2026 September 02 Archive - People's Balita

Archive for September 2nd, 2026

Bebot na nagtangkang magpuslit ng shabu sa piitan para sa nakakulong na ka-live-in, timbog

Posted on: September 2nd, 2026 by Francis Paolo Torres No Comments

MAKAKASAMA na ng 46-anyos na bebot sa loob ng selda ang kanyang live-in partner nang tangkaing magpuslit ng shabu sa loob ng city jail para sa nakapiit niyang live-in partner sa Valenzuela City, Linggo ng hapon.

Mahaharap sa kasong paglabag sa Section 11 ng R.A 9165 o ang Comprehensive Dangerous Drug Act of 2002 ang suspek na si alyas “Len”, residente ng Brgy., Dalandanan.

Sa imbestigasyon ni SDEU investigator PSSg Janine Buenaventura, pasado alas-2:15 ng hapon nang dumating ang suspek sa Valenzuela City Jail sa Maysan Road, Barangay Malinta, para dalawin ang kanyang live-in partner na nakakulong sa nasabing pasilidad.

Nang kapkapan ng babaeng tauhan ng Bureau of Jail Management and Penology (BJMP), nasamsam sa bulsa ng suspek ang isang plastic sachet na naglalaman ng hinihinalang shabu na dahilan ng kanyang pagkakaaresto.

Nang hilingin ng suspek na kunin ang kanyang cellphone sa loob ng bag niya para matawagan ang kanyang kaanak, isa pang plastic sachet na naglalaman din ng umano’y shabu ang nadiskubre pa sa loob ng bag.

Bukod sa shabu, nakumpiska din sa suspek ang isang shoulder bag, cellphone at identification card. (Richard Mesa)

Obrero na tulak, timbog sa P340K droga sa Valenzuela

Posted on: September 2nd, 2026 by Francis Paolo Torres No Comments

UMABOT sa mahigit P.3 milyong halaga ng shabu ang nasamsam sa isang construction worker na sangkot umano sa pagtutulak ng illegal na droga matapos maaresto ng pulisya sa buy bust operation sa Valenzuela City, kamakalawa ng gabi.

Kinilala ni P/Col. Aquino Olivar, hepe ng Special Operation Unit ng National Capital Region (SOU-NCR), PNP-DEG ang suspek na si alyas “Gino”, 39, residente ng Brgy., Marulas ng lungsod.

Ayon kay Col. Olivar, ikinasa ng kanyang mga tauhan sa pangunguna ni P/Lt. Juan Carlos De Ramos ang buy bust operation sa koordinasyon sa PDEA at NPD Tactical Operation Center matapos magpositibo ang natanggap nilang impormasyon hinggil pagbebenta umano ni alyas Gino ng shabu.

Benentahan umano ng suspek ang isang pulis na nagpanggap ng isang knot tied plastic ng shabu na nagresulta sa pagkakaaresto sa kanya dakong alas-11:41 ng gabi sa F. Bautista Street, Barangay Marulas.

Nakumpiska sa suspek ang humigi’t kumulang 50 grams ng hinihinalang shabu na may estimated value na P340,000 at buy bust money na isang tunay na P1,000 bill at apat na bundle ng P1,000 boodle money.

Mahaharap ang suspek sa kasong paglabag sa Section 5 ng R.A 9165 o ang Comprehensive Dangerous Drug Act of 2002 sa Valenzuela City Prosecutor’s Office. (Richard Mesa)

ISKO NANAWAGAN NA MAGSUOT NG MASK DULOT NG TOXIC HAZE

Posted on: September 2nd, 2026 by Francis Paolo Torres No Comments

NANAWAGAN si Manila Mayor Isko Moreno-Domagoso sa mga Manileño na mag-mask dahil sa toxic haze mula sa sunog sa kagubatan ng Indonesia na lumukob sa kabisera ng Pilipinas kasunod ng babala tungkol sa mabilis na paglala ng kalidad ng hangin sa lungsod dahil sa transboundary haze na dulot ng patuloy na sunog sa kagubatan at lupain sa Kalimantan, Indonesia.

