SINABI ni Caloocan Second District Representative Edgar “Egay” Erice na ang anumang panukala para sa Liberal Party na pumasok sa isang political alliance sa administrasyong Marcos ay hindi naaayon sa mga pangunahing prinsipyo ng partido maliban na lang kung tutugunan muna ng administrasyon ang inilarawan niyang pinakamalaking diumano’y iskandalo sa katiwalian sa kasaysayan ng Philippine national budget at infrastructure program.

“The Liberal Party has always stood for transparency, accountability, and good governance. We cannot abandon these principles for the sake of political convenience,” ani Erice.

Ayon kay Erice, hindi pa rin nasasagot ang mga seryosong katanungan hinggil sa umano’y malakihang manipulasyon sa badyet na kinasasangkutan ng flood control at iba pang proyektong pang-imprastraktura, na pinaniniwalaan niyang nagresulta sa pagkawala ng trilyong piso sa pondo ng publiko sa pamamagitan ng mga ghost project, substandard infrastructure, at kuwestiyonableng budget reallocations.

“What makes this issue even more compelling is that President Ferdinand Marcos Jr. himself was the first to publicly raise concerns about irregularities in flood control projects. He promised to determine the truth and hold accountable those responsible. Unfortunately, despite those commitments, the Filipino people have yet to see a comprehensive accounting of what actually happened or who has been held responsible,” dagdag niya.

Sa halip na ganap na transparency, sinabi ni Erice na nasaksihan ng publiko ang pag-aaway sa pulitika, pagturo ng daliri, at mga pagsisikap na, sa kanyang pananaw, ay nagpapahina sa tiwala ng publiko sa mga demokratikong institusyon, kabilang ang Kongreso.

Nagpahayag din siya ng pagkabahala sa inilarawan niyang paggamit ng mga institusyon ng gobyerno para sugpuin ang hindi pagsang-ayon.

“There is a growing perception that institutions such as the Ombudsman and the National Bureau of Investigation have been used not only to conceal the truth but also to harass critics of the administration. Whether these concerns are justified can only be answered through independent, impartial, and credible investigations,” giit niya.

Binigyang-diin ni Erice na ang pagkakakilanlan ng Liberal Party ay palaging nakaugat sa pagtatanggol sa demokrasya at panuntunan ng batas. (Richard Mesa)

INARESTO ng Fugitive Search Unit (FSU) ng Bureau of Immigration (BI) ang isang South Korean na pinaghahanap dahil sa pagtakas mula sa isang kulungan sa Leyte.

Kinilala ni BI Commissioner Joel Anthony Viado ang suspek na si Gim Sihun, 31 taong gulang na inaresto sa kahabaan ng Doña Julia Vargas Avenue sa Lungsod ng Mandaluyong.

Isinagawa ang operasyon sa pakikipag-ugnayan sa Presidential Anti-Organized Crime Commission (PAOCC) at Philippine National Police Intelligence Group (PNP-IG).

Natapos sa pag-aresto kay Gim ang tatlong taong pagtugis sa kanya matapos siyang makatakas mula sa kustodiya ng Sub-Provincial Jail sa Barangay Loyonsawang, Abuyog, Leyte noong 2023.

Bago siya muling madakip, kabilang siya sa sampung pangunahing Koreanong pugante na prayoridad na hinahanap ng pamahalaan ng South Korea.

May umiiral na warrant of arrest laban sa kanya na inilabas ng Seoul Central District Court dahil sa kasong pandaraya (fraud), isang paglabag sa batas kriminal ng South Korea.

Saklaw din siya ng isang summary deportation order na inilabas noong 2020, kung saan siya ay idineklarang isang hindi kanais-nais na dayuhan (undesirable alien) dahil sa kanyang pagiging pugante.

 (Gene Adsuara)

UMABOT sa mahigit P.4 milyong halaga ng shabu ang nasamsam sa isang drug suspect na itinuturing bilang High Value Individual (HVI) matapos maaresto ng pulisya sa buy bust operation sa Valenzuela City, Huwebes ng umaga.

