ITO ang pahayag ni House Speaker Faustino “Bojie” G. Dy III sa isinagawang misa sa House of Representatives nitong Lunes kung saan nanawagan siya ng “moral recovery” sa mga mambabatas upang maibalik ang tiwala ng publiko sa Kongreso.

 “I have said this before and I will continue to say it: a truly Bagong Kongreso must begin with moral recovery. Our standard cannot simply be how many laws we pass, but whether we become better public servants and restore our people’s faith in this institution,” sinabi ni Dy. 

“And if we stand together with faith in God, faith in one another, and faith in the Filipino people, I believe we can build a Congress worthy of their trust: A Congress that knows how to listen. A Congress that serves. A Congress that does what is right. A Congress that puts the Filipino people first,” dagdag ng kongresista.

Aniya, ang maging mambabatas ay hindi lamang karunungan kung papaano gumawa ng batas. “It is about knowing what is right and having the courage to do it—choosing integrity over convenience and the common good over personal interest.”

Tinukoy ni Dy ang mga pagkakataon na ang tamang desisyon ay hindi ibig sabihin na ito madali. Ang mga naging desisyon ng mga mambabatas sa Kongreso ay nakakaapekto sa buhay ng milyong Pilipino kaya ang usapan ng integridad at accountability ay kaakibat sa kanilang responsibilidad. 

 “There will be moments of noise, disagreement, and uncertainty. In those cases, we will need something greater than political judgment. We will need our conscience. We will need collective courage. And we will need prayers,” sabi ni Dy. 

(VINA de GUZMAN)

TINATAYANG aabot na sa P6.614 billion ang naging pinsala sa imprastraktura at agrikultura at mahigit sa anim na milyong katao ang apektado dahil sa Habagat at mga nagdaang bagyong Luis, Maymay, at Neneng, ayon sa National Disaster Risk Reduction and Management Council (NDRRMC).

Ayon sa situation report ng NDRMMC, araw ng Linggo, Agosto 23, ang estimated cost ng pinsala sa imprastraktura ay P4,887,870,851.63 habang agrikultura naman ay P1,726,292,918.05.

Sa ngayon, may 2,324 ang napinsalang bahay at 1,104 naman ang napinsalang imprastraktura.

Ang cost of damage sa livestock, poultry at pangisdaan ay P24,085,755.

May kabuuang 89 lungsod at munisipalidad ang isinailalim sa state of calamity.

Nakaapekto naman ang weather disturbances sa 50,023 magsasaka at mangingisda.

Samantala, tinuran ng NDRRMC na may 6,913,577 katao o 2,015,897 pamilya ang apektado ng multiple weather disturbances.

Ang mga apektadong indibiduwal ay matatagpuan sa Ilocos Region, Cagayan Valley, Cordillera Administrative Region, Central Luzon, National Capital Region, CALABARZON, MIMAROPA, Bicol Region, Western Visayas, at Zamboanga Peninsula.

Samantala, may 29 katao naman ang nasawi kung saa lima ang kumpirmado.

Mayroon namang 17 indibiduwal ang nasugatan. May 11 ang kumpirmado habang anim na iba pa ang nananatiling bina-validate.

Bina-validate rin ang ulat na may dalawang indibiduwal ang nawawala.

Idagdag pa rito, may 105,523 katao ang na-displaced ng masamang panahon kung saan 42,422 indibiduwal ang nakahanap ng temporary shelter sa loob ng evacuation centers at 63,101 iba pa ang nasa labas ng evacuation centers.

Iniulat din ng NDRRMC na may 2,324 napinsalang mga bahay sa Ilocos Region, CAR, Central Luzon, CALABARZON, MIMAROPA, at Western Visayas. Sa nasabing bilang, may 2,058 ang partially damaged habang 266 iba pa ang totally damaged.

Samantala, namahagi naman ang Department of Social Welfare and Development (DSWD) ng mahigit sa P1 bilyong halaga ng humanitarian assistance sa mga apektadong indibiduwal ng malupit na lagay ng panahon. 

 (DARIS JOSE)

PINAIGTING ng Department of Agriculture (DA) ang kampanya nito laban sa peke at illegally manufactured farm inputs kasunod ng kamakailan na operasyon sa Nueva Ecija.

Ayon sa DA, nagsagawa ang Talavera Municipal Police Station ng isang entrapment operation noong Hulyo 15 kasunod ng isang reklamo mula sa isang manufacturer ukol sa di umano’y pagbebenta ng ‘pekeng’ fertilizer products.

Nauwi ang operasyon sa pagkakatuklas ng isang hinihinalang unregistered warehouse at manufacturing facility sa Barangay Sta. Monica, Rizal, Nueva Ecija.

Sa dalawang magkahiwalay na operasyon, umabot sa 778 sako ng fertilizer ang nasamsam na tinatayang nagkakahalaga ng mahigit P748,000.

“Fertilizer is an investment for our farmers. When fake or substandard products are sold to them, it is not just their money that is lost. Their harvest and livelihood are at stake,” ang sinabi ni DA Secretary Francisco Tiu Laurel Jr. sa isang kalatas.

“We will protect our farmers and legitimate businesses. We are directing the FPA to intensify market surveillance and enforcement against counterfeit, unregistered, adulterated, and illegally manufactured agricultural inputs,” dagdag na wika nito. ( DARIS JOSE)

PINALABAS na isang donasyon na mga damit ang isang babae na fetus na idineliver sa Malate church sa Maynila.

