ISANG pulis na nakatalaga sa PNP Anti-Cyber Crime Group nasa “hot water” ngayon matapos ireklamo ng panunutok ng baril sa isang bebot sa Malabon City, Linggo ng madaling araw.

Sa ipinarating na ulat ng Malabon City Police Station kay Northern Police District (NPD) Director P/BGen. Benliner Capili, dumalo sa isang kapistahan sa Brgy. Potrero ang biktima, kasama ang isa pa, nang lapitan sila ng senglot na pulis dakong alas-5 ng madaling araw.

Ayon sa biktima, hinahanap ng pulis ang nawawalang cellphone at naglabas umano ito ng baril saka itinutok sa ulo at leeg ng babae hanggang mamagitan ang mga taong nakapaligid kaya napayapa ang sitwasyon.

Nang umalis ang suspek, humingi ng tulong ang babae sa Police Sub-Station 1 sa Potrero subalit hindi na inabutan ng nagrespondeng pulis ang kanilang kabaro at hindi na rin matagpuan sa tanggapan ng Anti Cyber Crime Response Team sa Northern District kung saan siya nagre-report.

Dinala naman ng pulisya sa Malabon City Police Station ang biktima at kanyang kasama na tatayo bilang testigo upang maghain ng pormal na reklamo laban sa naturang parak.

Tiniyak naman ng Malabon City Police Station na tutugunan nila anumang reklamo o insidenteng may pagbabanta sa buhay gamit ang baril kahit pa kabaro nila ang nasasangkot. (Richard Mesa)

NABULABOG ang mga estudyante sa Our Lady of Fatima University (OLFU) kasunod ng pagbabanta na isinulat sa kapirasong papel na natagpuan sa isang silid aralan ng sa Valenzuela City, Martes ng umaga.

Kaagad naman itong inaksiyunan ng mga tauhan ni Valenzuela police chief P/Col. Joseph Talento na rumesponde sa lugar at nagsagawa ng pagsusuri sa bawat sulok ng pasilidad ng paaralan na matatagpuan sa Tamaraw Hills, pati na ang pagrekisa sa mga bag ng mga estudyante, sa pakikipagtulungan ng pamunuan ng pamantasan.

Bilang hakbang din sa pag-iingat, pansamantala munang sinuspinde ang klase habang patuloy pang isinasagawa ng kapulisan ang pagsusuri, pati na ang pag-alam kung sino ang nagpadala o gumawa ng liham.

Matapos naman ang masusing pagsusuri ng pulisya, walang nakitang kahina-hinalang bagay na maglalagay sa panganib sa mga estudyante, mga guro, at mga kawani ng OLFU.

Tiniyak naman ng pulisya na lahat ng nakakarating na ulat sa kanila hinggil sa pagbabanta ay kanilang sineseryoso kahit ano pa mang paraan ito ipinapadala. 

Hinimok din ni Col. Talento ang mga estudyante at mga magulang na maging kalmado at iwasan ang pagpapakalat ng hindi beripikadong impormasyon na magdulot ng hindi kinakailangang pangamba. (Richard Mesa)

SUPORTADO ng Kilusang Magbubukid ng Pilipinas (KMP) ang dalawang araw na nationwide transport strike sa pangunguna ng PISTON, kasabay ng panawagan na agarang big-time rollback sa presyo ng gasolina at pagtanggal ng VAT at excise taxes sa petroleum products, na siyang nagtataas sa gastusin ng mga magsasaka sa produksyon at transportasyon.

Ayon pa sa KMP, ang rollback na P7.57 kada litro sa diesel, P5.85 sa kerosene at P0.24 sa gasolina ay hindi nakakabura sa mataas na dagdag presyo ngayong buwan.

“Hindi lang problema ng mga tsuper at konsyumer ang mataas na presyo ng langis. Malaking problema din ito ng mga magsasaka. Bawat pagtaas sa presyo ng diesel ay pagtaas sa gastos sa land preparation, irigasyon, renta ng makinarya, pag-aani, paghahakot at transportasyon ng mga produkto mula sa bukid papunta sa palengke,” ayon kay KMP Secretary General Ronnie Manalo.

