Punong Ehekutibo na hahanap siya ng paraan para maibalik ang P10-billion na tinapyas sa budget ng Department of Education para sa 2025.

Samantala, idinepensa naman ni Pangulong Marcos ang hindi paglalaan ng anumang subsidiya para sa Philippine Health Insurance Corp. para sa susunod na taon, tinukoy ang tinatayang reserve ng PhilHealth na P500 billion bilang patunay ng financial stability nito. (Daris Jose)

Oleksandr Usyk muling tinalo si Tyson Fury

Posted on: December 24th, 2024 by @peoplesbalita No Comments

TINALO ni Oleksandr Usyk si Tyson Fury sa kanilang ikalawang pagkikita sa boxing ring.

Nakuha ni Usyk ang unanimous decision na panalo sa laban na ginanap sa Saudi Arabia.

Dahil dito ay nananatiling wala pa rin itong talo sa dalawang division.

Magkakaparehas na binigyan ng judges na 116-112 ang Ukrainian boxer para ibigay ang ikalawang pagkatalo kay Fury.

Mayroon ng 23 panalo at wala pang talo si Usyk na mayroong 14 knockouts habang si Fury ay mayroong 34 panalo, dalawang talo at isang draw.

Unang tinalo ni Usyk si Fury noong buwan ng Mayo at humirit pa ito ng rematch.

Taong 2022 ng ianunsiyo ni Fury ang kaniyang pagreretiro sa boxing at ito bumalik muli sa laban matapos ang ilang buwan.

Kinuwestiyon naman ni boxing promoter Frank Warren ang desisyon ng mga judges subalit minaliit lamang ito ni Usyk.

Nanguna naman si Ukrainian President Volodymyr Zelensky na bumati sa kanyang kababayan na boksingero.

Naging sundalo kasi si Usyk na siyang lumaban din ng sakupin sila ng Russia.

Online shopping scams ngayong holiday season, maaari ng isumbong sa pamamagitan ng eGov app – DICT

Posted on: December 24th, 2024 by @peoplesbalita No Comments

Maaari ng isumbong ang naglipanang online shopping scams ngayong holiday season sa pamamagitan ng eReport feature ng eGov Super App.

Sa isang statement, sinabi ni Department of Information and Communications Technology (DICT) USec. David Almirol na ang pinakabagong feature ay ang e-commerce reporting para sa consumer protection ng Department of Trade and Industry (DTI). Natatanggap umano ng DTI Consumer Protection Office ang real-time reports at agad itong inaaksyunan.

Pinapadali naman ng bagong e-Report feature ang proseso ng pagsusumbong ng scam numbers sa pamamagitan ng pag-capture ng screenshot ng kahina-hinalang text message kasama ang numero ng sender na maaaring isumite ng user sa gobyerno sa pamamagitan ng eGov App.

Kaugnay nito, hinihimok ng DICT ang publiko na gamitin ang e-Report at eTravel features ng eGov Super App sa gitna ng inaasahang pagtaas ng mga krimen ngayong Christmas holiday.

BI personnel, full force ngayong Christmas season

Posted on: December 24th, 2024 by @peoplesbalita No Comments

Tiniyak ng Bureau of Immigration na naka full alert ang lahat ng kanilang mga tauhan sa Ninoy Aquino International Airport at sa lahat ng ports of entry at exit sa buong bansa ngayong holiday season.

Ayon kay Immigration Commissioner Joel Anthony Viado, ito ay upang masiguro na magiging mapayapa at matiwasay ang biyahe ng mga pasahero sa mga paliparan at mga pantalan na hahabol na makauwi sa kani-kanilang mga probinsya.

Paliwanag ni Viado, handa na ang kanilang mga tauhan sa inaasahang buhos ng mga pasahero.

Nagpatupad na rin ang kanilang ahensya ng ‘No Leave Policy’ sa lahat ng kanilang mga frontline personnel mula noong December 15 at magtatapos hanggang January 15.

Naka-deploy na rin ang kanilang mga tauhan sa NAIA, paliparan sa Clark, Mactan, Davao at Kalibo at sa Zamboanga international seaport. (Daris Jose)

PBBM, nangako ng mabilis na rehabilitasyon ng storm-hit shelters sa Cagayan

Posted on: December 24th, 2024 by @peoplesbalita No Comments

NANGAKO si Pangulong Ferdinand R. Marcos Jr. ng mabilis na rehabilitasyon ng mga bahay na winasak ng bagyong Marce sa Cagayan.