Sa kanyang ulat kay Northern Police District (NPD) Acting Director P/BGen. Benliner Capili, kinilala ni Valenzuela Police Chief P/Col. Jospeh Talento ang suspek na si alyas “Junie”, 42, ng 3rd Avenue, Brgy., 120, Caloocan City.

Ayon kay Col. Talento, ikinasa ng mga operatiba ng Station Drug Enforcement Unit (SDEU) sa pangunguna ni P/Lt. Sherwin Dascil ang buy bust operation sa koordinasyon sa PDEA nang magawang makipagtransaksyon kay alyas Junie ng isa sa mga operatiba.

Nang matanggap ang signal mula sa kanyang kasama na nagpanggap na poseur buyer na hudyat na positibo na ang transaksyon, kaagad lumapit ang back-up na operatiba at inaresto ang suspek dakong alas-6:35 ng umaga sa Karuhatan Public Cemetery sa Padrigal St., Brgy., Karuhatan.

Nakumpiska sa suspek ang humigi’t kumulang 60 grams ng hinihinalang shabu na may standard drug price value na P408,000, buy bust money na binubuo ng isang tunay na P500 bill at pitong P1,000 boodle money, coin purse at P250 cash.

Ani SDEU investigator PMSg Ana Liza Antonio, nakatakdang sampahan nila ng kasong paglabag sa Sections 5 at 11 ng R.A 9165 (Comprehensive Dangerous Drug Act of 2002) sa Valenzuela City Prosecutor’s Office sa pamamagitan ngInquest Proceedings. (Richard Mesa)

PINANGUNAHAN nina Mayor John Rey Tiangco at Congressman Toby Tiangco ang pormal na paglulunsad ng NavApp—ang opisyal na digital gateway ng Pamahalaang Lungsod ng Navotas na isang hakbang tungo sa mas mabilis, mas accessible, at mas responsive na serbisyo-publiko para sa lahat ng Navoteño, bilang bahagi ng pagwawakas na week-long selebrasyon ng ika-19th Navotas Cityhood Anniversary. (Richard Mesa)

LABIS na nalungkot si Pangulong Ferdiand Marcos Jr., sa dalawang sunud-sunod na malalakas na lindol na yumanig sa Venezuela, Hunyo 24, 2026.

“On behalf of the Filipino people, I extend our heartfelt sympathies,” ayon kay Pangulong Marcos.

Sinabi ni Pangulong Marcos, ang Pilipinas ay naninindigan sa pagkakaisa kasama ang 𝘝𝘦𝘯𝘦𝘻𝘶𝘦𝘭𝘢𝘯 people sa napakahirap na panahon at umaasa para sa ligtas at mabilis na pagbangon ng lahat ng komunidad na apektado.

Nauna rito, ayon sa United States Geological Survey, ang unang lindol ay may magnitude na 7.1 at kasunod ang mas malakas na 7.5 makalipas lamang ng isang minuto.

Ang episentro ay malapit sa Morón sa estado ng Carabobo at naramdaman hanggang sa kabisera na Caracas.

Maraming gusali ang gumuho kabilang ang ilang matataas na gusali sa Caracas at libo-libong residente ang nagtakbuhan palabas ng kanilang mga tahanan at opisina.

Nagbabala ang USGS na posibleng lumampas sa 10,000 ang bilang ng nasawi habang libo-libo ang sugatan at patuloy ang operasyon ng mga rescuers upang mailigtas ang mga na-trap sa guho.

Naapektuhan ang Maiquetía International Airport kung saan pansamantalang sinuspinde ang mga flight at nagkaroon ng malawak na pagkawala ng kuryente at komunikasyon sa iba’t ibang rehiyon.

Naglabas ng babala ang US Tsunami Warning System para sa ilang bahagi ng Caribbean ngunit kalaunan ay binawi.

Nanawagan si Interior Minister Diosdado Cabello sa publiko na umiwas sa mga gusaling nasira at mag-ingat sa posibleng aftershocks. Patuloy ang search and rescue operations sa Caracas at mga karatig-lalawigan upang mailigtas ang mga biktima. ( DARIS JOSE)