- October 3, 2026
Ang Diyaryong Pinagkakatiwalaan
Archive for July 20th, 2026
Magkatapat man ang serye, may iisang layunin sa industriya…DINGDONG, inihayag na may proyekto ang AKTOR na pamumunuan ni COCO (ni: ROHN ROMULO)
SA Facebook post ni GMA Primetime Queen Marian Rivera, pinost niya ang mga larawan nang muling pagkikita ng Primetime King ng GMA at ABS-CBN na sina Dingdong Dantes at Coco Martin.
May caption ito na, “Si Atoy at si Gabo para sa AKTOR – League of Filipino Actors #Soon.”
Nag-post din si Dingdong sa kanyang Instagram account ng naturang photos, kasama rin ang isang larawan ang wifey na si Marian, Iza Calzado at iba pang taga-AKTOR.
Mababasa sa masayang post na ito ng bida sa ’The Master Cutter’ (na more than 50 episodes na)…
“Magkaiba man ang programa, iisa lang ang layunin: pagmamahal at pagpapalakas ng ating industriya.
“Isang magandang Sunday meeting, may kasamang masayang kwentuhan at makabuluhang palitan ng mga ideya, para pag-usapan ang isa na namang proyektong ilulunsad ng AKTOR sa ilalim ng pamumuno ng ating kapwa AKTOR member na si Coco Martin. Soon.
“Para sa AKTOR. Para sa mga aktor. Para sa industriya.
“Salamat, Coco.”
#ProudAktor @aktorph
Marami celebrities ang natuwa at bumati sa muling pagsasama ng dalawang Primetime Kings, at na-excite ang netizens sa project na gagawin nila ang alam namin ay mangyayari sa bago matapos ang taon.
Marami rin ang nagwi-wish na magsama sina Dingdong at Coco sa isang action movie o serye.
Ramdam din ng netizens na walang rivalry sa kanila kahit na magkatapat ang kanilang primetime series.
Komento ng netizens, “Magkaibang programa pero iisa ang ama. Parehas na si Sir Joey Marquez.”
“Cross over sana hahahaha yung kahit napadaan lang ang isa sa kanila.”
Well, abangan na lang natin ang isang malaking project na ilo-launch ng AKTOR para sa local entertainment industry na tiyak na pag-uusapan bago matapos ang 2026.
Kahit maraming ‘di naniniwala na wala pang relasyon…AUBREY, ipinagdiinan na itinuturing niyang best friend si LANCE (ni: ROMMEL GONZALES)
MARAMI ang hindi naniniwalang wala pang relasyon bilang boyfriend/girlfriend sina Aubrey Caraan at Lance Carr, napaka-sweet nga kasi nilang dalawa.
Pero pagpapatotoo ng dalawa, best of friends [pa] lamang sila ngayon.
“We’re really good friends, like, parang ano kami… yung sinasabi ko totoo po talaga, like, best friend ko siya,” lahad ni Aubrey.
“Ang best friend ko po talaga siyempre yung sister ko, pero wala akong guy best friend, kumbaga, na nasasabihan ko ng lahat-lahat.
“Sa mga hindi po nakakaalam, I live alone here in Manila. Ako lang po talaga.”
At si Lance ang madalas nakakasama ni Aubrey sa mga ganap niya kahit sa labas ng showbiz.
“And si Lance, madalas kaming nagkakatrabaho, so siya minsan yung sumasama sa akin sa mga errands ko.
“Kunwari kailangan kong mag-grocery, pero ang dami kong bitbit, so magpapasundo ako.
“Ganoon yung level of closeness namin ni Lance,”
Sinegundahan ito ni Lance.
“Yun din po ang ibinilin ng mama niya sa akin.
“Since si Aubrey lang po ang mag-isa dito, kung puwede I can extend a helping hand to her.
“Kung kailan niya ako kailangan, parang I make sure naman na nandiyan ako for her, kung anuman yung kailangan niya.”
Pero wala mang relasyon sa ngayon, aminado naman sila na posibilidad na maging sila.
Lahad ni Lance, “Nakikita ko naman na girlfriend material si Aubrey!”
Sinagot naman ni Aubrey na boyfriend material si Lance, na agad sinagot ni Lance ng,
“Akala ko, husband material?”Kilig man ang hatid ng magka-loveteam, sa horror film na “Rosario” ay mananakot mula sila kasama sina
Rose Van Ginkel, Yumi Garcia, Bernadette Allyson, Meg imperial, Jairus Aquino at Suzette Ranillo.
Mula sa Viva Films na magbubukas sa mga sinehan sa Agosto 5, 2026, sa direksyon ni Roni S. Benaid.
