INIULAT ng Bureau of Immigration (BI) ang pagdating ng anim pang Pilipino na pinauwi mula Malaysia nitong Sabado, Oktubre 24, kasunod ng pagsalakay ng mga pulis sa kanilang pinagtatrabahuhan na umano’y nagpapatakbo ng online investment at customer service centers ngunit sangkot pala sa mga online scam.

Agad na ininterbyu ng mga opisyal ng BI Immigration Protection and Border Enforcement Section (I-PROBES) ang anim na repatriate na binubuo ng limang lalaki, edad 28 hanggang 33, at isang 37-anyos na babae na nagtrabaho sa Kuantan at Kota Kinabalu, Malaysia.

Ayon sa kanilang mga salaysay, ni-recruit sila bilang customer service representative o call center agent na may pangakong buwanang sahod na US$1,000 hanggang US$1,200. Gayunman, sa halip na lehitimong serbisyo sa customer ang kanilang gawin, pinagawa umano sila ng mga online gambling scam na naglalayong manloko ng mga hindi pinaghihinalaang indibidwal.

Ilan sa kanila ang hindi umano nakatanggap ng ipinangakong sahod, habang ang iba naman ay nagsabing kinumpiska ang kanilang mga pasaporte.

Nagsimula umano ang kanilang recruitment sa mga advertisement ng trabaho sa Facebook at Telegram job-hunting groups. Kalaunan, nakipag-ugnayan sa kanila ang mga indibidwal na nag-ayos ng kanilang pag-alis sa Pilipinas at pagdating sa Malaysia.

Nabatid din sa imbestigasyon na lima sa anim na repatriate ang umano’y nakalabas ng bansa sa pamamagitan ng tinatawag na “backdoor” route mula Zamboanga at Tawi-Tawi patungong Sabah, Malaysia, upang makaiwas sa regular na proseso ng immigration inspection.

Sa pagsusuri naman ng BI Anti-Fraud Section (AFS), natukoy na apat sa mga repatriate ang may hawak na tunay na pasaporte ng Pilipinas ngunit may pekeng departure stamps.

Nagbabala ang BI laban sa paggamit ng mga ilegal na ruta at pekeng dokumento sa paglalakbay, na maaaring magamit ng mga human trafficker upang makapagsagawa ng ilegal na recruitment at magdala ng mga Pilipino sa mapanganib na trabaho sa ibang bansa.

Binigyang-diin ni BI Commissioner Joel Anthony M. Viado na dapat maging mapanuri ang publiko sa mga alok na trabahong nangangako ng mataas na sahod ngunit maaaring maglagay sa kanilang buhay at kalayaan sa panganib.

Ipinasa ang anim na repatriate sa NAIA Task Force Against Trafficking (NAIATFAT) para sa kaukulang tulong at karagdagang imbestigasyon laban sa mga umano’y responsable sa kanilang recruitment at paglalakbay.

Muling iginiit ng BI ang pagpapatibay ng border control at pakikipagtulungan sa mga kaukulang ahensya upang maiwasan ang human trafficking at maprotektahan ang mga Pilipino laban sa mapanlinlang na alok ng trabaho sa ibang bansa. (Gene Adsuara)

PINAGHAHANDA na ng Malakanyang ang mga ahensya ng pamahalaan at mga lokal na pamahalaan (LGUs) laban sa El Niño upang matiyak na may sapat na tubig, pagkain at kuryente, at maprotektahan ang kabuhayan at kalusugan ng mga Pilipino.

Sa direktiba ni Pangulong Ferdinand R. Marcos Jr., pinangunahan ni Executive Secretary Ralph G. Recto ang pagpupulong ng mga pangunahing ahensya at lokal na opisyal noong Nobyembre 4 upang tiyaking handa ang bansa bago maramdaman ang inaasahang mas matinding epekto ng El Niño sa Enero 2027.

Binigyang-diin ni Recto na kailangang unahin ang mga komunidad na pinakananganganib sa kakulangan ng tubig, matinding init, pagkasira ng pananim at posibleng problema sa suplay ng kuryente.

“Mararamdaman ang El Niño sa buong bansa, pero iba-iba ang magiging epekto nito sa bawat lugar. May komunidad na tubig ang pangunahing problema. Sa iba, kuryente o matinding init. Kaya dapat alam natin kung sino ang pinakananganganib at anong tulong ang kailangan nila,” ani Recto.

