2026 June 22 Archive - People's Balita

Archive for June 22nd, 2026

No work, no pay sa mga matataas na opisyal ng gobyerno isinusulong sa Senado

Posted on: June 22nd, 2026 by Francis Paolo Torres No Comments

ISINUSULONG ngayon sa Senado ang panukalang batas na naglalayong hindi pagkalooban ng sahod ang mga matataas na opisyal ng gobyerno sa mga araw ito ay absent nang walang malinaw na paliwanag.

Saklaw sa panukala ang Pangulo, bise-Presidente, senador, congressman, mga halal na opisyal, cabinet secretaries at mga department heads.

Nakasaad din rito ang hindi pagbibigay ng mga allowances sa mga opisyal na absent na walang maayos na abiso sa pagliban.

Ayon kay Senator Erwin Tulfo na sponsor ng panukalang batas, nakasanayan na umano ng mga matataas na opisyal na walang sumisita na sumasahod kahit absent. Nakakahiya aniya na mga ordinaryong manggagawa ng gobyerno na walang sahod pag absent.

Binigyang-diin ng Senador na dapat pantay-pantay umano ang polisya sa no work, no pay. Ordinaryong manggagawa o maging matataas na opsiyal man.

Kasunod nito, kinilala ni Tulfo ang boluntaryong pagpapatigil ni Sen. Jinggoy Estrada sa kaniyang sahod noong arestuhin ito.

Samantala, matatandaan na naging sentro ng usapin ang no work, no pay dahil sa matahal na pagliban ni Sen. Ronald “Bato” dela Rosa ngunit patuloy na tumagtanggap ng kaniyang sahod. ( DARIS JOSE)

Alex Eala bigong makapasok sa finals ng Berlin Open

Posted on: June 22nd, 2026 by Francis Paolo Torres No Comments

NATAPOS na ang kampanya ni Pinay tennis star Alex Eala sa Berlin Open.

Ito ay matapos na talunin siya ni Linda Nosková ng Czech Republic sa semifinal round sa score na 2-6, 4-6.

Naging agresibo sa unang set pa lamang si Noskova kung saan nakuha nito ang kalamanagan na 3-1.

Sa ikalawang set ay sinubukan pa ni Eala na talunin ang ranked 13 player subalit ito ay mailap.

Ang nasabing laro ay bahagyang naantala ang pagsisimul dahil sa pagbuhos ng malakas na pag-ulan.

Makakaharap naman ni Noskova sa finals si Jessica Pegula.

Germany, tinalo ang Ivory Coast sa isang comeback game

Posted on: June 22nd, 2026 by Francis Paolo Torres No Comments

KUMAWALA mula sa mabigat na first half ang Germany at umiskor ng late comeback upang talunin ang Ivory Coast, 2-1, sa nagpapatuloy na World Cup competition

Matagal na na-outplay ang Germany sa unang bahagi ng laban at naiwan pa sa iskor matapos ang goal ni Franck Kessie sa ika-10 minuto ng laro paara sa Ivory Coast.

Sa kabila ng kontrol ng kalaban sa possession at tempo, nanatiling buhay ang Germany hanggang sa second half kung saan nagsimulang gumalaw ang bench strength ni coach Julian Nagelsmann. Pinasok ang ilang fresh players, kabilang si Deniz Undav, at dito unti-unting nagbago ang direksyon ng laro.

Nagpakita ng agarang epekto si Undav nang makapantay sa ika-68 minuto matapos ang long pass ni Nadiem Amiri, bago tuluyang tapusin ang comeback sa stoppage time sa isang clinical finish mula sa assist ni Felix Nmecha.

Dahil sa dalawang goals ni Undav, nakuha ng Germany ang mahalagang panalo at kinumpirma ang kanilang puwesto sa knockout stage.

Aminado ang German camp na hindi naging madali ang laban, ngunit binigyang-diin ang character at depth ng squad na nagbigay ng panalo kahit galing sa bench ang naging game-changer.

