IPINAG-UTOS ni Pangulong Ferdinand Marcos Jr., sa Department of Transportation (DOTr) na agad na lutasin ang usapin hinggil sa long-standing right-of-way na dahilan ng pagkaantala para matapos na ang Light Rail Transit Line 1 (LRT-1) Cavite Extension project.

Giit ng Pangulo, hindi na dapat na nagtitiis pa ang commuting public sa konsikuwensya o resulta ng natigil na imprastraktura.

Sa katunayan, sinabi ni Presidential Communications Office (PCO) Undersecretary Claire Castro na inatasan ni Pangulong Marcos si Transportation Secretary Giovanni Lopez na madaliin ang resolusyon ng right-of-way concerns, kabilang na ang mga usapin na may kinalaman sa pinlanong Las Piñas Station.

“Nais ni Pangulong Ferdinand R. Marcos Jr. na matapos ang LRT-1 Cavite Extension para sa ikagiginhawa nang mas maraming mananakay,” ang sinabi ni Castro.

“Matagal na nakabinbin ang nasabing proyekto at hindi dapat ang taumbayan ang magdurusa sa pag-delay nito dahil lamang sa usapin ng right-of-way,” aniya pa rin.

Hangad kasi aniya ni Pangulong Marcos na matapos na ang proyekto sa lalong madaling panahon upang makapagbigay ng kaginhawaan sa mga mananakay

“Mabilisang pagtatapos ng proyekto ang nais ng Pangulo para sa ikagiginhawa ng taumbayan,” ang winika ni Castro.

Ang LRT-1 Cavite Extension ay inaasahan na magpapalawak sa umiiral na rail line na mas malayo sa southern Metro Manila at Cavite, mapahusay ang connectivity at mabawasan ang travel time para sa daan-daang libo na mga pasahero.

Ayon sa Malakanyang, ang LRT-1 Cavite Extension ay isang P64.9-billion project na ipinapatupad sa pamamagitan ng public-private partnership kabilang ang national government, the Japan International Cooperation Agency (JICA), at private concessionaire Light Rail Manila Corporation (LRMC).

Ang proyekto ay tinustusan sa pamamagitan ng official development assistance (ODA) mula Japan kasabay ng investments mula sa pribadong sektor.

Tinuran pa ni Castro na ang gobyerno ay hindi responsable para sa kasalukuyang pagkaantala at hinikayat ang lahat ng partido na sangkot na makipagtulungan para matapos ang proyekto.

“Hindi po gobyerno ang dahilan ng delay sa pag-usad ng proyektong ito, kaya sabay-sabay nating kalampagin ang iba pang stakeholders na makipagkaisa at makipagtulungan na huwag maging balakid sa mabilisang pagtatapos ng proyekto,” diing pahayag ni Castro.

Dapat aniyang mangibabaw ang kapakanan ng mga mananakay kaysa sa interest ng interests ng private entities o mga politiko.

“Ang dapat na mangibabaw ay ang interest ng mananakay at hindi ang interes ng ilang kumpanya o politiko,” ang sinabi ni Castro.

Sa kasalukuyan, ang LRT-1 ay nago-operate ng 25 stations, sa kahabaan mula Fernando Poe Jr. Station in Quezon City hanggang Dr. Santos Station sa Parañaque, kasunod ng pagbubukas ng first phase ng Cavite Extension noong November 2024.

Sa oras na ang buong Cavite Extension ay nakompleto na, ang tatlong istasyon gaya ng Las Piñas, Zapote, at Niog, may kabuuang bilang na LRT-1 stations sa 28. ( DARIS JOSE)

PINALAWAK pa ng pamahalaan ang mga umiiral na programang direktang tumutugon sa suliranin ng stunting o pagkabansot sa mga batang Pilipino. 

Ginawa ni Presidential Communications Office (PCO) Undersecretary at Palace Press Officer Claire Castro ang pahayag sa isang press briefing sa Malakanyang nang tanungin kung paano tinutugunan ng pamahalaan ang problema ng stunting sa kabila ng pagpapatupad ng iba’t ibang programa laban dito.

“Nakikita iyan kaya ini-expand ang programa, mas pinapahaba pa at mas dumadami pa ang mga benepisyaryo na mga kabataan,” ani Castro.

Kabilang sa mga programang kasalukuyang isinasagawa ang Food Stamp Program na inilunsad noong 2023, ang First One Thousand Days Program, at ang Supplementary Feeding Program na ipinatupad noong nakaraang taon, na pawang naglalayong labanan ang stunting.

Ayon kay Castro, alam ni Pangulong Ferdinand R. Marcos Jr., ang problema sa stunting kaya’t naglunsad siya ng iba’t ibang inisyatiba noong nakaraang taon tulad ng pagtatatag ng mga child development center at daycare center.

Dagdag pa niya, ipinatutupad din ng Department of Education (DepEd) ang School-Based Feeding Program para sa taong 2026–2027 na pinaglaanan ng pondong PhP25.6 bilyon upang matugunan ang kagutuman sa mga mag-aaral na Pilipino.