Balitang ‘bankrupt’ na raw ang tech business ng asawa…IZA, lumalabas na walang kaalam-alam sa problema ni BEN (ni: REY PINEDA)
NAGSIMULA ang lahat sa isang bulung-bulungan na naging blind item na sa mga social media platforms.
Ang tinukoy ng nasabing item ay tungkol sa isang celebrity couple. Pinay ang babae at foreigner ang lalake.
Bankrupt na raw ang tech business ng nasabing foreigner. Naging madali itong hulaan ng mga mapanuring mata ng mga netizens dahil sa ang babae ay isang premyadong aktres.
Dito na nagsimula ang lahat.
Ang nabanggit na blind item ay nagkaroon na nang mukha. Ang mag-asawang Iza Calzado at Ben Wintle ang lumitaw na tahasang tinutukoy ng nasabing blind item.
Mas lalong tumindi ang kontrobersya dahil hindi lamang isa ang nagrereklamo sa DOLE, marami raw sila.
Mga empleyadong hindi nabayaran ng kabuuang suweldo. Kung kaya’t napangalanan na kung sino ang employer. Patung-patong na kaso daw ang isinampa ng mga complainant dahil sa hindi patas na pagpapasuweldo.
Ang matindi pa raw, bukod sa suweldo, yung mga separation pay raw ay hindi pa naibibigay o sadya raw na naka-hold.
Noong una, ayaw naman daw sanang magreklamo ng mga empleyado. Siguro naisip ng mga ito na asawa naman ito ng aktres kaya’t malayong hindi nito maibigay ang kanilang hinihinging kabayaran.
Mas lumala ang problema nila dahil naulinigan ng mga ito na maaaring mag-file na ng bankruptcy ang kumpanya, kung kaya’t kinailangan na nila ang intevention ng gobyerno. Kung kaya’t sumugod na ang mga ito sa DOLE upang idulog ang kanilang problema.
Kapag nag-file nga naman ito ng bankruptcy, malamang na wala silang makuhang separation pay.
Ayon pa sa mga naglalabasang balita, tila wala raw kaalam-alam itong si Iza sa nagiging problema sa negosyo ng kanyang asawa.
Well, sana lang maayos na ang problema ng asawa nito. at mabuting makipag-settle na lamang sa kanyang mga empleyado.
Kung sakali namang bankrupt na nga itong si Ben, I’m sure kaya naman siyang buhayin ni Iza, noh!
Dito natin mapapatunayan kung totoong through thick and thin e magiging maayos pa rin ang kanilang pagsasama.
Bukas ang pahinang ito para sa panig ng mag-asawa.
***
Bea at Vincent, hindi pa priority ang mag-honeymoon
WALA raw munang honeymoon para sa mga bagong kasal na sina Bea Alonzo at ang business tycoon na si Vincent Co.
Ayon mismo kay Boy Abunda, sa pamamagitan ng show nitong ‘Fast Talk With Boy Abunda’, nakausap nito si Vincent.
Diretsahang tinanong ni Tito Boy kung may plano ba silang mag-honeymoon?
Ayon kay Vincent, sa rami daw ng kanilang kanya-kanyang trabaho hindi raw nila ito binibigyan ng panahon.
Kumbaga, kampante na siguro ito na tuluyan ng natali sa kanya si Bea.
Marami ang nagsasabing si Vincent talaga ang sumuyo nang husto kay Bea.
Una raw itong nagpakita nang paghanga sa dating dalaga.
Sa kasalukuyan daw, maging si Bea ay walang oras para mag-honeymoon. Dahil may mga tapings daw ito na kailangang tapusin.
Kung sakaling matuloy nga ang honeymoon nina Bea at Vincent, sa Spain kaya ang pupuntahan nila?
After all, sa nasabing bansa sila dapat ikasal. Naunsiyami nga lang dahil sa mga ‘di inaasahang pangyayari.
Well, kung saan at kailan man ang kanilang honeymoon, desisyon na nila yon, syempre!
Natutuwa kami para kay Bea, at sana wala na rin makialam kung talagang sila ay totoong nagmamahalan!
Alex Eala makakatambal muli si Venus Williams
MULING magtatambal sa tennis court sina Alex Eala at US icon Venus Williams sa Mubadala DC Open na gaganapin sa Washington, DC.
Kabilang kasi ang dalawa sa star-studded na doubles lineup sa nasabing torneo kung saan kasama nila ang 18 Grand Slam doubles at mixed doubles champions sa ATP at WTA tours.
Unang nagsama ang dalawa sa Bad Homburg Open noong nakaraang buwan kung saan nagwagi sila laban kina Alexandra Osborne at Catherine Harrison sa first round.
Subalit tinalo sila sa quarterfinals nina Olivia Nicholls at Tereza Mihalikova.
Nakatakdang magsimula ang Mubadala DC Open sa darating na Hulyo 25 hanggang Agosto 2.
