2021 January Archive - People's Balita

Archive for January, 2021

Covid-19 Saliva test inaasahang maaprubahan ng gobyerno

Posted on: January 22nd, 2021 by @peoplesbalita No Comments

Inaasahan ng Philippine Red Cross (PRC) na maaaprubahan na ng gobyerno ngayong linggo ang COVID-19 saliva test.

Sinabi ni Dr. Paulyn Ubial, head ng molecular laboratory ng PRC, na posibleng makuha nila ang approval sa paggamit ng saliva test mula sa Food and Drug Administration (FDA) at Department of Health (DOH) sa mga darating na araw.

Aniya, nakumpleto na nila ang pilot run para sa pagsusuri sa may 1,000 samples ng saliva testing.

Nairehistro na rin nila sa FDA ang mga kits na gagamitin sa pagsusuri para sa sertipikasyon nito.

Sa sandaling payagan na ng pamahalaan ang saliva test para sa COVID-19 diagnosis ay maaaring sumunod na rin ang iba pang laboratoryo.

Ang magiging problema lamang aniya ay kung iba ang gagamiting reagents ng mga ito dahil kakailanganin pa nilang gumawa ng validation study na kahalintulad ng ginawa ng PRC.

Dagdag pa niya, ang pagkuha ng regulatory approval ay mangangahulugan rin na madaragdagan ang COVID-19 daily testing gamit ang mas mura, mas mabilis at mas kumbinyenteng paraan ng pagsusuri na kasing accurate rin ng swab test, na itinuturing na gold standard sa COVID testing. (Daris Jose)

ILANG PAARALAN SA MAYNILA, GAGAWING VACCINATION SITES

Posted on: January 22nd, 2021 by @peoplesbalita No Comments

BILANG paghahanda sa gagawing vaccination program ng pamahalaan, planong gawing Covid-19 vaccination sites ang ilang paaralan sa lungsod ng Maynila .

Ayon kay Manila Mayor Isko Moreno Domagoso, kabilang ang eskuwelahan sa nakikitang lugar na may malaking espasyo o open space para sa gagawing pagbabakuna sa mga residente.

Marami aniyang mga eskuwelahan ang may mga quadrangle kung saan maaaring maghintay at pumila ang mga magpapabakuna.

Sa mga classroom naman gagawin ang mismong proseso ng pagbakuna, at may iba pang classroom na magsisilbi namang waiting area ng mga nabakunahan na (dito hihintayin kung makararanas ba sila ng adversed effects matapos na maturukan).

Tiniyak naman ng alkalde na ihahanda na ng Manila LGU ang kanilang puwersa at iba pang assets sa sandaling may matukoy nang lugar para sa vaccination program.

Gaya na lamang ng mga healthcare worker na tututok sa inoculation o pagbabakuna, at suplay ng mga bakuna na dapat ay agad na magamit upang iwas-panis, ani Moreno. (Sensitibo rin kasi sa temperatura ang vaccine)

Bukod dito, mayroon ding idedeploy na mga tauhan at mga ambulansya ng Manila Disaster Risk Reduction and Management Office para umasiste at matiyak ang maayos na mass vaccination.

Inaasahan naman na magsasagawa pa ang lokal na pamahalaan ng Maynila ng mga simulation exercise bilang paghahanda sa kanilang COVID-19 vaccination program. (GENE ADSUARA)

Sobrang taas ng presyo ng baboy, tinutugunan ng pamahalaan

Posted on: January 22nd, 2021 by @peoplesbalita No Comments

KASALUKUYAN nang kumikilos ang gobyerno para tugunan ang sobrang taas ng presyo ng baboy.

Sinabi ni Presidential Spokesperson Harry Roque na umaangkat na ang Department of Agriculture ng baboy na mula hindi lamang sa Visayas at Mindanao kundi pati na sa iba pang mga ASF-free areas ng Luzon.

Maliban dito aniya ay nag-i-import na rin ang DA ng baboy sa bansa na walang ASF habang tinataasan din ang volume ng pork imports.

” Sa lalong mabilis na panahon nag-aangkat po ang ating Department of Agriculture ng baboy galing po sa Visayas at Mindanao at iba pang mga ASF-free areas ng Luzon.Nagbebenta po sila ng baboy sa mga Kadiwa in partnership with hog raisers, sa federations, kagaya ng Propork. Nag-i-import po sila ng baboy ngayon sa bansa na ASF-free at tinataasan po iyong volume ng pork imports the MAV o minimum access volume,” ayon kay Sec. Roque.

