NAGWAKAS na ang maligayang araw ng isang pusakal na kriminal na wanted sa isang katerbang kaso sa iba’t ibang lalawigan sa Central Luzon, Ilocos Region, at Metro Manila makaraang matunton ng pulisya sa kanyang pinagtataguan sa Pasig City, Lunes ng gabi.

Masyado umanong madulas sa kamay ng batas ang 43-anyos na pugante kaya binuo ng pulisya ang Case Operation Plan (COPLAN) Dacallos Criminal Group na pinangunahan ni Northern Police District (NPD) Director P/BGen. Benliner Capili, kasama ang kapulisan mula sa mga lalawigan ng Pampanga, Bulacan, Tarlac, Bataan, at Pangasinan para sa pagtugis sa kanya.

Pasado alas-7:30 ng gabi nang tuluyang masukol ng pulisya ang pugante sa Ortigas Avenue Ext. malapit sa Oasis Residences, Brgy. Santa Lucia, Pasig City.

Sa ulat ni BGen. Capili kay National Capital Region Police Office (NCRPO) Officer-in-Charge P/BGen. Christopher Abrahano, wanted sa maramihang bilang na kasong Robbery, paglabag sa Comprehensive Firearms and Ammunition and Regulation Act, Illegal and Unlawful Possession, Manufacture, and Dealing of Firearms, at New Anti-Carnapping Law sa iba’t ibang hukuman ang naarestong miyembro ng kilabot na grupong kriminal. 

Kabilang sa mga warrant of arrest na bitbit ng kapulisan na isinilbi sa akusado ang mula sa Regional Trial Court (RTC) Branches 19, 12, at 15 ng Malolos, Bulacan, Branch 68 ng Camiling Tarlac, Branch 175 ng San Mateo, Rizal, Branch 306 ng Quezon City, Branch 93 ng Balanga, Bataan, at Branch 43 ng Dagupan City Pangasinan para sa nabanggit na mga kaso.

Ayon kay BGen. Capili, ilang mga kasong kinakaharap ng akusado ay may nakalaang piyansa na mula P48,000 hanggang P300,000 kada bilang, maliban pa sa kinakaharap niyang kasong anti-carnapping.

Pansamantala namang ipiniit muna sa Custodial Facility ng Caloocan Police Station ang akusado habang pinoproseso ang pagbabalik sa mga hukuman sa iba’t ibang lalawigan ng mga warrant of arrest. (Richard Mesa)

ISINUSULONG ng isang mambabatas na bigyan ng health insurance coverage ang lahat ng manggagawa sa informal sector kabilang ang mga public utility drivers, delivery riders at street vendors.

“Maraming Pilipino ang pinipiling pumasok sa informal sector tulad ng mga tsuper, delivery riders, at food vendors. Pero sa ngayon, kulang ang mga benepisyo at proteksyon na natatangap nila mula sa pamahalaan,” sabi ni Quezon City Rep. Patrick Michael Vargas.

Batay sa House Bill No. 11028 na inihain ni Vargas, ang gobyerno ang magtataguyod ng National Informal Workers Health Insurance Program na pangangasiwaan ng Philippine Health Insurance Corporation (PhilHealth), sa tulong ng Department of Health (DOH), Department of Labor and Employment (DOLE), Department of Social Welfare and Development (DSWD), at local government units (LGUs). 

Kabilang sa insurance coverage ang mga transport workers, platform-based riders, vendors, at self-employed individuals. Mabibigyan sila ng preventive, primary, emergency, at hospital care, medicines, laboratory diagnostics, occupational injury care, rehabilitation, kasama ng mental health services.

“Layunin ng panukalang ito na pangalagaan din ang kanilang kapakanan,” dagdag ng kongresista.

“Anumang panahon, maaaring mawalan ng kita o magkasakit ang mga informal workers. Tungkulin ng pamahalaan na siguraduhing protektado pa rin sila sa medical emergencies sa mga ganitong pagkakataon.” (VINA de GUZMAN)

TINULIGSA ni House Assistant Minority Leader at Gabriela Partylist Rep. Sarah Elago ang naging huling babala ng Meralco ng posibleng pagtaas ng singgil sa kuryente.