Sa kanyang Facebook account na “Talk to the People”, sinabi ng Alkalde na nakapagtala ng nakababahalang reading ang mga air quality monitoring machines ng Pamahalaang Lungsod ng Maynila bandang alas 6 ng umaga.

Tatlong istasyon sa Puregold Tayuman, Anda Circle, at San Sebastian Residences ang nakapagtala ng “Very Unhealthy” na Air Quality Index o AQI, habang dalawang istasyon sa Sta. Ana Hospital at Rajah Sulayman Park ay “Unhealthy for Sensitive Groups”.

Ayon ito sa datos din ng DENR-Environmental Management Bureau o DENR-EMB.

Ang real-time monitoring station ng DENR-EMB sa Mehan Garden, Manila City ay nakapagtala ng AQI na 231, na “Acutely Unhealthy”, kaya kabilang ang Maynila sa pinakagrabe ang epekto sa Metro Manila.

Para sa mga Manileño, mahigpit na nagpaalala ang alkalde lalo na sa mga may pre-existing health conditions, senior citizens, buntis, at mga estudyante, na magsuot ng mask sa tuwing lalabas.

Inirerekomenda rin niya na magdoble ng mask dahil sa tindi ng polusyon sa hangin.

Pinayuhan din ni Mayor Isko ang mga residente na kung walang mahalagang gagawin sa labas ay manatili na lang sa loob ng bahay at isara ang mga bintana para hindi makapasok ang kontaminadong hangin na maaaring makaapekto sa respiratory system.

Ipinaliwanag ni Domagoso na ang haze ay dulot ng malalaking sunog sa Kalimantan at Sumatra, Indonesia, na ang makapal na usok ay itinutulak papunta sa Pilipinas ng umiiral na hangin.

Tiniyak ng Alkalde na naka-full alert ang Manila Health Department o MHD at ang pitong district hospitals ng lungsod sakaling dumami ang mga pasyenteng apektado ng masamang kalidad ng hangin.

Binanggit din ng Alkalde na nadagdagan pa ang problema sa kalusugan ng lungsod dahil kasabay nito ang pagtaas ng kaso ng leptospirosis dulot ng monsoon rains.

Inatasan na ni Mayor Isko ang Manila City Disaster Risk Reduction and Management Department o MCDRRMD at Department of Environment and Public Services o DEPS na ipagpatuloy ang pag-monitor sa direksyon ng hangin at datos ng kalidad ng hangin, at magbabahagi ng updates sa publiko sa buong araw. (Gene Adsuara)

NHA AT GLOBE, NAGTURO NG DIGITAL LITERACY SKILLS SA MGA SENIOR CITIZEN NG VALENZUELA

Posted on: September 2nd, 2026 by Francis Paolo Torres No Comments

MATAGUMPAY na inilunsad ng National Housing Authority (NHA), sa pamamagitan ng Community Support Services Department (CSSD) sa pamumuno ni OIC Department Manager Maricris G. Maninit, at sa pakikipagtulungan ng Globe Telecom ang isang learning initiative na nakatuon na matulungan ang mga nakatatanda na magkaroon ng kaalaman sa digital transformation at digital literacy.

Nasa 80 senior citizens ang dumalo sa pilot implementation nito sa Disiplina Village, Bignay, Valenzuela City, na pinangunahan nina NHA-North Sector Officer-in-Charge Engr. Wenson O. Reyes at Malabon/Navotas/Valenzuela Office District Manager Ms. Mishella T. Cruz, kasama ang ilang kawani ng Globe Telecom at Community Support Services Department ng ahensya.

Ang programa–na tinatawag na #SeniorDigizen ay naglalayong turuan ang mga senior citizens mula sa iba’t ibang resettlement sites ng NHA tungkol sa ligtas, responsable, at kapaki-pakinabang na paggamit ng makabagong teknolohiya, pati na rin ang pagprotekta sa kanilang sarili laban sa mga online scam, phishing, at iba pang uri ng digital fraud.

