DALAWA sa naging dating mga aides ni Vice President Sara Z. Duterte ang inaasahang haharap sa impeachment trial ng VP kaugnay sa P612.5 million confidential funds.

Bago nagtapos ang pagdinig nitong Miyerkules, inimpormahan ni lead prosecutor Batangas Rep. Gerville “Jinky Bitrics” Luistro ang Senate impeachment court na sina dating special disbursing officers Gina Acosta ng Office of the Vice President (OVP) at Edward Fajarda ng Department of Education (DepEd) ang ilan sa mga susunod na saksi ng prosekusyon.

Ipinag-utos naman ni Senate impeachment court Presiding Officer Sen. Francis “Chiz” Escudero ang pagpapalabas ng subpoenas ad testificandum at subpoenas duces tecum, kung kinakailangan para kina Acosta at Fajarda.

Gayundin, ang pagpapadala ng subpoena kay House Legislative Information Resources Management Department Director Marivic Pareja.

Inaasahang babalik para tumestigo muli si Commission on Audit (COA) Intelligence and Confidential Funds Audit Office Supervising Auditor Celine May Del Campo na humarap sa pagdinig nitong Miyerkules.

Kinabibilangan ng binubusising P612.5 million ang P500 million na confidential funds na ini-release sa OVP para sa ika-apat na bahagi ng 2022 at unang tatlong bahagi ng 2023, at P112.5 million na ini-release naman sa DepEd sa unang tatlong bahagi ng 2023 habang nagsisilbing education secretary si Duterte.

Sa unang bahagi ng pagdinig, inihayag ni dating Land Bank of the Philippines (LandBank) department manager Violeta Constantino na si Acosta ang nag-encash ng apat na Treasury checks na nagkakahalaga ng P125M bawat isa o nasa total na P500M sa OVP noong December 2022, February 2023, April 2023 at July 2023.

Sinabi naman ni dating LandBank department manager Nenita Camposano na si Fajarda ang nag-encash ng tatlong Treasury checks na nagkakahalaga ng P37.5M bawat isa o total na P112.5M para sa DepEd noong February, April at July 2023.

Tinukoy naman ni COA state auditor Roderick Wamil na sina Acosta at Fajarda ang special disbursing officers na tumanggap ng confidential funds at nagsumite ng liquidation documents para sa naturang opisina.

(VINA de GUZMAN)

TIKLO ang pitong individuals kabilang ang tatlong hinihinalang sangkot sa droga nang maaktuhan naglalaro umano ng ilegal na sugal sa magkahiwalay na lugar sa Valenzuela City.

Sa ulat, nagsasagawa ng Anti-Criminality Operation ‘Oplan Galugad’ ang mga tauhan ng Valenzuela Police Sub-Station 9 nang maaktuhan nila ang dalawang lalaki na nagsusugal umano ng ‘lucky 9’ sa Karuhatan Public Cemetery, Brgy., Karuhatan dakong ala-1:48 ng Miyerkules ng hapon.

Nasamsam sa kanila ang bet money, gamit na baraha at isang plastic sachet na naglalaman ng hinihinalang shabu na nakuha umano kay alyas “Apolinar”, 46, ng Brgy , Ugong.

Alas-9:35 ng Huwebes ng umaga nang mahuli din sa akto ng mga operatiba ng SS8 ang tatlong pasaway na nagsusugal umano ng ‘cara y cruz’ sa isang bakanteng lote sa A-2 Tatlong St., Brgy., Ugong. Nakuha sa kanila ang bet money, pangara at isang plastic sachet ng suspected shabu na nasamsam umano sa tricycle driver na si alyas “Leo”, 46.

‎Nauna rito, pasado alas-2:00 ng Huwebes ng madaling araw nang maaresto ng mga operatiba ng SS5 ang dalawang kelot na nagsusugal din umano ng ‘cara y cruz’ sa M. H Del Polar corner Sta. Cruz St., Brgy., Palasan. Nakuha sa kanila ang pangara, bet money at isang plastic sachet na naglalaman ng umano’y shabu na nasamsam umano kay alyas “Pedro”, 31, security guard.