Inatasan niya ang mga ahensya na gumawa ng mga mapa ng mga lugar na posibleng makaranas ng kakulangan sa tubig at matinding init upang matukoy kung saan dapat unahing maghatid ng tulong at kagamitan.

Kabilang sa mga lugar na binabantayan ang Pampanga at Cavite dahil sa posibleng problema sa suplay ng tubig.

Hiniling din ni Recto sa mga samahan ng LGUs na alamin ang pangangailangan ng kanilang mga miyembro, kabilang ang mga generator, solar power system, imbakan ng tubig at iba pa.

Bukas din si Recto sa pagrepaso sa mga prayoridad ng Local Government Support Fund (LGSF) upang matulungan ang mga LGU na pondohan ang kanilang paghahanda laban sa El Niño.

Samantala, tiniyak ng Metropolitan Waterworks and Sewerage System (MWSS) na sapat pa ang suplay ng tubig. Noong Nobyembre 3, nasa 208.70 metro ang lebel ng tubig sa Angat Dam, mas mataas sa minimum operating level na 180 metro.

Gayunman, patuloy ang paghahanda para maiwasan ang kakulangan sa tubig, kabilang ang maingat na pamamahala sa suplay mula sa mga dam, paghahanap ng alternatibong mapagkukunan ng tubig at pagpapalakas ng mga programa sa pagtitipid.

Hinihikayat din ang mga pribadong kumpanya na tumulong sa pagpapaunlad ng mga sistema ng suplay ng tubig sa mga komunidad na malapit sa kanilang operasyon.

Nag-alok naman ang Department of Health (DOH) ng tulong sa mga LGU sa pagsusuri ng mga bagong pinagkukunan ng tubig upang matiyak na ligtas itong inumin.

Para sa kuryente, sinabi ng Department of Energy (DOE) na pinaiigting nito ang maintenance ng mga planta, pinabibilis ang pagproseso ng mga permit, at tinitiyak ang sapat na reserba ng gasolina at iba pang panggatong.

Pinalalawak din ang paggamit ng battery storage at mga hakbang sa pagtitipid ng enerhiya.

Binibigyang-pansin din ang tuloy-tuloy na suplay ng kuryente sa mga ospital, paaralan at pasilidad ng tubig, lalo na sa panahon ng matinding init.

Tiniyak naman ng Department of Agriculture (DA) na sapat ang suplay ng pagkain sa bansa at patuloy nitong binabantayan ang presyo ng mga pangunahing bilihin, partikular ang bigas.

Kasama sa paghahanda ang pagpapalawak ng solar-powered irrigation systems sa pakikipagtulungan ng National Irrigation Administration (NIA) upang matulungan ang mga magsasaka na mapanatili ang produksyon kahit kulang ang ulan.

Ipinag-utos din ng Presidente na gawing mas mabilis at simple ang proseso ng pagbibigay ng fuel subsidies sa mga magsasaka at mangingisda upang agad nilang mapakinabangan ang tulong.

Para naman sa mga manggagawa at pamilyang maaaring mawalan ng pagkakakitaan dahil sa El Niño, nakahanda ang Department of Social Welfare and Development (DSWD) at Department of Labor and Employment (DOLE) na magbigay ng pansamantalang trabaho at iba pang tulong.

Mayroon ding Emergency Cash Transfer program ang DSWD na maaaring magbigay ng direktang ayuda sa mga indibidwal at pamilyang maaapektuhan ng kalamidad at iba pang krisis.

Sa kabilang dako, kasama rin sa paghahanda ang pagprotekta sa mga mag-aaral, manggagawa at iba pang mamamayan laban sa matinding init.

Ayon sa Department of Education (DepEd), makatutulong ang bagong Executive Order No. 130 sa mas malinaw na pagpapasya kung kailan dapat suspindihin o ibalik ang mga klase batay sa aktuwal na kondisyon sa bawat lugar.

Patuloy din ang mga programa para magkaroon ng solar power ang mga paaralan at mapabuti ang bentilasyon at pagpapalamig sa mga silid-aralan.

Makikipagtulungan naman ang DOH sa mga LGU upang matukoy ang mga residenteng higit na nanganganib sa matinding init, kabilang ang mga nakatatanda, bata at may karamdaman.