Sa inisyal na ulat ng Manila Police District (MPD) nadiskubre ng security ang fetus nitong Sabado .

Nakakabit pa umano ang umbilical cord ng fetus na nakabalot sa isang duguang bedsheet .

Ayon sa pulisya, diniliber at iniwan ng isang babae na nagpakilalang Lalamove rider ang isang milk supplement box sa simbahan alas 9:40 ng gabi ng Biyernes.

Ayon sa security na nakadiskubre, nagpakita ng booking receipt ang rider at ang box ay galing umano sa isang ‘Mam Cora’ .

Nang buksan nakita ang fetus na nakabalot ng duguang bedsheet na may mga kasama pang mga damit .

Agad na humingi ng assistance ang security para sa masusing imbestigasyon .

Dinala ng pulisya ang fetus sa J.Roa Funeral para sa safekeeping.

Masusi naman itong iniimbestigahan upang matukoy kung sino ang irresponsableng ina ng fetus na dinala sa naturang simbahan.

 (Gene Adsuara)

KALABOSO ang dalawang tricycle driver nang mahuli sa akto na sumisinghot umano ng shabu sa loob ng isang nakaparadang tricycle sa Valenzuela City.

Sa kanyang ulat kay Northern Police District (NPD) Director P/BGen. Benliner Capili, kinilala ni Valenzuela Police Chief P/Col. Joseph Talento ang mga suspek bilang sina alyas “Jomar”, 26, ng Brgy., Marulas at alyas “Mark”, 38, ng Brgy., Gen T De Leon.

Lumabas sa imbestigasyon ni P/MSg Carlito Nerit Jr., nakatanggap ng isang telephone call ang mga tauhan ng Police Sub-Station 3 at ipinaalam sa kanila ng tumawag ang hinggil sa nagaganap umanong pot session sa Parking lot ng Antonnete Townhomes, Barangay Marulas.

Kaagad namang nagsagawa ng validation sa nasabing lugar ang mga tauhan ng SS3 kung saan naaktuhan nila ang mga suspek na bumabatak umano ng droga sa loob ng isang nakaparadang tricycle dakong alas-10:12 ng gabi na dahilan ng kanilang pagkakaaresto.

Nasamsam sa kanila nina PCpl Inglis Balagtas at PCpl John Melo De Paz ang isang nakabukas na plastic sachet na may bahid ng umano’y shabu at ilang drug paraphernalias.

Sinampahan na ng pulisya ang mga suspek ng kasong paglabag sa Sections 12 at 15 ng RA 9165 o ang Comprehensive Dangerous Drug Act of 2002 sa Valenzuela City Prosecutor’s Office sa pamamagitan ng inquest proceedings. (Richard Mesa)

PORMAL na nanumpa sa kanilang tungkulin ang bagong hanay ng mga opisyal ng Cavite Press Corps (CPC) para sa taong 2026–2028 noong Agosto 21, 2026.

Sa harap ni National Press Club President Mina Navarro, isinagawa ang oathtaking ceremony na sumisimbolo sa panibagong pananagutan ng mga mamamahayag na nagsisilbing tagapagdala ng impormasyon at boses ng publiko sa gitna ng patuloy na pagbabago ng larangan ng pamamahayag.

Mula kanan, tampok sa larawan sina Gene Adsuara ng People’s Balita, President; Sid Samaniego ng Pilipino Mirror, Vice-President; Margie Bautista ng Remate, Secretary; Irine Gascon ng Police Files, Treasurer; at Jon Cagande ng Cavite News Today, Auditor.

Sa ikalawang hanay mula kaliwa ay sina Jimmy Barrientos ng Sparkle, Board of Director; Janice Baricuatro ng Bulgar, Chairman of the Board; Dennis Abrina ng Manila Times, Board of Director; Ma. Cristina Go Timbang ng Pilipino Star Ngayon, Board of Director; at Rex Molines ng Diyaryo Pinoy, Member.

Hindi lamang isang simpleng pagpapalit ng mga opisyal ang naturang oathtaking.

Kaakibat nito ang mas mabigat na hamon na panatilihin ang integridad, kredibilidad at kalayaan ng pamamahayag, lalo na sa panahon kung kailan mabilis kumalat ang impormasyon at maging ang maling balita ay maaaring magkaroon ng malaking epekto sa publiko.

Bilang organisasyon ng mga mamamahayag sa Cavite, nananatiling mahalaga ang papel ng CPC sa pagtataguyod ng propesyonalismo at responsableng pamamahayag, gayundin sa pagbibigay-puwang sa mga isyung direktang nakaaapekto sa mga mamamayan ng lalawigan.

Nasaksihan din ang makabuluhang okasyon ng mga opisyal ng National Press Club, kabilang sina President Mina Navarro, Secretary Leonel Magistrado Abasola, Treasurer Jeane Lacorte at Auditor Lydia Bueno, kasama ang mga miyembro ng NPC Board of Directors na sina Jojo Sicat, Muhammad Aya Yupangco, Madelynne Dominguez, Jun Mendoza, Irwin Zuproc, Dennis Napule at Nino M. Aclan.

Sa pagsisimula ng kanilang termino, nakaharap sa bagong pamunuan ng Cavite Press Corps ang hamon na higit pang patatagin ang pagkakaisa ng mga mamamahayag at panatilihing buhay ang prinsipyo na ang pamamahayag ay hindi lamang trabaho, ito ay pananagutan sa katotohanan at serbisyo sa publiko. 

(Gene Adsuara)