UMABOT sa mahigit P.7 milyong halaga ng shabu ang nasamsam sa isang ginang na itinuturing bilang High-Value Individual (HVI) nang maaresto sa ikinasang buy bust operation ng pulisya sa Caloocan City.

Sa kanyang ulat kay Northern Police District (NPD) Acting Director P/BGen. Christopher Dela Cruz, sinabi ni Caloocan Police Chief P/Col. Joey Goforth na nakatanggap ng impormasyon ang mga operatiba ng Station Drug Enforcement Unit (SDEU) hinggil umano’y illegal drug activities ng 40-anyos na ginang.

Nang positibo ang ulat, kaagad bumuo ng team si P/Lt. Restie Mables, hepe ng SDEU bago ikinasa ang buy bust operation laban sa suspek sa koordinasyon sa PDEA.

Kaagad inaresto ng mga operatiba ng SDEU ang suspek matapos umanong tanggapin ang marked money mula sa katransaksyon na pulis na nagpanggap na buyer kapalit ng isang plastic sachet ng shabu sa Brgy., 178, ng lungsod.

Nakumpiska sa suspek ang humigi’t kumulang 103.2 grams ng suspected shabu na may estimated standard drug price na P701,760.00 at buy bust money na binubuo ng isang tunay na P500 bill at 12-pirasong P1,000 boodle money.

Nakatakdang sampahan ang suspek ng kasong paglabag sa Sections 5 at 11 ng R.A 9165 (Comprehensive Dangerous Drugs Act of 2002).

Pinuri naman ni Gen. Dela Cruz ang arresting team sa kanilang matagumpay na operation na binibigyang-diin na ang NPD ay nananatiling matatag sa pagpapaigting ng kampanya laban sa ilegal na droga para matiyak ang mas ligtas na komunidad. (Richard Mesa)

SINABI ni Pangulong Ferdinand R. Marcos Jr. na isa sa binabantayan ng gobyerno ay ang posibleng epekto ng remittances na ipinadadala ng mga Overseas Filipino Workers (OFWs) sa kanilang mga kaanak sa Pilipinas.

Binigyang diin ni Pangulong Marcos na maliban sa security at diplomatic concerns, naghahanap din ng paraan ang gobyerno para pangalagaan ang tuluy-tuloy na daloy ng dolyar na nagpapanatili ng milyun-milyong sambahayan ng mga Pilipino.
“The other areas that we look into are what will be the effect on the remittances because this is something that will affect the families of those who are remitting funds from our workers in this part of the world,” ayon kay Pangulong Marcos.
Winika pa ng Pangulo na nag-host ang Gulf ng pinakamalaking concentrations ng overseas workers ng bansa, dahilan para ang rehiyon ay maging ‘key source’ ng remittance inflows.
“Karamihan ng remittances natin ay talaga diyan galing at ‘yan ang pinakamalaking working group natin na nandoon. Hindi nila kasama ang pamilya nila, kung hindi nagre-remit ng pera dito sa Pilipinas,” ang sinabi ng Pangulo.
Inilarawan naman ng Pangulo ang situwasyon bilang isang “a bit of a mixed bag,” sabay sabing nananatiling mahirap i-quantify ang overall impact sa yugtong ito.
Samantala, ang insiyal na report na nakarating sa Malakanyang ay nagpapahiwatig na maraming filipino sa Gulf ang patuloy na nagtatrabaho sa kabila ng pabago-bagong kapaligiran.
Sa pagtataya ng Pangulo, lumalabas na 80 hanggang 85% ng OFWs sa rehiyon at nananatiling nagre-report sa kanilang trabaho, may iba naman ang lumipat na sa work-from-home arrangements.
“Sinasabi nila, ang report nila sa amin, nagtatrabaho pa rin sila, na pumapasok pa rin sila. Kung hindi sila makapasok, mayroon silang mga work from home,” ayon sa Pangulo, sabay sabing ang patuloy na pagtatrabaho ay makatutulong na mapagaan ang anumang agarang pagbagsak sa mga remittance.
( Daris Jose)

TINUPOK ng apoy ang isang bodegang imbakan at pagawaan ng solvent makaraang sumiklab ang sunog, Lunes ng hapon sa Valenzuela City.

Dakong alas-2:37 ng hapon nang ilagay ng
Valenzuela Bureau of Fire Protection (BFP) sa unang alarma ang sunog sa warehouse na nasa Cabral St. Brgy. Maysan at kaagad na itinaas sa ikalawang alarma makaraan ang 11-minuto.

Para maiwasang madamay ang mga katabing bodega, itinaas sa ikatlong alarma ang sunog bago ideniklarang under control alas-4:00 ng hapon at tuluyang naapula bandang alas-4:23.

Isa naman sa mga kawani ng bodega ang iniulat na nasugatan na kaagad na naisugod sa pagamutan habang ligtas na nakalabas ang iba pang trabahador

Aminado ang BFP na nahirapan silang apulahin ang apoy dahil bukod sa madaling mag-apoy ang mga nakaimbak na solvent sa bodega, malayo pa ang fire hydrant sa lugar na pinagkukuhanan nila ng tubig.

Nagsasagawa pa ng masusing imbestigasyon ang mga arson investigators upang alamin ang sanhi ng sunog at kung magkano ang halagang natupok ng apoy. (Richard Mesa)

PINAPURIHAN ni Speaker Faustino “Bojie” G. Dy III ang pagkaka apruba ng House Committee on Suffrage and Electoral Reforms sa consolidated Anti-Political Dynasty bill para sa second-degree prohibition.