Tutulong ang mga barangay health worker sa regular na pagbisita at pagmonitor sa mga residenteng nangangailangan ng espesyal na pangangalaga.

Samantala, binigyang-diin sa pulong na hindi sapat ang iisang plano para sa buong bansa dahil magkakaiba ang hamon na kinakaharap ng bawat lalawigan, lungsod at munisipalidad.

Kaya mahalagang direktang makilahok ang mga lokal na opisyal sa pagtukoy ng mga problemang dapat unahin at mga kagamitang kailangang ihanda.

Dumalo sa pulong sina Quezon City Mayor Joy Belmonte ng ULAP, San Juan City Mayor Francisco Zamora ng LCP, LMP National President Mayor Faustino “Inno” Dy V, Vice Governor Francis Faustino “Kiko” A. Dy, at LnB National President Jessica Dy.

Kasama rin sina DILG Secretary Juanito Victor C. Remulla, DSWD Secretary Rexlon Gatchalian, DOH Secretary Edwin Mercado, DOTR Secretary Vince Dizon, DPWH Secretary Giovanni Lopez, DOLE Secretary Francis Tolentino at PCO Secretary Lino Cayetano.

Dumalo rin ang mga kinatawan ng DA, DepEd, DOE, DOST, DENR, OCD, LWUA, NIA, NWRB at MWSS. (DARIS JOSE)

NAGING matagumpay ang pagdaraos ng Asia’s Modern Hero Awards 2026 sa ginanap na grand awards night sa Okada Manila, Lungsod ng Parañaque. Ang nasabing kaganapan ay inorganisa ng Golden Icons Foundation sa pangunguna ng Founder at Chairman nitong si Dr. Ronnel Ybañez.

Layunin ng nasabing taunang parangal na bigyang-diin at kilalanin ang mga indibidwal at organisasyong nag-iiwan ng tahimik ngunit makabuluhang ambag sa lipunan—mga taong patuloy na naglilingkod, nagtataguyod ng pamilya at komunidad, at gumagawa ng mabuti kahit malayo sa ingay ng madla at ilaw ng media.

MGA KATANGI-TANGING PARANGAL NOONG 2026

Ilan sa mga kilalang personalidad, pampublikong lingkod, at lider na pinarangalan ngayong taon dahil sa kanilang tapat na paglilingkod at natatanging ambag sa bansa:

Mayor Third Barzaga (Alkalde ng Lungsod ng Dasmariñas, Cavite): Pinarangalan sa kanyang epektibo at tapat na pamumuno sa lokal na pamahalaan. Mula sa kanyang dedikasyong ipinamalas bilang dating Bise Alkalde ng lungsod, patuloy niyang itinaguyod ang mga programang pampubliko na naglalayong maiangat ang antas ng pamumuhay at kapakanan ng bawat Dasmariñeño.

Dr. Manuel M. Muhi (Pangulo, Polytechnic University of the Philippines): Pinarangalan sa kanyang dedikasyon sa pagsusulong ng inklusibo at de-kalidad na edukasyon sa pamamagitan ng PUP Open University System para sa mga out-of-school youth at Persons Deprived of Liberty (PDL).

Dante Francis “Klink” Ang II (Tagapangulo, Commission on Filipinos Overseas): Kinilala sa kanyang natatanging pamumuno at patuloy na pagtataguyod sa kapakanan ng mga Pilipino sa iba’t ibang panig ng mundo.

Joel Reyes Zobel (Broadcaster, Super Radyo DZBB / GMA Network): Pinarangalan dahil sa kanyang tapat at epektibong pamamahayag sa radyo at telebisyon.

Conrado Estrella III (Kalihim, Department of Agrarian Reform): Kinilala sa kanyang mahusay na pamumuno at mga programang naglilingkod sa mga magsasakang Pilipino.

George Erwin Garcia (Tagapangulo, Commission on Elections): Pinarangalan para sa katangi-tanging pamamahala at tapat na paglilingkod sa pamahalaan.

PAHAYAG NG PASASALAMAT AT INSPIRASYON

Sa opisyal na pahayag ng pamunuan ng Golden Icons, buong-pusong pinasalamatan ang Panginoon sa tagumpay ng kaganapan, pati na rin ang Executive Board, Awards Council, mga sponsor, at katuwang sa media tulad ng People’s Balita.

