NAKIPAGPULONG si Transportation Secretary Banoy Lopez noong Lunes kay Canadian Ambassador to the Philippines, His Excellency David Hartman, upang talakayin ang mga inisyatibo ng Department of Transportation at malalaking proyekto sa imprastraktura ng transportasyon na magpapagaan sa pang-araw-araw na pag-biyahe ng mga Pilipino.

Inatasan ni Pangulong Ferdinand Marcos Jr. ang DOTr na makipagtulungan at palawakin ang pakikipagsosyo sa ibang mga bansa upang mapaunlad at gawing moderno ang mga sistema ng transportasyon ng Pilipinas.

Binanggit ni Sec. Lopez ang pag-unlad ng mga pangunahing proyekto sa imprastraktura ng transportasyon sa sektor ng riles, aviation, kalsada, at maritime sectors, at sinabing ang pag-unlad ng sistema ng transportasyon ng Pilipinas ay titiyak sa pagpapanatili ng mobilidad at konektibidad ng bansa.

“International partnerships with developed countries play a crucial role in upgrading our transportation networks, which we know will result in enhanced connectivity and promote sustainability. With our long-standing partnership with Canada, we’re confident that they can help us develop our transport system for the benefit of the Filipinos,” sabi ni Secretary Lopez.

Sa kanyang bahagi, tiniyak ni Canadian Ambassador Hartman kay Secretary Lopez na ilalaan ng Canada ang tulong nito sa pagpapalakas ng sistema ng transportasyon ng Pilipinas, partikular sa sektor ng maritima at sa Philippine Coast Guard (PCG).

“We particularly support the DOTr and your mandate from a marine perspective with maritime domain awareness—coastal illegal fishing monitoring, port modernization—so there’s a lot of work to be done collaborately from an inter-agency perspective and again most importantly around disaster resilience,” sabi ni Canadian Ambassador Hartman. (PAUL JOHN REYES)

NILINAW ng Malakanyang na magbibigay ang gobyerno ng P60 kada araw na wage subsidy sa mga small and medium enterprises (SMEs) na hirap ipatupad ang bagong minimum wage increase.

Sinabi ni Palace Press Officer Atty. Claire Castro, na nakatakdang maglunsad ng Sagip Trabaho Program ng Department of Labor and Employment (DOLE).

Layon ng nasabing programa na maiwasan ang tanggalan ng empleyado at pagsasara ng maliliit na negosyo. Tatagal ang ayuda ng tatlong buwan, saklaw ng Oktubre, Nobyembre at Disyembre.

Kailangan lamang na magsumite ang mga negosyo ng Department of Trade and industry (DTI) certificates, financial records, at listahan ng mga empleyado sa online portal o DOLE regional offices para maging kwalipikado. Habang maglalabas naman ang DOLE ng kabuuang guidelines para sa naturang programa ngayong linggo.

Ang hakbang ng Palasyo ay kasunod ng P60 daily minimum wage increase sa National Capital Region (NCR) sa P755 para sa non-agricultural workers at P718 sa agricultural at small retail establishments, na tinatayang makikinabang ang 1.1 milyong manggagawa.