Mayroon din aniyang ipinatutupad na Bantay ASF sa Barangay o ang BABay ASF na ang target ay mapigilan
ang ASF katuwang ang LGUs, private sector veterinary groups at mga hog raisers.

“Sa medium term po, pinapatupad po nila iyong Bantay ASF sa Barangay o iyong BABay ASF, at ito ay nagnanais na ma-prevent at makontrol ang ASF in partnership with the LGUs, private sector veterinary groups, hog raisers and traders. Iyong massive repopulation in ASF-free areas or green zones, iyong quick speedy indemnification doon sa mga may-ari ng baboy na napatay. Ngayon, mayroon ding provision para sa P30, 000 – zero interest, no collateral, 10 year to pay livelihood loans to displaced backyard hog farmers,” anito.

Sa ngayon ay umaabot na sa P400.00 kada kilo ng baboy na mas mahal pa sa presyo ng baka.

Samantala, para naman aniya sa gulay at sa mga prutas, ang agarang hakbang aniya ay pagpapatupad ng SRP – suggested retail price.

“intensify po natin ang vegetable and fruit production; expand Kadiwa ni Ani at Kita. Tapos magpapadala pa po ang mga rehiyon nang mas maraming gulay at prutas sa Metro Manila, sa NCR. I-expand po natin ang urban agriculture, iyong Gulayan sa Paaralan at Barangay. Nagdi-distribute na rin po nang mas maraming mga seeds at planting materials ‘no. Sa medium term po, magpapatayo po ng mga processing facilities at magbibigay po ng mga support vans, warehouses, cold storage,” ang pahayag ni Sec. Roque.

Habang sa isda naman aniya ay mag-i-expand o magpapalawak aniya ang pamahalaan ng aquaculture lalo na sa tilapia at sa bangus.

Bukod dito ay magri-regulate ang gobyerno ng import at magkakaroon ng joint fishing of commercial at municipal fisherfolks. (Daris Jose)

Top 6 most wanted person ng NPD, timbog

Posted on: January 22nd, 2021 by @peoplesbalita No Comments

Makalipas ang limang taon pagtatago, nadakip na ng mga awtoridad ang tinaguriang Top 6 Most Wanted Person ng Northern Police District (NPD) sa kanyang pinagtataguan sa Calumpit, Bulacan.

Sa report ni District Special Operation Unit (DSOU) head P/Col. Ferdinand Del Rosario kay NPD Director PBGen. Eliseo Cruz kinilala ang naarestong suspek na si Rudy Mar Cruz, 25, online seller (Auto Parts).

Matapos ang nalikom na impormasyon at makumpirma ng mga tauhan ng DSOU ang hinggil sa pinagtataguan ng suspek ay agad bumuo ng team si Col. Del Rosario.

Pinangunahan ni P/Major Amor Cerillo at PLT Melito Pabon ang binuong team ng NPD-DSOU sa ilalim ng pangangasiwa ni Col. Del Rosario, kasama ang RIU, IG, NCR ay pinuntahan ng mga ito ang pinagtataguan ng suspek sa Gatbuca, Zone 4, Calumpit Bulacan dakong 7:45 ng gabi.

Hindi na nakapalag ang suspek nang arestuhin ng mga pulis sa bisa ng alias warrant of arrest na inisyu ni Hon. Emmanuel D. Laurea, presiding Judge, Malabon RTC Branch 169 sa kasong Frustrated Murder na may inirekomendang piyansa na P200,000 para sa kanyang pansamantalang kalayaan.

Kaugnay nito, pinuri ni NPD Director Cruz ang mga miyembro ng operating team na masigasig na nagsagawa ng operasyon na nagresulta sa pagkadakip sa suspek. (Richard Mesa)

Biden, pormal nang nanumpa bilang 46th US president

Posted on: January 22nd, 2021 by @peoplesbalita No Comments

Opisyal nang nanumpa bilang ika-46 pangulo ng Estados Unidos si Joe Biden.

Idinaos ang kanyang panunumpa sa US Capitol, na pinangasiwaan ni Supreme Court Chief Justice John Roberts.