Ang resulta ay nagpalawig pa sa impressive run ng Germany, na patuloy na nagpapakita ng consistency sa kanilang kampanya matapos ang mga nakaraang World Cup disappointments.

Para sa Ivory Coast, nauwi sa sayang na pagkakataon ang maagang kalamangan habang bigo pa rin silang makuha ang unang knockout stage qualification sa kasaysayan ng kanilang kampanya.

Ads June 22, 2026

Posted on: June 22nd, 2026 by Francis Paolo Torres No Comments

Ads June 20, 2026

Posted on: June 22nd, 2026 by Francis Paolo Torres No Comments

2 drug suspects, kulong sa higit P.4M droga sa Caloocan

Posted on: June 22nd, 2026 by Francis Paolo Torres No Comments

SHOOT sa selda ang isang tulak na itinuturing bilang High Value Individual (HVI) at kasabwat nito matapos makuhanan ng mahigit P.4 milyong halaga ng shabu nang maaresto sa buy bust operation sa Caloocan City.

Sa kanyang ulat kay Northern Police District (NPD) Director Benliner Capili, kinilala ni Caloocan Police Chief P/Col. Joey Goforth ang mga nadakip na sina alyas “Prince”, 24, (HVI) at alyas “Aljon”, 34, kapwa ng residente ng Brgy., 36.

Batay sa ulat, ikinasa ng mga operatiba ng Station Drug Enforcenent Unit (SDEU) sa pangunguna ni P/Lt. Restie Mables ang buy bust operation sa koordinasyon sa PDEA nang magawa ng isa sa kanyang mga tauhan na makipagtransaksyon kay alyas Prince.

Isinagawa umano ang transaksyon sa bahay ni alyas Prince sa C. Name St. Brgy., 36, na nagresulta sa pagkakaaresto sa kanya at sa kasabwat na si ‘Aljon’ dakong alas-5:13 ng hapon nang bintahan ng P6,500 halaga ng shabu ang isang pulis na nagpanggap na buyer.

Bukod sa 64.97 gramo ng shabu na nagkakahalaga ng P441,796.00 na nakumpiska sa dalawa, nakuhanan pa sila ng isang plastic sachet na naglalaman ng 14.76 gramo ng marijuana kush na nagkakahalaga ng P20,664.00 at buy bust money na binubuo ng isang tunay na P500 bill at anim na P1,000 boodle money.

Mahaharap ang mga suspek sa kasong paglabag sa Sections 5 at 11 ng R.A.916 o ang Comprehensive Dangerous Drug Act sa Caloocan City Prosecuto’s Office.

Ayon kay Gen. Capili, ang matagumpay na operasyon ay bahagi ng pangako ng NPD na paigtingin ang laban sa ilegal na droga upang matiyak ang mas ligtas na mga komunidad at protektahan ang publiko mula sa mga mapaminsalang epekto ng ilegal na droga. (Richard Mesa)

NHA, NAMAHAGI NG ₱49.2-M AYUDA SA MGA BIKTIMA NG LINDOL SA MINDANAO

Posted on: June 22nd, 2026 by Francis Paolo Torres No Comments

PATULOY na pinaiigting ng National Housing Authority (NHA) ang mga hakbang nito upang matulungan ang mga pamilyang naapektuhan ng lindol na tumama kamakailan sa Mindanao sa pamamagitan ng pagpapatupad ng Emergency Housing Assistance Program (EHAP) noong Hunyo 18, 2026.

Personal na pinangunahan ni NHA General Manager Joeben A. Tai ang pamamahagi ng EHAP sa Oval Plaza, General Santos City, upang mapakinabangan ng nasa 1,340 pamilya. Ang bawat pamilya ay tumanggap ng tig-₱30,000 na umaabot sa ₱40,200,000.