Sa naging talumpati ng Pangulo sa isinagawang distribusyon ng financial aid sa Buguey, Cagayan, sinabi ng Pangulo na isinama niya ang lahat ng mga mahahalagang ahensiya ng gobyerno para tiyakin na ang kanilang tulong ay makararating sa mga nawalan ng tahanan dahil kay Marce.

“Hindi kaya ng isang department gawin lahat. Kaya ang tinatawag po namin, ginagawa po namin ay what we call the whole-of-government approach. Ibig sabihin, lahat ng iba’t ibang departamento kahit papaano ay makakadala ng tulong at makakatulong para mabigyan ng relief, para ma-rescue ang ating mga tauhan, para mabigyan ng relief,”ang sinabi ni Pangulong Marcos.

“At ngayon, ngayon dito sa Cagayan, ang dapat talaga nating tingnan ay ang reconstruction dahil ‘yung sa… Sa public infrastructure, okay naman, not so bad. Pero ‘yung mga private na tirahan, ‘yun na nga, nasira. Kaya’t ‘yun ang tututukan natin,” aniya pa rin.

Sinabi ng Chief Executive na hindi aabandonahin ng gobyerno ang mga biktima hangga’t ganap na makabangon ang mga ito mula sa epekto ng bagyo.

Tinuran pa rin ng Pangulo na magpapatuloy naman ang tulong na ipinagkakaloob ng Department of Social Welfare and Development (DSWD).

Samantala, pinangunahan ni Pangulong Marcos ang pag-aabot ng mahigit sa P10 milyon kada munisipalidad ng Aparri, Buguey, Sanchez-Mira, Santa Teresita, Baggao, Gattaran, Gonzaga, at Santa Ana.

Ang pondo ay tinanggap ng kani-kanilang local chief executives.

Sinaksihan din ng Pangulo ang pamamahagi ng tulong mula sa iba’t ibang ahensiya ng pamahalaan gaya ng DSWD, the Bureau of Fisheries and Aquatic Resources (BFAR), National Irrigation Administration (NIA), at Department of Agriculture (DA). (Daris Jose)

PBBM, muling pinulong ang economic managers para sa review ng 2025 nat’l budget

Posted on: December 24th, 2024 by @peoplesbalita No Comments

MULING pinulong ni Pangulong Ferdinand Marcos Jr., ang economic managers na kinabibilangan nina Finance Sec. Ralph Recto, DBM Sec. Amenah Pangandaman at NEDA Sec. Arsenio Balisacan sa Malakanyang, kahapon Lunes.

Ito ay dahil sa patuloy na pinag-aaralan ni Pang. Marcos Jr. ang pambansang pondo para sa susunod na taon.

Kasama rin sa meeting sina Executive Sec. Lucas Bersamin at DPWH Sec. Manuel Bonoan.

Ayon kay Presidential Communications Sec. Cesar Chavez, noong Biyernes lang ng hapon natanggap ng Pangulo ang printed copy ng 2025 national budget.

Target ni Pang. Marcos na mapirmahan ang general appropriations act bago matapos ang taon.

Sabi ni Chavez, sa mga nakaraang pulong ay hindi naman nababanggit ang pagkakaroon ng reenacted budget.

Hindi naman masabi ni Chavez kung anong araw lalagdaan ito ng Pangulo. (Daris Jose)

Inabandonang bagong panganak na sanggol, na-rescue sa Malabon

Posted on: December 24th, 2024 by @peoplesbalita No Comments

MATAGUMPAY na nailigtas ng mga awtoridad ang isang inabandonang bagong panganak na sanggol sa gilid ng kalsada sa Malabon City, Lunes ng umaga.

Ayon kay Malabon police chief P/Col. Jay Baybayan, dakong alas-6:40 ng umaga nang mapansin ng saksing si Marlyn Amado, 20, Vendor ng Brgy. Potrero ang isang pulang eco bag sa kanto ng Santolan Road at McArthur Highway, Bgry. Potrero.

