AGAD na umaksyon ang Land Transportation Office (LTO), sa direktiba ni LTO Chief, Assistant Secretary Markus V. Lacanilao, sa pamamagitan ng paglalabas ng Show Cause Order (SCO) laban sa rehistradong may-ari at drayber ng isang sasakyan na sangkot sa insidente ng pagkakabangga sa isang tauhan ng Philippine Coast Guard (PCG) habang nagsasagawa ng checkpoint operation kasama ang mga tauhan ng LTO sa Roxas Boulevard, Parañaque City noong Hulyo 26.

Batay sa inisyal na ulat ng insidente, nagtamo ng mga pinsala ang biktima matapos mabangga ng naturang sasakyan habang nasa aktuwal na pagpapatupad ng checkpoint operation.

Dahil dito, inaatasan ang rehistradong may-ari at ang drayber ng naturang sasakyan na humarap sa tanggapan ng Intelligence and Investigation Division (IID) sa itinakdang pagdinig at magsumite ng kanilang sinumpaang salaysay, kalakip ang mga kaukulang orihinal na dokumento, upang ipaliwanag kung bakit hindi dapat maharap ang drayber sa kasong Reckless Driving at kung bakit hindi siya dapat ideklarang Improper Person to Operate a Motor Vehicle, na maaaring magresulta sa pagsuspindi o pagbawi ng kanyang driver’s license.

“Ang driver’s license ay hindi lamang pahintulot na makapagmaneho, kundi patunay na ang isang tao ay may disiplina at paggalang sa batas at regulasyon ng ahensya. Kapag ang resulta ng pagmamaneho ay pinsala sa isang tauhang nasa aktuwal na pagpapatupad ng batas, obligasyon ng LTO na suriin kung nananatili siyang karapat-dapat maghawak ng lisensya,” pahayag ni Asec. Lacanilao.

Kasunod nito, inatasan ang drayber na agad na isuko ang kanyang driver’s license sa tanggapan ng IID, na isasailalim sa 90-araw na preventive suspension habang nagpapatuloy ang imbestigasyon. Pansamantala ring inilagay sa alarm status ang naturang sasakyan.

Muling iginiit ng LTO na ang driver’s license ay hindi lamang pahintulot upang makapagmaneho, kundi isang pribilehiyong ipinagkakaloob sa mga may kakayahang sumunod sa batas, gumalang sa kapwa, at unahin ang kaligtasan sa lansangan. Binigyang-diin ng ahensya na ang bawat may hawak ng lisensya ay inaasahang patuloy na patunayan, sa bawat paglalakbay, na karapat-dapat siyang pagkatiwalaan sa pamamagitan ng responsableng pagmamaneho at mahigpit na pagsunod sa mga umiiral na batas at regulasyon. (PAUL JOHN REYES)

PINAALALAHANAN ng Department of the Interior and Local Government (DILG) ang lahat ng mga opisyal at mga empleyado ng ahensiya na ipinagbabawal ng batas at may katapat na parusa ang pagtanggap ng regalo, pabor o pasasalamat o iba pang may monetary value habang tinutupad ang tungkulin.

Ito ay nakasaad sa ipinalabas na memorandum ng DILG nang makatanggap ng report na may ilang tauhan ang gumagamit ng kanilang puwesto para makapag-solicit ng pera, regalo at iba pa mula sa mga pribadong indibidwal, national government agencies at local go­vernment units (LGUs).

Binigyang diin ng DILG na alinsunod sa Section 7 of Republic Act (RA) No. 6713, o ang Code of Conduct and Ethical Standards for Public Officials and Employees bawal sa public officials at empleyado na mag-solicit, manghingi at tumanggap ng anumang regalo, gratuity, favor, entertainment, loan o anumang monetary value habang nasa tungkulin o may kinalaman sa anumang transaksyon na apektado ang tungkulin sa opisina.

Niliwanag ng DILG na ang sinumang mapapatunayang m­agkakasala rito ay maaa­ring ma­dismis sa trabaho at makasuhan.