LUNGSOD NG MALOLOS – Upang makapagbigay ng accessible na serbisyong pangkalusugan at suporta sa mga Bulakenyo, pinangunahan nina Senador Christopher Lawrence “Bong” Go, Senador Joel “Tesdaman” Villanueva kasama sina Gobernador Daniel R. Fernando at Bise Gob. Alexis C. Castro ang Pagbubukas ng Ika-161 na Malasakit Center sa Joni Villanueva General Hospital sa Bocaue, Bulacan kamakailan.

Layong magsilbi bilang one-stop shop sa mga ahensiya kabilang na ang PhilHealth, Philippine Charity Sweepstakes Office, at Department of Social Welfare and Development, magkakaloob ang Malasakit Center ng tulong medikal at pinansiyal sa mga kapus-palad na pasyente nang hindi na kinakailangan pang umalis sa lugar ng ospital upang ma-access ang mga serbisyo ng mga nabanggit na ahensiya.

Ipinaabot naman ni Fernando ang kanyang pasasalamat kina Senador Go at Villanueva at sa lahat ng mga taong nasa likod ng pagkakatayo ng ikaapat na Malasakit Center sa lalawigan.

“Ang center na ito ay nagpapatunay sa ating kolektibong adhikain na magbigay ng mas abot-kamay, abot-kaya at dekalidad na serbisyong pangkalusugan para sa lahat. Access to healthcare is a fundamental human right, and it is our duty as public servants to ensure that this right is upheld for every Bulakenyo,” anang gobernador.

Samantala, dinaluhan din ang paglulunsad ng mga opisyal ng Department of Health kabilang na sina Asec. Ariel Valencia, Usec. Maria Rosario Singh-Vergeire, Usec. Emmie Liza Perez-Chiong, Director Girlie Velozo, Regional Director Corazon I. Flores; Congressman Ambrosio Cruz, Bocaue Mayor Eduardo Villanueva, Jr., at Bocaue Vice Mayor Abgd. Sherwin Tugna; Dr. Renely Tungol, Medical Center Chief ng Joni Villanueva General Hospital; at iba pang mga kinatawan mula sa mga katuwang na ahensiya.

TULOY ang plano ng Metro Pacific Investments Corp. (MPIC) sa ilalim ni Manny Pangilinan na bilihin ang 35 porsiento investment ng mga Ayalas sa operator ng Light Rail Transit Line 1 (LRT1) upang mas mapalakas ang MPIC’s portfolio na siyang magbibigay daan sa tuluyang pag-bid sa nasabing railway.

“Our company is looking to acquire the Ayala’s stake in the Light Rail Manila Corp. (LRMC) to become its majority owner with a 70.8 percent share,” wika ni MPIC chairman Manuel V. Pangilinan.

Ayon kay Pangilinan ang acquisition ng MPCI sa interes ng mga Ayalas sa LRMC ay siyang magpapatibay at magtataas sa kanilang operasyon ng railway at palalakasin ang kanilang hangad na mag-bid sa concession upang sila na ang mag-operate at mag- maintain ng Metro Rail Transit Line 3 (MRT3).

“I think the principle we are (keen on buying the Ayala stake in LRMC) for a number or reasons. One is the possibility of being able to bid for the MRT3,” dagdag ni Pangilinan.

Dati pa nagbigay ng isang unsolicited proposal ang MPIC upang sila ang mag manage ng MRT 3 subalit ang Department of Transportation (DOTr) ay hindi ito tinanggap sapagkat gusto ng DOTr na magkaroon ng mga bagong offers para sa proyekto.

Sa ilalim ng administrasyon ni President Ferdinand Marcos, Jr. at sa pangunguna ni DOTr Secretary Jaime Bautista ay nakita ang kanilang kagustuhan na magkaron ng solicited bidding ang privatization ng transport assets.

Kung kaya’t gagawin ng DOTr ang kaparehong sistema sa operasyon ng maintenance ng MRT3 kapag ang kasundaan sa pagitan ng Sobrepena-led Metro Rail Transit Corp at DOTr ay nag- expire na sa 2025.

Noong nakaraang January, si Pangilinan ay nagpahayag ng kanyang intensyon na  makipag- partner kay San Miguel’s Ramon Ang sa isang bidding para sa kontrata na hahawak ng nasabing rail line. May plano rin ang San Miguel Corp. (SMC) na kunin ang operasyon at pangangasiwa ng MRT3 dahil ito ay makapagpapalakas sa operasyon ng ginagawang Metro Rail Transit Line 7 (MRT7) na kanilang tinatayo.