Nagbigay ng mga aralin ang mga kawani ng Globe Telecom tungkol sa Smartphone 101, Cybersecurity and Safety, at Guide to GlobeOne App and GCash, bilang tatlong modules.

Kung maaalala, pumirma ang NHA at G-Xchange Inc. ng isang Memorandum of Agreement noong Oktubre 2025, hudyat ng pagsasama ng GCash app bilang pinakabagong e-payment channel ng ahensya, na nagpapahintulot sa mga benepisyaryo ng pabahay na bayaran ang kanilang buwanang amortisasyon sa pinaka-mabilis at pinaka-episyenteng pamamaraan.

Sa ilalim ng kanyang direktiba, ipinahayag ni NHA General Manager Joeben A. Tai ang kanyang suporta sa pagsasagawa ng kaganapan, habang binibigyang-diin ang pakinabang nito para sa mga nakakatanda, maging sa mismong ahensya–sa pamamagitan ng pagpapabuti ng collection efficiency gamit ang GCash at ilan pang Globe-related applications.

Ang partnership na ito sa pagitan ng NHA at Globe Telecom ay alinsunod sa NHA Memorandum Circular No. 2016-088 na nagsasaad ng kahalagahan ng networking sa pagbibigay ng mga oportunidad sa mga benepisyaryo ng pabahay at mga homeowner associations (HOAs) ng ahensya.

Ayon sa ulat ng NHA, ipapagpapatuloy pa nito ang paglulunsad ng programa sa iba pang project sites ng ahensya, upang mas marami pang senior citizens ang matulugan. (PAUL JOHN REYES)

Trapik sa NLEX inabot ng 7-km

Posted on: September 2nd, 2026 by Francis Paolo Torres No Comments

NAPERWISYO nitong Lunes ang mga motorista at commuters matapos umabot sa pitong kilometro ang haba ng trapiko sa bahagi ng North Luzon Expressway (NLEX), partikular sa bayan ng San Simon, Pampanga, dahil sa pagbaha dulot ng habagat.

Ayon sa NLEX Corporation, nagkabuhol-buhol ang daloy ng sasakyan mula sa Candaba Viaduct, Tulaoc, hanggang sa southbound lane ng San Simon interchange.

Pansamantalang isinara ang isang seksiyon ng NLEX at ang Libtong Exit sa Meycauayan, Bulacan.

Ang dating 40 minutong biyahe ay tumagal ng hanggang 5 oras.

Kapwa apektado ang northbound at southbound lanes ng NLEX.

“Motorists approaching San Simon NB entry may take the San Simon Exit and re-enter NLEX via the San Simon entry as an alternative route to avoid the flooded section,” anang advisory.

“Motorists approaching San Simon SB may take the San Simon Exit and re-enter NLEX via the San Simon Southbound Entry as an alternative route to avoid the flooded section,” dagdag pa ng NLEX.

May mga U-turn slots bago ang Tulaoc Overpass at San Simon Interchange para sa mga nais bumalik sa northbound lane.

Naka-deploy ang mga patrol officers ng NLEX upang umasiste sa mga motorista at pangasiwaan ang matinding sitwasyon ng trapiko.

Nakakuha ng sampung nominasyon ang ‘Quezon’…Bida ng ‘ImPerfect’ na sina KRYSTEL at EARL, parehong nominado sa 49th Gawad Urian (ni: ROHN ROMULO)

Posted on: September 2nd, 2026 by Francis Paolo Torres No Comments

NAKUHA ng historical drama na “Quezon” ang pinakamaraming nominasyon mula sa Manunuri ng Pelikulang Pilipino para sa 49th Gawad Urian.

Sampu ang nakuha ng pelikulang pinagbidahan ni Jericho Rosales, samantalang parehong walo ang ipinagkaloob sa “Cinemartyrs” at “Sunshine.”

