MARAPAT lamang na isama at palawakin ang maternity benefits ng mga kababaihang naghahanapbuhay sa kalye.

Ito ang pinanukala ni House Senior Deputy Minority Leader and Mamamayang Liberal (ML) Partylist Rep. Leila de Lima na naglalayong amyendahan ang Republic Act No. 11210 at isama sa coverage ng maternity benefits ang mga vendor o tindera na naglalako sa kalye o palengke, at mga nagtratrabaho sa mula sa informal economy.

Sa inihaing House Bill No. 9904 o “Maternity Benefit for Women in the Informal Economy Act,” sinundan ni De Lima ang Senate Bill No. 1579 ni Sen. Risa Hontiveros na bigyan ng one-time maternity cash benefit per delivery ang mga babaeng hindi miyembro ng Social Security System (SSS), katumbas ng 44 araw niyang kita, o batay sa daily minimum wage ng rehiyon kung saan siya naninirahan.

“Marami sa ating mga kababaihan ang marangal na naghahanapbuhay bilang mga street vendors, domestic helpers, mananahi, labandera, driver, micro-entrepreneurs at iba pang pagkakakitaan. Gayunpaman, ang kanilang mga pagsisikap at sipag sa pagbabanat ng buto ay hindi natutumbasan ng sapat na benepisyo at seguridad sa trabaho,” pahayag ni De Lima.

“Sa pagsasabatas ng panukalang ito, hangad po natin na walang ina na mapag-iiwanan at mapagkakaitan ng karapatan at nararapat na serbisyo sa kanilang pagdadalang-tao at pag-aruga sa kanilang mga anak,” dagdag ng kongresista. 

Ayon kay De Lima, manggagaling ang pondo mula sa excise taxes sa sweetened beverages, alcohol, tobacco products, heated tobacco products, at vapor products, at maari pang madagdagan pa ito mula sa General Appropriations Act (GAA). 

(Vina de Guzman)

PORMAL na inilunsad ng Pamahalaang Lungsod ng Navotas ang NavApp—ang opisyal nitong digital gateway na isang hakbang tungo sa mas mabilis, mas accessible, at mas responsive na serbisyo-publiko para sa lahat ng Navoteños.

Pinangunahan nina Mayor John Rey Tiangco at Congressman Toby Tiangco ang paglulunsad ng NavApp na ginanap sa Navotas Convention Center, bilang bahagi ng pagwawakas ng week-long na pagdiriwang ng ika-19th Navotas Cityhood Anniversary.

“Ang NavApp ay patunay ng ating pangako na gawing mas mabilis, mas maginhawa, at mas accessible ang serbisyo ng Pamahalaang Lungsod para sa bawat Navoteño,” ani Mayor Tiangco.

Sa pamamagitan aniya ng NavApp, mas madali nang makipag-ugnayan sa Pamahalaang Lungsod—mula sa pag-book ng appointments, pagbayad ng city transactions, pagproseso ng business permits, hanggang sa pagtanggap ng mahahalagang balita at anunsyo ang mga Navoteño.

Kung wala pang NavApp, i-download na ito at gumawa ng inyong NavoRehistro account para masimulan nang gamitin ang iba’t ibang serbisyo ng pamahalaang lungsod.

Maaaring i-download ang NavApp sa Apple App Store: https://apps.apple.com/ph/app/navapp-city-of-navotas/id6760896424 at

Google Play Store: https://play.google.com/store/apps/details?id=ph.ncg.navapp&pcampaignid=web_share

Pinasalamatan naman ng magkapatid na Tiangco ang lahat ng nakiisa sa paglulunsad ng NavApp kabilang ang mga konsehal ng lungsod, department heads, barangay officials, partners, at mga kawani ng pamahalaang lungsod. (Richard Mesa)