LABIS ang kasiyahan ni Yoshimi Yamashita matapos na mapili bilang kauna-unahang babaeng professional football referee ng Japan.

Ang 36-anyos na si Yamashita ay napiling magiging referee ng World Cup na gaganapin sa Qatar sa buwan ng Nobyembre.

Kasama nitong napili sina Stephanie Frappart ng France at Salima Mukansanga ng Rwanda.

sa kasalukuyan kasi ay naka-kontrata ito sa Japan Football Association at nagtuturo ito sa paaralan.

Siya rin ang unang babae na humawak ng football game ng mga kalalakihan.

Ang tatlong referee ay napili sa mga kabuuang 36 na referees para sa World Cup sa listahan na mayroong 69 na assistants.

KUMANA ang Team Phi­lippines ng tatlong gintong medalya mula sa swimming at athletics sa ASEAN Para Games na ginaganap sa Surakarta, Indonesia.

Pinamunuan nina Asian Para Games gold medalist Ernie Gawilan at Roland Sabido ang matikas na kamada ng Pinoy squad kahapon matapos mamayagpag sa swimming competition.

Hataw si Gawilan sa men’s 400m freestyle S7 TF event  habang nanguna si Sabido sa men’s 400m freestyle S9 class.

“Salamat po may ambag na ako sa Team Phi­lippines. Salamat po Philippine Sports Commission at NSA namin NPC Philspada at sa lahat po nang mga naniniwala sa amin,” ani Gawilan.

Nagparamdam din si trackster Cendy Asusano na bumanat ng ginto sa athletics competition.

Nagreyna si Asusano sa women’s javelin throw F54 event para masiguro ang ikatlong ginto ng Pilipinas.

Bukod sa tatlong ginto, nakahirit din ang Pilipinas ng isang pilak at limang tanso sa iba’t ibang events.

Kumana ng pilak si Arnel Aba sa men’s 400m Freestyle S9 event sa swimming.

Nagdagdag naman ng dalawang tanso ang table tennis bets kung saan pumangatlo sina Jobert Lumanta at Jayson O­campo sa Men’s Table Tennis Class 8 category.

Naka-tanso rin sina Smith Billy Cartera, Racleo Martinez at Darwin Salvacion sa Men’s Table Tennis TT4 event

May tansong medalya rin sina Jesebel Tordecilla ng athletics sa Women’s Discus Throw F55, Edwin Villanueva ng swimming sa Men’s 400m Freestyle at Daniel Enderes Jr. ng athletics sa Men’s 5000m T20 event.

Puntirya ng Pilipinas na malampasan ang 20 ginto, 20 pilak at 29 tansong medalyang nakamit nito noong 2017 Asean Para Games sa Kuala Lumpur, Malaysia.

Hindi nagdaos ang Asean Para Games noong 2019 edisyon dahil pumutok ang coronavirus disease (COVID-19).

GINULAT ang national team ng Estados Unidos ng bansang Uzbekistan matapos ang Day 4 sa nagpapatuloy na 44th FIDE Chess Olympiad sa Mahabalipuram sa bansang India.

Ito ay makaraang magawang maitabla ng Uzbekistan ang kanilang harapan sa score na tig-dalawang panalo.

Tanging ang Filipino-American at supergrandmaster na si Wesley So ang nagtala ng panalo sa Amerika sa kanyang solidong game sa Board 3.

Pero nasilat naman ang top board nila na si GM Fabiano Caruana.

Ang dalawa pang players na sina GM Levon Aronian at Sam Shankland ay nagkasya lamang sa draw game.

Kaugnay nito nalaglag tuloy sa ika-11 pwesto ang Team USA.

Samantala, ang Team Pilipinas naman ay umangat ang standing sa number 31 na nilalahukan ng mahigit 100 mga bansa.

Ito ay matapos na ilampaso ng mga Pinoy ang team ng Monaco sa score na 3.5, habang ang kalaban ay meron lamang point 5.

Nagtala kasi ng mga panalo sa Board 2 si GM John Paul Gomez, GM Darwin Laylo at si GM Paulo Bersamin.

Ang top board na si GM Rogelio Barcenilla ay naitabla ang laban.

Samantala ang home team na India ay nangunguna pa rin na sinusundan ng Armenia, Israel at England.

Sa women’s division naman ang Team Pilipinas ay nasa pang-39 na puwesto.

PORMAL nang ipinakilala ang official mascot ng prestihiyosong FIBA World Cup na idaraos sa Pilipinas, Japan at Indonesia.

Pinangalanan ang mascot ng JIP na initials ng Japan, Indonesia at Pilipinas — ang tatlong host countries ng world meet.

Napili ang pangalang JIP mula sa mahigit 100,000 na sumali sa pa-contest ng FIBA noong nakaraang linggo para pangalanan ang official mascot.

“The name JIP is a perfect match for this beautifully designed mascot as it incorporates and unites all three host nations,” ani FIBA Basketball World Cup 2023 executive director David Crocker.

Pinangunahan ng Samahang Basketbol ng Pilipinas (SBP) ang pagpapakilala sa World Cup mascot.

Ginanap ang official announcement sa Pilipinas kasabay sa Japan at Indonesia.

Ayon kay SBP president Al S. Panlilio, ang mascot na si JIP ay nagsisimbolo ng magandang samahan ng tatlong bansa para kapit-kamay na maitaguyod ng matagumpay ang World Cup.

May kuwento kung paano nabuo si JIP.

Istorya ito ng ng tatlong fans na nagkakilala online na sina Caloy na mula sa Pilipinas, Kota mula sa Japan at Dewi mula sa Indonesia para mabuo ang basketball robot.

Pagkakaisa ang simbolo ng robot na kailangan na kailangan hindi lamang sa Japan, Indonesia at Pilipinas maging sa buong mundo na dumaranas ng pandemya sa kasalukuyan.