ISANG ocular inspection ang isinagawa ng Metropalitan Manila Development Authority (MMDA) sa Quirino Grandstand sa Maynila, ilang araw bago ang pagdiriwang ng Pista ng Jesus Nazareno sa Enero 9.
Pinangunahan ito ni MMDA General Manager Nicolas Torre III kung saan isasagawa ang Pahalik sa Poong Nazareno, vigil, Misa Mayor, at iba pang aktibidad kaugnay ng pista.
Isa sa tutugunan o pagtutuunan ng MMDA ang pagsasaayos ng pila ng mga deboto, paglalagay ng mga bakod o fence, medical tents, at iba pang paghahanda upang matiyak ang kaligtasan ng mga deboto at lahat ng lalahok sa mga aktibidad.
Sinabi ni Torre na handa na ang MMDA para sa pista ngunit posible pa umanong magkaroon ng ilang pagbabago matapos ang isasagawang final walk-through kasama ang iba’t ibang ahensya ng pamahalaan at mga Volunteers.
(Gene Adsuara)

SUSPENDIDO ang klase sa lahat ng antas ng pribado at pampublikong paaralan, pati na ang trabaho sa Lokal na Pamahalaan ng Maynila sa Biyernes, Enero 9, sa araw ng pagdiriwang ng kapistahan ng Mahal na Poong Itim na Nazareno.

Sa nilagdaang Executive Order No. 1 Series of 2026 ni Mayor Isko Moreno Domagoso, iniutos ang suspensiyon ng klase at trabaho sa lokal na pamahalaan upang matiyak ang kaligtasan, kaayusan, at taimtim na pagdiriwang ng kapistahan, at malayang makalahok ang mga deboto sa taunang Traslacion na dinarayo ng milyon manlalakbay na may banal na layunin taon-taon sa kapitolyo ng bansa.
Ipinauubaya naman ng alkalde sa mga pribadong kompanya sa Maynila at maging sa pambansang pamahalaan, kung sususpendihin din ang kanilang trabaho.

Naglabas din ng Executive Order No. 2 Series of 2026 ang alkalde na nagpapataw ng liquor ban sa Enero 9 sa loob ng 500 metrong radius sa paligid ng Quiapo Church at maging sa ruta ng Traslacion.
Sa ilalim naman ng inilabas ding Executive Order No. 3, Series of 2026 ng alkalde, kanyang idineklara ang total ban sa paggawa, distribusyon, at paggamit ng anumang uri ng paputok at pyrotechnics mula Enero 8 hanggang 9 sa buong lungsod upang maiwasan ang pinsala sa buhay, sunog, at iba pang panganib sa gagawing prusisyon ng Itim na Nazareno.
Inatasan din ni Mayor Isko Moreno ang Manila Police District (MPD) at iba pang tagapagpatupad ng batas na mahigpit na ipatupad ang tatlong kautusan na kanyang nilagdaan sa buong panahon ng selebrasyon.
(Gene Adsuara)

WALANG epekto sa ekonomiya ng bansa ang nagpapatuloy na tensyon sa pagitan ng Estados Unidos at Venezuela.
“With respect to the impact of Venezuela there is hardly nothing,” ayon kay Department of Economy, Planning, and Development (DepDev) Secretary Arsenio Balisacan sa press briefing sa Malakanyang.
“I don’t think there’s going to be a perceptive effect on us…As it is, our links —directly and indirectly— to Venezuela’s economy is strong,” aniya pa rin.
Ang Pilipinas, sa pamamagitan ng Department of Foreign Affairs, nagpahayag ng pag-aalaala sa tumitinding hidwaan sa pagitan ng Estados Unidos at Venezuela, nanawagan sa dalawang bansa na igalang ang international law at ibalik ang kapayapaan at kaayusan.
Sa ulat, inanunsyo ni US President Donald Trump na iti-take over ng Estados Unidos ang Venezuela matapos ang matagumpay na operasyon militar sa Caracas.
Ayon sa kanya, pansamantalang pamamahalaan ng U.S. ang bansa hanggang sa maitatag ang ligtas na transisyon tungo sa bagong gobyerno.
Inaresto ng mga puwersang Amerikano si Venezuelan President Nicolás Maduro at ang kanyang asawa na si Cilia Flores.
Dinala sila sa Estados Unidos upang harapin ang mga kasong narco-terrorism at drug trafficking.
Nanatiling ipinatutupad ang embargo sa langis ng Venezuela habang nakaposisyon ang mga pwersang pandagat ng U.S. sa rehiyon.
Binalaan ni Trump ang iba pang opisyal ng Venezuela na maaari silang masapitan ng kaparehong kapalaran kung patuloy silang magiging mapang-abuso.
Plano ng U.S. na isali ang mga kompanyang Amerikano sa muling pagpapatayo ng industriya ng langis ng Venezuela.
Itinuturing ng pamahalaang Amerikano na tagumpay ang operasyon at simula ng pagbabalik ng sigla sa ekonomiya ng bansa.
( Daris Jose)