Pito namang nominasyon para sa “Bar Boys: After School.”

Tiglima ang “Bloom Where You Are Planted” at “Manila’s Finest.”

Nakakuha naman ng apat na nominasyon ng “Habang Nilalamon ng Hydra ang Kasaysayan”, habang tigtatatlo ang “Republika ng Pipolipinas”, “Raging (Rumaragasa)”, “Child No. 92: Anak ni Boy Kana”, at “Magellan.’

Narito ang mga nominado sa top six categories…

Maglalaban-laban para sa Best Film ang Bar Boys: After School, Bloom Where You Are Planted, Cinemartyrs, Quezon, at Sunshine.

Sa Best Director nominated sina Noni Abao para sa Bloom Where You Are Planted, Sari Dalena para sa Cinemartyrs, Antoinette Jadaone para sa Sunshine, Kip Oebanda para Bar Boys: After School, at Jerrold Tarog para sa Quezon.

Sa Best Actress, kakalabanin naman ni Krystel Go para sa I’mPerfect sina Nour Hooshmand para sa Cinemartyrs, EJ Jallorina para sa Dreamboi, Odette Khan para sa Bar Boys: After School, Maris Racal para sa Sunshine, Rissey Reyes-Robinson para sa Paglilitis, Ruby Ruiz para sa Tigkiliwi, at Geraldine Villamil para sa Republika ng Pipolipinas.

Matindi rin ang tunggalian sa Best Supporting Actress nominees na kinabibilangan nina Dolly de Leon para sa Habang Nilalamon ng Hydra ang Kasaysayan, Alessandra de Rossi para sa Republika ng Pipolipinas, Elora Españo para sa Lakambini: Gregoria de Jesus, Jennica Garcia para sa Sunshine, Gina Pareño para sa Lakambini: Gregoria de Jesus, Rochelle Pangilinan para sa Child No. 82, at Eula Valdez para sa Paglilitis.

Sa Best Actor category pasok sina Earl Jonathan Amaba para sa I’mPerfect, Jomari Angeles para sa Some Nights I Feel Like Walking, Carlo Aquino para sa Bar Boys: After School, Elijah Canlas para sa Rumaragasa, Julian Paul Larroder para sa Tigkiliwi, Jojit Lorenzo para sa Habang Nilalamon ng Hydra ang Kasaysayan, Miguel Odron para sa Some Nights I Feel Like Walking, at Jericho Rosales para sa Quezon.

Marami naman ang nakapansin na nalaglag sa mga nominado ng Best Actor si Vice Ganda para sa Call Me Mother, kaya naman naging usap-usapan agad ito ng netizens.

Sina Will Ashley para sa Bar Boys: After School, Amado Babon para sa Magellan, Rico Blanco para sa Manila’s Finest, Joshua Garcia para sa Meet, Greet, Bye, Enrique Gil para sa Manila’s Finest, Iain Glen para sa Quezon, at Nanding Josef para sa Habang Nilalamon ng Hydra ang mga nakakuha ang nominasyon para sa Best Supporting Actor.

Ang Gawad Urian ay taunang parangal mula sa Manunuri ng Pelikulang Pilipino para kilalanin ang outstanding achievements sa Filipino cinema.Gaganapin ang awards night ng 49th Gawad Urian sa Oktubre sa De La Salle University, Taft Ave., Manila.

***

SOBRANG saya at proud ang premyadong aktres at producer na si Sylvia Sanchez dahil nakakuha ng dalawang top category nominations sa 49th Gawad Urian ang “I’mPerfect” na mula sa Nathan Studios.

Sa kanyang Facebook post, labis nga ang pasasalamat ng aktres…”Thank you, Gawad Urian, for this recognition.

“Malaking bagay sa amin na ma-nominate sina Krystel Go for Best Actress and Earl Amaba for Best Actor. More than inclusion, this is a recognition of their raw talent, hard work, and heart as artists.

“Beyond disability and labels, Krystel and Earl remind us that what truly matters is the talent, passion, and truth they bring to their craft.