Samantala, nabisto naman ang dalang hinihinalang pinatuyong dahon ng marijuana ng 16-anyos na binatilyong grade 8 student sa loob ng kanilang paaralan sa JEDS National High School sa boundary ng Brgy., Ugong at Gen. T De Leon dakong alas-6:30 ng umaga. (Richard Mesa)

TIAONG, QUEZON — Bagama’t noong Hulyo 24, 2026 pa ang aktuwal na kaarawan ni Mayor Vincent Arjay Mea — na pinili niyang ipagdiwang nang pribado kasama ang kanyang pamilya sa abroad — ay naging makabuluhan, engrande, at masaya pa rin ang huli nitong selebrasyon kasama ang kanyang mga nasasakupan noong ika-3 ng Agosto 2026.

Ginanap ang pagtitipon sa bagong gusali ng Multi-Purpose Building sa bayan, kung saan personal na nakiisa ang pamilya ng alkalde upang ipakita ang kanilang buong suporta.

Nagningning din ang okasyon sa pagdalo ng mga lider ng bayan sa pangunguna ng kasalukuyang Vice Mayor na si William Razon, kasama ang dating Vice Mayor na si Dick Umali. Nakiisa rin sa pagdiriwang ang mga miyembro ng Sangguniang Bayan na sina Konsehal Tom Ilao, Konsehal Maja Escueta, Konsehal Jonas Atienza, at Konsehal Recrec Baldeo, kasama ang iba pang mga konsehal ng bayan at ang hepe ng kapulisan ng Tiaong.

Dinaluhan din ito ng kanyang mga malalapit na kaibigan at iba’t ibang sektor ng lipunan kabilang ang mga Punong Barangay at opisyal, mga barangay tanod, Homeowners Associations (HOAs), Rotary Clubs, iba’t ibang samahan, women’s groups, at mga kabataan.

Lalo pang naging buhay at masaya ang programa dahil sa inihandang live band. Mas lalo pang pinasigla ang okasyon sa pangunguna ng Head ng Tiaong Public Information Office (PIO) na si Binibining Monica Baldeo, kasama ang mga kasamahan niya sa departamento, na nag-alay ng mga awitin at nagbigay-saya sa mga kababayang dumalo sa naturang pagdiriwang. 

(Kim Bornella/ Photos Boy Morales)

UPANG matigil na ang pagpasa ng system loss charges at mapagaan ang dinadalang pasakit ng tumataas na presyo ng pangunahing bilihin at serbisyo sa consumes, isinusulong ni Akbayan Party-list Rep. Chel Diokno na alisin ang ipinapataw na system loss charges sa singil sa kuryente at palakasin ang pagkakaroon ng accountability ng mga distribution utilities sa pamamahala ng kanilang system losses.

Sa House Bill No. 10585, sinabi ni Diokno na ang ipinapataw na system loss charges ay nasa 5% ng average electricity bill. Sa pagitan ng Agosto 2025 at Hulyo 2026, ang isang tahanan na kumukunsumo ng 200 kilowatt-hours (kWh) kada buwan ay nagbabayad ng average na P1,787.38 na system loss charges para sa kuryente na hindi naman nila nakonsumo.

“This is unjust and unfair. Why would we let consumers, who have no control over the operation of the distribution system, shoulder the cost of system losses,” ani Diokno, na naghain ng panukala kasama sina Akbayan Party-list Reps. Perci Cendaña at Dadah Ismula, at Dinagat Islands Rep. Kaka Bag-ao.

Ayon kay Diokno, dahil sa pagpayag na sagutin ng consumers ang system losses ay nagbigay daan para mawala sa mga distribution utilities ang pressure sa pagmodernisa ng kanilang tumatandang infrastructure, pagpapabuti sa operational efficiency, at pagpapalakas sa mga anti-pilferage na hakbang.

