INAMIN ni Pangulong Ferdinand Marcos Jr., na delikado na pauwiin ang 1,416 Filipino na nag-request ng repatriation sa gobyerno ng Pilipinas sa gitna ng matinding tensyon at nagpapatuloy na giyera sa Gitnang Silangan.

Sa press conference sa Kalayaan Hall, Palasyo ng Malakanyang, araw ng Martes, sinabi ng Pangulo na bagama’t mayroong mga pinaplano na dapat na mga ruta kung saan ilalabas ang mga Filipino o mga foreign – overseas workers, ang mga mga rutang ito ay isinara na dahil noong una ay hindi naman binobomba ang mga ito subalit ngayon ay kasama na sa binobomba.
“So, as of early this morning, sampu ang gustong magpa-repatriate from Iran. Ang pinakamarami from Israel – 297, 22 from Jordan, 231 from Bahrain, 586 from Dubai, 270 from Abu Dhabi. Altogether that’s 1,416 Filipino nationals who would like – who have requested repatriation,” ani Pangulong Marcos.
Bukod dito, wala aniyang lumilipad na eroplano dahil ang mga airport ay tinatamaan na.
“We have heard reports of attacks on different airports around the region, generally by – this is by Iran. ‘Yung mga tumulong sa Amerika at ‘yung mga tumulong – ‘yung mga bansa na tumulong sa Amerika ay inaatake ngayon ng Iran as retaliatory strikes,”a nito sabay sabing “Kaya’t very fluid ang situation. Ang assessment namin is delikado siguro magpalipad. Kahit na kaya nating kumuha ng eroplano at ipasok, wala tayong magagawa dahil number one, the airports are closed. They are all no-fly zones. This is a combat area.”
Kaya aniya, hindi muna gagawin ng gobyerno ang pagpapalipad.
Kung ‘by land’ naman aniya, sinabi ng Pangulo na delikado rin ito lalo na kung kung magkaroon ng friendly fire incident.
“Alam niyo pagka may putukan, it is an active combat zone, ‘pag nakakita ka ng maraming sasakyan, eh baka bombahin ‘yun because they will misidentify it as some – a hostile movement. So, that is also dangerous. Although that will be the best option that we will have in the immediate future dahil nga kinakatakutan pa natin ‘yung pagpalipad,” ang sinabi ng Pangulo.
Kaya aniya ang payo niya sa mga Filipinong nasa apekatdong lugar ay maghanap ng safe place at doon muna aniya manatili.
“You stay in a safe place and stay indoors and stay away from areas of danger,” ang pahayag ng Pangulo.
May plano rin aniya na maglagay ng quick response team sa mga crossing area, “Pero kagaya ng nasabi ko, ‘yung mga crossing area, kung maalala ninyo halimbawa sa – remember when the Hamas attack was done in Gaza, dinaan natin sila sa Rafah crossing, nagpunta sila sa Egypt. Eh ngayon, ang karamihan ng mga Pilipino in Israel are in Tel Aviv. Malayo na ‘yun sa Rafah crossing so we have to find other ways.”
Samantala, para sa Pangulo, ang pinaka-dangerous na lugar para sa mga Filipino ay ang Israel dahil tuloy-tuloy aniya ang pag-atake sa Israel.
“But the situation in Israel dahil sanay sila sa giyera, marami silang mga bomb shelter na puwedeng pagtaguan. At ‘yun ang naging advice namin sa ating mga kababayan, doon muna kayo. Para maging mas maginhawa para sa kanila, kumuha tayo ng – nakipag-areglo – nakipag-usap tayo sa mga iba’t ibang hotel na malapit doon sa bomb shelter na doon sila muna. Doon sila muna pumunta, doon sila muna. At pagka may air raid alarm, eh ‘di tumakbo muna sila sa bomb shelter. And that is the advice we have given to our nationals in Israel and also our nationals everywhere else na if you are in a safe place, kung malayo naman kayo, just stay put and be safe. And we will slowly try to find ways for those who want to be repatriated, we will find ways to get you out safely,” ang litaniya ng Pangulo.
“And that is the key thing here. Ang pinakauna nating tinitingnan ay dapat ligtas sila, hindi sila magka-problema. Hindi sila ma-attack dahil sa misidentification, dahil nga ay tuloy-tuloy ang pag-bomba, missile attacks, drone attacks. We already have seen friendly fire incidents in the past day.

So, kailangan natin bantayan ‘yun. So, right now, safety first for our people. And they are in constant contact with our embassy staff both – and the families of those who are working and living in the Gulf countries, mayroon silang hotline with the Department of Migrant Workers and also with the DFA para maitanong naman nila kung anong kalagayan ng kanilang mga kamag-anak,” ang pahayag pa rin ng Pangulo.
( DARIS JOSE)

IDINEKLARA ng House Committee on Justice ang natitirang dalawang impeachment complaints laban kay Vice President Sara Duterte na sufficient in form, na siyang daan upang talakayin at pagbotohan naman ngayong Martes ang isyu ng sufficiency in substannce.