Sa kanya namang unang talumpati bilang US president, nanawagan si Biden na magkaroon ng bagong simula sa pulitika sa kanilang at pagtanggi sa aniya’y pagmanipula sa katotohanan.

“At this time in this place let’s start afresh. All of us must begin to listen to one another again, to hear one another, see one another, show respect to one another,” wika ni Biden.

“And we must reject the culture in which facts themselves are manipulated and even manufactured,” dagdag nito.

Umapela rin si Biden na itakwil ang “political extremism, white supremacy, domestic terrorism.”

“American has to be better than this,” ani Biden.

“This is our historic moment of crisis and challenge,” dagdag nito, “and unity is the path forward.”

Nanawagan din si Biden ng pagkakaisa at kanya ring tinuligsa ang nangyaring karahasan sa US Capitol noong Enero 6.

“Now, on this hallowed ground, where just a few days ago violence sought to shake this country’s very foundation,” sambit ni Biden.

“We come together as one nation, under God, indivisible and carry out the peaceful transfer of power as we have for more than two centuries.”

Sa edad na 78-anyos, si Biden ang pinakamatandang manunungkulan bilang presidente ng Amerika.

Siya rin ang ikalawang pangulo ng Estados Unidos na isang Katoliko, sunod kay John F. Kennedy.

Samantala, nanumpa na rin si Kamala Harris bilang kauna-unahang babaeng bise presidente ng Estados Unidos.

Si Supreme Court Justice Sonia Sotomayor ang nangasiwa sa oath of office ni Harris.

Nanumpa si Harris sa bibliyang na pagmamay-ari ni dating Supreme Court Chief Justice Thurgood Marshall, ang unang Black member ng US high court. (ARA ROMERO)

Runway banderang tapos!

Posted on: January 22nd, 2021 by @peoplesbalita No Comments

PINASINGHOT ng alikabok ni Runway ang mga karibal sa banderang tapos niyang pamamayagpag sa kakahagibis na Philippine Racing Commission Lakambini Stakes Race sa Santa Ana Park sa Naic, Cavite.

Nirendahan ni class A rider MM Gonzales ang tumawid sa metang kabayo sa tiyempong isang minuto’t 40 segundo sa 1,600-metrong hagaran at nagkaloob sa may ari sa kanya ng gantimpalang P600,000.

Pero umangas ding bahagya si Radio Gaga sa unahan at sa far turn kasabayan si Beli Bell na mga bitin lang ang mga pagtatangka.

Binulsa ng Radio Gaga horseowner ang P225,000 cash prize sa pagsegundo, P125K sa Cam From Behind sa pagtersero at P50K sa Calbayog sa pagpang-apat.

Suportado ang karera ng Komisyon ng Karera sa Pilipinas (KKP) o Philippine Racing Commission (Philracom). (REC)

TUMANGAY NG MOUNTAIN BIKE, ARESTADO

Posted on: January 22nd, 2021 by @peoplesbalita No Comments

KINADENA na, tinangka pang nakawin ng isang miyembro ng ‘Bahala na Gang’ ang isang mountain bike habang nakaparada sa isang parking sa Malate, Maynila.

Kasong Theft ang kinakaharap ng suspek na si Eric Bedonio, 40, may live-in partner ng 1880 Mayon St., Bulkan, Punta Sta Ana Manila dahil sa reklamo ni Maria Ninel Madlangbayan, 16, sa pamamagitan ng kanyang ina na si Pauline Michelle, isang estudyante ng 2420 Zapanta St.,Singalong, Malate Manila.

Sa reklamo ni Maria Ninel kay PEMSgt Flaviano Garcia Jr., ng Manila Police District (MPD)-Station 9, ipinarada nito ang kanyang bisekleta na isang mountain bike na nagkakahalaga ng P12,000 sa harapan ng isang tindahan upang bumili ng damit dakong aals-5:00 kamakalawa ng hapon sa panulukan ng Taal at P. Ocampo Sts., Malate, Maynila..

Nabatid na ginamitan pa niya ng chain padlock ang kanyang bisekleta bago pumasok sa tindahan.

Pero paglabas nila ng kanyang pinsan m,ula sa pamimili ay nakita nito ang suspek na pinuputol nito ang chain padlock saka sumakay at itinakaa papalayo.

