NAGLABAS si Pangulong Ferdinand Marcos Jr., ng Executive Order (EO) na naglalatag ng malinaw na patakaran kung kilan sususpendihin at kailan ibabalik ang klase.

Ito’y dahil batid ni Pangulong Marcos ang mga hamon sa kabataan dulot ng class suspension.

Ani Presidential Communications Office Undersecretary at Palace Press Officer Claire Castro, malaking kawalan ang bawat araw na pagliban sa eskuwela.

Layunin ng bagong EO na tiyaking ligtas ang mga estudyante at patuloy lang ang kanilang pag-aaral.

Ani Castro, binibigyan nito ng dagdag na kapasidad ang mga lokal na pamahalaan para magpasya kung saang mga lugar o mga paaralan lang ang magkakansela ng klase. depende sa aktuwal na kalagayan dito. 

“Mas direkta ang aksyon, mas angkop ang tugon ng mga LGUs,” ayon kay Castro.

Magkakaroon din aniya ng kakayahan ang mga paaralan na magsuspinde ng klase kung talagang kinakailangan para sa mga estudyante dahil kaligtasan ng mga bata ang una.

Maliban dito, makatutulong din aniya ang EO para siguruhin na patuloy lang ang pagkatuto ng mga bata sa tulong ng alternative learning arrangment.

“Suspended man ang klase, tinitiyak ng EO na tuloy-tuloy pa rin ang pagkatuto,” ang sinabi pa rin ni Castro.

Sa ilalim ng bagong Executive Order, inaatasan ng Pangulo ang Department of Education (DepEd) na gabayan ang mga paaralan sa pagsunod sa guideline upang maging maayos ang implementasyon nito sa buong bansa. ( DARIS JOSE)

HANDA ang Malakanyang na makipagtulungan sa mga budget watchdogs at civil society groups para suriin ang panukalang 2027 national budget, at hinimok ang mga ito na direktang magsumite sa Palasyo ang mga dokumentong naglalaman ng posibleng iregularidad.

Sinabi ni Presidential Communications Office (PCO) Undersecretary at Palace Press Officer Claire Castro sa press brefing sa Malakanyang na mahalaga ang mga natuklasan ng mga grupong nagbabantay sa paggamit ng pondo ng bayan upang maiparating sa Pangulo ang mga posibleng red flags sa panukalang budget.

“Sa mga nagbabantay ng budget, kung mayroon po kayong mismong kopya na inyong nakita at napansin na red flag ay ipagbigay-alam lang po ninyo sa amin, bigyan po ninyo kami ng kopya, mismo ang PCO dahil kakailanganin din po ito ng Pangulo,” ani Castro.

Binigyang-diin ni Castro na mahalaga ang papel ng mga budget watchdogs sa pagtulong sa pamahalalan upang marinig ng Pangulo ang kanilang mga natuklasan at rekomendasyon.

“Ang mga tagabantay ng budget ay kailangan ng gobyerno. Kailangan po kayo para po madinig kayo ng Pangulo,” dagdag ni Castro.

Tiniyak ni Castro na hindi papayagan ni Pangulong Ferdinand R. Marcos Jr. ang mga budget amendment na walang sapat na dokumentasyon, malinaw na paglalarawan at konkretong proyektong pagbabatayan.

Dadaan pa aniya sa pagsusuri ng bicameral conference committee at ng economic team ng Pangulo ang panukalang 2027 budget bago isumite sa Punong Ehekutibo para sa kaniyang lagda. ( DARIS JOSE)

MAKALIPAS ang halos limang taon pagtatago, naaresto na ang 43-anyos na construction worker na wanted sa kaso ng panggagahasa sa Valenzuela City nang matunton ng pulisya sa San Mateo, Rizal.

Matagal nang tinutugis ng pulisya ang akusado dahil sa nakabinbing nitong arrest warrant na inisyu ng Regional Trial Court, Branch 270, Valenzuela City, noong December 16, 2021, para sa kasong Rape na walang inirekomendang piyansa.

Sa ulat ng tanggapan ni Northern Police District (NPD) Director P/BGen. Benliner Capili, nakatanggap ng impormasyon ang mga tauhan ni Valenzuela Police Chief P/Col. Joseph Talento na naninirahan sa San Mateo, Rizal ang akusado na nakatala bilang ranked No. 6 Top Most Wanted Person sa NCRPO.

Bitbit ang nasabing warrant, agad nagkasa ng manhunt operation ang pinagsamang mga operatiba Valenzuela Police Warrant and Subpoena Section at Women and Children Protection Desk (WCPD) na nagresulta sa pagkakaaresto sa akusado dakong alas-12:15 ng tanghali sa harap ng San Mateo Medical Center, sa Barangay Ampid II, San Mateo, Rizal.

Pansamantalang nakapiit ang akusado sa Custodial Facility Unit ng Valenzuela CPS habang hinihintay ang pagpapalabas ng commitment order mula sa hukuman para sa paglilipat sa kanya sa Valenzuela City Jail.

Binigyang-diin ni P/BGen. Capili na ang patuloy na pag-aresto sa mga wanted person kabilang ang mga Top Most Wanted ay nagpapakita ng matibay na paninindigan ng NPD na panagutin ang lumalabag sa batas at tiyakin ang kaligtasan at kapayapaan ng bawat komunidad.

 (Richard Mesa)

NAKAKOLEKTA ang Caloocan City Environmental Management Department (CEMD) ng kabuuang 150 black bags ng plastic waste materials mula sa iba’t ibang mga pampubliko at pribadong sementeryo sa lungsod nitong nagdaang Undas 2026. 

Ang mga naturang bulto ng plastic waste materials ay ireresiklo ng CEMD upang bigyang-buhay at gawing kapaki-pakinabang na mga kagamitan tulad ng upuan, lamesa, bag, at iba pa. 

Naging epektibo at episyente ang koleksyon ng basura sa kabila ng pagdagsa ng mga bumibisita sa mga sementeryo dahil sa pagpapatupad ng CEMD ng biodegradable at non-biodegradable trashbins, paglalagay ng mga “Shoot Your Empty Plastic Bottle” bins, pagpapatupad ng kampanyang “Basura Ko, Responsibilidad Ko” na may angkop na kaparusahan o multa para sa mga mahuhuling lalabag.

Patuloy din ang pagpapatrol ng environmental police upang regular na magpaalala at tiyakin ang kalinisan sa lahat ng mga sementeryo sa lungsod. 

Taos pusong nagpasalamat si Mayor Dale Gonzalo “Along” Malapitan sa libo-libong indibidwal na nakiisa, naging responsable, at nagpakita ng disiplina sa kalinisan.

“Maraming salamat po sa mga kababayan natin na nagpakita ng kanilang paggalang hindi lamang sa ating kalikasan, kundi maging sa mga namayapa at mga kapwa nila na bumibisita rin sa mga sementeryo,” ani Mayor Along.

Kinilala rin ng alkalde ang walang humpay na pagsisikap ng mga kawani ng CEMD na nanatiling nakaantabay upang matiyak na malinis, payapa, at ligtas ang mga sementeryo. 

“Pinupuri ko ang CEMD sa inyong mga inisyatiba at epektibong pamamaraan upang mahiyakat ang pakikiisa ng ating mga kababayan. Dahil sa tulong niyo hindi lamang mas naging malinis ang ating kapaligiran, napigilan din ang bulto ng mga plastik na mapunta sa landfill,” dagdag ng alkalde. (Richard Mesa)