NANATILING palaisipan ang mga kabaong na natagpuan sa iba’t ibang bahagi ng Metro Manila. Hanggang ngayon, wala pang tiyak na impormasyon kung sino ang nag-iwan ng mga ito at kung ano ang tunay nilang layunin.

Ngunit kung ang mga ito ay sadyang iniwan bilang simbolo ng protesta, naniniwala si Chairman Emeritus Dr. Jose Antonio Goitia na malinaw ang ipinahihiwatig ng mga ito: napuno na ang maraming Pilipino.

“Matagal nang sinusubok ng Tsina ang pasensya ng sambayanang Pilipino,” ani Goitia.

 “Hinaharas ang ating mga mangingisda, hinahadlangan ang ating Coast Guard at Hukbong Dagat, at hinahamon ang ating mga karapatan sa kabila ng umiiral na arbitral ruling. Gayunman, diplomasya, pagpipigil, at paggalang sa pandaigdigang batas pa rin ang pinili ng Pilipinas.”

“Ngunit may hangganan ang pasensya ng bawat bansa. At tila narating na iyon ng sambayanang Pilipino.”

Ayon kay Goitia, hindi iisang pangyayari ang pinagmulan ng lumalalim na galit ng publiko kundi ang matagal nang sunod-sunod na panggigipit ng Tsina sa West Philippine Sea at ang paulit-ulit na paghamon sa soberanya ng Pilipinas.

“Huwag ninyong ipagkamali ang ating pagpipigil sa pagsuko. Walang bansang may dangal ang magtitiis sa walang humpay na pang-aalipusta.”

Kung may sinisimbolo man ang mga kabaong, ani Goitia, maaaring hudyat ito ng pagtatapos ng matagal na pagtitimpi ng sambayanan.

“Ipinahahayag nito ang matagal nang nais sabihin ng maraming Pilipino: tama na ang pangha-harass, tama na ang pananakot, tama na ang kawalang-galang.”

Kinuwestiyon din ni Goitia ang paraan ng pag-uulat ng mga media outlet na aniya’y may pagkiling sa Tsina.

“Kung sadyang nilabo o hindi ipinakita ang mahahalagang detalye o larawan ng mga kabaong, may karapatan ang publiko na magtanong kung bakit. Tungkulin ng media na ihatid ang mga katotohanan nang buo at patas, hindi ang hubugin ang pananaw ng publiko. Kapag tila may impormasyong pinipiling ilahad o binabawasan, likas lamang na itanong kung kaninong interes ang pinaglilingkuran.”

Nilinaw ni Goitia na ang galit ng mga Pilipino ay hindi laban sa mamamayang Tsino.

“Ang ating pagtutol ay hindi laban sa ordinaryong mamamayan ng Tsina. Ito ay laban sa mga patakaran at pagkilos na lumalabag sa soberanya ng Pilipinas at sa pandaigdigang batas. Ang mga pamahalaan ang dapat managot sa kanilang mga desisyon, hindi ang kanilang mga mamamayan.”

Aniya, dapat manatiling matatag ang Pilipinas nang hindi isinusuko ang mga prinsipyong bumubuo sa isang demokratikong lipunan.

“Ang tunay na lakas ng Pilipinas ay wala sa laki ng hukbong sandatahan kundi sa pagkakaisa ng mamamayan, tibay ng paninindigan, at paggalang sa batas at katarungan.”

Nagbabala rin si Goitia sa Beijing na huwag ipagkamali ang pagpipigil ng Pilipinas bilang kahinaan.

“Ang pasensya ay hindi pagsuko. Ang diplomasya ay hindi pagpapasakop. Sa bawat hakbang ng pananakot, lalo lamang tumitibay ang pasya ng mga Pilipino na ipaglaban ang nararapat sa atin. Maaaring mas malakas ang kapangyarihang militar ng Tsina, ngunit hindi nito kailanman matitinag ang diwa ng isang bayang handang ipaglaban ang kalayaan at soberanya nito.”

Anuman ang tunay na layunin ng mga nag-iwan ng mga kabaong, sinabi ni Goitia na may isang katotohanang hindi na maaaring ipagsawalang-bahala.

“Maaaring hindi pa kilala ang nasa likod ng mga kabaong, ngunit malinaw ang ipinahihiwatig ng mga ito. Napuno na ang mga Pilipino. Hindi kami naghahanap ng hidwaan o digmaan. Hinihingi lamang namin ang nararapat sa bawat malaya at nagsasariling bansa—paggalang sa aming soberanya, pagtalima sa pandaigdigang batas, at paggalang sa dignidad ng sambayanang Pilipino.” (Richard Mesa)

SINABI ng Malakanyang na magpapatuloy ang P12-per-liter fuel discount para sa public utility vehicle (PUV) drivers hangga’t kailangan ng transport sector ng tulong mula sa gobyerno sa gitna ng epekto ng mas mataas na presyo ng langis.

Winika ni Presidential Communications Office Undersecretary at Palace Press Officer Claire Castro na sa ngayon ay walang depinidong petsa kung kailan magtatapos ang fuel discount, na magiging epektibo sa Agosto 15.

“Sa ngayon ay walang definite na panahon hangga’t kailangan ng tulong ng ating mga kababayan sa transport sector ay mananatili po ang pagbibigay po ng ayuda,” aniya pa rin.

