NAGBABALA si Executive Secretary Ralph Recto na gagawa ng legal na hakbang ang gobyerno laban sa mga scammers na nagpapakilalang taga -Office of the Executive Secretary at nanghihingi ng pera kapalit ng di umano’y mabilis na paglalabas ng pondo para sa Local Government Support at Socio-Civic Projects Fund.

Ani Recto, hindi sila mag-aatubiling magsampa ng kaukulang kasong legal laban sa sinumang mapatutunayang sangkot sa mga mapanlinlang na gawain.

Nakarating din sa kaalaman ni Recto ang ulat na ilegal at mapanlinlang na gawain ang pagpapatawag ng mga pekeng pagpupulong o pagtitipon at pagbibigay ng huwad na pangako ng appointment.

Malinaw aniyang pagpapanggap bilang opisyal o awtorisadong kinatawan ng LGSF at Socio-Civic Projects Fund program at iba pa.

Kaya ang paalala ni Recto sa publiko, maging mapagmatyag at tiyaking beripikado ang anumang impormasyon sa pamamagitan lamang ng kani- kanilang Local Chief Executive o ng lehitimong opisyal ng OES. (DARIS JOSE)

INILUNSAD ng Pamahalaang Lungsod ng Valenzuela ang Dr. Pio Valenzuela Digital Scholarship Payout, isang digital disbursement ng scholarship grants sa pamamagitan ng LandBank ATM Card, kasabay ng orientation at contract-signing ng mga bagong Dr. Pio Valenzuela scholars na ginanap sa Pamantasan ng Lungsod ng Valenzuela.

Sa pamamagitan ng programang ito, madali nang ma-claim ng 797 Valenzuelano scholars ang kanilang scholarship grants gamit ang kanilang LandBank ATM Card kung saan 205 dito ay mga papasok na freshmen scholars.

Bago ang paglulunsad, pinirmahan ng mga kwalipikadong iskolar ang kanilang mga kontrata at dumalo sa isang orientation na isinagawa ng LandBank of the Philippines. Ginabayan ang mga mag-aaral kung paano kunin ang kanilang mga gawad sa pamamagitan ng kanilang mga naka-enroll bank account bago ang ceremonial distribution ng kani-kanilang ATM Cards.

Ang partnership na ito sa pagitan ng Valenzuela LGU at LandBank ay nagpapatunay sa pangako ng lungsod sa pagbabago sa pamamagitan ng pagbibigay ng mga serbisyo nang mas madali at mas maginhawa para sa mga benepisyaryo.

Ang inisyatiba ay partikular na nagta-target na bawasan ang mahabang paghihintay at mabawasan ang abala sa pagpila sa panahon ng payout, na tinitiyak na ang mga benepisyaryo ay makakatanggap ng kanilang mga gawad sa isang napapanahong paraan at maayos na paraan.

Sa kanyang mensahe, binigyang-diin ni Mayor WES Gatchalian ang mga direktiba ng lungsod patungo sa digitalizing public services para sa mas mahusay na accessibility. Natuwa rin siya kung paano nakatulong ang scholarship program sa maraming Valenzuelano learners.

“Natutuwa ho ako. Masarap sa pakiramdam na ang pera po ng Pamahalaang Lungsod ng Valenzuela ay nagagamit sa tama. Masarap ang pakiramdam na it brings change sa buhay po ng mga scholars natin. Kaya sana po ay ipagpatuloy natin, pagpursigihin natin. ‘Wag natin sayangin ang pagkakataon.” ani Gatchalian. 

(Richard Mesa)

ISANG magandang senyales para sa Malakanyang ang hirit ni Meralco Chairman at CEO Manny V. Pangilinan na pag- usapan ang may kinalaman sa pagpapabuwag sa system loss charges.

Sinabi ni Presidential Communications Office (PCO) Undersecretary at Palace Press Officer Claire Castro na nangangahulugan lamang ito ng bukas si MVP sa diskusyon sa gitna ng desididong pasiya ni Pangulong Ferdinand R. Marcos Jr. na bumaba ang presyo ng kuryente.

Gayunman, tinuran ni Castro na marami talagang pagdaraanan na pag-aaral at maaaring may maapektuhan sa nasabing kagustuhan ng Pangulo at mabuti na lang aniya na handa ang kinauukulang mga panig na ito ay mapag- usapan.

Sa kabilang dako, nagsisimula na aniyang pag-aralan ng Department of Energy (DoE) ang regulasyon ng ERC, legislations at iba pang polisiya sa harap ng pangunahing objective na maibaba ang electricity rates na binabayaran ng mga consumers.

Sisikapin aniyang may mabuong polisiya hinggil sa target na pagtatanggal ng system loss na hindi magiging pahirap kapwa sa hanay ng ating mga kababayan, mga investors at utility companies. 

 (DARIS JOSE)

INIHAIN ni Leyte 4th District Rep. Richard Gomez ang House Bill No. 10225, para sa development, promotion, at protection ng Philippine ube industry.

Layon nitong gawing isang globally competitive agricultural product ang ube habang nagbibigay ng mas maraming oportunidad sa mga magsasakang pilipino at komunidad.