Kasunod na rin ito sa patuloy na depresasyon ng piso na makakaapekto sa pagtaas ng power generation costs.

Bumaba ang halaga ng piso kontra dolyar na ₱64.17 ngayong Martes, November 3.

Pinaalalahan ng Meralco ang customers sa pagbaba ng piso na katumbas sa mas mataas na electricity bills.

“Lahat na lang hahanapan ng rason para magtaas ng singil sa kuryente. Kapag tumaas ang presyo ng langis, may dagdag-singil. Kapag humina ang piso, may dagdag-singil na naman. Pero kapag bumaba ang mga gastusin o gumanda ang kita ng mga kumpanya, nasaan ang katumbas na ginhawa para sa mga konsyumer?” ani Elago.

“Hindi dapat awtomatikong ipinapasa sa mga konsyumer ang bawat paggalaw ng presyo sa merkado. Hindi naman tumataas ang sahod ng mga manggagawa sa tuwing may dagdag-singil ang Meralco. Sa huli, ordinaryong pamilya na kapos na nga sa pambayad sa pagkain at iba pang pangangailangan ang muling pinagbabayad ng mas mahal na kuryente,” dagdag ng mambabatas.

Nanawagan pa ang mambabatas sa Meralco na itigil ang pagpaalala sa consumers sa automatic shock absorbers na dala ng pagtaas sa generation costs.

Gayundin, hinikayat niya ang Energy Regulatory Commission (ERC) na mahigpit na busisiin ang proposed rate adjustments at siguruhin na tanging justified at properly documented costs ang maipapasa sa consumers.

“Panagutin ang mga kumpanyang patuloy na nagpapabigat sa bayarin ng taumbayan. Kailangan nang mahigpit na regulasyon at tunay na proteksyon sa mga konsyumer, hindi puro pag-apruba sa dagdag-singil. Dapat unahin ang abot-kaya at maaasahang serbisyo ng kuryente kaysa tubo ng mga pribadong kumpanya,” aniya.

Nanawagan din ang Gabriela Partylist sa gobyerno at regulatory agencies na ipatigil ang unjustified electricity rate increases, alisin ang unnecessary fees tulad ng VAT at systems loss tax, at magpasa ng mga batas para masiguro na gawing abot kaya ang kuryente.

(VINA de GUZMAN)

UMABOT sa mahigit P.1 milyong halaga ng shabu ang nasamsam sa tatlong drug suspects kabilang ang isang bebot matapos maaresto sa ikinasang buy bust operation ng pulisya sa Valenzuela City.

Sa ulat ng tanggapan ni Northern Police District (NPD) Director P/BGen. Benliner Capili, nagsagawa ang mga operatiba ng District Drug Enforcement Unit (DDEU) ng buy bust operation sa koordinasyon sa PDEA sa Dulong Tangke, Brgy., Malinta.

Dakong alas-10:48 ng umaga nang maaresto ng mga operatiba sa loob ng isang bahay ang tatlong drug personalities kabilang ang 26-anyos na lalaki, 22-anyos na kelot at 33-anyos na bebot matapos umanong magbenta ng shabu sa isang pulis na nagpanggap na buyer.

Nakumpiska sa kanila ang humigi’t kumulang 15.87 grams ng hinihinalang shabu na mayestimated Standard Drug Price na ₱107,916.00 at buy bust money.

Mahaharap ang mga suspek sa kasong paglabag sa R.A 9165 o ang Comprehensive Dangerous Drugs Act of 2002 sa Valenzuela City Prosecutor’s Office.

Ayon kay BGen. Capili, patuloy na pinaiigting ng NPD ang kampanya nito laban sa iligal na droga upang maprotektahan ang komunidad. Inaasahan din aniya niya sa kanyang mga tauhan ang tuloy-tuloy na operasyon, maayos na paghawak sa mga ebidensya at tapat na pagpapatupad ng batas. (Richard Mesa)