“Proud and grateful. Congratulations, Krystel and Earl!

Gamit ang mga hashtags na #imperfect #gawadurian #inclusivitymatters #beyondrecognition at #nathanangels.

Maraming nagulat na pina-manage muna ni Vincent kay Chris… BEA, nananatili pa ring tahimik after na mag-resign ang dating manager (ni: REY PINEDA)

Posted on: September 2nd, 2026 by Francis Paolo Torres No Comments

ANG mga huling araw ng Agosto, 2026 ay isa sa mga pinaka-maintrigang panahon sa buhay ng aktres na si Bea Alonzo.

Dahil matapos mag-resign ang manager nitong si Shirley Kuan, ‘di na ito narinig magsalita.

Samantala, sa panig ni Shirley, napilitan itong maglabas ng sama ng loob, dahil siya ang ititnuturong dahilan upang makansela ang dapat sanang kasalang naganap sa Spain noon nina Bea at Vincent Co.

Ang ugat ng pagre-resign ni Shirley ay ang pananatiling tahimik ni Bea, at ni hindi man lang daw nito nakuhang maipagtanggol ang dating manager.

Sa kabilang banda, nananatili pa rin tahimik si Bea sa isyu.

Ikinagulat ng lahat ng bigla na lamang lumitaw sa eksena si Chris Cahilig.

Ayon dito lumilitaw na isinama siya sa team ni Bea ang magsisilbi bilang isang interim manager/agent.

Hindi raw napulot si Chris sa kung saan.

Ito rin daw ang nagsisilbing public relations specialist ng Puregold, na pag-aari ng pamilya ni Vincent.

Bale si Chris na raw ang matutuloy ng nabiting trabaho ni Shirley. Tulad ng mga pending na projects, mga ongoing projects, at mga inquiries tungkol sa career ng aktres.

Sa kabila ng biglaang pagpapalit ng manager ni Bea, binanggit nitong si Chris sa kanyang interview na hindi pa sila nagkikita ni Bea.

At wala pa naman daw silang napag-uusapan tungkol sa mangyayaring pagma-manage nito.

Hindi ba’t maliwanag na may kinalaman si Vincent sa nangyaring transition?

Nangangahulugan din ba na pinanghimasukan ng negosyante ang career ni Bea?

Ang tanong lang ay kung bakit nito kinailangang manghimasok?

Hindi ba’t sobrang busy ito sa pagpapatakbo ng kanilang negosyo?

May oras pa ba ito para sa ganitong bagay? O sadyang binigyan ng oras ang panghihimasok sa career ng aktres.

Isa pang tanong, ano ang motibo?

***

SA isang interview kay Heath Jornales ni Boy Abunda para sa Fast Talk With Boy Abunda, halatang naalangan ang kator sa tanong.

Tinanong kasi ito na kung liligawan si Caprice Cayetano ng isa nitong kaibigan ano ang magiging reaksyon nito.

Sumagot ito na okay lang sa kanya at susuporta siya., na halatang nag-iba ang tono ng boses.

Sa naturang interview, kasama rin bukod kina Heath at Caprice ay ang ama ng una ang aktor at fight director na si Michael Roy Jornales.

Tinanong ito kung okay lang sa kanya ang pagiging close ng anak niya at ng dating co-star na maaaring ma-develop sa ligawan.

Ayon sa aktor, mas okay kung magpo-focus muna sila sa kanilang career at goals, dahil mga bata pa sila.

Si Heath ay 17 years old pa lang.

Nabuo ang team up ng dalawa at nakilala bilang CapEath sa ‘Pinoy Big Brother: Celebrity Collab Edition 2.0’, nung panahong sila ay nasa loob ng Bahay ni Kuya.

Itinanghal si Caprice bilang Kapuso Big Winner, samantalang natapos naman si Heath bilang Kapuso Second Big Placer.

Ads September 2, 2026

Posted on: September 2nd, 2026 by Francis Paolo Torres No Comments