“HINDI tayo papayag na mapunta sa kurakot ang salaping pinaghirapan ng bawat Pilipino.”
Ito ang inihayag ni Pangulong President Ferdinand R. Marcos Jr., araw ng Lunes, bilang pangako na titiyakin niya na ang bawat piso ng P6.793-trillion 2026 national budget ay gagastahin sa paraan na direktang mapakikinabangan ng mga mamamayang Filipino.
Sa naging talumpati ng Pangulo sa isinagawang pagpirma sa General Appropriations Act (GAA) for the Fiscal Year 2026, sinabi ng Chief Executive na ang bawat programa o proyekto ay isasailalim sa masusing pagsusuri para igarantiya ang tunay na resulta para sa mga filipino partikular na sa itinuturing na ‘most vulnerable sectors.’
“Sa National Budget ng 2026, malinaw ang direksyon ng inyong pamahalaan: magiging mas masinop, mas maingat, at mas responsable kami sa paggastos ng pondo ng bayan,” ang sinabi ni Pangulong Marcos.
“Ang bawat programa at proyekto ay dadaan sa masusing pagsusuri upang masiguro na ito ay may malinaw na benepisyo sa mamamayan—lalo na sa sektor na higit na nangangailangan,” dagdag na wika nito.
Nauna rito, nilagdaan ng Pangulo ang P6.793 trillion 2026 national budget, naglalayong panatilihin ang progreso ng bansa sa aspeto ng ‘education reform, health protection, food security, social security, at job creation.’
Siniguro rin ng Pangulo na paiigtingin ng kanyang administrasyon ang pagsisikap na paghusayin ang sistema sa gobyerno, palakasin ang pananagutan at labanan ang korapsyon.
Hinikayat naman ng Pangulo ang publiko na aktibong makilahok sa nasabing layunin.
“Ang pagbabantay, ang pagtatanong, ang pag-uulat, at ang pakikilahok ay mahalagang bahagi ng isang gumaganang demokrasya. Kasama ninyo kami sa layuning tiyakin na ang budget ng bayan ay para sa bayan,” ayon kay Pangulong Marcos. (Daris Jose)

NASAMSAM sa isang bagong identified drug pusher ang halos P.3 milyong halaga ng shabu nang maaresto ng pulisya sa ikinasang buy bust operation sa Valenzuela City, Linggo ng madaling araw.
Kinilala ni Valenzuela Police Chief P/Col. Joseph Talento ang suspek na si alyas “Don Don”, 50, ng Brgy., 162, Sta Quiteria, Caloocan City.
Sa kanyang ulat kay Northern Police District (NPD) District Director P/BGen. Christopher Dela Cruz, sinabi ni Col. Talento dakong alas-3:40 ng madaling araw nang maaresto ang suspek ng mga operatiba ng Station Drug Enforcement Unit (SDEU) sa pangunguna ni P/Lt. Sherwin Dascil sa A. Bernardino St., Brgy. Ugong.
Ayon kay Lt. Dascil, unang nakatanggap sila ng impormasyon hinggil sa umano’y illegal drug activities ni ‘Don Don’ na dumadayo pa umano sa Valenzuela para magbenta ng droga kaya ikinasa nila ang buy bust operation sa koordinasyon sa PDEA.
Isa sa kanyang mga tauhan na nagpanggap na buyer ang nagawang makipagtransaksyon sa suspek at nang tanggapin nito ang marked money mula sa pulis kapalit ng isang plastic sachet ng shabu ay agad siyang dinamba ng mga tauhan ni Lt. Dascil.
Nakumpiska sa suspek ang humigi’t kumulang 43 grams ng hinihinalang shabu na may standard drug price na P292,400.00, buy bust money na isang tunay na P500 bill at pitong P1,000 boodle money, P150 cash at ang gamit nitong motosiklo.
Ani SDEU investigator PMSg Ana Liza Antonio, mahaharap ang suspek sa kasong paglabag sa Sections 5 at 11 ng R.A 9165 o ang Comprehensive Dangerous Drug Act of 2002. (Richard Mesa)