Tiyempo naman na may paparating na nagpapatrulyang pulis kaya humingi ng tulong na nagresulta sa kanyang pagkakaaresto at narekober sa kanya ang bisekleta at bolt cutter. (GENE ADSUARA)

Diaz pormalidad na lang ng pagpasok sa Tokyo Games

Posted on: January 22nd, 2021 by @peoplesbalita No Comments

KABILANG sa top eight sa International Weightlifting Federation (IWF) world ranking sa women’s 55-kilogram event ang mga magku-qualify para sa 32nd Summer Olympic Games 2020 sa Tokyo, Japan na inurong sa Hulyo 2021.

At sa pag-okupa sa No. 2 sa kasalukuyan, halos pasok na rin ang 29 na taong-gulang, 4-11 ang taas at tubong Zamboanga City na dalagang barbelistang si Hidilyn Diaz.

Kailangan na lang niyang sumalang sa Olympic Qualifying Tournament liftest sa darating na Abril 15-25 sa Tashkent, UIzbekistan sa April 15-25 para mapormalisa ang pang-entra niya sa ikaapat na sunod niyang na quadrennial sportsfest na noong isang taon pa niya inaasam.

Pero nabatid kahapon kay Philippine Weightlifting Association, Inc. (PWAI) president Monico Puentevella, na hindi lang sa Diaz ang ipapadala sa Tashkent kundi ang iba pang nasa national training team. (REC)

2 bebot arestado sa shabu sa Caloocan at Navotas

Posted on: January 22nd, 2021 by @peoplesbalita No Comments

Bagsak sa kulungan ang dalawang babae, kabilang ang katulong ng District Drug Enforcement Unit (DDEU) matapos makuhanan ng shabu sa magkahiwalay na lugar sa Caloocan at Navotas cities.

Kinilala ni DDEU chief P/Major Ramon Aquiatan Jr. ang suspek na si Jeremiah Dimia, 33 ng 122 Guido 2 St. Maypajo Brgy. 33, Caloocan city.

Sa imbestigasyon ni PCpl Jezell Delos Santos, dakong 6:30 kahapon ng umaga nang mahulihan ni PSSg Ronel Tamayo ng isang plastic sachet na naglalaman ng hinihinalang shabu si Dimia sa loob mismo ng DDEU office sa Langaray St. Kaunlaran Village, Brgy. 14.

Sa Navotas, dakong 12:30 naman ng umaga nang maaresto ng mga tauhan ng Navotas Police Sub-Station 3 sa pangunguna ni PLT Juanito Arabejo Jr. na nagsasagawa ng patrolya at nagpapatupad ng city ordinance sa kahabaan ng Baron St. Brgy. NBBN si Edna Serrador, 54 ng Old Fishport.

Narekober ng mga pulis kay Serrador ang nasa 7.4 gramo ng hinihinalang shabu na tinatayang nasa P50,320.00 ang halaga.

Mahaharap ang mga suspek sa kasong paglabag sa RA 9165 o Comprehensive Dangerous Drug Act of 2002. (Richard Mesa)

Gomez de Liano papahasa pa PBA D-League at UAAP

Posted on: January 22nd, 2021 by @peoplesbalita No Comments

AYAW pang mag-propesyonal na basketbolista.

Maski veteran internationalist na sa paglalaro sa Gilas Pilipinas national men’s basketball team at maging standout dito, ayaw pang mag-pro ni Joaquin Javier ‘Javi’ Gomez de Liano.

Kaya hindi siya magpapalista sa Philippine Basketball Association (PBA) hanggang sa deadline nito sa Enero 27.

Ipinahayag niya kahapon na tutuparin niya pa ang commitment sa University of the Philippines (Diliman) Fighting Maroons kahit wala pang katiyakan ang 84thUniversity Athletic Association of the Philipines (UAAP) 2021-22 men’s hoopfest dahil sa Covid-19.

Inamin ng 22-anyos at 6-5 ang taas na manlalaro, na labis din siyang nahirapan smagpasyang ‘di muna mag-PBA.

“It was honestly a hard decision because I was really thinking about it,” giit ni Gomes de Liano, na bukod sa collegiate league, maghahasa pa rin siya sa PBA Developmental League para sa kasalukuyang taon.

Nakatakda ang 36th PBA Rookie Draft 2021 sa Marso 14, habang ang 46th PBA 2021 Philippine Cup bubuksan sa Abril 9. (REC)