Tatawaging Philippine Ube Industry Development Act, pinadedeklara nito ang ube bilang National Priority Crop, magbuo ng Philippine Ube Industry Council, at palakasin ang research, production, processing, branding, at export promotion.

Matagal-tagal na rin aniyang kinikilala ang bansa sa produksyon ng world-class ube, subalit hindi nabebenipisyuhan ng buo ang magsasakang Pinoy mula dito.

“Ube is more than a beloved Filipino delicacy—it is part of our culture, our identity, and a valuable agricultural resource. It is time that we invest in our farmers and build an industry that will allow them to earn more while showcasing the best of the Philippines to the world,” ani Gomez.

Sa panukala, maglalaan ng suporta ang gobyerno para sa de kalidad na planting materials, research and development, post-harvest facilities, processing, financing, quality standards, market access, at export promotion. 

(VINA de GUZMAN)

SA GITNA ng patuloy na pagtaas ng gastusin ng mga pamilyang Pilipino, isinusulong ng isang mambabatas ang agarang reporma sa sektor ng enerhiya upang mapababa ang singil sa kuryente at wakasan ang mga hindi makatarungang bayarin sa konsyumer.

Sa pamamagitan ng House Bill No. 10306, layon ni Quezon City District V Rep. Patrick Michael “PM” Vargas na amyendahan ang Electric Power Industry Reform Act (EPIRA) at palakasin ang proteksyon ng publiko laban sa mga singil na hindi dapat ipinapasa sa mga mamamayan.

Ang panukala ay kaakibat ng direktiba ni Pangulong Bongbong Marcos na binigyang-diin sa kanyang State of the Nation Address ang pangangailangang pababain ang presyo ng kuryente at pagbutihin ang kahusayan ng sektor ng enerhiya.

Sa ilalim ng panukala, hindi na maaaring ipasa sa konsyumer ang mga non-technical losses tulad ng nakaw ng kuryente at iba pang pagkukulang sa sistema. Sa halip, tanging mga lehitimong pagkawala ng kuryente sa transmission at distribution ang maaaring isama sa singil, at ito ay sasailalim pa sa mas mahigpit at makatarungang limitasyon.

Sa ilalim ng panukala, tanging mga lehitimong technical losses na lamang ang maaaring isama sa singil, at ito ay sasailalim pa sa mas mahigpit at makatarungang limitasyon.

Sa kasalukuyan, ang system loss charges ay bahagi ng buwanang bayarin sa kuryente, na nagpapahintulot sa distribution utilities na mabawi ang bahagi ng enerhiyang nawawala sa transmission at distribution.

 Ngunit iginiit ni Vargas na hindi dapat pasanin ng mga mamamayan ang pagkawala ng kuryente dahil sa kapabayaan o ilegal na gawain.

Kasama rin sa panukala ang pagbaba at muling pagsasaayos ng system loss cap upang masigurong ang mga pagtitipid at kahusayan sa operasyon ay direktang mararamdaman ng mga konsyumer sa kanilang bayarin sa kuryente.

Ayon kay Vargas, ang abot-kayang kuryente ay mahalaga hindi lamang sa bawat tahanan kundi pati sa maliliit na negosyo, edukasyon, at serbisyong pangkalusugan.

Inaasahang tatalakayin ang House Bill No. 10306 sa kaukulang komite ng Kamara sa mga susunod na linggo. (VINA de GUZMAN)

HIMAS-REHAS ang 63-anyos na lolo na wanted sa apat na bilang ng kasong panghahalay matapos maaresto ng pulisya sa kanyang tirahan sa Malabon City, kamakalawa ng hapon.

Sa ulat ng tanggapan ni Northern Police District (NPD) Director P/BGen. Benliner Capili, ang akusado na si alyas “Lolo Lucio” ay nakatala bilang No. 5 sa Top Ten Most Wanted Person sa Malabon City Police Station.

Nang makatanggap ng impormasyon ang mga tauhan ni Malabon Police Chief P/Col. Kenneth Mission na naispatan ang presensya ng akusado sa kanilang lugar sa Sanciangco St. Brgy. Catmon, kaagad nilang ikinasa ang operation laban kay ‘Lolo Lucio’.

Hindi na nakapalag ang akusado nang makorner ng pinagsamang mga operatiba ng Malabon Police Warrant and Subpoena Section at Women’s and Children Protection Desk sa Sanciangco St., Brgy., Catmon dakong alas-3:40 ng hapon.

Matagumpay na naisilbi ng pulisya ang bitbit na warrant of arrest na inilabas noong Hulyo 21, 2026 ng Malabon City Regional Trial Court (RTC) sa akusado para sa apat na bilang ng kasong Rape through Sexual Assault sa ilalim ng Article 266-A Paragraph 2 ng Revised Penal Code.

Pinuri naman ni National Capital Region Police Office (NCRPO) Director P/MGen. Anthony Aberin ang NPD at Malabon Police sa mabilis na pagkakadakip sa akusado na may pagkakataong makalayang pansamantala kung makakapaglagak ng P480,000 na itinakda ng hukuman. 

(Richard Mesa)