Ang LRT 1 at MRT 7 ay magdudugtong sa MRT 3 kapag natapos ng pamahalaan ang pagtatayo ng Unified Grand Central Station sa lungsod ng Quezon. Kung kaya’t magiging importanteng asset ang MRT3 sa pag take-over ng MPIC at SMC sapagkat magdudugtong ito sa kanila-kanilang railways sa north at south ng Metro Manila.

Noong February, sinabi ni Ayala Corp. chief finance officer Alberto de Larrazabal na ang grupo ng Ayala ay umaasang makaalis na sa railway business sa darating na anim na buwan bilang bahagi ng kanilang divestment program.

Inaasahan ng grupo ng Ayala na makakakuha sila ng $350 milyon mula sa kanilang disposal ng kanilang 35 porsiento na bahagi sa LRMC at bukas din sila sa idea na ibenta ang kanilang stake sa grupo ni Pangilinan. LASACMAR

SINAMPAHAN na ng pulisya ng kaso ang isang mangingisda na walang habas na inundayan ng saksak sa iba’t ibang parte ng katawan ang naka-alitang kapitbahay sa Navotas City.

Kasong murder ang isinampa ng mga tauhan ni Navotas police chief P/Col. Mario Cortes sa Navotas City Prosecutor’s Office laban sa 43-anyos na si alyas “ Victor”, residente ng A. Cruz St. Brgy. Tangos South matapos siyang madakip sa follow-up operation nina P/Capt. Edward Adriano, Commander ng Navotas Police Sub-Station-2.

Ayon kay Col. Cortes, nangyari ang insidente ng pananaksak sa biktimang si alyas ‘Alfredo’, 45, dakong alas-9:10 ng Sabado ng umaga sa eskinitang malapit sa tirahan ng suspek sa A. Cruz St. na nakuhanan umano ng video ng kanyang mga kapitbahay.

Sa nakalap na pahayag ng ilang mga residente sa lugar, gabi pa lamang ng Biyernes ay nagkaroon na umano ng alitan at nagkainitan ang biktima at suspek na naawat naman ng kanilang mga kapitbahay.

Sabado ng umaga nang makita ng suspek ang biktima na patungo sa kanilang lugar, kasama ang isa pa, at sa pag-aakalang susugurin siya ng mga ito, kumuha ng patalim at sunod-sunod na tinarakan ang kaaway na narinig pang nagmamakaawa sa video na kuha ng kapitbahay.

Tanging isang matandang babae na posibleng kaanak ng suspek ang nakita sa video na pilit na umaawat kay ‘Victor’ sa patuloy na pananaksak kahit bulagta at nagmamakaawa na ang biktima.

Matapos ang pananaksak, isinugod ng ilang kalalakihan sa pinakamalapit na pagamutan ang biktima subalit idineklarang dead-on-arrival. (Richard Mesa)

PITO  sa 10 Pilipino ang nagpakita ng kahandaang ipagtanggol ang Pilipinas mula sa mga kaaway na bansa.

Sa survey na isinagawa ng OCTA Research na kinomisyon ng Armed Forces of the Philippines (AFP), nasa 77% ng Filipino adults ang nagpahayag ng kanilang pagnanais na idepensa ang bansa.

      “Across major areas, at least 60% of adult Filipinos are willing to fight for the country, with the highest percentage observed in Mindanao (84%) and the lowest percentage in Visayas (62%),” nakasaad sa report ng OCTA Research.

      Ang naturang resulta ng survey ay sa gitna ng umiigting na tensiyon sa pagitan ng Pilipinas at China sa West Philippine Sea.

      Sa naturang survey, ang Davao at Caraga region ang nakapagtala ng pinakamataas na percentage na 96% ng adult Filipinos na sasabak sa labanan habang 95% ang Soccsksargen.

Nasa 52% naman ang Central Visayas  samantalang 54% sa Bicol Region.

“There are more adult Filipinos in the urban areas (80%) who are willing to fight for the country in the event of a conflict with a foreign enemy compared to those in the rural areas (73%),” anang OCTA.

      Nasa 80 porsiyento naman ng mga Pilipino sa Class D ang nagpakita ng pagnanasa ng pagkiki­paglaban habang ang mga edad 45-54 na gustong lumaban para sa Pilipinas ay 87%.

Nakapagtala ng 69% ang mga nasa edad 65-74 na hindi handang lumaban para sa Pilipinas.

Mas marami namang kalalakihan ang nagpakita ng interes na lumaban sa 82% kumpara sa kababaihan na 72%.

      Pumalo sa 86% ng mga Pilipino na vocational education ang interesado na makipaglaban para sa bansa kumpara sa mga college at postgraduate na 70%.

      Matatandaang walang tigil ang China Coast Guard sa pangha-harass sa mga barko ng Pilipinas na nagsagawa ng resupply mission sa Ayungin Shoal na humahantong sa pagkasugat ng ilang Pilipino.