“For nearly four decades, the Constitution has directed Congress to prohibit political dynasties. Today, we move closer to fulfilling that mandate,” ani Dy.

Ipinasa ng komite na pinamumunuan ni Lanao del Sur Rep. Zia Alonto Adiong, ang House Bill No. 6671, na inihain nina Speaker Dy at House Majority Leader Ferdinand Alexander “Sandro” Marcos, bilang draft ng pinagsama-samang panukala.

Sa inaprubahang bersyon, ipagbabawal ang political dynasties hanggang second degree of consanguinity or affinity.

Sakop nito ang pagbabawal para sa “mayor-and-vice mayor spouses, siblings serving simultaneously as senators, and a father serving as governor while a child serves as a provincial board member in the same province.”

Ang second-degree coverage ay bunga ng ginawang konsultasyon sa Luzon, Visayas at Mindanao, kung saan natalakay ang mga isyu ukol sa implementasyon nito.
(Vina de Guzman)

AGAD na nagpatupad si Manila City Mayor Francisco “Isko” Moreno Domagoso ng 50 porsiyentong pagbawas sa konsumo ng gasolina sa operasyon ng pamahalaang lungsod bilang paghahanda sa inaasahang pagtaas ng presyo at kakulangan sa langis na dulot ng epektibong pagsasara ng Strait of Hormuz at lumalalang sigalot sa Iran.

Sa ilalim ng Executive Order No. 7, series of 2026 na nilagdaan noong Lunes, Marso 2, sinabi ni Domagoso na ang “patuloy na armadong tunggalian sa Middle East at ang Operation Epic Fury (ang pinagsanib na opensiba ng US at Israel laban sa Iran) ay posibleng magdulot ng matinding pag-uga sa pandaigdigang merkado ng langis, pagkaantala ng suplay, at pagtaas ng presyo ng krudo na may masamang epekto sa pambansa at lokal na ekonomiya pati na sa pananalapi ng Lungsod ng Maynila.”

“Ipinahayag ng Iran ang blockade sa Strait of Hormuz, kaya’t pisikal na nahaharangan ang daloy ng 20% ng suplay ng langis sa buong mundo,” dagdag ng alkalde.

“Kinakailangang kumilos ang pamahalaang lungsod ng Maynila upang mapangalagaan ang pondo ng bayan, mapanatili ang mahahalagang serbisyo publiko, at mabawasan ang epekto ng kakulangan at pagtaas ng presyo ng gasolina sa pamamagitan ng agarang hakbang sa pagtitipid,” aniya.

Sa direktiba, inatasan ang lahat ng departamento, kawanihan, at tanggapan ng lungsod na magpatupad ng hindi bababa sa 50% na pagbawas sa paggamit ng gasolina, kabilang ang sa mga sasakyang de-motor, generator, heavy equipment, at iba pang kagamitang gumagamit ng fuel na pag-aari, inuupahan, o pinatatakbo ng lungsod.

Hinimok din ang mga tanggapan na i-optimize ang mga ruta ng sasakyan, pagsamahin ang mga delivery, at bawasan ang hindi kailangang biyahe.

Kabilang sa agarang ipinatutupad ang pagbabawal sa lahat ng hindi mahalagang paglalakbay ng mga opisyal at kawani ng lungsod.

Ang “Non-essential Travel” ay tumutukoy sa mga biyahe na maaaring ipagpaliban, palitan ng virtual meeting, o iwasan nang hindi naaapektuhan ang serbisyo publiko.

Sinuspinde rin ang lahat ng “lakbay-aral” at mga biyahe sa ibang bansa maliban kung itinuturing na kritikal sa operasyon ng lungsod.

Inatasan ang mga tanggapan ng lungsod—maliban sa mga ospital at pasilidad pangkalusugan—na magpatupad ng pagtitipid sa kuryente, kabilang ang pagpatay ng suplay ng kuryente pagsapit ng alas-5 ng hapon. Ang mga pagpupulong sa 896 barangay ng Maynila, 44 na health center, pitong ospital, at mga district satellite office ay isasagawa online.

Ang mga seremonya ng pagtatapos sa lahat ng pampublikong elementarya at sekondaryang paaralan ay gagawin na lamang sa kani-kanilang kampus upang mabawasan ang biyahe at gastusin ng mga pamilya.

Pinahihintulutan din sa kautusan ang staggered shifts, compressed workweek, at work-from-home arrangements kung maaari, at inaatasan ang pagbawas sa hindi mahalagang ilaw at pagsasaayos sa heating, ventilation, at air-conditioning systems sa mga pasilidad ng lungsod.

Hindi saklaw ng mga restriksyon ang mga operasyong pang-emergency tulad ng pulisya, bumbero, at ambulansiya; serbisyong pangkalusugan at disaster risk reduction; koleksyon at paghakot ng basura; pamamahala ng trapiko; at iba pang serbisyong itinuturing na mahalaga ng alkalde.

Ang mga lalabag sa mga patakaran sa biyahe at paggamit ng gasolina ay sasailalim sa administratibong imbestigasyon at posibleng mapatawan ng parusa alinsunod sa civil service rules, kabilang ang suspensyon ng fuel privileges at iba pang kaparusahan.

Agad na ipatutupad ang kautusan at mananatiling epektibo hanggang sa ideklara ng alkalde na bumalik na sa normal ang kondisyon ng suplay ng gasolina.
(Gene Adsuara)