Pinangasiwaan din ni GM Tai ang EHAP payout sa Glan Central Integrated SPED Center, Brgy. Poblacion, Glan, Sarangani Province, kung saan 300 apektadong pamilya ang nakatanggap ng ₱30,000 bawat isa, na sumuma sa ₱9,000,000.

“Sa direktiba ng ating mahal na Pangulong Ferdinand “Bongbong” Marcos Jr., ang NHA po ay may nakalaang pondo para sa EHAP upang makapaghandog kami ng tulong pinansyal sa mga naging biktima ng sakuna at kalamidad. Ito po ay para makatulong kami sa kanilang pagbangong muli at mabigyan sila ng pag-asa sa buhay,” wika ni GM Tai.

Ang nasabing proyekto, na bahagi ng NHA Resettlement Assistance Program for Local Government Unit (RAP-LGU), ay binubuo ng 80 housing units para sa mga dating Informal Settler Families (ISFs) na naninirahan sa mga mapanganib na lugar.

“With this groundwork na ginawa namin, we are continuously doing our best to work hand in hand with our local governments, most especially with the mayors of the affected cities. These collaborations aim to intensify yung kagustuhan namin to provide the immediate needs ng mga biktima ng lindol, pati na rin ang tulong para sa kanilang mga kabahayan,” dagdag ni GM Tai.

Bago ito, nagpatupad din ang NHA ng isang buwang moratorium sa amortization at lease payments para sa mga existing account holders mula sa Regions 9,10,11,12, at 13 mula Hunyo 1-30, 2026, kasunod ng direktiba ni Department of Human Settlements and Urban Development (DHSUD) Secretary Jose Ramon P. Aliling.

Nakasama ni GM Tai sa mga aktibidad na ito sina NHA XII Regional Manager Engr. Zenaida M. Cabiles, General Santos City/Koronadal/South Cotabato/Sarangani District Manager Engr. Fritzie M. Punzalan, General Santos City Mayor Lorelie G. Pacquiao, General Santos City, Sarangani Governor Rogelio D. Pacquiao na kinatawan ni Atty. Kareen Joy Solaria, Glan Mayor Victor James B. Yap, Sr., DHSUD XII OIC Regional Director Benleo T. Jarangue, OCD XII Regional Director na kinatawan ni G. Jerome Barranco, at iba pang lokal na opisyal.

Muling pinagtitibay ng NHA ang pangako nito sa pagtiyak ng napapanahon at mabilis na paghahatid ng tulong sa mga pinaka-apektadong pamilya at pinakamalalayong komunidad tungo sa kanilang pagsisimulang muli.

(PAUL JOHN REYES)

Dengue ngayong taon bumaba ng 56 percent – DOHBUMABA ng 56% ang mga kaso ng dengue sa bansa mula Enero hanggang Mayo ngayong taon, kumpara sa naitalang mga kaso sa parehong panahon noong 2025, ayon sa Department of Health (DOH).

Posted on: June 22nd, 2026 by Francis Paolo Torres No Comments

Naitala ang 50,727 kaso ng dengue sa unang limang buwan ng taon na mahigit sa kalahati ang ibinaba mula sa 114,308 na naitala sa kaparehong mga buwan noong nakalipas na taon.

Naniniwala ang DOH na malaking tulong sa pagbaba ng mga kaso ang paglilinis ng mga komunidad na “4Ts” o “Taob, Taktak, Tuyo, at Takip,” para mawalan ng pinamumugaran at pinangingitlogan ang mga lamok.

Kabilang din ang pagsusuot ng pantalon, long sleeves, medyas at sapatos, at paggamit ng kulambo at mosquito repellent para makaiwas na makagat ng lamok.

Pinayuhan din ng DOH ang publiko na agad na magpakonsulta sakaling makaramdam ng mga sintomas na mataas na lagnat, rash, nausea, pagsusuka, pananakit ng tiyan, pananakit ng katawan at mata, at pagdurugo ng ilong.