Nauna rito, inaprubahan ng Malakanyang ang pagtataas ng fuel discount para sa mga tsuper ng jeepney at UV Express, alinsunod sa direktiba ni Pangulong Ferdinand Marcos Jr.

Mula sa P10 kada litro, magiging P12 kada litro na ang diskwento simula Agosto 15.

Tinatayang aabot sa P1,800 kada linggo ang matitipid ng bawat kwalipikadong driver.

Ani Castro, ang mas mataas na discount ay makapagbibigay sa mga drivers ng P1,108 in assistance kada linggo o pahintulutan ang mga ito na maka-ipon o kumita ng P7,200 kada buwan sa pamamagitan ng government subsidy.

Tinuran pa ni Castro na naglaan ang gobyerno ng P400 million para sa fuel discount program, gayunman, ang detalye ukol sa kung gaano tatagal at mapananatili ang tulong ay hindi pa malaman.

“Sa ngayon ay may inilaan po na 400 million pesos para sa fuel discount at ang pinakadetalye po nito mamaya po ay magkakaroon ng press briefing or presscon ang DOTr at alas dos po ng hapon para po mabigay niya ang pinakadetalye kung paano narating ang dose pesos or 12 pesos na fuel subsidy para sa ating mga tsuper,” ang litaniya ni Castro.

Tugon ito ni Castro nang tanungin ukol sa kung bakit P12 per liter ang inaprubahan ng gobyerno sa halip na P20 na naunang naiulat ng Land Transportation Franchising and Regulatory Board (LTFRB).

Samantala, nangako naman ang Malakanyang na tutugunan ang alalahanin ng transport group na MANIBELA hinggil sa limitadong bilang ng mga gasoline stations na magpapartisipa sa fuel discount program.

“Lahat po iyan ay tinutugunan po ng ating pamahalaan at sa lahat po ng kanilang mga concerns ay makakaabot po ito para po matugunan nang mas mabilis kung ano iyong mga lugar na dapat pa na magkaroon ng mga gasoline stations na magbibigay ng fuel subsidy ay dapat po na matugunan kaagad,” ayon kay Castro.

Kaugnay pa rin nito, pinag-aaralan ng administrasyon ang karagdagang tulong para sa transport sector habang patuloy ang alalahanin sa mas mataas na fuel prices na nag-ugat sa tensyon sa Gitnang Silangan dahilan para sa pangambang pagtaas naman ng transport fares at commodity prices. 

( DARIS JOSE)

ITINUTULAK ni Pangulong Ferdinand Marcos Jr., ang pagpapalawak sa artificial intelligence (AI) at digital upskilling initiatives bilang bahagi ng pagsisikap na ihanda ang mas maraming Filipino para sa hanapbuhay sa hinaharap at palakasin ang ‘competitiveness’ ng bansa sa modernong ekonomiya.

Ayon kay Presidential Communications Office Undersecretary at Palace Press Officer Claire Castro, na ang inisyatiba ay kasama sa mga mahahalagang usapin na tinalakay sa pang-limang miting ng Pangulo kasama ang Private Sector Advisory Council (PSAC) Education and Jobs Sector Group sa Palasyo ng Malakanyang, araw ng Miyerkules.

Tinuran ni Castro na nakatuon ang miting sa mga hakbang para paghusayin ang edukasyon, workforce development, at job creation sa bansa.

Sinabi pa nito na binigyang diin sa talakayan ang kahalagahan ng pagpapalawak ng AI at digital upskilling na magagamit ng mga manggagawang Pinoy sa lalong tumataas na technology-driven economy.

“Iisa lang ang layunin ni Pangulong Marcos Jr. sa ganitong mga hakbang—ihanda ang mas maraming Pilipino sa mga trabahong kakailanganin sa hinaharap, palakasin ang kakayanan ng bansa sa inobasyon at pandaigdigang kompetisyon at lumikha ng mas marami at mas de-kalidad na oportunidad para sa bawat Pilipino,” ayon kay Castro.

Pinag-usapan din sa pulong ang mas malapit na kooperasyon sa hanay ng gobyerno, pribadong sektor, akademiya para tugunan ang jobs-skills mismatch at mas mahusay na paghahanay ng polisiya at programa kasama ng pangangailangan ng industriya.

Ayon sa PCO, “stronger collaboration among the three sectors is intended to ensure that education and skills development initiatives respond to industry and the modern economy’s requirements.”

Sinabi ng administrasyon na ang koordinasyon ay makatutulong na makalikha ng mas marami at mahusay na oportunidad para sa mga Filipino habang dine-develop ang workforce upang matugunan ang labor-market demands.

Samantala, pinag-usapan din nina Pangulong Marcos at PSAC ang implementasyon ng Semiconductor and Electronics Industry Roadmap bilang bahagi ng mas malawak na puwersa ng hanap-buhay at ‘economic development agenda’ ng gobyerno.

Gayundin, saklaw ng miting ang mga programa na naglalayon na palawigin ang oportunidad para sa employment, entrepreneurship, at skills development sa mga Filipino.

Sinabi ng Malakanyang na ang mga inisyatibang ito ay naglalayon na palakasin ang kakayahan ng bansa para sa inobasyon at global competitiveness habang lumilikha ng mas dekalidad na oportunidad para sa mga Filipino. (DARIS JOSE)