“Kapag tumataas ang diesel, tumataas ang gastos ng magsasaka. Pero hindi naman awtomatikong tumataas ang presyo na natatanggap namin sa farmgate. Ang nawawala sa kita ng mga magsasaka ay napupunta sa dagdag-gastos sa produksyon at transportasyon,” ani Manalo. “Sa huli, ang kumita lang ay ang mga kumpanya ng langis.”

Kritikal ang papel ng diesel bilang farm input, mula sa hand tractors at iba pang makinaryas, irrigation pumps, harvesters, hanggang threshers at trucks.

Sinabi pa nito na sobrang bigat ng epekto ng sunod-sunod na lingguhang taas-presyo ng langis sa mga magsasaka ng gulay at iba pang madaling masirang produkto.

Kaunti o halos wala na aniyang kapasidad ang mga magsasaka na mag-imbak ng kanilang ani at umaasa lang sa pag-transport ng gulay.

“Nauubos ng mataas na gastos sa transportasyon ang maliit nang kita sa farmgate, at sa ilang pagkakataon, hindi na praktikal at lugi na ang mga magsasaka kapag dinala pa nila sa trading post ang mga gulay. Kaya may mga napipilitan na itapon o ipamigay na lang ang kanilang aning repolyo, kamatis, at iba pa.”

“Paulit-ulit sinasabi ng gobyerno na may ayuda at subsidyo, pero mga magsasaka, tsuper at konsyumer ang nagpapasan ng epekto ng presyo ng langis,” giit ni Manalo.

(VINA de GUZMAN)

NANAWAGAN ang isang mambabatas kay Pangulong Bongbong Marcos na agad lagdaan ang Universal Social Pension kasabay ng selebrasyon ng Elderly Filipino Week mula October 1 hanggang 7.

Ayon kay United Senior Citizens Partylist Rep. Milagros Aquino-Magsaysay, mahigit sa 12 milyong Filipino senior citizens sa bansa ang kumakaharap sa pagtaas ng healthcare costs at inflation at ang universal coverage ay hindi na isang pribelehiyo kundi basic right ng bawat lolo at lola na naging bahagi sa pagtulong sa paglago ng sosyedad.

“Ang ating mga lolo at lola ang nagbanat ng buto, nagturo, at nagtaguyod sa henerasyong nagpapatakbo ngayon sa ating bayan. Hindi makatarungan na sa kanilang pagtanda ay nangangamba pa sila kung saan kukunin ang pambili ng gamot o pangkain sa araw-araw,” mariing pahayag ni Magsaysay. “Hindi ito limos. Ito ay laban para sa kanilang dangal, karapatan, at kapakanan.”

Layunin ng panukalang batas na tanggalin ang mga masasalimuot na patakaran at limitasyon na nagdudulot upang marami nating nakatatanda ang maitsapwera, upang matiyak na walang maiiwang lolo o lola saanmang sulok ng kapuluan.

Buong-paggalang na kinilala ni Magsaysay ang pagpapahalaga ng Pangulo sa kapakanan ng maralitang sektor, kasabay ng pakiusap na gawing ganap na batas ang panukala bilang makasaysayang pamana sa mga nakatatanda ngayong linggo ng kanilang pagpupugay.

“Mahal naming Pangulo, sa pagdiriwang po ng Linggo ng Katandaang Pilipino ngayong Oktubre 1 hanggang 7, umaasa ang 12 milyong senior citizens sa inyong malasakit at pamumuno. Ang isang lagda po ninyo ay magdudulot ng kapanatagan, kalinga, at pag-asa sa bawat tahanang Pilipino. Iparamdam po natin sa kanila na hindi sila pinababayaan ng pamahalaan.”

Nanawagan din si Magsaysay sa sambayanan, lalo na sa mga samahan ng senior citizens sa buong kapuluan, na magkaisa at iparinig ang kanilang tinig upang maisakatuparan ang batas.

“Hindi po ako titigil hangga’t hindi natutugunan ang karapatan ng bawat lolo at lola. Sa ating mga minamahal na senior citizens: magtiwala po kayo, kasama ninyo ako sa bawat laban, at titiyakin nating maririnig ang inyong boses sa Malacañang.” (VINA de GUZMAN)