Spain, kinoronahang kampeon sa World Cup 2026 vs Argentina, 1-0
YUMANIG sa East Rutherford, New Jersey, nang muling nakoronahan ang Spain bilang kampeon ng mundo matapos talunin ang Argentina sa score na 1-0 sa 2026 FIFA World Cup Final.
Sa extra time ng laban, si Ferran Torres ang nakapuntos ng nag-iisang goal na nagbigay ng panalo sa La Roja at nagpatibay ng kanilang ikalawang titulo sa kasaysayan ng torneo.
Hindi napigilan ng Argentina ang matinding opensa ng Spain, lalo na matapos ma-red card si Enzo Fernández sa stoppage time ng second half.
Ang pagkakabawas ng isang manlalaro ay nagbigay ng mas malaking bentahe sa Espanya hanggang sa makapuntos sila sa karagdagang oras.
Bukod sa kampeonato, nakamit din ng Spain ang iba’t ibang parangal.
Si Unai Simón ay ginawaran ng Golden Glove matapos magtala ng pitong shutouts, si Rodri ay tinanghal na Golden Ball bilang pinakamahusay na manlalaro ng torneo, at si Pau Cubarsí ay kinilala bilang Best Young Player.
Ito ang ikalawang pagkakataon na nakuha ng Spain ang World Cup, kasunod ng kanilang unang panalo noong 2010.
Sa tagumpay na ito, naging unang bansa ang Espanya na sabay na may hawak ng men’s at women’s World Cup titles.
Samantala, nabigo ang Argentina na maulit ang kanilang tagumpay noong 2022 at hindi natupad ang pag-asang maging ikatlong koponan sa kasaysayan na makapagdepensa ng titulo.
PBBM, hinimok mamagitan sa LRT-1 Cavite Extension
Dapat nang mamagitan si Pangulong Ferdinand “Bongbong” Marcos, Jr. sa implementasyon ng P64.9 bilyong LRT-1 Cavite Extension Project na ilang taon nang naaantala.
Ito naman ang panawagan ni Las Piñas Rep. Mark Anthony Santos para sa pagpapatuloy ng proyekto na inaasahang magpapagaan sa daloy ng trapiko at magpapabilis ng biyahe ng milyun-milyong mananakay mula Las Piñas, Parañaque, at Cavite. Ani Santos, hindi na dapat hayaang maantala pa ang isang proyektong may malaking pakinabang sa publiko.
Sinabi ng mambabatas na napatunayan na ni Pangulong Marcos ang kahandaan nitong mamagitan sa mga usaping may kinalaman sa mahahalagang serbisyong pampubliko. Kabilang dito ang pagtugon sa mga suliranin sa sektor ng tubig at ang pag-aksyon ng pamahalaan sa krisis sa suplay ng kuryente sa Siquijor.
Umaasa si Santos na maipakikita rin ng Pangulo ang kaparehong agarang aksyon sa mga natitirang isyu na humahadlang sa LRT-1 Cavite Extension upang tuluyan na itong makumpleto at mapakinabangan ng milyun-milyong commuter. (DARIS JOSE)
Padilla binira, tanggap ‘unggoy’ video ng China
ISANG malaking insulto umano sa 26 milyong Pilipino na bumoto kay Sen. Robin Padilla ang pagtanggap nito sa panunuya ng China na mga unggoy ang mga Pilipino, ayon kay Philippine Coast Guard (PCG) Spokesperson Jay Tarriela.
“Hindi po unggoy ang mga Pilipino. I believe it is an insult to the more than 26 million Filipinos who voted for you na tinanggap ninyo na unggoy tayo,” saad ni Tarriela na dismayado sa naging tugon ni Padilla.
Ang pahayag ay reaksyon sa Facebook post ng senador hinggil sa China Daily’s AI-generated video na nilibak ang mga Pinoy bilang unggoy. Sa naturang post, tila kinampihan pa ni Padilla ang China sa pagsasabing lahat ng tao ay unggoy na magkakaiba lang ng kulay. Mariin itong tinutulan ni Tarriela na iginiit na hindi dapat tanggapin ng mga Pilipino ang anumang pang-iinsulto sa kanilang lahi.
“As for the Chinese media, aren’t we all monkeys of different colors in the eyes of white colonizers/supremacists? Filipinos are brown, and Chinese and Japanese are yellow. We cannot deny our relativity to each other,” ani Padilla sa kanyang Facebook post. Kilala si Padilla bilang pro-China.
“Ako po, bilang Pilipino, ay hindi kailanman tatanggapin na unggoy ang aking lahi — at hindi ko rin matatanggap na unggoy ang mga susunod pang salinlahi ng ating bansa. Ang tunay na paggalang sa ating lahi ay ang ipagtanggol ito — hindi ang tanggapin ang pang-iinsulto!” giit ni Tarriela, na kilala sa katapangan sa pagtatanggol sa West Philippine Sea (WPS).