Nang kanyang tignan, laking gulat ni Amado nang madiskubre sa loob ang isang bagong panganak na sanggol na buhay pa kaya agad siyang humingi ng tulong sa mga nagpapatrol tauhan ng Malabon Police Sub-Station (SS1).

Agad namang dinala ng mga tauhan ng SS1 sa pangunguna ni P/Lt. Benedicto Zafra ang sanggol sa MakatTao Hospital kung saan ito patuloy na inoobserbahan upang tuluyang mailigtas sa panganib ang baby.

Pinuri naman ni Northern Police District (NPD) Acting Director P/Col. Josefino Ligan ang Malabon police sa mabilis na pagtugon, pati na ang babaing nakakita para mailigtas ang sanggol.

Iniutos na rin ni Col. Baybayan sa kanyang mga tauhan na rebisahin ang mga kuha ng CCTV sa lugar upang matukoy kung sino ang nag-abandona sa sanggol. (Richard Mesa)

NADIA, naoperahan dahil sa ‘Wolff-Parkinson-White’ syndrome at mabilis ang naging recovery

Posted on: December 24th, 2024 by @peoplesbalita No Comments

ISA ang dating aktres na merong Wolff-Parkinson-White syndrome kung kaya dumaan ang si Nadia Montenegro sa isang operasyon

Binanggit din niya na meron na siyang ganito noong 17 taong gulang pa lamang siya at ang surgery niya kamakailan ang pinaka-una niyang operasyon.

Ang tinatawag na WPW syndrome ay isang heart condition na congenital o meron na pagkapanganak.

Sey pa ng aktres na isa sa chief of staff ni Sen. Robin Padilla ay hindi raw naman ito nakamamatay kaya hindi niya ito pinaopera kaagad.

Pero ang nangyari raw sa kanya noon ay nag-palpitate siya at inatake siya nito.

Ganon daw pala ang pakiramdam ng hindi ka sigurado kung makalalabas pa ng ospital na ang dami raw pala niyang biglang iisipin na gustong sabihin.

Sa ngayon ay medyo okey na ang kundisyon ni Nadia at mabilis ang kanyang naging recovery.

Well, pagaling ka pa nang husto Ms. Nadia at maraming salamat sa pag-aayos sa aming mga movie press sa pa-ayuda ni Sen. Robin Padilla.

***

NAG-ENJOY kami sa concert cum prescon and with matching Christmas party na handog ni Rozz Daniels na ginanap sa Music box kamakailan lang.

Bumaha ng mga pa raffle prizes, hindi man kami pinalad na manalo pero happy kami dahil nai-launch ang singing career ng aming kaibigang showbiz editor na si Blessie Cirera.

Kasama si Blesilda sa naghandog ng awitin sa concert na yun with matching back up Ate Pilar Mateo and Favatini San.

May mga dapat pa tayong aabangang pasabog sa tandem nina Blessie at Rozz.

Kasalukuyang inihanda na nila ang pagkaroon ng recording.

Although hindi na teenager ang singer at producer ay sunod-sunod pa rin ang offer kay Rozz lalo na sa America kung saan siya naka-base.

Nagpe-perform din naman sa America si Rozz para sa mga kababayan natin.

Paano na ang comparison ng Pinoy audience sa mga nanonood ng concert niya sa abroad.

“Well malaki ang kaibahan. Sa America kukunin ka dahil alam nila marunong kang kumanta.

“After mong umawit, yung mga Pinoy doon lalapit sayo at magpapasalamat. Pero yung mga Kano. Wala lang, basta ka na lang ni-let go nila.

“Dito sa Pilipinas, may palakpakan at humihiyaw pa at talagang super pasasalamat sa ‘yo after ng performance mo,” banggit pa ni Rozz.

Samantala, kagaya rin karamihan sa Pinoy ay sobra siyang maka-nanay.

Isa raw sa dahilan nang pag-uw- niya sa Pilipinas ay ang may karamdaman niyang ina.

Medyo sumama raw loob ni Rozz sa dinatnan niyang kalagayan ng kanyang ina.

“Kung di pa ako umuwi dito sa Pilipinasa di ko malaman na ganun na pala ang kalagaysn ng ina ko,” kuwento pa ni Rozz.

(JIMI C. ESCALA)