Una nang nagpaalala ang DOH ngayong tag-ulan na ingatan ang sarili laban sa “W.I.L.D” diseases o waterborne diseases, influenza-like illnesses, leptospirosis, at dengue.

Unang Ginang Liza nagpahatid ng Father’s Day tribute kay PBBM sa pamamagitan ng executive order

Posted on: June 22nd, 2026 by Francis Paolo Torres No Comments

BINATI ni Unang Ginang Liza Araneta-Marcos si Pangulong Ferdinand Marcos Jr., ng Father’s Day sa pamamagitan ng isang “Official Presidential Father’s Day Executive Order.”

Sa kanyang social media post, sinabi nito na bilang isang Ama, dapat ay nagpapahinga ngayon si Pangulong Marcos at “no stressful meetings.”

“The President tirelessly attends to the affairs of the nation while also fulfilling the responsibilities of fatherhood; therefore, a period of well-deserved rest shall be observed on Father’s Day,” ayon sa Unang Ginang.

“Father’s Day is a special occasion dedicated to family, gratitude, and quality time with loved ones; therefore, all non-essential meetings and stressful discussions shall be deferred for the day,” ang sinabi pa rin ng Unang Ginang.

Aniya pa, “dessert is a must,” lalo pa’t “every celebration worthy of the Office of the President deserves a sweet ending.

Ang “executive order” ay pinirmahan ng Unang Ginang at kanilang tatlong anak na sina Sandro, Simon, and Vincent.

(DARIS JOSE)

NDRRMC: Halos 1.6 milyon apektado ng magnitude 7.8 lindol sa Mindanao

Posted on: June 22nd, 2026 by Francis Paolo Torres No Comments

UMABOT na sa humigit-kumulang 1.59 milyong indibidwal ang apektado ng magnitude 7.8 na lindol na tumama sa ilang bahagi ng Minadanao noong Hunyo 8, ayon sa National Disaster Risk Reduction and Management Council (NDRRMC).

Ayon sa NDRRMC, apektado ang 1,599,350 katao o 375,664 pamilya mula sa 580 barangay sa Davao Region at SOCCSKSARGEN.

Sa naturang bilang, 22,109 katao ang nananatili sa mga evacuation center habang 63,351 naman ang nabigyan ng tulong sa labas ng mga evacuation site.

Kabilang rito ang isang kaso sa Glan, Sarangani na dating nakalista bilang parehong patay at nawawala ngunit kalaunan ay nakumpirmang pumanaw at tinanggal na sa listahan ng missing persons.

Nananatili namang 31 ang nawawala habang 1,339 ang sugatan batay sa pinakahuling datos.

Samantala, patuloy pa rin na mino-monitor ang pinsala sa imprastraktura kabilang ang 130 kalsada at 47 tulay na naapektuhan sa Davao Region at SOCCSKSARGEN, habang 47 lugar ang nakaranas ng power interruption na bahagi ay naibalik na ang suplay ng kuryente.

Tinatayang 68,511 bahay ang bahagyang nasira at 14,234 ang tuluyang nawasak sa Zamboanga Peninsula, Davao Region, SOCCSKSARGEN at Bangsamoro region.

Umabot naman sa ₱1.356 bilyon ang pinsala sa imprastraktura, habang nasa ₱318.66 milyon na ang naipamahaging ayuda mula sa Department of Social Welfare and Development (DSWD), Office of Civil Defense (OCD) at mga lokal na pamahalaan.

Ayon pa sa NDRRMC, mahigit 456,000 family food packs na ang naipamahagi sa mga apektadong rehiyon.

Habang iniulat naman ng Philippine Space Agency (PhilSA) ang mga landslide sa ilang bahagi ng Sarangani at Davao Occidental batay sa satellite images, na may tinatayang 137.87 ektaryang apektadong lugar dulot ng pagguho ng lupa matapos ang lindol.