“Ang mabebenepisyuhan nito ay aabot sa 4.63 million learners nationwide at mas pinahaba na ang araw para sila ay makatanggap ng masustansiyang pagkain. Aabot na sa 200 days, mas mahaba po kumpara sa nakaraang taon na 120 days,” paliwanag ni Castro.

“At ang mabibiyayaan nito para sa universal feeding ay ang Kinder to Grade 1 at ang mga undernourished learners naman para sa Grade 2 to Grade 6 kasama na rin ang pregnant adolescent learners, vulnerable and marginalized students na beyond Grade 6.”

Bukod dito, ipinatutupad din ng Department of Social Welfare and Development (DSWD) ang Walang Gutom Program at Supplemental Feeding Program na nakatuon sa 1.8 milyong batang naka-enrol sa mga child development center na pinatatakbo ng mga lokal na pamahalaan.

“Ito ay sa buong bansa ipapatupad ng DSWD. So, dito naman, 180 feeding days ang maibibigay natin sa mga tatlo hanggang limang taong mga bata,” dagdag pa ni Castro.

Sa datos, umabot sa mahigit 20 porsiyento ang kaso ng stunting sa mga batang Pilipinong wala pang limang taong gulang noong nakaraang taon, na nakaaapekto sa isa sa bawat apat na bata.

Ang stunting ay isang kondisyon kung saan hindi sapat ang paglaki at pag-unlad ng mga bata dahil sa kakulangan sa nutrisyon, kakulangan ng angkop na psychosocial stimulation, at madalas na pagkakasakit o impeksiyon. (DARIS JOSE)

ITO ang naging reaksyon ni Akbayan Partylist Rep. Perci Cendaña kaugnay sa depensa ng kampo ni Vice President Sara Duterte na “freedom of expression” ang kanyang pagbabantang asasinasyon laban kina Pangulong Bongbong Marcos, First Lady Liza Marcos at dating Speaker Ferdinand Martin Romualdez.

“Baliko na talaga ang pag-iisip ni VP Sara. Only consistent corrupt lawbreakers will call threatening the life of another person as freedom of expression. Totoo nga, when you are accustomed to impunity, justice feels like oppression. Pag nasanay kang hindi sinisita tuwing nananakot ng kapwa o nangungulimbat ng pera ng bayan, nagmimistulang pang-aagrabyado ang pagpapanagot sa mga kasalanan mo,” pahayag ni Cendaña.

Ang pagbabanta umano ay ginawa sa isang live video noong November 2024.

Bukod sa freedom of expression, tugon pa ng kampo ng VP na confidentiality ng bank records at Anti-Money Laundering Council reports, at kakulangan ng supisyenteng ebidensiya sa apat na articles of impeachment laban sa nasabing opisyal.

(Vina de Guzman)

PINATAWAN ng Land Transportation Franchising and Regulatory Board (LTFRB), sa pamumuno ni DOTr Secretary Giovanni “Banoy” Z. Lopez, ng 30-araw na preventive suspension ang isang electric vehicle (EV) taxi matapos masangkot ang driver nito sa isang viral robbery prank na isinagawa kasama ang dalawang vlogger.

Ayon kay LTFRB Chairman Atty. Vigor D. Mendoza II, mananatiling suspendido ang operasyon ng naturang taxi habang isinasagawa ng ahensya ang imbestigasyon.

“Hindi ito nakakatuwa. Sa halip, naghahatid ito ng takot sa ating mga kababayan na regular na sumasakay ng taxi at TNVS. We will look into this and we assure that appropriate disciplinary measures will be done,” ani Chairman Vigor.

Naglabas din ang LTFRB ng show cause order (SCO) laban sa Green and Smart Mobility Philippines, Inc., ang operator ng EV taxi, matapos maakusahan ang driver na nakipagsabwatan sa dalawang vlogger upang isagawa ang naturang prank.

Sa viral na video, inanunsyo ng driver ang umano’y holdap bago sumakay ang dalawang vlogger na nagpanggap na mga holdaper.

Ayon kay Chairman Vigor, nagdudulot ito ng takot sa publiko at maling impresyon na hindi ligtas ang pampublikong transportasyon sa bansa.

Aniya, lalo itong nakababahala dahil kasalukuyan ring iniimbestigahan ng LTFRB ang dalawang taxi driver na umano’y nangholdap sa dalawang dayuhang modelo na bumisita sa bansa noong Hunyo 13 para sa isang fashion show.

Binigyang-diin ni Chairman Vigor na malinaw itong paglabag sa obligasyon ng mga PUV na magbigay ng ligtas at maayos na serbisyo sa publiko.

Nanawagan din siya sa mga operator at driver ng public utility vehicles (PUVs) na makiisa sa pagpapanumbalik ng tiwala at kumpiyansa ng publiko sa pampublikong transportasyon. (PAUL JOHN REYES)