“Sa ating panahon ngayon, madalas na sinusukat ang tagumpay sa katanyagan at dami ng nakakakita. Subalit napakaraming tao ang patuloy na nagpapagal sa likod ng entablado—nagpapatakbo ng negosyo, nagpapatatag ng pamilya, at nagpapabuti sa buhay ng iba nang walang hinihinging kapalit,” ayon sa pahayag.

“Ang Asia’s Modern Hero Awards ay idinisenyo upang ibahagi ang kanilang kuwento. Ipinapaalala ng ating mga awardee na ang kabayanihan ay matatagpuan sa pagsusumikap, responsibilidad, malasakit, at sa araw-araw na pagpiling gumawa ng tama.”

Nagtapos ang kaganapan sa isang hamon at panawagan na ipagpatuloy ang paggamit sa platapormang ito hindi lamang upang magbigay ng parangal, kundi upang maghatid ng tunay na pagbabago at maging inspirasyon sa mga susunod na henerasyon. 

(Yvonne Bagang/ Kim Bornella/ Jeremiah Solomon/ Boy Morales/ Francis Angeles)

NASA kritikal na kalagayan ang 23-anyos na kelot nang pagbabarilin ng hindi pa nakikilalang salarin habang naglalakad sa Malabon City, kamakalawa ng gabi.

Sa ulat ni Northern Police District (NPD) Director P/BGen. Benliner Capili, naglalakad ang biktimang si alyas “Ralph” sa harap ng Northshore Subdivision sa kanto ng Victoneta Avenue at Magsaysay St., Brgy. Potrero dakong alas-7:20 ng gabi nang sumulpot ang naka-motorsiklong salarin sa kanyang harapan at agad naglabas ng baril saka sunod-sunod siyang pinaputukan.

Sa kabila ng tinamong mga tama ng bala, nagawang makatakbo ng biktima at makahingi ng tulong sa mga tao sa naturang lugar na dahilan para mabilis na tumakas ang suspek, sakay ng asul na Suzuki Skydrive, patungo sa hindi nabatid na direksiyon.

Isinugod naman ng mga nagmalasakit ang biktima sa Manila Central University (MCU) Hospital kung saan patuloy siyang ino-obserbahan ng mga doktor sanhi ng tinamong tama ng bala sa bahagi ng katawan.

Nakuha naman ng mga nagrespondeng tauhan ni Malabon police chief P/Col. Kenneth Mission sa lugar ng pinangyarihan ng insidente ang limang basyo ng bala na hinihinalang mula sa kalibre .45 pistola.

Inaalam pa ng pulisya ang motibo sa pamamaril habang patuloy naman ang follow-up imbestigasyon para sa posibleng pagkakilanlan at pagkakaaresto sa suspek na hinihinalang kilala ng biktima.

 (Richard Mesa)

MALUBHANG nasugatan ang 34-anyos na ginang matapos pagtatagain ng bading na kapitbahay habang naglalakad ang biktima, kasama ang paslit na anak sa Malabon City, Huwebes ng umaga.

Ginagamot ang biktimang si alyas “Sharmaine”, 34, sa Fatima Medical Center sa Valenzuela City sanhi ng mga tinamong tama ng taga sa batok at kamay matapos isugod ng kanyang mister.

Sa ulat ni Malabon Police Chief P/Col. Kenneth Mission kay Northern Police District (NPD) Director P/BGen. Benliner Capili, naaresto naman ang suspek na si alyas “Melad”, 39, na kilala rin sa alyas “Eh Eh” dakong alas-1:40 ng hapon nang matunton sa Brgy. Potrero sa tulong ng mga residente at barangay tanod sa lugar.

Nabawi rin ng pulisya sa suspek ang ginamit na itak na may bahid pa umano ng dugo.

Sa kuha ng CCTV sa lugar, naglalakad ang biktima at paslit na anak sa Doña Juana St. Brgy. Potrero alas-10:15 ng umaga nang sumulpot sa likuran ang suspek na armado ng 13-pulgadang itak at bigla na lang pinagtataga ang biktima sa leeg hanggang sa malugmok sa kalsada.

Personal umanong alitan ang dahilan ng tangkang pagpatay ng suspek sa kapitbahay na nagpahayag pa na hindi niya pinagsisisihan ang ginawa at handa siyang panagutan ang kasong frustrated murder na isasampa ng pulisya laban sa kanya. (Richard Mesa)