Sa magkahiwalay na mosyon na walang humadlang, nagdesisyon ang komite na ang mga reklamo na inihain nina Father Jose Saballa at abogadong si Nathaniel Cabrera ay nakasunod sa formal requirements sa ilalim ng House rules.

“The Chair declares the third impeachment complaint, that is Father Saballa et al. impeachment complaint, sufficient in form. So ruled,” pahayag ni committee chair Batangas Rep. Gerville “Jinky Bitrics” Luistro matapos ang mosyon ni vice chair San Juan City Rep. Ysabel Maria Zamora ng walang objection.

Ang Saballa complaint ay inendorso ni ML Party-list Rep. Leila De Lima.

Matapos nito, inaprubahan din ng komite ang ika-apat na reklamo na inindorso nina Deputy Speaker Francisco Paolo Ortega V at Manila Rep. Bienvenido “Benny” Abante Jr.

“The Chair declares the fourth impeachment complaint, that is Cabrera impeachment complaint, sufficient in form. So ruled,” pahayag ni Luistro matapos ang motion ni GP Party-list Rep. Padiernos na sinegundahan at walang humadlang.

Didinggin naman sa susunod na pagdinig ang dalawang reklamo para idetermina ang sufficiency in substance nito kung saan susuriin ng panel kung totoo ang mga alegasyon, sa ilalim ng Constitution.

Una nito, isinantabi ng komite ang unang impeachment complaint laban kay Bise Presidente Sara Duterte.

Sa botong 22 pabor, 10 hindi at 0 abstention, isinantabi ng komite ang first impeachment complaint na inihain laban kay VP Sara Duterte dahil sa paglabag sa one-year bar rule.

Ang unang complaint ay inendorso ng mga mambabatas ng Makabayan bloc.

Inakusahan dito ang VP ng betrayal of public trust, culpable violation of the Constitution, at iba pa dahil sa umano’y maling paggamit ng P612.5 million na confidential fund.

“By setting [it] aside, it means it will be no longer be included in the proceedings of this committee,” pahayag ni Luistro.

Nangangahulugan na tanging dalawang impeachment complaints laban sa VP ang naiwan matapos na iatras ang ikawalang complaint ng Tindig Pilipinas upang suportahan ang ikatlong reklamo na may kaparehong alegasyon.

Ang unang impeachment complaint ay inihain ni dating ACT Teachers party-list Rep. France Castro, at iba pa noong February 2.
(Vina de Guzman)

TULOY pa rin ang naka-iskedyul na working visit ni Pangulong Ferdinand Marcos Jr. sa New York, USA mula March 8-11 upang dumalo sa mga high-level meeting ng United Nations.
Ito’y sa gitna ng nagpapatuloy na gulo sa Gitnang Silangan.
“Sa ngayon, wala pa pong pagbabago sa schedule,” ayon kay Presidential Communications Office (PCO) Undersecretary at Palace Press Officer Claire Castro sa press briefing sa Malakanyang.
Sa kabilang dako, kabilang sa magiging agenda ng Pangulo sa working visit nito sa New York, USA ay ang pagdalo sa opening ng 70th session ng Commission on the Status of Women, na tumatalakay sa mga isyu ng gender equality at women empowerment.
Matatandaang, taong 2024 nang muling nahalal ang Pilipinas bilang myembro ng Commission on the Status of Women para sa taong 2025 hanggang 2029, matapos ang naging pamumuno ng bansa sa ika-68 session nito.
Magbibigay din ng talumpati ang Presidente sa isang special session ng UN General Assembly bilang bahagi ng aktibong pakikilahok ng Pilipinas.
Makikipagpulong din ang Pangulo sa ilang opisyal ng United Nations. (DARIS JOSE)

NAGSAGAWA ng masusing talakayan sina Mayor John Rey Tiangco, kasama ang mga estudyante at kawani ng Navotas Polytechnic College hinggil sa pagpapasigla ng antas ng edukasyon at kabuuang kalagayan ng naturang pamantasan.

Ani Tiangco, nais nilang magsagawa ng mga programang tutugon sa mga hamong kinakaharap ng mga mag-aaral ng NPC sampu ng buong komunidad nito katulad ng pagpapatuloy ng libreng edukasyon at iba pang pangangailangan.

Tinitiyak din nya na buo ang suporta ng lokal na pamahalaan kaakibat ng layunin na iangat ang pamantayan ng edukasyon sa siyudad dahil ito ang magiging gabay ng mga kabataan sa magandang kinabukasan. (Richard Mesa)