Samantala, pinalagan din ni Defense Secretary Gilbert Teodoro Jr. ang pang-iinsulto ng China laban sa mga Pinoy. Aniya, hindi pasisiil ang bansa sa maling naratibo at ipagpapatuloy ang pagdepensa sa karapatan ng Pilipinas sa loob ng 200-nautical mile Exclusive Economic Zone (EEZ).
“This mockery of the lawful 2016 Arbitral Award and the video’s glorification of violence against the Filipino people and soldiers expose the moral and intellectual bankruptcy of China’s propaganda machine,” ani Teodoro, na binigyang-diin na panunuya sa legal na tagumpay ng Pilipinas ang naturang AI video. ( DARIS JOSE)
Cash aid sa 7.5 milyong mahihirap, low-income lalarga na
SISIMULAN na sa susunod na linggo ng Department of Social Welfare and Development (DSWD) ang pamamahagi ng ?2,000 cash assistance sa 7.5 milyong benepisyaryo ng pinalawak na Unified Package for Livelihoods, Industry, Food, and Transport (UPLIFT) na kinabibilangan ng poor, near-poor, at low-income households.
Ayon kay DSWD Secretary Rex Gatchalian, hinati sa tatlong grupo ang mga tatanggap ng ayuda. Ang Group 1 ay binubuo ng 3.5 milyong Filipino na naka-enrol sa Pantawid Pamilyang Pilipino Program (4Ps) at Walang Gutom Program (WGP).
Group 2 ay ang 2.5 milyong indibidwal na hindi kabilang sa 4Ps ngunit tinukoy na poor at near-poor batay sa 2024 Community-Based Monitoring System (CBMS) ng Philippine Statistics Authority (PSA).
Samantala ang Group 3 ay ang 1.5 milyong low-income Filipinos na may Social Security System (SSS) accounts.
Ani Gatchalian, agad na makakukuha ng ayuda ang Group 1 at Group 3 dahil ididiretso ito sa kanilang accounts. Para sa Group 2, magsisimula ang manual payout, validation, at enrollment ng digital accounts sa susunod na linggo.
Isang beses lamang makatatanggap ng ?2,000 ang mga benepisyaryo ng 4Ps at WGP, samantalang anim na buwan (Hulyo-Disyembre) makatatanggap ang mga near-poor at lower-middle-income households.
Binanggit ni Gatchalian na layon ng programa na protektahan ang mga pinakamadaling maapektuhan ng tinaguriang “energy emergency.” Base sa pag-aaral ng Philippine Institute for Development Studies (PIDS), nasa 14M Pinoy ang mahirap. ( DARIS JOSE)
PNP, pinaigting ang imbestigasyon sa pagpatay sa vlogger sa Caloocan
PINAIGTING ng Philippine National Police (PNP) ang imbestigasyon sa pagpaslang sa vlogger na si Alicia “Mima Alicia” Lapata na binaril sa harap ng kanyang bahay noong Biyernes ng madaling araw sa Caloocan City.
Ayon kay PNP Chief PGen. Jose Melencio C. Nartatez Jr., nais niya ang komprehensibong pagsisiyasat sa kaso kabilang ang anggulong posibleng may kaugnayan ang krimen sa pagiging aktibo ng biktima bilang political vlogger gayundin ang umano’y usapin sa pera.
Sinabi ni Nartatez na walang puwang ang karahasan sa malayang pamamahayag. Aniya, bagama’t magkakaiba ang paniniwala at opinyon ng bawat isa, pananagutan ng PNP na protektahan ang karapatang ito at tiyaking mapapanagot ang mga responsable sa krimen.
Tukoy naman na ng pulisya ang mga suspek na riding-in-tandem na bumaril sa biktimang si Lapata na sakay ng motorsiklo ang bumaril sa biktimang si Lapata, 25 at sa live-in partner nitong si alyas “Nellboy”, 25, sa harap ng kanyang bahay sa Tierra Nova sa Caloocan City. Inatasan din ang Anti-Cybercrime Group (ACG) na suriin ang mga post at iba pang nilalaman ng kanyang social media accounts na maaaring makatulong sa pagtukoy sa motibo at pagkakakilanlan ng mga suspek.
Pinatitiyak din ni Nartatez sa NCRPO ang seguridad ng partner ng biktima na patuloy na nagpapagaling sa ospital. Aniya, gagawin nila ang lahat upang matukoy at maaresto ang mga responsable sa krimen. Nabatid na tukoy na ng pulisya ang mga suspek. ( DARIS JOSE)