“As a result, honest paying households, including those in the lower income brackets, are forced to subsidize these inefficiencies and answer for stolen electricity,” giit nito.

Layon ng panukala na amyendahan ang Section 43 (f) ng Electric Power Industry Reform Act (EPIRA) sa pamamagitan nang pagbabaal sa mga distribution utilities na ipasa ang kanilang technical at non-technical system losses sa consumers sa pamamagitan ng electricity rates o iba pang billing mechanism.

Palalakasin din ng panukala ang pananagutan o accountability ng distribution utilities sa pamamagitan ng pagrerequire sa kanila na isama ang system losses bilang bahagi ng kanilang ordinary costs and risks sa paglalaan ng electric distribution services.

Inaatasan naman sa panukala ang Department of Energy (DOE), the National Electrification Administration (NEA), at Energy Regulatory Commission (ERC) na tulungan ang mga electric cooperatives sa pamamagitan ng modernization programs, technical assistance, infrastructure upgrades, at access sa financing, partikular na yaong nagseserbisyo sa mga geographically isolated at disadvantaged areas. 

(VINA de GUZMAN)

ISANG mambabatas ang nagbabala sa Marcos administration at mga sumusuporta sa Pax Silica project na huwag gumamit ng nuclear power sa pagpapatakbo ng proyekto sa kakulangan ng pagsubok nito.

Ayon kay ACT Teachers Rep. Antonio Tinio, walang katiyakan kung ligtas gumamit ng small modular reactors (SMR) para tustusan ang kakailanganing 5-gigawatt power requirement sa gagawing Pax Silica project sa loob ng Economic Security Zone sa New Clark City. 

Naunang napaulat na maaaring gumamit ng SMR sa Pax Silica project matapos ang US-Philippines “123 Agreement” on civil nuclear cooperation. 

“We see a dangerous convergence here. First, the government commits to a US-led project that will consume a huge chunk of our national power supply for the benefit of foreign corporations. Then, it uses the resulting artificial energy crisis to justify importing risky, experimental nuclear technology from the same foreign power,” sinabi ni Tinio. 

Ayon kay Tinio, mas mahal ang gumamit ng mga SMR. 

“They still pose risks involving radioactive waste, accidents, security, and nuclear proliferation—while their smaller size does not eliminate these fundamental dangers.” 

“The Marcos administration is creating a crisis through Pax Silica and then offering a US-made modular nuclear ‘solution’ that will make us permanently dependent on American technology, fuel, and capital. This is not energy independence; this is deepening neocolonial control over our energy sector,” dagdag ng kongresista. 

(VINA de GUZMAN)

SHOOT sa selda ang isang basurero matapos maaktuhang may hawak na baril sa San Juan City.

Mahaharap sa kasong paglabag sa R.A 10591 (Comprehensive Firearms and Ammunition Regulations Act) ang suspek na si alyas “Baba”, 40, at residente ng Brgy., Poblacion, Mandaluyong City.

Sa ulat, habang nagsasagawa ng ‘Oplan Galugad’ operation ang mga tauhan ng Pasadena Police Sub-Station 4 sa pangunguna ni PCMS Roberto Santillan, kasama sina Pat. Edrel Mandia at Pat. Joseph Bayon nang maaktuhan nila ang suspek na may hawak na baril sa kanto ng Lt. Artiaga at M. Paterno Sts., Brgy., Corazon De Jesus, San Juan City dakong ala-1:30 ng hapon.

Kaagad nilang nilapitan ang suspek saka kinumpiska ang nasabing baril na isang kalibre .38 revolver na may dalawang bala, kasama din nakuha sa kanya ang tatlong bala ng .22 (short), limang bala ng .22 (long) at isang itim na eco bag.

Nang hanapan siya ni PCMS Santillan ng mga kaukulang dokumento hinggil sa ligaledad ng nasabing baril at mga bala ay walang naipakita ang suspek na naging dahilan upang posasan siya ng mga pulis. (Richard Mesa)